Adchectivos indefinius en aragonés

Os adchectivos indefinius en aragonés son d'orichen latín y presentan particularidatz presents en as luengas neolatinas pirenencas y as luengas galo-romances.

Son adchectivos indefinius algun(o), atro, bell, qualque, brenca, cada, cosa, demás, garra, guaire, más, menos, mica, mismo/mesmo/mateix, muito, poco, pro(u), qualsiquier, res, tanto, tot, un.

Adchectivo indefiniu algún(o), alguna

Presenta variación en chenero y numero: algún(o), alguna, algun(o)s, algunas. Deriva d'o latín *ALICUNU (ALIQUIS+UNU), y presenta cognatos en todas as luengas vecinas de l'aragonés, encara que en francés presenta un significau negativo. Se relaciona con o pronombre indefiniu algún(o), alguna, algun(o)s, algunas.

Bell autor l'ha considerau un castellanismo que substituye a bell u a qualque. José Antonio Saura Rami argumenta que talment no siga autoctono en benasqués porque no se troba a suya teorica contrapartida ninguno (se troba o adchectivo indefiniu cap y o pronombre digú como derivau de NEC UNU), y antiparte, encara se documenta o indefiniu bell, bella.

Miguel Ánchel Barcos considera que no bi ha datos pa afirmar u negar a suya pertenencia a lo sistema aragonés, pero que a perda de bell, bella ha suposau a suya expansión.

O indefiniu algún(o), algunas ye d'uso regular en aragonés medieval.

Adchectivo indefiniu atro, atra

Presenta variación en chenero y numero: atro, atra, atros, atras, que derivan d'o latín ALTERU a traviés d'as formas intermeyas altro, altra, altros, altras que encara se fa servir en belsetán y benasqués. En aragonés cheneral por un regular se fan servir as formas coincidents con o castellano otro, otra, otros, otras, que s'han orichinau por vocalización d'a l en u y reducción d'o diftongo decreixient -au-. As formas con a se conservan en aragonés d'a Val de Tella, chistabín y baixorribagorzano pero en retacule.

• imos a tener atro fillo.

Puet ir acompanyau con o indefiniu un:

• un atro día.

As formas otro, otros, otra, otros se troban en variants d'aragonés bien conservadas tant a lo norte como en a Val d'Ansó:

• Venioron de l'otro lau d'a búa.

Adchectivo indefiniu bell, bella

L'adchectivo bell se pronuncia en aragonés cheneral /bel/, ye sinonimo de qualque y siempre va debant d'o substantivo. Seguntes Rohlfs deriva d'o latín BELLUS y presenta equivalents en gascón (bet en masculín, bero en feminín), y catalán antigo. O pronombre indefiniu relacionau con l'adchectivo indefiniu bell ye bell un (/bel un/).

Se gosa fer servir sobre tot en singular, (bell en masculín, bella en feminín), d'astí que mesmo bell autor haiga sinyalau l'ausencia d'o plural en a variant de l'aragonés que describiba u mesmo que o emplego plural siga efecto d'una influencia d'o castellano. A escaseza d'o emplego en plural s'explica por o suyo caracter indefiniu, que fa que no haiga de menester as formas en plural, car o suyo mesmo significau abraca una ideya de plural.

As pocas vegadas que se fa servir en plural presenta en masculín as formas bellos u bells (que se pronuncia tamién en quasi totz os puestos /bels/), y en feminín bellas. Un d'os pocos usos bien documentaus en plural ye en Ribagorza acompanyando a numerals pa dicir "aproximadament":

• Habrán cohiu bellos tres kilos.
• Va correr bellos venticinco metros.
• Belles quatre cargues en quede de hierba.

A documentación d'as formas en plural sin ixe significau son mes escasas y esporadicas:

• Bells animals.
• Mutos se deixaban belas borregatas en casa.
• A bells tipos n'habría qu'escarmentar-los.
• Bellas veces n'estoi farto....

A forma feminina presenta as variants foneticas bel·la con ele cheminada en belsetán y bela con simplificación d'esta ele en belsetán y chistabín.

A forma masculina presenta una variant quasi desapareixida con l cheminada en belsetán que se presenta quan lo substantivo encomienza por vocal, fenomeno comparable a la liaison d'o francés con atras consonants:

• Bel·l animal.
• Bel·l hombre.

En l'aragonés d'a val de l'Ebro no se debeba fer servir o indefiniu bell, bella porque no amaneix guaire en os textos medievals y o que trobamos ye qualque bella vegada.

Actualment bell, bella se troba en tot l'Alto Aragón pero en claro retacule. En ansotano quasi no se fa servir y a suya presencia se reduce a expresions fosilizadas y a la conoixencia d'a chent mes viella; en Ribagorza Baixa ya quasi no lo fan servir as cheneracions mes chóvens.

