Propuesta ortografica de l'Academia de l'Aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A Propuesta Ortografica de l'Academia de l'Aragonés ye un conchunto de convencions graficas pa l'aragonés y as suyas variedaz, publicau en 2010 . por o Estudio de Filolochía Aragonesa, naixiu en chulio de 2006 como autoridat lingüistica como resultau d'o II Congreso de l'Aragonés, baixo a denominación de Academia de l'Aragonés.

Proceso de propuesta de reforma grafica

A manca de cheneralización d'as Normas graficas de l'aragonés (1987), a suya contestación por a SLA y os retrasos d'a Lei de Luengas provocó que asociacions como l'Asociación Cultural Nogará-Religada, o Consello d'a Fabla Aragonesa y o Ligallo de Fablans de l'Aragonés, que feban servir as normas graficas d'o I Congreso de l'Aragonés encetasen en 2005 un proceso clamau Chuntos por l'Aragonés, chunto a o Instituto d'Estudios Altoaragoneses, asociacions como o Rolde O Caixico de Samianigo, o Rolde de Estudios Aragoneses, Espelungué, Calibo, Fendo Traña (Sobrarbe), Purnas (Somontano), CREABA, Asociación A Gorgocha (Ansó), Colla Unibersitaria por l'Aragonés, Parola y ESTRELA, y particulars como José Lera, Roberto Serrano, Manuel Castán u Juan José Guillén Calvo.

L'obchectivo d'iste proceso yera de reivindicar a unidat d'a luenga y complegar voluntaz ta celebrar un II Congreso de l'Aragonés que creyase una autoridat lingüistica ta l'aragonés. Dito II Congreso se celebró en chulio de 2006 y, a resultas, se creyó l'asociación Estudio de Filología Aragonesa con a denominación Academia de l'Aragonés. Ista asociación, formada por personas con sensibilidaz diferents respective a la normativización d'a luenga, recibió o refirme de numerosas institucions y prencipió a "treballar en as ferramientas teoricas que permitisen [...] endrezar tota la fayena de codificación y normativización" d'una variedat estándard d'aragonés.

En febrero de 2010, publicó los suyos primers resultaus, a Propuesta Ortografica Provisional de l'Academia de l'Aragonés, que pasó ta un proceso d'estudio d'as esmiendas feitas por a comunidat. En octubre de 2010, publicó a Propuesta ortografica de l'Academia de l'Aragonés.

Prencipios y criterios de codificación

Ta os problemas de codificación y normativización, se proposan cinco prencipios (avaluables) que cumplirán as propuestas graficas:

1. Historicidat: Existents en la luenga.
2. Diasistematicidat: Favorexerán a unidat d'a luenga.
3. Identidat: Refirmarán a identidat d'a luenga arredol d'elementos en os cuals toz os fablants se i veigan representaus y que dixarán clara l'autonomía de l'aragonés cara ta las luengas proximas.
4. Coherencia paradigmatica: Presentarán a mayor regularidat posible, compatible con a realidat d'a luenga.
5. Funcionalidat: Se parará cuenta de l'acceptabilidat, compatibilidat dichital, facilidat d'aprendizache, adaptabilidat t'as funcions d'o lenguache y t'os lenguaches d'especialidat, facilidat d'integración de neolochismos, integración en ambients multilingües...

A Propuesta se guida tamién por o criterio etimolochico ta proposar solucions: aplicau a cultismos, as solucions mas etimolochicas se consideran mas funcionals (como a distinción etimolochica de v y b). Pero en bel caso descartan un tractamiento mas etimolochico en favor d'a funcionalidat (como l'uso cheneral d'o digrafo ch ta ch, j, g(+e), g(+i)).

Atros aspectos reflectan a busca d'a coherencia paradigmatica y a diasistematicidat (como a grafía 'tz' ta plurals y formas verbals pronunciadas /θ/ en aragonés cheneral, pero /ts/ en benasqués).

