Escandinavismos en francés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Os escandinavismos en francés se remontan en a suya mes gran part a lo lexico d'orichen norrén que se conservó en Normandía dimpués de l'asimilación lingüística d'os pobladors vikingos a la comunidat galorromana local. Destacan os termins referents a la mar y la vida d'os mariners, manimenos también bi ha parolas ligadas con l'agricultura, a ganadería y a vida en o medio rural. Belunas desapareixoron en a mesma Edat Meya u quedoron restreitas a las luengas d'Oil locals como o normando.

Ataque vikingo, imachen de 1100, feita en l'abadía de Saint-Aubin.

Lexico referent a comunidaz marineras

O francés ampró de l'idioma normando parolas d'orichen escandinavo referents a la mar, os mariners y a piratería. Ye en este tipo de lexico a on que se troba correspondencias foneticas mes evidents con o norrén orichinal. A vegadas no ye claro si bella parola como marsouin ye un escandinavismo, un anglicismo u un neerlandismo por o pareixiu entre as primeras fases d'evolución d'as luengas chermanicas tamién por haber-ie una relación con o medio marín en os contactos entre os franceses, anglosaxons y holandeses.

Comparanza fonetica

Eixemplos de termins tecnicos u atros, maritimos u no, pasaus a lo francés por meyo d'o normando

Francés	Norrén antigo
agrès	greiði
bite (< norm. [a]biter)	bita
bitte	biti
bord	borð
bouline	bóglína
brayer	bræða
carlingue	karling
cingler (anc. sigler)	sigla
dalot	dæla
duvet (anc. dum, dunet)	dúnn
écoute	skaut
équiper	skipa
étrave	stafn
flaner	flana
flotte	floti
girouette (< patois de Loira guiroué)	veðr-viti
gréer	greiða
guindeau	vindáss
guinder	vinda
hauban	höfuðbenda
houle	hol
hune	húnn
itague	útstag
nantir (< norm. nant, namps)	nám
quille	kilir (plur. de kjölr)
racage, raquer	rakki
raz	rás
riper	rispa
ris	rif
rogue (substantivo.)	hrogn
rogue (adch.)	hrókr
tangue	tangi
tillac, tille	þilja
tolet	’þollr
vague	vág (acc.)
varangue	vrang
varech	vágrek

Clasca d'as embarcacions

Carlingue, sinyalada con o numero 17.

• Carlingue: sobrequilla en castellano y catalán.
• Dalle: desaugue. De dalle deriva dalot con sufixo -ot.
• Étrave: estrave en castellano, roda de proa en catalán.
• Hune: cofa en castellano y catalán.
• Quille: carena.
• Tillac: puent superior d'un baixiello.
• Varangue: varenga en castellano y catalán.

A palabra brant (prova), desapareixió en a Edat Meya.

Aparellos

O laberinto de cordaches, de vergas y de velas, que fan part de l'aparello d'un baixiello velero. En conchunto recibe a denominación en francés de greement, formau por os agrès.

• Agrès: aparellos.
• Bitte: estructura vertical d'amarrache.
• Bouline: bolina en castellano y catalán.
• Guindeau: estopor en castellano, molinet, serreta en catalán.
• Hauban: obenque en castellano, obenc en catalán.
• Flotte: a part d'o principal significau actual de flota, armada, tiene atros significaus como boya.

Verbos relacionaus con as embarcacions

Embarcación remolcando un atra embarcación en o puerto de Rostock. O verbo remolcar en francés ye touer si se refiere a estos medios de transporte marins u fluvials.

• Brayer: peguntar, aplicable a la impermeabilización d'embarcacions.
• Cingler: navegar a embarcación con un rumbo determinau.
• Équiper: tripular. Si se refiere a naus de guerra: "armar" u "dotar".
• Greer: aparellar.
• Guinder: guindar en castellano y catalán, izar en castellano, issar en catalán.
• Riper: lascar en castellano, amollar en catalán.
• Tanguer: cabecear u arfar en castellano, capficar u amorrar-se en catalán.
• Touer: remolcar embarcacions.

O escandinavismo cingler u singler ha plegau a lo castellano y a lo catalán como singlar. No s'ha de confundir con o verbo homofono d'orichen latín cingler, relacionau etimolochicament con l'aragonés cinglo, cingla y cacingla.

Medio marín y costero

Mar cruzada, una houle chica.

• Houle: un estau d'a mar con ondas que fegura en a escala Douglas.
• Mare: basa.
• Raz: corrient d'augua.
• Vague onda de mar.

A parola raz ("corrient d'augua") tiene o mesmo orichen que o l'anglés race, tamién un escandinavismo. En os dos idiomas bi ha un uso d'esta parola aplicau a las mareas: raz-de-marée (cuan puya a marea y invade a costa), y tidal race ("corrient de marea").

Fauna y flora marinas y costeras

Chroicocephalus ridibundus con plumache d'hibierno. Esta especie ye conoixida en francés como Mouette rieuse.