Brenca como adchectivo indefiniu

Brenca (en as vals occidentals branca, y en aragonés d'a valle de Vio branga), acompanya como adchectivo indefiniu a sustantivos incontables estando invariable en chenero y numero:

• No me queda brenca hierba.
• No tiengo brenca perras.

Adchectivo indefiniu cada

Deriva d'o latín CATA y ye present en atras luengas romanicas a part de l'aragonés. Ye invariable en chenero y numero. Siempre va con sustantivo u con o pronombre indefiniu un(o), una:

• Cada un ye como Dios l'ha feto.

Quan va con o pronombre indefiniu se puet pronunciar con una -g- antihiatica (cadagún, cadaguna), por deseparar a vocal a d'una vocal velar u en un hiato.

Quan acompanya a sustantivos indicadors de tiempo sigue a la preposición per / por en ciertas variants orientals de l'aragonés como en chistabín, belsetán y tellán (y tamién se n'ha sinyalau bell eixemplo en benasqués).

• Por cada día le verás cosas.
• La media la temperatura sube por cada anyo.

En sustantivos que indican colpes sigue a la preposición en en belsetán y tellán:

• Les pegan en cada hetazo.

Adchectivo indefiniu garra

Ye invariable. Se refiere a obchectos contables y presonas con significau negativo, d'ausencia. Documentau en chistabín, aragonés d'a Val de Tella, Baixo Penyas, Val de Vio, Fanlo, Bestué, Sobrepuerto, Bara, Panticosa, y dica as Cinco Villas. En benasqués no se fa servir garra y se troba cap u cap de. En as atras variants de l'aragonés se fa servir dengún, denguna. Eixemplos:

• No tiengo garra libro.
• No va ta garra cabo.
• No se puede ir ta garra puesto.
• No hi hai garra fuent.
• Ta garra puesto.

Adchectivo indefiniu gota

Ye invariable y como quantificador indica ausencia u manca. Deriva d'o latín GUTTA, que indicaba una quantidat muito chicota, a minima. Eixemplos:

• No queda gota vino en lo porrón.

Adchectivo indefiniu guaire, guaires

Ye invariable en chenero, pero presenta variación en numero. Se fa servir con un significau de quantidat alta pareixiu a muito pero en oracions negativas, interrogativas y condicionals. Deriva d'o francico WAIGARO y tien os suyos cognatos en luengas galo-romanicas: gaire en catalán y occitán y guère en francés. Eixemplos d'uso:

• No y estaban guaire rato.
• No tengo guaires ganas.

Se troba muit poco en textos aragoneses medievals, pero entre os pocos textos a on se troba bi n'ha un de localidatz tant a lo sud como Zaragoza:

• ...et qu'el no conocia guayre bien el synyal del dito ganado...

Actualment se conserva en aragonés oriental, centro-oriental, d'o Semontano de Balbastro y panticuto, documentando-se tan a lo sudueste como Orlato. Manimenos en qualques parlas altoaragonesas se n'ha perdiu l'uso en os dos zaguers tipos d'oracions, por eixemplo en baixo-ribagorzano no se fa servir en oracions interrogativas.

Adchectivo indefiniu mesmo/mismo, mesma/misma

Presenta variación en chenero y numero. O suyo significau tien connotacions d'igualdad u equivalencia. Tien como superlativo mesmismo. Mesmo/mismo deriva d'o latín METIPSIMU y presenta amés en aragonés a forma mateix. L'alternancia de mesmo y mismo se puet veyer en una mesma localidat, y se considera mes correcta mesmo por razons etimolochicas. A forma mateix ye común con o catalán y actualment restrinchida a laragonés benasqués. Manimenos d'antes estió estendillada dica l'aragonés terolano y responde a la ley fonetica -PS- > -x- que veyemos en IPSE > ixe.

• A nuestra no ye a mesma casa.
• O mismo coche que tu.>
• Hai que tornar por lo mismo camín.
• L'alguaril ye lo mismo que lo troixo.

Mica como adchectivo indefiniu

Ye invariable en chenero y numero. Acompanya a substantivos incontables indicando una ausencia y manca de quantidat, manimenos en oracions interrogativas tien una valgua positiva indicando cierta quantidat. Provién d'o latín vulgar MICCA que indicaba una quantidat muito chicota, tien o suyo cognato en o catalán mica pero un significau comparable a l'aragonés brenca u gota u a lo catalán gens. Eixemplos d'uso como adchectivo indefiniu:

• No cayerá mica fiemo.
• Estes besos no me fan mica goyo.

Como adchectivo indefiniu puet ir acompanyau con a preposición de, pero se gosa perder.