Representación d'os fonemas vocalicos

letra	fonema	son	eixemplos	transdialectal	excepción
a	/a/		envasador, laganya	en variedaz de benasqués, representa /e/ en as rematanzas de plural femenino: badinas, /badínes/; y de segunda persona de singular: trobabas, /tɾobábes/, etc.
e	/e/		tieda, ampre, escalfar, café, mercé, vustés
i	/i/	[i]	fin, sinyal; i (=bi)
i	/i/	[j]	tieda, rei, guaire		conchunción y, /i/
o	/o/	en benasqués:[o]~[ɔ]	torroco
u	/u/	[u]	ubrir, ungla
u	/u/	[w]	fuella

Amás, la u forma parte d'os digrafos gu (/g/) y qu (/k/) debant de e, i.

Representación d'os fonemas consonanticos

letra u grafema	fonema	emplego	eixemplos	transdialectal	excepción
b	/b/	en palabras con fonema /b/ no provenient de u, v, w, f, en o etimo, u d'etimo no conoixiu	beber, hibierno, cabeza, craba; biolochía, biblia; albarda, boxeo, briquet, club; bardo, buco, Ixabierre; chubo, brendar	bu debant de a, e, i, o representa [bw]~[gw] en palabras con b etimolochica: buen, [bwen]~[gwen], buenya, buega, buei, buai [gwaj]
c	/k/	nunca debant de e, i	capuzar, cuenta, cuallar, cuesta, chemeco, actor, chemec, porc; clau, crapacín	se mantiene como final, mesmo si dialectalment no se pronuncia: cloc, /klo/~/klok/; tampoc, /tanpó/~/tanpók/; poc
c	/θ/	debant de e, i	cecina, esbance, cillo	en benasqués, se realiza como /s/
ch	/tʃ/		adchectivo, achuntar, chent, cheografía, reloch	representa realizacions con /ʃ/ cuan son discordants con os usos chenerals y etimolochicos: chabalín, /tʃabalín/~/ʃabalín/; dicherir, /ditʃeɾíɾ/~/diʃeɾíɾ/...
d	/d/		dient, adchectivo, desfer, almendrera	en as variedaz ribagorzanas, os cherundios rematan en -nd, mesmo si no se pronuncia la d: fend, /fen/, puyand, ind; tamién en as formas charrin-charrand, coixin-coixand...; en posición final, -d representa /d/~/ɾ/ en sud y derivaus como sudeste: /sudéste/~/suréste/
f	/f/		alfalz, floixar, buf, trunfera; filosofía, farmacia, anfiteatro	dialectalment, representa tamién realizacions con /θ/: fiemo, [θjémo]~[fjémo]; Felipe, /θelípe/~/felípe/
g	/g/	no debant de e, i	chugar, gorga; anglucioso, gnostico, grau
gu	/g/	debant de e, i	borguil, figuera		s'escribe ua, hua, si no tiene g- etimolochica: uambra, [gwámbɾa]~[wámbɾa]
gü	/gu/	debant de e, i	agüerro, lingüistica		s'escribe ue, ui, hue, hui, si no tiene g- etimolochica: huerto, [gwéɾto]~[wéɾto]; uello, [gwéʎo]~[wéʎo]; huembrera, deshuembrar, desuesar, Uesca, uescano, deciueito
h	/∅/	en palabras con h etimolochica; en intercheccions monosilabicas	haber, hereu, hibierno, hixopo, huerto, hiena, adherir, ahier, anhelo, bohemio, exhumar, menhir, deshonra, filharmonía; hepatico, hieroglifico, harpa; hamaca, hindú, Helena, Henrique; ah!, oh!		Espanya, Occitania, y derivaus; bels adverbios y substantivos derivaus d'o latín hora: norabuena, agora, ara, aora, allora, alora
h	/x/	expresions y intercheccions con fonema /x/; voces castellanizadas; en extrancherismos y voces con influencia forana; en voces dialectals u vulgars castellanas	ha ha!, he he!, hibo!, holio!; hopar; haima, haixís; huerga, holgorio, huerza, halar, hoder
ix	/ʃ/	dezaga de a, e, o, u	baixar, bruixa, caixa, peix	representa tamién realizacions [jʃ], /tʃ/, /s/...: deixar, [dejʃá(r)]; buixo, [bújʃo]~[bútʃo]~[bújʃjo]~[búsjo]	guix, /giʃ/; guixa, /gíʃa/; guixón, /giʃón/; guixeta, /giʃéta/...; Exeya, /eʃéʝa/
j	/tʃ/	en extrancherismos, terminos cientificos y toponimos u antroponimos, y derivaus	banjo, judo, Jersey
j	/x/	en antroponimos foranos u exotoponimos	Jaén, jabugo
