Pronombre adverbial i/bi/ie en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

O pronombre adverbial i/bi/ie se remonta a o latín IBI. Existe en muitas luengas romances amés de l'aragonés: italiano, vi u ci (< ECCE IBI u < ECCE HIC), francés, y, occitán, i, gascón, catalán, hi.

O significau ye sobretot a significación inicial d'adverbio espacial, y ixo, d'acuerdo con a desaparición d'a diferencia entre ablativo y acusativo, tanto pa reposo (en un puesto) como pa dirección (ta un puesto).

Tamién puede representar pronominalment situacions adverbials expresadas con a preposición ad en relación con personas y cosas.

Asinas sirve pa reproducir un complemento preposicional que empieza con cualsiquier preposición que no siga de ni asimilable a de

Una d'as tendencias foneticas de l'aragonés ye conservar as sonoras intervocálicas latinas, -B-, -D- y -G-, y por ixo dicimos leixiva, rader y peder. A evolución de IBI en aragonés de bella val axial, mas que mas as vals occidentals yera, doncas, BI, con a consonant conservada, (y en cheso se diz encara IB-ye como variant de bi-ye).

En aragonés semontanés, ribagorzano y d'a mas gran parte d'o Prepireneu s'emplegaba, manimenos a variant I, que coincide con atrás luengas, y pareixe que esta variant yera la que s'emplegaba en a val d'Ebro y ya la que trobamos en os textos medievals.

En as parlas orientals como as d'a Ribagorza, A Fueva, Chistau, y a vegadas en Bielsa (aragonés centro-oriental y aragonés oriental) se fa servir a variedat dezaga o verbo -ie:

• no puedo meter-lo-ie.

En as zonas occidentals (aragonés occidental y aragonés centro-occidental), s'emplega bi dimpués d'o verbo, como en cheso:

• se podría fer una planeta que, plantando-bi arbols, sería bien maja.

Tradicionalment s'ha considerau que i/bi teneba uso nomás que como locativo y complemento preposicional que encomienza con a, en, ta, y con o verbo haber. Manimenos bel intresau en a lingüística ya heba visto que en a literatura chesa se rechistraba un emplego que feba referencia a un complemento preposicional que teneba con. Agora se'n tiene millor conoixencia y se vei que ye como en atras lenguas:

• Como locativo:
  • Ya bi ye (Panticosa)
  • Porque i vaz a divertir-tos (Estadilla)
  • No i soi estato (Bielsa)
  • No bi so estada (Echo)
  • Y si conviene no ir ta lo café no i be (Echo).
  • La patata se i cría bien (Chistau)
  • La chen se'n va y no i torna/ y els qu'encara i están (Campo)
• Como complemento preposicional: muitas vegadas con os verbos pensar y creyer, como pensar en bella cosa o creyer en bella cosa.
  • De pensar-ie me sall tenya (Pastorada de Torres)
  • No i pienso. (Viello Sobrarbe).
  • No i creigo. (Viello Sobrarbe).
• Como complemento preposicional de puesto: emplego intermedio entre as dos modalidaz.
  • Por o calso d'o filo no i pasa. (Penya Montanyesa)
  • Un matical de buxos que no i puedes pasar. (Penya Montanyesa). I en este caso substituye a Por ixe puesto, que tiene un matinal de buxos.
  • ¿ Qué metes en a cambra? no i meto cosa (Fovano).
  • Vas ta Troncedo? No i voi.
  • Toz los anyos se dan cita los fillos de Graus – los que i son y los que anyoraus sonyan que i están. (Graus). I en esta caso substituye a En Graus.
• Con verbos que prenen un sentiu especial: veyer, saber, y, como dimpués explicaremos, haber:
  • No se i vede guaire; fa fosco encara. (Benás).
  • Ya ye viella, no i vei. (Aragonés de Sierra Ferrera).
• Con haber: A forma impersonal d'o verbo haber ye acompanyada d'este pronombre. As formas orichinals son
  • Haber-bi: Bi ha /B'ha, Bi heba, Bi hese.
  • Haber-ie: I ha, I heba, I hese.
  • Pero bi ha variacions, como l'ansotán bi'sta (con un uso curioso d'o verbo estar como impersonal con paralelo en rumano), y as formas castellanizadas i hai, i habeba, ecetra…

Situación d'o pronombre adverbial en aragonés

En o proceso de desaparición de l'aragonés o pronombre adverbial ye uno d'os primers caracters que desapareixen: l'emplego regular nomás se da que en bella val d'o Pireneu Axial mas conservadera y fuera d'as vals axials en zonas orientals, (Viello Sobrarbe, A Fueba y Ribagorza), on influye que se charre amán o catalán, on lo emplego ye encara fuerte y regular.

En bel puesto l'emplego en a forma impersonal d'o verbo haber, se fa con a forma castellana d'este mesmo verbo, (que paradoxicament tiene a y fosilizada).

• I ha /yá/ > I hai /yay/.

Fruito d'as combinacions con l'atro pronombre adverbial en/ne, a vegadas en a forma personal d'o verbo haber i trobamos tamién una n, que no complementa cosa y que forma con a i una ny:

• n'i hai /ny hai/