Adchectivo indefiniu muito, muita

Presenta variación en chenero y numero. Indica una quantidat alta pero imprecisa y puet sustituir-se por locucions que indican tamién una quantidat gran. Deriva d'o latín MULTU y ye cognato d'o castellano mucho y d'o catalán molt. Presenta as variants foneticas muto en belsetán (y d'antes en tellán ) que manimenos coexistiba en belsetán como mayoritaria debant d'a forma cheneral muito, y molto en benasqués. Eixemplos d'uso:

• En ha traiu muitas.
• Ixe lugar no teneba muitas casas.
• Muitas ralladuras.
• No brenca fret, pero i hei moltes conchestres

En o sieglo XX se documenta a suya sustitución progresiva por o castellanismo mucho en muitos puestos. Ya Alwin Kuhn deciba que en Linars de Broto se fa servir poco y que en Aineto ye antiqüau, Saroïhandy deciba que en Biel no yera común y Manuel Alvar sinyalaba que en o Campo de Chaca ya quasi heba desapareixiu. Chabier Lozano Sierra en o suyo estudeo sobre l'aragonés d'a valle de Tella troba unicament mucho en a parla actual, encara que en as enqüestas lo indicaban que d'antes se feba servir muto.

Adchectivo indefiniu quantos, quantas

Tien un significau pareixiu a bell, qualque, pero indica cierta imprecisión de numero. No admite a forma singular:

• Fa quantos días que pasó.
• I he estato quantos días ingresato.
• Un chirmán que heba marchato feba quantos anyos.
• Estiemos allí quantos días.

Adchectivo indefiniu tot, tota

Tot, tota, totz, totas ye a evolución d'o latín tōtus, tōta, tōtum. En aragonés cheneral son mes frequents as formas con fonetica coincident con a castellana to, toda, todos, todas, conservando-se as formas que se consideran chenuínas en belsetán y benasqués.

• Ye per totz es puestos.
• A ixe el conoix tot Cristo.
• Tota la nuet circulaba coches.

En l'aragonés d'a Val de Tella se presenta como tot, toda, totz, todas, no pronunciando-se a -t final en a mes gran part d'os casos y tendendo a perder-se a forma totz debant d'a forma todos por castellanización. Tamién en chistabín se diz tot, toda, totz, todas, pronunciando-se en Chistén /toa/ y /toas/.

Adchectivo indefiniu un(o)

Se presenta en as atras luengas neolatinas y a vegadas ye considerau un articlo indefiniu. Presenta as variacions un, una, un(o)s, unas. A forma uno coincident con o castellano ha puesto substituir recientment en qualques zonas a la forma un en un proceso de castellanización. A forma uns se puet pronunciar us. Eixemplos d'uso:

• Me chito un ratet en lo bango.
• Lo gramen tien unas venachas malas.
• Rancar uns cospins.

Quan no acompanya a un substantivo esdevién un pronombre indefiniu y a sobén va acompanyau d'o pronombre adverbial en/ne.

Adchectivo indefiniu qualque

Ye invariable en chenero, presenta la forma plural qualques. Se troba en belsetán coexistindo con bell, bel·la, y ye documentau tamién en aragonés tensín. Se relaciona con o pronombre indefiniu qualcún, qualcuna.

• Qualques hombres, qualques mullers.
• Qualque vez.
• Qualque día d'éstes me'n voi de casa.
• Qualque cosa dirás maitín.
• Qualque día iy estió.
• Come-te qualque cosa antes de marchar.
• Qualque día d'éstes en mató un altro.
• Per qualque cosa debe estar.
• Es mayordomos hopan a tot meter ta Sobrevilla a escar qualque tremol ta la plaza.
• Encara queda qualques mullers n'a plaza.

Bibliografía

• (es) Chabier Tomás Arias: Elementos de lingüística contrastiva en aragonés: estudio de algunas afinidades con gascón, catalán y otros romances. Editorial: Universidat de Barcelona, 2016.
• (es) José Antonio Saura Rami: Elementos de fonética y morfosintaxis benasquesas. Gara d'Edizions, Institución Fernando el Católico, 2003.
• (es) BLAS GABARDA, Fernando y ROMANOS HERNANDO, Fernando, Diccionario Aragonés: Chistabín-Castellano; Gara d'Edizions. Zaragoza, 2008. ISBN 978-84-8094-061-0
• (es) Lozano, Ch., Saludas, Á.L. (2005). Aspectos morfosintácticos del belsetán. Zaragoza: Gara d'Edizions - IFC.
• (es) Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010.
• (es) María Pilar Benítez: L'Ansotano. Estudio del habla del Valle de Ansó. Gobierno de Aragón, 2001.
• (es) Miguel Ánchel Barcos: El Aragonés Ansotano: estudio lingüístico de Ansó y Fago. Gara d'Edizions. Zaragoza, 2007. ISBN 978-84-8094-058-0.