k	/k/	en palabras foranas con k etimolochica	karate, kenyata, rock, kilometro, kafkiano, Tokio
l	/l/		alredol, dolent, clau, floixo, plorar, luna	representa tamién /ɾ/ en os articlos: lo, /ɾo/~/lo/; la, /ɾa/~/la/; los, /ɾos/~/los/; las, /ɾas/~/las/; la l cheminata d'o belsetán se representa con un puntet volato: bel·la, payel·la; en aragonés ribagorzano, se consella l como representación de /ʎ/ en posición inicial, final, intervocalica, en os grupos consonanticos bl, cl, fl, pl, gl, y dezaga de r, cuan ye palatalización de l'aragonés común /l/: luna, /ʎúna/; bal, /baʎ/; flama, /fʎáma/; clucar, /kʎukáɾ/; replega, /repʎéga/; lulo, /ʎúʎo/; parlar, /paɾʎáɾ/; cacinglo
ll	/ʎ/		lloza, cullir	pronombre tonico ell, /el/~/eʎ/, y plural; determinants bell, /bel/~/beʎ/, aquell, /akél/~/akéʎ/, y plurals
m	/m/		malmeter, chema; Betlem, Cherusalem	en variedaz orientals, s'emplega como rematanza d'a primer persona de plural en formas acutas: fem (=femos), trobarem (=trobaremos)	(?) no s'explicita si ye muta en helenismos, a principio de palabra, debant de n: mnemotecnia
n	/n/		cambión, onso, novalla; anvista; os hunnos; capanna, lanna; anfora, anfiteatro	en variedaz orientals, s'emplega como rematanza d'a primer persona de plural en formas planas: feban (=fébanos), yeran (=yéranos)	en interior de palabra, debant de b, p, s'escribe m: embolicar, emplir... (pero se mantiene perén -n en compuestos: bienplegau, bienpensant...); se mantiene perén -m en circum-: circumvalación, circumscripto...; se mantiene m debant de v si ye etimolochica: triumvirato, tramvía; os prefixos in-, con-, se converten en im-, com-, debant de m-: immigrant, immóbil, commemorar, commutar
ny	/ɲ/		anyo, banyar, calcanyo, nyudo; estany		no forma digrafo en palabras compuestas como desenyermar, /desenʝeɾmáɾ/
p	/p/		peito, apto, Ip		(?) no s'explicita si ye muta en os grupos inicials d'orichen griego ps, pn, pt: psicosi, pneumatico, Ptolomeu...
qu	/k/	debant de e, i	baruquero, nevusquiar
qu	/ku/	debant de a, o, con qu etimolochica	qualcún, quad, loquaz, ubiquo
qü	/ku/	debant de e, i con qu etimolochica	aqüicultura, enqüesta, cinqüenta		no se pinta dieresi en latinismos estrictos: quid, quidam
r	/ɾ/	entre vocals; en final de silaba y cuan forma silaba con a consonant precedent	agora; perda; bruixa, crosta, drullón, fraixino, grillar, ampre, quatrón, Alquezra	se mantiene la r d'os plurals en -er, -ero, mesmo si no se pronuncia: corders, /koɾdés/, primers, /pɾimés/; dialectalment, se mantiene la -r final, mesmo si no se pronuncia: muller (/muʎé/), millor (/miʎó/), tornar (/toɾná/), fer (/fé/); se mantiene la -r final d'os infinitivos con encliticos, mesmo si no se pronuncia: fer-lo (/félo/), ir-se-ne (/ísene/); se consella mantener la r en pronuncias coloquials: encara (/enká/), sisquiera ([siskjá]), quiero ([kjo]), quiera ([kja]), mira ([mja]); dialectalment, r inicial representa /ɾ/ en os articlos: ro, /ɾo/; ra, /ɾa/; ros, /ɾos/; ras, /ɾas/ (pero se consella l inicial: lo, la, los, las)
rr	/r/	entre vocals	arrocegar, hemorrachia; pitarroi, bancarrota		en inicial de palabra y dezaga de n, l, s, s'escribe una sola r ta representar o fonema vibrant multiple /r/: ringlera; enruena, alredor, esradigar, Israel
s	/s/		sobo, sostras, aconsellar, escolastica, espacio, estatico, desestabilizar, desespesar; prescolar, instabilidat, inscrutable
sc	/esθ/	inicial de palabra, debant de e-, i-, en cultismos y extrancherismos, seguntes a etimolochía	scita, scena, sceptico, scindir, scipionista, sciurido, y familias lexicas		sc- se pronuncia /θ/ en: sciencia, sciatico, scirro, scirrosi, scisma, y familias lexicas
