Neerlandismos en francés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Los neerlandismos en francés son palabras que esta luenga ampró de lo neerlandés en diferents periodos de la historia, destacando lo lexico relacionau con la navegación y la incheniería hidraulica.

Uns matelots de lo sieglo XIX. La palabra francesa matelot proviene de lo vocabulario neerlandés de l navegación a vela.

Las palabras d'orichen neerlandés son mes comuns en las zonas francofonas en contacto con esta luenga como Belchica, tanto en valón como en francés estándard.

Historicament las palabras d'orichen neerlandés se troban dende lo sieglo XII dica l'actualidat, y fan part de los estratos cuatrén, cinquén y seisén en los que se dividen los chermanismos de lo francés. L'apocheu en la entrada de neerlandismos estió lo sieglo XVII, cuan los neerlandeses teneban un monopolio en cuasi tot lo comercio maritimo francés.

Lo neerlandés fa part d'un continuum dialectal que va dende los Alpes dica la Mar de lo Norte, estando pocas y progresivas las diferiencias entre esta luenga y las luengas chermanicas occidentals continentals con las que ye en contacto cheografico (lo baixo alemán y las "luengas altochermanicas centrals occidentals"). Distinguir los primers neerlandismos d'atros chermanismos orichinaus a partir de lo baixo alemán, de las luengas altochermanicas centrals occidentals u de l'alamanico ye dificil y s'ha de recurrir a documentar como se produció la expansión d'estas palabras, ya no bi heba grans diferiencias por perteneixer a un mesmo conchunto en grau d'igualdat. Dende la Edat Meya tardana, y a traviés de los sieglos XVI y XVII los Países Baixos y Flandres quedoron progresivament mes desvinclaus politicament, economicament y culturalment de las atras tierras chermanicas occidentals, y la formación de los Países Baixos como potencia significó que apareixese una luenga nacional, devez que en las tierras chermanicas fuera de los Países Baixos y de Flandres se cheneralizaba l'acceptación un alemán estándard basau en lo luengache de la Biblia de Lutero. Las palabras chermanicas que han iu entrando en francés dende lo neerlandés en estos sieglos (neerlandismos) presentan circunstancias y campos lexicos proporcionalment diferents de las que han iu entrando dende las atras luengas y dialectos de lo diasistema entre l'alto y lo baixo alemán (tudesquismos).

Neerlandismos primerencos

En lo cuatén estrato de chermanismos los neerlandismos yeran difícils de distinguir de los chermanismos d'orichen francico. Un de los pocos eixemplos probables en lo sieglo XII ye esturman ("una clase de marinero"), relacionau con l'holandés antigo stuurman.

En este periodo bi ha contactos entre franceses y holandeses en relación a la pesca en Mar de lo Norte y de la Canal de la Manga, pero tamién entre franceses y flamencos en relación a lo comercio y las ferias locals en la zona entre lo norte de Francia y los Países Baixos. Lo peache Bapaume entre Lille y Amiens ilustra lo comercio que bi heba en ixas zonas entre 1097 y 1634.

En lo sieglo XI Flandres y Brabant yeran superpoblaus y bi heba una emigración ta Francia y beluns se convertiban en mercenarios. En lo exercito francés bi heba rechimientos neerlandeses.

Bi ha neerlandismos como écran y étape que amuestran la lei fonetica francesa que en la baixa Edat Meya fizo desapareixer la -s- debant d'una consonant en francés:

• Scherm > escren (zaguers de lo S. XIII) > écran.
• Stapel > estaple (1272) > estappe (1396) > étape.
• Schoppe > escope (1230) > eschope (1285) > échoppe.

Neerlandismos dende lo sieglo XIV dica l'actualidat

Los palabras d'orichen neerlandés yeran los chermanismos mes abundants de lo cinquén estrato (Edat Meya tardana). En este periodo s'introducioron digue (de lo neerlandés meyo dijc), bouquin (de lo neerlandés meyo boeckijn), mannequin (de lo neerlandés meyo manneken).

En ixas envueltas de lo Ligallo de la Hansa, que controlaba lo trafico maritimo entre la mar Baltica y Francia, la navegación se fa mes important. En Flandres se desarrollan puertos como Bruches y Anvers, y en Francia bi heba colonias neerlandesas en puertos como Roan, Dieppe y Bordeus.

