Fuents Claras

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Ista pachina ha menester d'una revisión por un corrector ta amillorar a suya ortografía, a suya gramatica u o suyo vocabulario.

Fuents Claras (Fuentes Claras en castellano) ye un municipio de la provincia de Teruel (Aragón), situau en la comarca de lo Xiloca. La suya población ye de 435 habitants en una superficie de 36,64 km² y una densidat de 11,87 hab/km².

Fuents Claras
Municipio d'Aragón
Ilesia de Fuents Claras
Entidat  • País  • Provincia  • Comarca	Municipio  Aragón  Teruel Xiloca
Partiu chudicial	Calamocha
Superficie	36,64 km²
Población  • Total  • Densidat	435 hab. (2018) 11,87 hab/km²
Altaria  • Meyana	909 m.
Distancia  • 66 km	enta Teruel
Alcalde	sin etiquetar
Codigo postal	44340
Parroquial  • Diocesi  • Arcipestrau  • Parroquia	Teruel y Albarracín Calamocha Sant Pero Apóstol
Coordenadas
Fuents Claras Fuents Claras en Aragón
Web oficial

Lo municipio ye conoixiu en haber-se rechistrau allí la temperatura mas baixa en zonas habitadas d'Espanya: –30 °C en a estación d'observación meteorolochica de Calamocha-VOR lo 17 d'aviento de 1963, récord oficial de fredo reconoixiu per l'Achencia Estatal de Meteorolochía (AEMET).

Toponimia

Lo toponimo que denomina a la localidat se debe a lo gran numero de fuents claras y naixederos que surten en o termin y que sirven de refuerzo a lo cabal de lo río Xiloca, regando una ampla y fertil vega. En o escudo de la población s'utiliza la versión en latín, Fontes Clarae, sin que d'ixo se deduzca forzosament que l'actual población tienga orichen romano.

En lo texto de l'adchudicación de decimas 1205 por part de Remón de Castrocol ya leyemos Fuentesclaras. L'actual chentilicio Fuentesclareros en plural ye rearagonesizable como Fuentsclarers.

Cheografía fisica

Ubicación

Sabina milenaria, un de los árbols mas singulars de Fuents Claras.

Lo municipio tiene una superficie de 36,64 km² con una población de 445 habitants (INE 2020) y una densidat de 18,37 hab/km². Se troba a una distancia de 7 km de la capital comarcal, Calamocha; a alto u baixo 65 km de la capital de provincia, Teruel, y a alto u baixo 110 km de Zaragoza.

Orografía

Fuentes Claras s'asienta sobre una terraza cuaternaria, chunto a lo leito fluvial de lo río Xiloca, de sedimentos travertinicos; ye decir, acumulacions de carbonato calcico precipitadas quimicament arredol de restas vechetals. Enta las marguins de lo río las acumulacions cuaternarias de abanicos aluvials y glacis forman superficies planas de gran amplaria, recorridas per chicotas ramblas, de las cualas la mas important ye la de Cañamaría, en la marguin occidental de lo río.

S'observa una fuerte transformación de lo paisache, que ha provocau l'aparición d'un fenero degradau con dominio de lo lastón, chunto a lo cual existen grans extensions de cautivos. Destaca en as cercanías, a lo este de lo lugar, lo Pico Valdellosa, con 1.227 m d'altitut, y en o cual s'ubican matorrals de porteye arbustivo con presencia de encinas y quejigos. Fuents Claras se troba en a val u depresión de lo Xiloca, los suyos paisaches son de zonas cautivadas, muit planas, entre las cuals trobamos zonas de regano y de secano.

La presencia de lo río Xiloca y las suyas amplias zonas de cautivo fa que sía una important zona d'alimento de la grulla comuna. La cercanía a la Lacuna de Gallocanta permite que estas aus se desplacen en gran numero a las distintas zonas de cautivo de la zona de lo Xiloca.

