Conchuncions adversativas en aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

As conchuncions adversativas son as conchuncions que encaran dos oracions y termins sintacticos de tot u parcialment. En aragonés actual a conchunción adversativa mes comuns ye pero. Atras conchuncions adversativas son sindembargo, manimenos, sino y ciertas locucions conchuntivas.

Conchunción sindembargo y manimenos

A forma sindembargo ye propia de l'aragonés occidental y a forma manimenos (mas ni menos) de l'aragonés oriental y aragonés centro-oriental dende o bergotés dica o benasqués. Sindembargo y manimenos dan un matiz emfatico.

Conchunción sino

A conchunción sino tamién se fa servir en aragonés, (no ye trigo sino mestura).

Locucions conchuntivas adversativas

Bi ha locucions conchuntivas con función adversativa como con tot y con ixo , con tot, encara que, a tamás que, por mas que, ecetra.

Conchunción adversativa mas/mes

En aragonés medieval a conchunción mas/mes podeba tener sentiu adversativo como en francés y en as etapas medievals d'atras luengas romances:

et se clamaua Princep de Aragon et Conte de Barçelona, que non quisieron consentir los aragoneses que se clamasse Rey mas su fillo Don Alfonso se clamó Rey.

Encara se puede sentir en belsetán, pero muit poco:

• Mes se quiers cosa cal fer-s'iye.

Bibliografía

• (es) Chabier Lozano Sierra: Aspectos Lingüisticos de Tella. Aragonés de Sobrarbe (Huesca). Gara d'Edizions - Prensas Universitarias de Zaragoza - Institución Fernando el Católico. 2010
• (es) Francho Nagore: Gramática de la Lengua Aragonesa. Zaragoza. Mira Editores. 1989.