Los neerlandeses estioron presents como incheniers y man d'obra en tiempos d'Henrique IV en obras hidraulicas pa desecar u desauguar los almarchals de Picardía, Poitou, Saintogne, Guyana, Auvernia y Provenza. Lo cardenal Richelieu reclutó tecnicos y obrers neerlandeses en la marina francesa. En lo sieglo XVII los neerlandeses obtenioron de lo comercio de vins, y de feito a mitat de lo sieglo XVII a mes gran part de lo comercio internacional francés se feba a traviés de los barcos de los neerlandeses. Lo sieglo en lo que lo francés ampró mes neerlandismos estió lo sieglo XVII.

Lo ministro Colbert prebó de fer minguar la posición de los neerlandeses y ninvio incheniers franceses a los Países Baixos pa que prenesen conoixencias d'incheniería hidraulica. La revocacion de l'Edicto de Nantes en 1685 fació que muitos neerlandeses protestants deixasen Francia, pero lo suyo puesto lo podioron ocupar neerlandeses catolicos. Dimpués de la paz d'Utrecht (1712) la influencia politica de los neerlandeses minguó y las colonias neerlandesas que bi heba en Francia encomenzoron a asimilar-sen a los franceses, deixando se parlar holandés.

La intensidat de los contactos entre neerlandeses y franceses fació que entre las palabras ampradas bi'n hese muitas de lo vocabulario de base (bouquin, drôle), pero la mes gran part de lo lexico neerlandés perteneixe a lo sector de la navegación (amarrer, cambuse). Ligaus a la navegación trobamos nombres de peixes marins, mercaderías, medios de transporte, fauna y flora exotica. Tamién son representaus lo sector de l'artesanía y industria (cliver, pompe), la incheniería hidraulica (polder, digue), lo sector militar (boulevard), la fiesta y la diversión (cabaret, bastringue), y las bebidas (bière, brandevin).

Vocabulario de base

• Bouquin.
• Drôle.
• Blague.
• Cancrelat.
• Lippe .
• Trique : Aferesi d'estrique, de lo francés antigo estriquier « dar colpes, pasar un obchecto por dencima d'atro », y de lo neerlandés antigo strīken (huei strijken).
• Bourse: de beurse, saliu de l'Hôtel de Van der Buerse de Bruches dito asinas por estar la casa de los banquers venecianos della Borsa.

Verbos

• Begayer.
• Grouiller: deriva de lo neerlandés meyo grollen.
• Gruger : deriva de lo neerlandés gruizen « esclafar ».
• Reluquer: deriva de lo neerlandés meyo loeken (« mirar-se », « fixar »), con lo prefixo re-.

Navegación

Una flûte en un gravau de 1647, ye un « barco redondo » con fuerte capacidat de transporte que permitió a Holanda adquirir la primera marina mercant d'Europa en lo sieglo XVII.

• Affaler: de afhalen ("tirar") u afvallen ("cayer"). Ye abaixar un cordache pa aduyar a que corra en una garrucha y que baixe millor. Por extensión abaixar una vela. Documentau dende 1610.
• Amarrer: de aanmeren, "ligar", dimpués pasó a lo castellano y catalán como amarrar, tamién se puede considerar de lo vocabulario de base.
• Bâbord: < bakboord « borde de dezaga », de bak « espalda , dezaga».
• Bastaque: un tipo de cable.
• Cambuse: reposte de la embarcación.
• Foc < fok. Una vela triangular.
• Flûte < fluijt: navilio de carga holandesa.
• Livarde: palo posau a'l bies pa ixamplar una vela. Ye sinonimo de balestron.
• Matelot < mattenoot « companyero » (huei matroos): marinero.
• Tribord, stribord: < stierboord, variant de stuurboord.
• Vrac : < wrak « bazar, restas, naufrachio ».
• Yole: deriva de lo neerlandés jol u de lo baixo alemán meyo jolle. Encara que en 1733 se feba mención d'una yole de Norvège, no ye prou criterio pa adchudicar un orichen escandinavo, en realidat lo danés ha puesto amprar la palabra de lo baixo-alemán u lo neerlandés igual que l'anglés yawl.

Flora y fauna

Flora y fauna exotica

Fruitos de Citrus maxima, conoixius en francés como Pamplemousse y pomélo.

Fruitos de Citrus ×paradisi, tamién conoixius en francés como Pamplemousse y pomélo.

Sobre tot son zoonimos y fitonimos d'orichen exotico.