• Crabe: cancro de mar. Podría estar devez un escandinavismo y un neerlandismo que han entrau en o francés estándard dende o normando y o picardo respectivament.
• Fia: molusco bivalvo d'a familia Mactridae, mes a sobén d'as especies Mactra stultorum y Mactra glauca, tamién conoixius en francés con a denominación de Mactre.
• Lieu: un peix gadiforme, referindo-se en especial a unas especies d'o chenero Pollachius y a unas especies d'a familia Merlucciidae. Ye sinonimo de colin.
• Marsouin: cetacio d'a familia Phocoenidae.
• Mouette: au d'a familia Laridae.
• Rogue: ovarios de ciertas especies acuaticas comestibles que se presentan como pochas de chicoz uevos antes d'a frega.
• Turbot: rodaballo.
• Varech: un tipo d'alga tamién denominau en francés con o bretonismo goémon.

No ye claro si marsouin ye un escadinavismo, un anglicismo antigo u un neerlandismo, en tot caso se remonta a lo protochermanico *mariswīną ("tocín de mar").

Lexico referent a comunidaz agricolas y ganaderas

Aparellada d'un caballo. Os aparellos se dicen en francés harnais, parola d'orichen norrén.

Bi ha un lexico relacionau con o medio rural de tierras d'interior que incluye aspectos relacionaus con as edificions, a vida familiar, a fauna, a flora, o treballo d'a tierra, a cría de bestiar, y ferramientas agricolas. Tot esto indica que os colonos escandinavos de Normandía no yeran una chica aristocracia guerrera y que muitos d'os escandinavos que se i establioron yeran labradors y pastors devez que guerrers vikingos.

• Accroupir.
• Bigot: beato.
• Brayer: peguntar, aplicable a la impermeabilización d' embarcacions.
• Coterie.
• Duvet: plumón.
• Houspiller.
• Nique.
• Quenotte: dentet
• Rincer: aclarir, esclarir, ixauguar.

Son escandinavismos d'o normando que no se troban en francés hogue (haugr en islandés, cognato de hauteur en francés estándard pero con significaus como "cabezo" u "puyalón") y flonde (flynder en islandés, carrelet en francés eestándard).

Edificios

Guichet ubierto en una esportalada en Paris.

• Cottage: mas.
• Guichet: puerta chica en una esportalada.
• Haras.

Ferramientas, instrumentos, trastes

Recipients de leit que en francés se conoixen como Bidons à lait.

• Bidon: bidón. Ye una palabra con equivalents en noruego y islandés y documentada en francés dende o sieglo XV en Normandía. Estió una palabra de mariners dica zaguers d'o sieglo XVIII.
• Crochet: gancho. A palabra crochet fue amprada d'o francés por o castellano convertindo-se en corchete.
• Harnais: aparello. En aragonés medieval existió a palabra etimolochiament relacionada arnés, que teneba un significau mes amplo que os aparellos d'os abríos.
• Raccrocher.

Atros campos lexicos

• Amadouer: afalagar. Podría relacionar-se con o norrén antigo mata y o danés mada (dar de minchar), pero tamién s'ha quiesto interpretar a partir de l'occitán amador.
• Bagage: bagache, equipache. Deriva d'o francés antigo bague, que bel autor lo ha relacionau con o norrén antigo baggi ("paquet"), manimenos no ye pas seguro porque bague tiene cognatos con significau de paquet, saco u bolsa en friulián (bage), veneciano, emilián, lombardo, occitán antigo (baga), y mesmo en aragonés (baga, baguera, bagueras, baguereta, bagareta, bagaril, baguereta). As formas aragonesas tienen significaus relacionaus con tipos de cuerdas, (beluna pa ligar fardos y cargas), y Coromines las interpreta a partir d'o latín BACA (eslabón d'una cadena).
• Flâner: dondiar.
• Fringale: fambre canina.
• Marmonner.
• Mièvre: desucau.
• Ricaner.
• Rogue.

Destaca hanter d'o norrén antigo heimta (conducir a casa), devez relacionau con heim (fogar, casa), encara que o significau siniestro se remonta a los tiempos de l'anglomanía y o encomienzo d'a novela fantastica.

Escandinavismos recients

• Alque, d'o noruego alke.
• Édredon.
• Eider.
• Elfe.
• Geyser: guéiser. Deriva de lo islandés Geysir, nombre d'un celebre guéiser d'Islandia, devez derivau de lo verbo gjósa (« brollar », « ruixar »), en norrén antigo geysa, que ha orichinau to gush en anglés.
• Harfang: Bubo scandiacus, d'o sueco harfång.
• Nickel.
• Renne.
• Rutabaga.

Toponimia norrena en Normandía

A terminación -thorp(e) significa "lugar" y ye común en a toponimia anglesa (Scunthorpe). O toponimo normando Torgistorp se remonta a Thorgilsthorp y significa "lugar de Thorgils".

Un atro toponimo normando d'orichen norrén ye Étalonde, que se remonta a Steinslund.

Bibliografia

• (es) Carlo Tagliavini: Los orígenes de las lenguas neolatinas. Introducción a la filología romance. Fondo de Cultura Economica, 1973.
• (es) Gramática francesa: Larousse Editorial, S.A, 2000.
• (en) Peter Rickard: A History of the French Language. Editor: Routledge, 2003. ISBN 1134838778, 9781134838776.
• (en) Ralph Paul De Gorog: The Scandinavian element in French and Norman: a study of the influence of the Scandinavian languages on French from the tenth century to the present. Bookman Associates, 1958.
• (fr) Adolphe Hatzfeld et al.: Dictionnaire général (1890-1900). Traité de la formation de la langue. Paris, Delagrave, 1890.

Se veiga tamién

• Adstrato escandinavo en anglés.

Vinclos externos

Le vocabulaire normand d'origine scandinave.