t	/t/	en palabras con sufixos masculins -et, -ot, -ut; en palabras derivatas d'o latín -ate(m), -ete(m), -ote(m), -ute(m), -udo; en formas que fan plural en -tz, /θ/~/ts/; en rematanzas -nt, -st, -rt, etimolochicas, mesmo si no se pronuncia [t]; formas sincopadas de palabras en -to; adverbios en -ment	acotolar, trobato, alazet, pocot, azut, puput, amistat, virtut; piet, nueit, nit, abet, pixot; puent; fuents, [fwens]; dolent, huest, cort, part; sant, cient, tant, muit, molt, feit; malament, evidentment; hábitats, pívots	tiene, como rematanza, realizacions en /t/, /ɾ/, /d/, /∅/: mocet, /moθét/, /moθéɾ/, /moθéd/, /moθé/; dialectalment, a terminación -t como morfema de segunda persona de plural d'imperativo, que puede realizar-se [t]~[ɾ]~[∅]: puyat-os-ne, fet, venit	en o prefixo post, no se pronuncia la t debant de consonant: postnatal, /posnatál/; sin t etimolochica por no tener tradición grafica: pon, sobén
tz	/θ/	como rematanza: morfema de 2ª persona de plural; plural de buena cosa de palabras rematadas en vocal tonica seguida de -t; plural de palabras (arcaísmos u dialectalismos) rematadas en vocal tonica seguida de -rt	podetz, íbatz, cantásetz, puyetz, vetz; chiquetz, abetz, litz, almutz, amistatz, pobrotz, toz, virtutz; chaletz, briquetz, carnetz; corz, partz, hibertz, confortz, chizartz	dialectalment, representa tamién /ts/~/ds/~/ɾs/~/s/: chiquetz, /tʃikéθ/~/tʃikéts/~/tʃikéds/~/tʃikéɾs/~/tʃikés/; verdatz, /beɾdáθ/~/beɾdáts/~/beɾdás/	(?) se pronuncia /θ/ en interior de palabra: doce, trece, sece, y derivaus: docena, setzén...; puetz ('puedes'), [pwets]~[pweθ]~[pwes]; en benasqués, os plurals d'os participios y bellos adchectivos y substantivos se fan en -ts (correspondient a -tos): forats, querits, trobats, perdets, vestits; en extrancherismos no adaptaus, se forma lo plural con -s: bits, chats, tests; (?) se pronuncia /s/ en: nueiz, [nwejs]; leiz, [lejs]
v	/b/	en voces con u, v, f, etimolochica; en ampres con v; en ampres con w etimolochica ya asolaus en a luenga	veyer, proveito, vinclo, Pavlo, avrispa, voda; vagón, vals, visir, esparvero	vu representa [bw]~[gw] en palabras con v etimolochica en os grupos vua, vue, vui: vuestro, [bwéstɾo]~[gwéstɾo], vuelta, vueitre, vuitrino	con b en ampres si creban a coherencia paradigmatica: arribista (fr. arriviste); gu, gü representa [bw]~[gw] si no bi ha tradición grafica con v en os grupos gua, güe, güi: güelo, güembre, guambre, fagüenyo, y familias lexicas
x	/ʃ/	dezaga de i; en posición inicial	pixar, mixino, estixeras; xada, xordiga, xamplar	representa realizacions con /tʃ/ cuan son discordants con os usos chenerals y etimolochicos: xordica, /tʃoɾdíka/~/ʃoɾdíka/; buixo, /bútʃo/~/búʃo/...
x	/ks/	en cultismos y voces internacionals	sexo, saxofón, taxi, axial
y	/ʝ/		yera, royo, yodo; yermo	representada con i en o pronombre adverbial ie: meter-ie, /metéʝe/	cuan /ʝe/ derive de he-, hie-, s'escribirá hie-: hierba, enhierbar-se, hieratico, hieroglifico
z	/θ/	en qualsiquier posición no seguida de e, i	azulenco, barza, panizo; Alquezra; alfalz	en benasqués, se realiza como /s/	debant de e,i etimolochica, u por tradición historica u de regularidat internacional: azembla, azeotropo, zebra, zelo, alazet, almazén , azuzena, zebra, azepina, benzén, bronze, eczema, zelo, zefiro, zero, zeta, zeugma, aguazil, almuezín, azimo, azina, benzina, aiazina, zigoto, enzima, topazio, trapezio, zigoma, zigoto, zinc, zingaro, zirconio, zizanya...