• Cacatoès: proviene de lo malayo kakatūwa a traviés de lo neerlandés kaketoe u de lo portugués cacatua.
• Éland: lo bovido africano Taurotragus oryx. La mesma radiz se troba en lo tudesquismo élan (Alces alces).
• Palissandre: esencia de la fusta de lo chenero Dalbergia.
• Pamplemousse: fruito de los citricos Citrus maxima y Citrus ×paradisi. Deriva de lo neerlandés pompelmoes « limón espeso ».
• Loris: primate de la familia Lorisidae.

Peixes marins

Abadecho en un acuario de Mareis. La especie Gadus morhua ye conoixida en francés como morue u tamién con lo neerlandismo cabillaud.

• Aiglefin / aigrefin / eglefin: peix Melanogrammus aeglefinus.
• Bar: nombre común de bella especie de la familia Moronidae, en especial lo bar commun (Dicentrarchus labrax) y lo bar tacheté (Dicentrarchus punctatus). Derivau de lo neerlandés meyo baers, baerse, barse, relacionau con lo neerlandés meyo borstel ("pelo", "seda", "broza").
• Cabillaud: abadecho, Gadus morhua. Derivau de lo neerlandés kabeljauw. No ye claro si la palabra orichinal ye basca u neerlandesa. Las formas en neerlandés tienen una documentación mes antiga que no la basca (forma lalinizada cabellauwus de lo S. XII), y bi ha una variant con metatesi bakeljauw ← kabeljauw que precedería a las formas basca bakailao y castellana bacalao.
• Éperlan: peix de lo chenero Osmerus.
• Flétan: peix de la subfamilia Hippoglossinae y de los cheneros Hippoglossus y Reinhardtius.
• Elbot: peix de la subfamilia Hippoglossinae, sinonimo de Flétan.
• Lingue: lo peix Genypterus blacodes.
• Lingue franche: lo peix Molva molva.

Tamién bi ha denominacions sobre productos comercials de peixes marins sozmesos a metodos tradicionals de conservación:

• Saur: aplicau a l'arengue cuan ye zafumau y secau. Deriva de lo neerlandés soor, que significa secau.
• Stockfisch: filez de peix secau en un palo a l'aire libre. Se refiere en especial d'abadecho. Deriva de lo neerlandés stokvis pero con ortografía influida por l'alemán. Vis ye peix y stok se traduz por "bastón".

Cucos

Los cucos mite y cancrelat no son fauna exotica pa los franceses pero talment tiengan nombre neerlandés por trobar-sen en los barcos.

Mercaderías y medios de transporte

• Drogue: deriva de lo neerlandés drōge « mercadería seca », en neerlandés actual drogerij « hierba secada ».
• Échope: deriva de lo neerlandés meyo schoppe. Ye una botiga chica. En lo sieglo XIII yera escope y se documentaba primero en lo norte de Francia, devez que en atras zonas s'ixemeneba lo probable occitanismo d'orichen helenico boutique.
• Frelater: deriva de verlaten « trescolar ».
• Potasse.
• Coche: un tipo d'embarcación fluvial.

Artesanía y industria

Villabarquín, palabra que deriva de lo neerlandés wimmerlkijn.

• Action.
• Brique: amprau de lo neerlandés meyo bricke, brike, relacionau con lo verbo breken ("trencar"). Significa ladriello, de feito en Flandres y los Países Baixos yeran importants las construccions con ladriello ya en la baixa Edat Meya. En francés lo dispositivo pa fer purna en las armas de fuego recibió la denominación sufixada de briquet, que plegó a l'aragonés.
• Colza. Deriva de koolzaad « simient de col ». Estió la base d'una industria important.
• Cliver: deriva de lo neerlandés klieven ("fender").
• Épite.
• Pompe: bomba.
• Rabot: deriva de lo neerlandés meyo robbe ("conillo")
• Varlope.
• Vilebrequin: villabarquín. Deriva de lo neerlandés wimmerlkijn.

Incheniería hidraulica

Anvista aeria de los polders de La Gironda.

• Bélandre: embarcación de fondo plan que s'emplega en ríos y canals.
• Berme: sendero que bi ha canto d'una canal.
• Polder.
• Digue.
• Rigole: desaugue, zequia. Esta palabra ha plegau dica l'aragonés de la val de Tella como rigola.

Agricultura y cheografía fisica

Perfil transversal tipico d'un barducal supramareal en un río costero dito rivière de Penzé, en Bretanya. Un barducal d'una plana de marea se dice en francés vasière, palabra derivada de lo neerlandismo vase, "sedimento lutitico".

