Abrir menú principal
Trueixos de diferents simients.

Un trueixo u troixo (puet estar que d'o gotico <*trauhs[1]; «mundo», «arcón») ye, de forma extensiva, un recipient de muita superficie en comparanza con a relativament poca profundidat, que se fa servir ta concaber un montón de bell arido, encara quan este puede despuntar muito por alto d'as paretz d'o recipient.

A parola tamién describe os elementos de deseparación móbils (tablas de madera, trallos u qualsiquier atro) que se fa servir pa delimitar o espacio ocupau por o montón d'un mesmo arido a nibel de a base y privar que se mezcle con o contiguo, especialment quan a materia ye amontinada directament sobre o suelo y sin garra recipient que a concaba. En l'Alto Aragón, esta forma de trueixos s'emplegan tipicament pa delimitar a base d'os montons de cerials apilaus en o suelo en un granero, os montons de nueces, almendras y belatros fruitos cullius una mesma anyada y tipicament que s'atesera pa que s'oreyen en o suelo d'un reposte u en a falsa, as trunfas, as cebollas y belatras hortalicias que s'almagazena directament sobre o suelo d'a falsa, etc.

En o Baixo Aragón, zona oliverera, se documenta a forma castellanizada truejo, «trueho», con a qual se fa referencia a os trueixos a on que se dipositan as olivas que en espera de que las muelgan,[2] en as dependencias d'un molín d'azeite u almazara.

ReferenciasEditar

  1. (es) MOTT, Brian L. (2000). Diccionario etimológico chistabino-castellano castellano-chistabino. Institución «Fernando el Católico». Zaragoza. ISBN 84-7820-553-5
  2. (es) QUINTANA i FONT, Artur et al. (2004), El Aragonés residual del bajo valle del Mezquín (2ª Ed.); Ayuntamiento de Torrecilla de Alcañiz. Torrociella d'Alcanyiz. ISBN 84-606-3647-X