Hidrografía

Dentro de lo patrimonio natural de Fuents Claras son destacables los uellos, manantials naturals semellants a los d'atros municipios de la val de lo Xiloca, asinas clamaus en a comarca per la suya forma circular u ovalada. En estar una zona tan plana afloran en a parte mas baixa. Son cinco masas d'augua de chicota extensión y son conectadas entre ellas per cequias que aprofitan la suya augua pa regar. La masa d'augua mayor ocupa uns 1.000 m². En o municipio se denominan Las Balsas. La profundidat maxima ye entre tres y cuatro metros y la minima ye d'uns 35 cm. Los materials calsinosos de la tierra son d'una gran permeabilidat, permitindo que l'augua se infiltre dica l'acuifero, alimentando a lo río Xiloca.

Ye una zona sobrebuena pa alufrar la milaneta, la garra u la anade reyal. Tamién son muitos los cangrillos de río.

Lo paisache de los uellos ye muito vistoso en cualsequier epoca de l'anyo. Lo ciclo vital, tanto de los cautivos como de la vechetación natural, permite una variación en a tonalidat cromatica: verdes, ocres, amariellos, etc., irán cambiando a lo largo de l'anyo.

Dentro de l'arquitectura popular vinclada a los usos de l'augua destacaremos las pesqueras, lo lavador de lo Chopo, lo lavador de lo Manantial (u Lo Cubo), y las Suertes. Mención aparte mereixen la fuent de Piedra y lo molín farinero, descritos en l'apartau de patrimonio civil.

Lo lugar ye recorriu per cuantos cursos d'augua: lo Molinar, lo Chicot y lo Lavador, toz éls con un curto trayecto que oscila arredol de los dos kilometros. Lo río Xiloca ye denominau como lo río de la Mai. Lo Molinar (u cequia de lo Molino) ye una desviación de lo Xiloca que, partindo de lo termin municipal de Camín Reyal, riega l'ampla partida que leva lo suyo nombre y suministraba la fuerza de lo molín farinero. Lo río Chicot tiene lo suyo orichen en a fuent de las Hondoneras, confluyendo con o de lo Lavador a uns 300 m de lo suyo desembocadura en o río Mai. Lo Lavador naixe en a fuent de lo Cubo, chunto a un bien cudiau lavador publico de lo cual prene lo nombre, pa trascruzar posteriorment lo barrio de Sant Ramón, y replega en o suyo camín lo desaugüe d'asaber-las pesqueras caseras. Sobre este zaguer río i hai tamién unatro lavador municipal, lo Lavador de lo Chopo.

Atras fuents, menors en dimensions que l'anterior pero de gran importancia, son las representadas en as seis radices de la Olma que figura en o escudo y bandera: los Cuadrones, Ampón, Esteban, fuent de lo Lugar (la Fuent), de lo Cubo y fuent de la Virchen de los Navarros. Existen atras fuents como lo canyo Mana, Hondoneras, Cantalobos u la de lo Escorial, d'augua calient y salada, de la cuala se diz que tiene propiedaz curativas.

Las pesqueras son chicotas fuents que naixen debaixo de las viviendas y que se canalizan enta las cequias proximas u con endrecera ta lo río Lavador en dos de los suyos barrios (Sant Ramón y las Fuents).

Galería fotografica

• 
  Os uellos de Fuents Claras-Lo Pueyo.
• 
  Balsa (1).
• 
  Balsa (2).
• 
  Balsa (3).
• 
  Balsa en a dentrada de lo lugar.

• 
  Manantial de lo Cubo.
• 
  Río Lavador.
• 
  Río Chicot.
• 
  Manantial de los Cuadrones.
• 
  Lavadero d’o Chopo.
• 
  Lavadero de lo Cubo.
• 
  Tipica pesquera.

Clima

A grans rasgos, las variables climaticas de la Comarca de lo Xiloca definen un clima de tipo mediterranio continentalizado fresco y bella cosa ixuto. Permite cautivar, sin necesidat de riegos artificials, cerials de grano d'hibierno, vit y plantas resistents como lo zafrán. En os hortals y campos con mayor grau de humedad ye posible lo cautivo de leguminosas, hortalicias, bulbos y bels cautivos industrials como lo canyimo y lo lino. Tamién cualques arbols fruitals, encara que en este caso cal tener en cuenta lo risgo que se produzca bella chelada en primavera y arruine la florada d'estes y impida la replegada posterior de los fruitos, lo que succede con bella frecuencia.