A menos que lo requiera bel tecnicismo, se consella simplificar siempre, en helenismos y latinismos, os grupos de consonants cheminatas: ll, ss, pp, tt, cc (debant de a, o, u), bb, dd, ff, gg. Tamién en os compuestos: transiberiano, postraumatico...

Una mesma letra puede tener diferents realizacions seguntes l'orichen en ampres crudos y en derivaus de nombres d'atras fablas, adaptaus u no pas: chovinismo [tʃovinísmo] (d'o francés chauvinisme, [ʃovi'nism]); Wamba, Witiza, Wahid; Newton, newtoniano, wagneriano; clown, kiwi, whisky, wolframio; HItler, hitleriano; rugby, Los Angeles [losantʃéles], Algete [alxéte], Jordi, Barça; joule, junior, judo, jockey; Jaén, jabugo; byte; boulevard; zoom, ohm, ad hominem; alzheimer; huelga, hicienda; holding, hockey, hitleriano...

Guions

S'escriben con guion:

1. Locucions lexicalizadas: fito-fito, china-chana, a-saber-lo, punto-y-coma.
2. Cherundios imperfectivos: charrín-charrand, coixín-coixand.
3. Reiteración: camín-camín, bueno-bueno.
4. Formas verbals (infinitivos, cherundios, imperativos, y atros tiempos verbals en textos antigos) con pronombres y adverbios atonos encliticos: fer-lo, charrand-ne, ves-ie, traye-les-ne, fendo-lo; fizo-le, estaban-se.
5. Nombres propios compuestos por aposición: Francho-Chabier.
6. Ta reflectar a pronuncia popular an s'elida de: pa forro-bota ('pa forro de bota'), arco-Sant Chuan ('arco de Sant Chuan').
7. Ta fer deseparacions en palabras compuestas en palabras no asoladas en la luenga: un concurso-oposición, l'antigo navarro-aragonés, conseqüencias politico-militars.
8. Ta trestallar una palabra a la fin d'una linia, cal fer-lo por silabas: ad-/chec-/ti-/vo. Pero no puede dixar-se sola una vocal a prencipio ni a la fin de linia: aguai-/tar. Se podrán separar as palabras con prefixos tamién seguntes a composición: de-/san-/sar; u: des-/an-/sar.
9. Como enlaz entre dos palabras: o concello de Tella-Sin.
10. Ta sinyalar a posición relatva de silabas, lexemas, morfemas... dentro d'a palabra. Primer parte: inter-, sobre- ..., con guion dezaga. Parte intermeya: -electric-, entre guions. Parte zaguera: -iello, -ismo..., con guion debant.