• Friche: yermo. La forma orichinal en neerlandés ye versh que fa part de la expresión versch land, "tierra fresca", "tierra ganada a la mar".
• Vase: sedimento lutitico, bardo, buro, fango, limo, laco, tarquín. Deriva de lo neerlandés meyo wase, que ha dau en neerlandés actual waas.
• Vasière: plana de marea, barducal. Derivau de l'anterior con lo sufixo -ière.
• Wagage: limo que se fa servir d'abono. Deriva de lo neerlandés wag ("mullau").

Guerra y vida militar

Lo sector militar ye representau por:

• Blocus.
• Boulevard. Deriva de lo neerlandés antigo bollewerc, correspondient a la forma actual bolwerk ("muralla"). En francés la palabra boulevard ha perdiu progresivament lo suyo significau militar que han heredau lo catalán baluard y lo castellano baluarte, luengas a on que ha plegau recientment dende lo francés bulevar y bulevard con lo significau urbán d'avenida ampla con árbols.
• Halecret.
• Risban: ye un terrero con canyons pa protecher un puerto. Deriva de lo neerlandés Rijsbank.

Fiesta y diversión

• Cabaret.
• Kermesse: fiesta popular. Deriva de lo neerlandés meyo kermesse, kermisse « mesa d'ilesia, fiesta patronal » (en neerlandés moderno kermis).
• Bastringue.

Ropa, accesorios

• Bague: aniello. Deriva de lo neerlandés premoderno bagge « aniello », que corresponde a l'actual bag « choya »).
• Mannequin : < mannekijn « hombre chicot ».
• Ruban : deriva de lo neerlandés ringband « collar ».

Gastronomía

• Couque.
• Gaufre: < wāfel(e), wafer (huei wafel, y en flamenco wafer).
• Spéculoos.

Bebidas

• Bière: biera, cervesa. Deriva de lo neerlandés bier.
• Brandevin.
• Halbi.

Neerlandismos locals

Son neerlandismos propios de Belchica (belchicismos): kot (cambra d'estudiant) y drève (de l'holandés dreef). En las luengas d'oïl de lo norte y nord-este s'emplega pleutre.

Adaptación de los neerlandismos

Lo diminutivo neerlandés kijn que s'adapta en francés como quin y lo veyemos en vilebrequin (villabarquín). Atros eixemplos son bouquin (de lo neerlandés meyo boeckijn) y mannequin (de lo neerlandés meyo manneken).

Bi ha muitas palabras neerlandesas que s'adaptan con la terminación -an, que en part ye lo resultau de la evolución de lo sufixo -enc, -anc, la forma como s'adaptó en francés antigo lo sufixo francico -ing.

• Spierlinc (forma en neerlandés meyo)> éperlan.
• Scherm (forma en neerlandés meyo)> écran.
• Ringhband (forma en neerlandés meyo)> ruban.
• Vleting > flétan.
• Rijsbank > risban (terrero con canyons pa protecher un puerto).

Esta traza d'adaptar palabras se troba tamién en tudesquismos (brelan, élan), y en italianismos (bilan, palan).

Bibliografía

• (es) Carlo Tagliavini: Los orígenes de las lenguas neolatinas. Introducción a la filología romance. Fondo de Cultura Economica, 1973.
• (es) Gramática francesa. Larousse Editorial, S.A, 2000.
• (es) Francisco Sánchez Romero: La influencia de los terminos neerlandeses en la lengua española. Publicau en Transferencias culturales, literarias y lingüísticas en el ámbito de la Unión Europea. Universidat de Sevilla, 2006.
• (es) Benedek Elemér Vidos: Relaciones antiguas entre España y los Países Bajos y problemas de los préstamos holandeses (flamencos) en castellano. Revista de filología española, ISSN 0210-9174, Tomo 55, Fasc. 3-4, 1972.
• (en) Peter Rickard: A History of the French Language. Editor: Routledge, 2003. ISBN 1134838778, 9781134838776.
• (fr) Olivier Bertrand: Histoire des mots français. Éditions Garnier, 2018.
• (fr) Adolphe Hatzfeld et al.: Dictionnaire général (1890-1900). Traité de la formation de la langue. Paris, Delagrave, 1890.

Vinclos externos

• L'influence néerlandaise sur le vocabulaire français.

Se veiga tamién

• Neerlandismos en anglés.