Lo 17 d'aviento de 1963 se rechistroron –30 °C en a estación meteorolochica instalada chunto a lo centro de comunicacions pa la navegación aeria Calamocha-VOR sito en o termin de Fuents Claras, dato que suposó lo récord oficial de fredor en zonas habitadas d'Espanya. Todas dos poblacions s'adchudican la paternidad de dita marca, ya que lo observatorio se denominaba oficialment Calamocha-VOR; pero d'alcuerdo con os datos oficials de AEMET en aviento de 1963, calendata d'o récord de fredo en zonas habitadas de Espanya, yera ubicau en Fuents Claras, a que lo suyo termin municipal corresponden las coordenadas cheograficas.

Historia

Las restas mas antigas de población en l'actual termin municipal son ubicaus en La Loma d'el Prau, zona situada chunto a la muga municipal con Lo Pueyo (actualment pedanía de Calamocha). Sería una ciudat romana d'epoca imperial, talment fundada en albandonar-se lo nuclio urbano en o municipio vecino (actual chacimiento de Sant Esteban) y bi habría existiu dica lo sieglo IV d.C. Actualment no quedan estructuras en superficie, encara que las restas afloradas han estau cuantiosas.

La primera referencia sobre l'actual nuclio de población de Fuents Claras amaneixe en a Adchudicación de Diezmos y Primicias de las Aldeas de la Comunidat de Daroca de lo Bispe de Zaragoza, Remón de Castrocol, en 1205, replegada en o Libro vermello de l'Archivo Colechial de Daroca, asinas como en un documento de lo Monesterio de Casbas en 1209. La suya creyación s'enmarca en o proceso historico de la Reconquiesta, en l'abance de las tropas cristianas de la Corona d'Aragón enta lo sud. Dau que los reis de Aragón no nomás tenioron que enfrontinar-se a los musulmans entre la Edat Meya –la guerra contra lo Reino de Castiella tamién estió present– lo rei Chaime II ordenó la construcción de la Ciudadela de Fuents Claras en l'anyo 1337. La zona de lo Xiloca en a cuala se troba la localidat fue atacada entre la Guerra de los Dos Peros entre 1356 y 1369. En 1361 Pero IV mandó realizar obras en a Ciudadela pa resistir l'ataque castellano.

Dende 1414 Fuents Claras perteneixió a la Comunidat de Daroca, en concreto a la Sexma del río Xiloca, y dende alavez la suya historia sería ligada a dita Comunidat dica lo sieglo XIX. Tamién perteneixió succesivament a la sobrecollida (dende 1488-1495), a la vereda (dende 1646) y a lo correchimiento (dende 1711) de dita ciudat.

Con a creyación de la nueva división territorial d'Espanya de 1833 en provincias la población fue incluyida en a Provincia de Teruel. En 1834 se constituyió como concello y dende alavez forma parte de lo partiu chudicial de Calamocha.

Seguntes lo Diccionario geográfico-estadístico-histórico de España y sus posesiones de Ultramar de Pascual Madoz, en 1847 lo lugar teneba 412 habitants repartius en 120 casas y manteneba una escuela de primeras letras con 40 alumnos. La economía local se basaba en o cautivo de trigo, centeno, hordio, canyimo, trunfas, cibada y zafrán. Tamién mencionaba lo bestiar lanar y l'abundancia de codornices, truitas, enguilas, barbos y cangrillos de río. Amás existiba una pedrera de ruellos de molín farinero, hue albandonada. Igualment, la Enciclopedia Espasa indicaba en 1924 que lo municipio ya heba triplicau la suya población en 1910 (1179 habitants, repartius en 559 casas), en 1920 se manteneba estable (1178) y manteneba lo cautivo de cereales, legumbres y trunfas como prencipal fuent de riqueza; amás, la pedrera de ruellos de molín seguiba en activo.

En 2003 s'incorporó a la Comarca de lo Xiloca, dentro de lo Plan de Comarcalización d'Aragón.