Apostrofacions

L'apostrofo (') sinyala la elisión, cheneralment d'una vocal, cuan se produce en a oralidat de traza sistematica. Ye perén opcional y se prioriza l'apostrofación entre l'articlo y a palabra que le siga, antis que l'apostrofación d'a preposición con l'articlo: de l'hibierno, ta l'aire, a l'augua...

forma plena	forma apostrofada (respectivament)	emplego	eixemplos	excepción
lo, el (determinants)	l'	debant de vocal; no se consella a forma apostrofada debant de silaba atona es-, hes-, ni de s- liquida	l'onso, l'esmo, l'arcón, l'helio; l'ibert, l'hotel; o esquiruelo, lo escopolón, o scientifico, el scisma	no s'apostrofa debant de diftongo ue-, ua-, ui-, hue-, hua-, hie-, hia-, hio-: el uello, lo huembro, lo hierbero
el (determinant)	'l	debant de son consonantico u semiconsonantico; puede fer-se a contracción con as preposicions a, ta, enta, pa; no se consella a forma apostrofada con as preposicions por, per, en	a'l, ta'l, enta'l, pa'l; por el ~ po'l; per el ~ pe'l; n'el ~ en el
els, es (determinants)	'ls, 's	puede fer-se a contracción con as preposicions a, ta, enta, pa; no se consella a forma apostrofada con as preposicions por, per, en	a'ls, a's; ta'ls, ta's; enta'ls, enta's; pa'ls, pa's; por els ~ po'ls; por es ~ po's; per els ~ pe'ls; per es ~ pe's; n'els ~ en els; n'es ~ n'es
la (determinant)	l'	solament debant de a-, ha-	l'agulla, l'alba, l'habilidat
de	d'	debant de vocal u h muda; pero no se consella a forma apostrofada debant de s- liquida	d'o, d'a, d'hibierno; de sciencia	no s'apostrofa debant de diftongo ue-, ua-, ui-, hue-, hua-, hie-, hia-, hio-: de Uesca, de huembro, de hierba
de	'i	introduce complemento nominal d'unatro nombre en textos dialectals	pa forro'i bota, en a vida'i Dios
ta, enta, en	t', ent', n'	puede fer-se a contracción con os determinants o, os, a, as; pero no se consella fer-la con en	t'o, t'os, t'a, t'as; ent'o, ent'os, ent'a, ent'as; n'o ~ en o; n'a ~ en a; n'os ~ en os; n'as ~ en as
me, te, se	m', t', s'	debant de verbo prencipiato por vocal u h muda; apostrofación prioritaria con o verbo si no bi está lo pronombre adverbial en/ne	m'esbarizo, t'hidratas, s'estozan; te m'he feito un chuguet
el, lo (pronombres personals atonos)	l'	debant de verbo prencipiato por a-, ha-, e-, he-, o-, ho-; apostrofación prioritaria con o verbo si no bi está lo pronombre adverbial en/ne	l'has, l'oloraba, l'escuitetz; te l'has minchau
el, els (pronombres personals atonos)	'l, 'ls	dezaga de l'adverbio no; dezaga de me, te se	no'l, no'ls; me'l, me'ls, te'l, te'ls, se'l, se'ls
bi, be (adverbios)	b'	debant de verbos prencipiatos por a-, ha-, e-, he-	b'ha, b'heba
ibi, ¿? (adverbio)	ib', igu'	debant d'as formas de present y preterito imperfecto d'indicativo d'o verbo estar	ib'ye, ib'yera; igu'é, igu'era, igu'eba
ne, en (adverbios)	n'	debant de vocal u h muda	n'hai, n'heba, n'i ha
ne, en (adverbios)	'n	dezaga de l'adverbio no; prioritariament con l'adverbio bi si va debant; prioritariament con un pronombre personal atono que vaiga debant	no'n; bi'n ha; se'n iba, le'n heba, lo'n son, li'n darán, di-li'n
mos, tos, os (pronombres personals atonos)	mo', to', o'	debant de pronombre personal atono el, els, es, u pronombre adverbial en, ne (en istos casos, se pinta la falqueta una sola vegata)	mo'l han dau, mo'n im, portatz-mo'l, to'l, to'n hébetz baixau, to'n marcharetz, it-o'ne

