Prunus dulcis
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
| Almendrera | ||||||||||||||||||||
 Prunus dulcis | ||||||||||||||||||||
| ||||||||||||||||||||
| Prunus dulcis | ||||||||||||||||||||
| Mill. et D.A.Webb | ||||||||||||||||||||
L'almendrera[1] (Prunus dulcis (Mill. et D.A.Webb)) ye un árbol caducifolio que puet fer enta 10 metros d'altaria, con o tronco liso, verde u marronoso quan ye choven, que se torna griso u mes fusco y sulcato quan se fa viello. As fuellas son simples, con es cantos u ripas dentatos, con flors individuals u fendo grupetz de 2 a 4, con estructura pentamera, de color blanca u rosadeta seguntes qué variedat, y 3–5 cm de diametro. A fruita que fa no ye si que l'almendra, clasicament una drupa de 3–5 cm de lonchitut, con l'exocarpo y o mesocarpo bastos y fibrosos, y l'endocarpo bien duro. A forma regular de l'almendra a l'árbol ye oblonga u elipsoidal, de color verda y tomentosa, que se torna mes fusca en ixucar-se (per l'agüerro, 9 meses dimpués de fer as flors).
L'almendrera ye un árbol cautivato tipicament en climas calidos, como en a cuenca mediterrania, per a conoixida tendencia a floreixer bien temprano que tien, a qual cosa a sobén li causa la chelata (y conseqüent perduga) d'as flors. En l'Alto Aragón se'n diz que només que uno de cada quatro anyos fan bueno istes frutals. Manimenos, per a grandiza cantidat d'almendras que produz os anyos que fa bueno, diz que compensa per totz os que no ne fa garra, pos efectivament as anyadas de buena cullita en naixen a ran d'os 10 u 15 kg d'istas simients per árbol adulto, simients que cal remarcar-ne o poder calorico que tienen, y d'ixa razón que, d'antigos, fuesen tan importants en a dieta.
As venas d'istes árbols se fan fundas y n'ixan augua d'es terrenos més xucos sines de guaire problema, razón per a qual se gosaba a plantar-los en terrenos de secano y marguins a on que altras especies heban de tener complicacions ta subsistir. A plantada de l'almendrera ye complicada, pos encara que naixen a escape d'as almendras sembratas, as variedatz bien productivas son tamién, de regular, as més sensibles y deficultosas de fer escapar en terrenos duros. Ta solventar-lo, se gosan a plantar en a tierra os pietz d'una variedat mes borde, ta que s'envenen en a tierra, y quan son medratas, se-les mete corte, y se-bi empeltran as partis aerias d'a variedat quiesta. L'empeltre de l'almendrera ye de tot emplegato con altras especies de frutiers, especialment con especies d'o mesmo chenero Prunus, pos asinas se fa proveito d'a capacidat d'os pietz d'esta ta fer vivir as partis superior d'altros arbols en suelos difícils.
ReferenciasEditar
- ↑ (es) Rafel Vidaller Tricas: Nuestros árboles, Cuadernos altoaragoneses de trabajo 2, Instituto de Estudios Altoaragoneses, 1993, ISBN 84-398-7906-7, p. 4
Vinclos externosEditar
Wikispecies tiene un articlo sobre Prunus dulcis.
Se veigan as imáchens de Commons sobre l'almendrera.- (es) L'almendrera
- (es) Cudiar os árbols d'alcuerdo con a especie; l'almendrera