Cheografía humana

Demografía

Evolución demografica

1362 f 1495 f 1842 1857 1860 1877 1887 1897 1900 - - 412 772 841 959 991 1.113 1.123

1910 1920 1930 1940 1950 1960 1970 1981 1991 1.179 1.178 1.318 1.540 1.421 1.369 1.103 909 742

1992 1994 1996 1997 1998 1999 2000 2001 2002 - - 689 - 665 656 650 636 613

2003 2004 2005 2006 2007 2008 2009 2010 2011 589 571 608 641 605 673 663 590 582

2012 2013 2014 2015 2016 2017 2018 2019 2020 576 553 531 528 494 482 461 461 445

2021 2022 2023 2024 2025 2026 2027 2028 - - 434 - - - - - - -

1717-1981: población de feito; 1990- : población de dreito. Fuent: Intercensal en l'INE, Series de población en l'INE y Relación d'unidatz poblacionals en l'INE.

Urbanismo

Arquitectura

Los edificios son de baixa altura, aconseguindo a lo sumo dos u tres plantas. Las construccions tradicionals son de piedra y de gran grosor, fueras de las recients que utilizan materials modernos.

Curiosament lo estilo arquitectonico que impera en os prencipals edificios no ye lo estilo mudéchar aragonés propio de la comarca, sino lo barroco castellano posterior. Igualment destaca la escasa utilización como material de construcción de la rechola a la vista en ditas construccions en favor de la piedra y la sillería.

Prencipals carreras y plazas

• Calle la Plaza. Vial que une la casa de lo lugar con a ilesia Parroquial.
• Calle San Pedro. Tiene inicio debant de la ilesia y d'ella prene lo nombre.
• Calle Sant Ramón. Antes mas uniba dito barrio con a resta de lo lugar antes de quedar unius. Segurament prenió lo nombre de la ermita que lo preside.
• Calle la Fuent. Prene lo nombre de la fuent de piedra que la preside y connecta lo nuclio urbano con o barrio de Lo Santo.
• Calle San Salvador. Ye la prencipal carrera de lo barrio de Lo Santo. Ye formada per una carrera y tres subviales diferents. Prene lo nombre de la ermita homonima.

Toz los vials aluden a figuras relichiosas, puestos de lo lugar u a localidaz vecinas. No i hai carreras dedicadas a personas.

Parques y chardins

Plaza de la Concordia

• Plaza de la Concordia. Espacio achardinau entre la ilesia parroquial, la Casa Gran, l'hostal de la localidat (la Concordia) y las instalacions esportivas.
• Plaza de la Fuent. Situada en a carrera homonima amán de lo río y la ceiquia chicota, salindo enta las afueras. En o centro ye la fuent de piedra, arredol de la cuala i hai un chicot espacio achardinau.
• Parque municipal de San Salvador. Zona verda de chicotas dimensions, situada en o barrio de San Salvador (Lo Santo) a lo costau de la ermita homonima.
• Prado de la Virchen. Chopera situada a las afueras de la localidat chunto a la ermita de la Virchen de los Navarros, adecuau pa picnic u barbacoa.
• Parque de lo pabillón. Zona verda de chicotas dimensions con cafetería, situada a lo costau de lo pabillón poliesportivo.
• Parque infantil. Especialment disenyau pa los mas chicoz, con zona de chuegos infantils. Ye situau en a carrera de Sant Roque, dentrando en o lugar dende la carretera cheneral.

Comunicacions

Historia

Entre muitos anyos la prencipal vía de comunicación de Fuents Claras estió la carretera que une Murviedro con Burgos u N-234, pasando entre atros nuclios de población per Teruel, Calatayú u Soria. Historicament se remonta a l'antiga calzada romana que uniba Saguntum (Murviedro) y Bilbilis (Calatayú), lo que mete de manifiesto la suya gran importancia historica. Parte de lo vial, a l'altura de Fuents Claras, tamién coincidiba con o Camín Reyal medieval que uniba Zaragoza y Teruel. La carretera pasa per las afueras de lo lugar, aproximadament a meyo kilometro de lo nuclio urbano, y se conecta per un vial d'acceso. Actualment ha perdiu gran parte de la suya utilidat con a puesta en servicio de la Autovía Mudéchar u A-23.

