Scenario

O scenario (/es.θe.'na.rjo/) ye, en o teatro, o espacio destinato a o publico ta a interpretación de produccions teatrals u atros escaicimientos. O scenario sirve como espacio ta os actors u interpretes y como un punto focal ta os miembros d'o publico. Como elemento arquitectonico, o scenario puet consistir en una plataforma (a sobén elevata) u una serie de plataformas. En bells casos, pueden estar temporals u achustables, pero en os teatros y atros edificios adedicatos a iste tipo de produccions, o scenario ye a sobén un elemento estable y permanent.

Scenario d'o espectaclo Quidam d'o Cirque du Soleil.

O espacio scenico puet emplegar-se d'una traza más u menos clasica u innovadora, y entendito como espacio artistico (termin que comparte con atras artes) puet referir-se a un termin propio de l'arte de vanguardia que supera en dimensions fisicas y conceptuals a o scenario tradicional, vulnerando o principio clasico de deseparación con o publico u quatrena paret.

Bi ha quatre tipos de scenarios que varian en relación a o suyo uso y en relación con o publico. A forma mas común en Occident ye o scenario tipo proscenio. En iste tipo, o publico se localiza en un costato d'o scenario con a resta d'os costatos ocultos y emplegatos por os interpretes y os tecnicos. Os scenarios centrals son parellans a os de tipo proscenio, pero con una plataforma u aria d'interpretación que s'estendilla enta o publico de traza que iste se sitúa en tres costatos. En un teatro redondo, o publico se localiza en os quatre costatos d'o scenario. Un quatreno tipo de scenario ye aquel que se construye especificament ta una representación u que embreca un espacio preexistent y adaptato como scenario.

Historia d'o scenario

Scenario d'un teatro a l'aire libre, Regent's Park, Londres.

En os principios d'a historia d'o teatro, os scenarios yeran a sobén simplament arias trigatas ta interpretacions aintro d'un lugar. Como o teatro deriva d'os ritos y ceremonias relichiosas, istas arias tenioron especial significato ta a tribu. Os primers scenarios elaboratos estioron os de l'Antiga Grecia a on que os scenarios yeran orichinalment solos, y que se desembolicoron enta grans anfiteatros a l'aire libre con scenarios permanents. O mesmo tipo de teatros fuoron adoptatos por os romans que los estendilloron por tota Europa.

Chicotz scenarios portatils yeran normals en a Edat Meya y s'usaban ta interpretar misterios y miraclos en as seus, asinas como en l'exterior ta o pueblo. Scenarios parellans s'emplegoron ta a Comedia de l'arte en Italia, que s'estendilloron por tot o continent en os sieglos siguients.

Bibliografía

• Gillette, J. Michael. Theatrical Design and Production, 3rd Ed. Mountain View, California: Mayfield, 1997. ISBN 1-55934-701-5.
• Wilson, Edwin. The Theater Experience, 7.ª Ed. Nueva York: McGraw-Hill, 1998. ISBN 0-07-913202-2.

Vinclos externos

• Scenography - The Theatre Design Website Diagrama y imaches de diversos tipos de scenario.