Superstrato francico en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Lo superstrato francico en aragonés ye lo conchunto d'elementos orichinarios de lo luengache francico presents en aragonés. Encara que bel elemento podió entrar ya en tiempos de los merovinchios, la mes gran part d'estos elementos entroron en lo periodo carolinchio y baixo-medieval a traviés de lo latín tardano, lo latín medieval, l'occitán y lo francés. Los elementos francicos en aragonés son sobre tot lexicos, pero tamién bi ha palabras gramaticals y sufixos.

Mapa de la Marca Hispanica en 806.

Penya Uruel, un toponimo relacionau con lo conte Aureolus, capistoste de los francos que bi heba en la Chacetanía en ixas envueltas de los Carolinchios.

Fonetica de los franconismos

A l'igual que en occitán los franconismos no presentan la h aspirada que se troba en los suyos cognatos franceses.

• Anca.
• Arengue / Arenque.

Los bi ha franconismos con lo grupo consonantico orichinal -ng- que presentan formas dos diferents en aragonés como reproducindo la sonorización dezaga de liquida u una reacción contra esta tendencia que conserva part de l'aragonés central:

• Frisking > fraixengo / fraixenco.
• Hâring > arengue / arenque.

No se documenta esta alternancia con lo sufixo -enco, d'orichen francico.

Lexico d'orichen francico

Las palabras francas se troban sobre tot en lo vocabulario de las costumbres, habitos y tradicions de l'aristocracia franca. Semanticament lo lexico chermanico destaca en los siguients campos: guerra, edificios, muebles, ferramientas, medio rural, alimentos, fauna, caza, cuerpo, fiestas, institucions , sentimientos, ropas, colors, antroponimos y adverbios. En aragonés lo lexico francico ligau a lo dreito, las ferramientas y la flora son muito menos importants que en francés:

Lexico militar

Ixovar d'una tumba merovinchia con armas.

No siempre ye posible relacionar un chermanismo d'este campo lexico con un pueblo chermanico concreto, y la tradición filolochica de cada país los gosa relacionar con los pueblos chermanicos que i estioron presents. Una mesma palabra ha estau relacionada con lo gotico u lo francico dependendo de diferents autors. Son palabras relacionadas con la guerra u la conquiesta:

• Ardido.
• Dardo.
• Guardar: de lo chermanico *wardon, "cosirar", "vichilar".
• Guerra: ye una palabra d'orichen chermanico que se considera d'orichen gotico en las luengas iberorromanicas y francico en las luengas galorromanicas.
• Aguaitar.
• Hielmo.
• Senescal.

Encara que los francos combatiban a piet, lo lexico de la equitación en aragonés y atras luengas romances tiene una influencia chermanica:

• Grupa: de lo francico *kruppa ("masa redonda").
• Esperón: sinonimo d'espuela.
• Galopar.
• Mariscal: orichinariament yera lo encargau de los caballos, dimpués se convertió en lo mariscal en la hierarquía militar.
• Trotar.

Colors

Ta más detalles, veyer l'articlo Colors en aragonésveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

En aragonés bi ha menos nombres de colors d'orichen francico que en occitán u francés, a on que clama l'atención que muitas denominacions latinas s'haigan perdiu. S'ha quiesto explicar estas substitucions por las denominacions de las colors de los caballos. Son palabras relacionadas con las colors:

• Blanco.
• Griso.

En aragonés medieval ha teniu cierta presencia brun, bruna ("moreno", "morena").

Fiestas y institucions

Son palabras relacionadas con las fiestas y institucions:

• Baron.
• Danzar: de lo francico *dansōn.
• Feudo, feu.
• Rango, ran.

Cuerpo

Cabeza de Clotario I. En ixas envueltas de los merovinchios lo pelo luengo yera simbolo de reyaleza. La palabra francesa touffe ("fleca de pelo") y lo suyo cognato aragonés tufa provienen de lo francico *Topf.

Son palabras relacionadas con l'anatomía, fisiolochía y movimiento:

• Garrampa.
• Anca < *Hanka.
• Pata.
• Tufa < *Topf (fleca de pelo).

Ropa y teixius

Guants de lana. Los guants teneban un significau simbolico en la sociedat franca relacionau con acomandar misions u entregar tierras. En la baixa Edat Meya aragonesa se daba un part de guants como gratificación a los notarios u a los arbitros en los tribunals..

Son palabras relacionadas con la ropas y las vestiduras:

• Bordar.
• Cofia.
• Falda: d'acuerdo con bel autor sería un goticismo de lo periodo tolosán, manimenos en cheneral se considera d'orichen francico, luenga a on que existe la palabra falda. Dende l'accepción orichinal esta palabra ha preso significaus oronimicos ("falda d'un cabezo", "falda d'una montanya"), y en ansotano una faldera ye lo cabaixo d'una ladera.
• Fieltro.
• Guant.
• Tovalla. Deriva de lo francico thwahlja, que explica l'occitán toalha y lo touaille. En aragonés existe la forma derivada tovalleta con sufixo -eta.
• Pocha.