Posteriorment plegó lo ferrocarril, con a construcción per la Companyía d'o Ferrocarril Central d'Aragón d'o tramo entre Calatayú y Teruel que dentró en servicio en 1901, con aturada en o vecino lugar de Camín Reyal. Posteriorment, con motivo d'a obridura d'o tramo de Zaragoza a Camín Reyal en 1933 se construyió a gara nova, a caballo de toz dos termins municipals. O tramo Calatayú-Camín Reyal zarró en 1985 y actualment se mantiene la linia Zaragoza-Sagunto, pasando per Teruel. La Estación estió clausurada en 1995, pero lo apeadero sigue en activo dica hue.

En 2001 dentró en servicio lo trampo de la Autovía Mudéchar entre Zaragoza y Valencia u A-23 a l'altura de Fuents Claras. Con a dentrada en funcionamiento en a suya totalidat en 2008 gran parte de lo trafico rodau pasa per esta vía, que transcorre paralela a la N-234 pero un poquet mas luent de lo municipio. Pa dentrar u salir d'ella ye necesario desplazar-se dica Camín Reyal u Calamocha.

Actualment lo lugar se troba situau en un de los prencipals eixes de transporte d'Espanya: lo Corredor Cantabrico-Mediterranio, alto u baixo a metat de lo trampo Zaragoza-Teruel. Ye un corredor transversal que une per autovía (autovías A-23 y A-68) y ferrocarril l'este d'Espanya (Valencia) con o norte d'Espanya (Bilbao y Santander), pasando per Zaragoza.

Carreteras

• Con Teruel y Valencia: Autovía Mudeixar A-23
• Con Zaragoza y País Basco: Autovía Mudeixar A-23 y Autovía de l'Ebro A-68
• Con Madrid: Carretera Nacional N-211 (Mont-reyal-Alcolea del Pinar) y Autovía de lo Nord-este A-2
• Con Cataluña: Carretera Nacional N-211 (Caminreal-Alcanyiz-Tarragona)

Ferrocarril

• Con Teruel, Zaragoza y Valencia: Linia de meya distancia 49: Valencia-Teruel-Zaragoza-Uesca, operada per la companyía Renfe.

Autobús

• Rota Zaragoza-Teruel (chestionada per la interpresa concesionaria Grupo Jiménez)
• Rota Zaragoza-Teruel-Valencia-Alicant-Murcia (chestionada per la interpresa concesionaria Grupo Jiménez)
• Rota Teruel-Mont-reyal-Guadalachara-Madrid (chestionada per la interpresa concesionaria Grupo Samar)

Economía

Tradicionalment las actividaz agropecuarias han constituyiu la base economica de la localidat, encara que en os zaguers anyos ha cambiau la tendencia, estando la industria y la construcción las prencipals actividaz de lo municipio.

Sector primario

Agricultura

Gran parte de lo termin municipal ye ocupau per zonas agricolas con 3.334 hectarias (un 90,4% de lo total), de las cualas 346 son de regano. Lo prencipal cautivo ye lo dedicau a herbacios, con 2.934 hectarias (2.601 en secano y 333 en regano) y los fruitals ocupan 23 (20 en secano y 3 en regano). Destaca lo cautivo de cerials pa grano (trigo, cibada, centeno y hordio) y en menor medida leguminosas, trunfas, vinyals y fruitals.

Pesca

Dada la presencia d'abundants cursos d'augua ye frecuent la pesca de truita comuna, gobio, madrilla, barbo y cangrillo americano u royo (lo cual ha desplazau a l'autoctono cangrillo de río), encara que mas pa lo autoconsumo y pesca esportiva, sin chenerar una industria piscicola.

Ganadería

Per lo que fa a la ganadería destaca lo bestiar porcino con unas 17.500 cabezas; le sigue l'ovino con unas 2.300 cabezas y la resta corresponde a aus y conellos. En total, unas 20.000 cabezas.

Sector segundario

Poligono industrial Azalenguas

En os anyos 90 se construyió lo Poligono Industrial Azalenguas, situau a las afueras de lo nuclio urbano y a lo costau de la carretera cheneral N-234. La factoría mas important de lo mesmo ye una planta adedicada a la fabricación de components pa l'automoción (SMP Automotive Technologies), instalada en 2003, que actualment da emplego a uns 150 residents en a localidat.