Signos diacriticos

1. S'emplega la dieresi en güe, güi, qüe, qüi, ta pronunciar la u: güeito, güitanta; freqüencia, ubiqüidat.
2. Se recomienda l'accento grafico como diacritico en sé, dé, dó (verbos); é, és (verbos baixorribagorzanos, 'ye, yes'); sí (adverbio y substantivo), y en todos pronombres, adchectivos y adverbios interrogativos y exclamativos: qué, cómo, quán, quándo, quín, quiénto, quál...

Accentuación grafica

Todas as palabras polisilabicas pueden levar accento grafico ta sinyalar a tonicidat, pero ye perén opcional.

L'accento grafico ye consellato en os casos siguients, perén sobre a vocal tonica.

palabras	con accento grafico	eixemplos
acutas	si rematan en vocal sola u seguita de n u s final de palabra, especialment si son formas verbals	trobé, dentrarás
acutas y planas	si a vocal tonica ye zarrada (i, u) y está en hiato con vocal ubierta (a, e, o)	fería, vehíclo, paúl, Saúnc

Sinyals d'interrogación y exclamación

Os sinyals d'interrogación d'apertura (¿) y de tancada (?) incluyen un enunciau interrogativo. O sinyal d'apertura ye opcional: Qué farás maitín?

Os sinyals d'exclamación d'apertura (¡) y de tancada (!) incluyen un enunciau exclamativo. O sinyal d'apertura ye opcional: Grita a os bombers!

Comparanza con atras grafías de l'aragonés

En as Normas graficas de l'Aragonés [3](Uesca, 1987), ciertas solucions graficas coenciden con o castellano:

1. Representación d'o fonema palatal nasal /ɲ/: ñ.
2. Digrafos: ch, ll, rr, qu, gu.
3. No emplego d'as consonants doples bb, dd, ff, gg, mm, pp, ss, tt, vv.
4. No emplego d'os grupos latinos d'orichen griego th, ph, rh, ch.
5. No emplego de y como vocal en interior de palabra.

Y tamién cuenta con un sistema d'accentuación, prou acomparau a lo castellano.

A Sociedat de Lingüistica Aragonesa publicó en 2006 a Ortografía SLA [4], emplegada por os miembros d'ista sociedat ("una vintena de personas").