Fauna

Lo esparveret recibe la denominación d'épervier en francés, en los dos casos son palabras d'orichen francico.

Son palabras relacionadas con la fauna :

• Esparvero.
• Arengue, arenque.
• Choliba: cheosinonimo oriental de babieca en zonas como Viello Sobrarbe, Ribagorza meya y Semontano de Balbastro. La forma paralela en catalán òliba s'orichinó a partir de lo francico UWWILA > HUWILA, por lo que en caso de no estar un catalanismo faría part de lo superstrato francico de l'aragonés.
• Gualla: denominación oriental de la codorniz u cotorniz.

Medio rural

Un manequín en posición de segar, representau con una garba en la man.

Son palabras relacionadas con la vida en lo medio rural:

• Garba: .
• Chardín.
• Fraixenco: derivau de lo francico frisking, palabra que encara se trobaba en baixo alemán antigo y que contina l'alemán actual frischling ("rayón").

En aragonés medieval ha estau documentada la palabra blado, pero siempre ha predominau l'uso de trigo, derivau de lo latín TRITICUM.

Edificios y muebles

Bordas en la Val de Vio.

Son palabras relacionadas con los edificios y los muebles:

• Borda.
• Facistol.
• Loncha.
• Sala.

Alimentos y cocina

Son palabras relacionadas con los alimentos:

• Flan.
• Rustir: proviene d'una forma reconstruita francica *rōstjan.
• Sopa.

Flora

Hypnum cupressiforme, una molsa común en Aragón.

• Guinda: variedat de ceresa de mida más chicorrona y sabor más aguda que las comuns. Deriva de lo proto-chermanico <*wīksǐna a traviés de lo franco ripuario wîshila.
• Molsa: deriva de lo francico *mosa con lo mesmo significau, pero con influencia de lo latín MULSA ("hidromiel").

Ferramientas

• Lesna: deriva de lo proto-chermanico *alisnō, *alusnō, talment a traviés de lo francico *alisna. Se troba como microtoponimo en Pui de Cinca (La Lesna) fendo referencia a la forma conica d'un mont punchagudo.

Sentimientos

L'Orguello seguntes Pieter Brueghel l'Ancien.

• Orgueil: cognato de l'aragonés "orgüello", "orgullo".

Antroponimos

Son antroponimos d'orichen francico:

• Bernal.
• Cherardo.

Adverbios

L'adverbio gaire deriva de lo francico *waigaro « muito ».

Sufixos, prefixos y formación de palabras

Lo francico tenió una influencia en la formación de palabras por derivación, en especial por l'aparición en galorromance de prefixos y sufixos d'orichen chermanico. Las palabras ampradas con los sufixos -hart, -wald, -ing, -isk facioron que se tornasen productivos y s'anyadisen tamién a palabras romanicas. Tamién podió haber-ie una influencia francica en los usos de lo sufixo romanico -ón y de lo prefixo romanico en-/em-.

Los antroponimos francos con la terminación -hart ("duro") entroron primer con antroponimos como Bernhart y Reginhart y pasoron dimpués a substantivos comuns y adchectivos convertindo-se en lo sufixo -ard, que dimpués pasó dende lo francés y l'occitán a l'aragonés como -ardo.

Lo mesmo se puede dicir sobre l'orichen de lo sufixo -aud, que yera -alt en francés antigo. La terminación chermanica -wald teneba en francico una forma redueita en -ald que entró con antroponimos como Guiraud y Regnaud. A traviés de l'occitán y lo catalán (gripau, babau), plegó dica lo benasqués como -au (patau, pipau).

La forma masculina de lo sufixo -ing prenió la forma -enc/-anc en galorromance primerenco, representando lo cognato de l'aragonés -enco.

Bibliografía

• (es) Carlo Tagliavini: Origenes de las lenguas neolatinas. Fondo de Cultura Economica. 1973.
• (es) Rafael Lapesa: Historia de las lengua española. Editorial Gredos. (1981).
• (es) LÍBANO, Ángeles y SESMA, J. Ángel, Léxico comercial en Aragón (Siglo XV). Institución Fernando el Católico, 1982.
• (an) F. Romanos, F. Sánchez: L'aragonés de A Fueba. Bocabulario y notas gramaticals. Uesca, Publicazions d'o Consello d'a Fabla Aragonesa (col. «Puens enta ra parola», 9) (1999).
• (fr) Jean-Louis Tritter: Histoire de la langue Française. Editor: Paris, Ed. Ellipses - 1999.
• (en) Peter Rickard: A History of the French Language. Editor: Routledge, 2003. ISBN 1134838778, 9781134838776.
• (fr) Adolphe Hatzfeld et al.: Dictionnaire général (1890-1900). Traité de la formation de la langue. Paris, Delagrave, 1890.