Aragonés grausino

Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla.

Grausino Grausín
Variedat de l'aragonés
Situación d'o grausino en o baixo-ribagorzano
Localización cheografica
Territorios	Ribagorza
Lugar(s) principal(s)	Graus
Sociolochía
Vitalidat	Meya
Literatura
Escritors principals	Luisón de Fierro Ana Tena Puy
Rasgos dialectals	Variedat d'o baixo-ribagorzano

L'aragones grausino ye a parla local aragonesa que se charra en Graus (Uesca). Ye una d'as variedatz d'o baixo-ribagorzano millor conoixidas.

Fonetica

Tot y que predomina a diftongación d'as Ĕ y Ŏ curtas latinas, como ye normal en aragonés, bi ha casos de no diftongación, como en atras localidatz de Ribagorza Baixa occidental:

• Ben: bien.
• Pedra: piedra.
• Den: dient.
• Peu: piet.
• Cova: cueva.
• Bou: buei.

Como ye normal en baixo-ribagorzano os diftongos -ie- d'o sufixo -iello s'han simplificau en -illo:

• ixartillo, armilla, manimenos se conserva maciello.

Veyemos -o final pero ye fácil que siga recomposada, porque se troba en casos que l'aragonés cheneral no en tiene.

• aviento, aiguazo, espantallo, anyo
• mano

Manimenos se pierde en bell caso dezaga -ll-, seguindo una tendencia común con o catalán que no se troba guaire en aragonés:

• batall ("batallo"), corcoll ("corcollo").

A -y- d'a epentesi antihiatica se conserva en sayeta.

Encara que a F- inicial se conserva, bi ha muitos castellanismos foneticos:

• abllá ("fablar"), iel, ígado ("figado"), ornillos ("forniellos").

Encara que a Ch- inicial se conserva, bi ha muitos castellanismos foneticos:

• hueves ("chueus"), hodías ("chodías"), harra ("charra").

Bi ha poquetz eixemplos de conservación d'as oclusivas xordas intervocalicas latinas:

• Crepa.
• Batallá.
• Batall.
• Mallata.
• Trucador /trucadó/.

A -x- se conserva bien, y como ye normal en ribagorzano ye acompanyada d'una i:

• un coixo baixaba por una baixada con un faixo de buixos

A x- inicial ye acompanyada d'una i- inicial en probables derivaus de palabras latinas con prefixo ex-, como en belsetán y chistabín:

• ixambre, ixolomá, ixafegá.

Y tamién en belatro caso como ixada < ASCIATA.

A -ll- que vien d'os grupos -LY-, -C'L-, -G'L-, ecetra...se conserva en muitos casos, pero tamién trobamos a sobén castellanismos foneticos:

• vieha ("viella"), cohé ("cullir", "agafar"), conseho ("consello"), muertihuelo, cehas ("cellas").

A -it- que provién d'os grupos latinos -CT-, -ULT- se conserva mal, y abundan os castellanismos foneticos:

• mucho ("muito"), cochilla, escuchá ("escuitar").
• ocho ("ueito"), leche ("leit"), noches ("nueitz"), fecho, encara que bi ha bell testimonio de fei (forma baixo-ribagorzana de feito).

Como bi ha dobletz de formas chenuinas y castellanizadas, bi ha casos de rearagonesización incorrecta con xeada, (dende o punto de vista d'os que no reconoixen l'aragonés, hiperdialectalismo):

• dixá/dehá, treballá/trabahá
• muixar en cuenta de mullar

Morfolochía

L'articlo en os zaguers anyos coincide con o castellano, pero ye domentau l'emplego antigo de lo, es, y a. Puede contrayer-se con a preposición por: pol camino, pola pllaza.

L'emplego de tot se reduce a quan va dezaga de l'infinitivo, en os atros casos se diz to, y 'to puede emplegarse pa totz os cheneros y numeros:

• te lo voi a 'spllicá tot
• to la semana, to las cosas.

O pronombre presonal ellos de l'aragonés cheneral ye en grausino els, ye analochico de él.

Bi ha verbos que en grausino y en catalán son d'a conchugación en -ir y en castellano en -er:

• cosí, atreví, chenerals en aragonés.
• tení, querí que contrastan con l'aragonés cheneral tener, querer.

Bi ha muitos infinitivos d'a conchugación en -ar transformaus en -iar:

• obriá, mezcliá, femiá, propulsiá

Bi ha manca de diftongación en as formas rizotonicas de bell verbo, por analochía, feito común en baixo-ribagorzano:

• Tos rogo, Mos recorda.

O diminutivo -et a vegadas pierde a -t final:

• barranquet, balsonet
• coralé, brazolé, banqué

Lexico

Las palabras comuns con o catalán adintro d'a mesma isoglosa pero no comuns con l'aragonés a l'ueste de Ribagorza y los catalanismos son dificils de distinguir y representan dica un 4 % d'o lexico:

• Asquena.
• Filosa: rueca.
• Patamoll.
• Sillón: cognato de lo catalán nordoccidental selló.

Bi ha palabras tipicas de Graus y redolada:

• Mirondia(r).
• Rafollada.
• Susoído.
• Torán

Pero cada vegada son más comuns os castellanismos, tanto os foneticos (que ya en hemos charrau), como os lexicos.

Bibliografía

• (es) Maria Luisa Arnal Purroy: El habla de la Baja Ribagorza Occidental, Institución Fernando el Católico, 1998.

Vinclos externos

• Diccionario Grausín.
• Poemas en grausino de Luisón de Fierro

Variedatz orientals de l'aragonés
Altorribagorzano (Benasqués) | Chistabín | Fovano | Meyorribagorzano (incluindo o campés) | Baixorribagorzano (incluindo o foncense, estadillano y grausino)