Comparanza entre as tres ortografías de l'aragonés

Fonemas	Propuesta ortografica de l'Academia de l'Aragonés (Zaragoza, 2010)	Normas graficas de l'aragonés (Uesca, 1987)	Grafía SLA (Grist, 2006)
/a/	a	a	a
/b/	b, v seguntes a etimolochía latina. Ex: bien, servicio, val, activo, cantaba, debant	b Ex: bien, serbizio, bal, autibo, cantaba, debán	b, v seguntes a etimolochía romance, como en catalán y occitano. Ex: bien, servício, val, activo, cantava, devant
/k/	c qu debant de e, i	c qu debant de e, i	c qu debant de e, i
/kw/	Si i hai 'q' etimolochica, como en catalán y un poquet en occitano: qu debant de a, o. qü debant de e, i. Ex: quan, qüestión.	cu como en espanyol Ex: cuan, cuestión	Si i hai 'q' etimolochica, como en catalán y un poquet en occitano: qu debant de a, o. qü debant de e, i. Ex: quan, qüestion.
/tʃ/	ch Ex: chaminera, minchar, chusticia, cheografía	ch Ex: chaminera, minchar, chustizia, cheografía	ch. j (g debant de e, i) seguntes a etimolochía, como en catalán y occitano. Ex: chaminera, minjar, justícia, geografia
/d/	d	d	d
/e/	e	e	e
/f/	f	f	f
/g/	g gu debant de e, i	g gu debant de e, i	g gu debant de e, i
/gw/	gu debant de a, o gü debant de e, i	gu debant de a, o gü debant de e, i	gu debant de a, o gü debant de e, i
h etimolochica, muda dimpués d'o latín	Notata seguntes a etimolochía. Ex: historia, hibierno	No notata. Ex: istoria,ibierno	Notata como en aragonés medieval y en catalán. Ex: história,hivierno
/i/	i	i	i
/l/	l	l	l
/ʎ/	ll	ll	ll
/m/	m	m	m
/n/	n	n	n
/ɲ/	ny como en aragonés medieval y como en catalán Ex: anyada	ñ como en espanyol Ex: añada	ny como en aragonés medieval y como en catalán Ex: anyada
/o/	o	o	o
/p/	p	p	p
/r/	r	r	r
/rr/	rr r- inicial	rr r- inicial	rr r- inicial
/s/	s (tamién entre dos vocals, nunca ss*)	s (tamién entre dos vocals, nunca ss*)	s (tamién entre dos vocals, nunca ss*)
/t/	t	t	t
-t final etimolochica, muda en aragonés contemporanio	Notata como en aragonés medieval, en catalán y en occitano. Ex: sociedat, debant, chent	No notata. Ex: soziedá, debán, chen	Notata como en aragonés medieval, en catalán y en occitano. Ex: sociedat, devant, gent
/u, w/	u	u	u
/jʃ/ (dialectos orientals) /ʃ/ (dialectos occidentals)	ix como grafía soporte ta toz os dialectos Ex: baixo	x Ex: baxo	ix (dialectos orientals). x (dialectos occidentals). Ex: baixo (oriental) = baxo (occidental)
/j/	y inicial y entre dos vocals i en os atros casos	y inicial y entre dos vocals i en os altros casos	y inicial y entre dos vocals i en os atros casos
/θ/	z debant de a, o, u. c debant de e, i (fueras de formacions internacionals, y bellas palabras d'orichen griego u arabe). z en posición final (pero tz como grafía soporte en plurals y formas verbals procedents de t+s que en benasqués fan ts). Ex: zona, Provenza, fetz, centro, servicio, realizar, verdatz.	z Ex: zona, Probenza, fez, zentro, serbizio, realizar, berdaz.	z debant de a, o, u, en posición inicial. ç debant de a, o, u, en posición interior. z en posición final. c debant de e, i. z en as formacions internacionals (cultismos griegos, ampres, con una z en l’orichen). Ex: zona, Provença, fez, centro, servício, realizar, verdaz.
Cultismos	No se notan as tendencias a l'asimilación. Ex: dialecto, extension y lexico.	Se notan as tendencias a l'asimilación. Ex: dialeuto, estensión pero lecsico.	No se notan totas as tendencias a l'asimilación. Ex: dialecto, extension y lexico.
Notación de l'accento tonico (en negreta en os eixemplos)	Modelo espanyol, nomás en agudas, permitindo-se la no accentuación. Ex: historia, gracia, servicio mitolochía, cheografía, María, río atención choven, cantaban	Modelo espanyol. Ex: istoria, grazia, serbizio mitolochía, cheografía, María, río atenzión choben, cantaban	Modelo portugués, catalán y occitano. Ex: história, grácia, servício mitologia, geografia, Maria, rio atencion joven, cantavan