Tamién i hai una fabrica de tubos de formigón, un taller de fustería metalica y unatro de fustería de fusta.

Sector terciario

La comarca fa parte de lo Camín de lo Cit, serie de rotas turistico-culturals que siguen los pasos que recorrió Rodrigo Díaz de Vivar, Lo Cit Campiador, en o sieglo XI. En concreto la localidat fa parte de la clamada Rota de las Tres Taifas, entre Calatayú y Cella de 308 km, que se puede recorrer total u parcialment a piet, en bicicleta u en auto.

D'igual traza existen diferents itinerarios en bicicleta, en auto u caminando per los diferents espacios naturals de la Comarca de lo Xiloca: vals, sierras, riberas, cerros, fuents, manantials y selvas.

Lo municipio ye rodiau de destacaus eixemplos de l'arquitectura mudéchar a lo largo de los diferents municipios de la comarca de lo río Xiloca. A mas distancia se troban la ciudat medieval de Daroca y lo Castiello de Peracens, toz dos a uns 35 km de la población. Un poquet mas luent, a uns 70 km, se troba la ciudat d'Albarracín, famosa per la suya conchunto historico.

Respective a espacios naturals ye destacable la reserva natural de la lacuna de Gallocanta, a uns 30 km, la mayor lacuna natural d'augua salada d'Europa.

Per lo que fa l'aloch, dende 2010 funciona l'hostal restaurant La Concordia, situau a lo costau de la ilesia parroquial. Tamién han surtiu cuantas casas rurals pa la practica de turismo rural, en paralelo a la resta d'a comarca.

Simbolos

Escudo de Fuents Claras

Bandera de Fuents Claras

Fuents Claras tiene escudo y bandera oficials. Estioron adoptaus oficialment en 1993.

Escudo

Cuadrilongo con base circular. En campo de gules (royo), con una fuent d'oro (2 canyos d'azur sobre ondas d'azur y archent) cargada d'una olma, de sinople (verda), con as radices d'azur, cargada, a la suya vegada, en o tronco, de la cifra «1663», de loro, y brochant una cinta con o Sinyal Reyal d'Aragón, cargada con a leyenda Fontes Clarae, de sable (negro). A lo trucador, Corona Reyal Ubierta.

Bandera

En un panyo que las suyas proporcions son d'una longaria equivalent a tres meyos de l'amplaria. Lo espacio se distribuye en tres faixas: la primera roya y la tercera amariella, d'igual amplaria (8/36 cadaguna); la segunda u intermedia, de color azul (d'amplo 20/36), en a cual se colocan las suyas armas prencipals: una fuent d'oro (dos canyos d'azur sobre ondas d'azur y plata) situada en o centro de la bandera (inscrita en un rectanglo de 16/36 d'alto per 14/54 d'amplo), cargada d'una olma, de sinople, con as radices d'azur, cargada a la suya vegada, en o tronco, de la cifra «1663», d'oro, y brochant una cinta con o Sinyal Reyal d'Aragón, en a cual se reflecta la leyenda Fontes Clarae, de sable.

Politica

Gubierno municipal

Alcaldes en a Segunda Republica (1931-1936)

Período	Alcalde	Partido
1931	Pedro Manuel Pérez Fuertes	PRR
1931-1934	Enrique Esteban Julve	PSOE

Alcaldes en o periodo democratico (1979-actualidat)

Período	Alcalde	Partido
1979-1983	Antonio Sánchez Sanz	UCD
1983-1987	Mariano Pérez Pellicer	AP-PDP-UL
1987-1991	Mariano Pérez Pellicer	AP
1991-1995	Mariano Pérez Pellicer	PP
1995-1999	Mariano Pérez Pellicer	PP
1999-2003	Mariano Pérez Pellicer	PP
2003-2007	Joaquín Sánchez Romero	PSOE
2007-2011	Joaquín Sánchez Romero	PSOE
2011-2015	Joaquín Sánchez Romero	PSOE
2015-2019	Mª Milagros Gracia Alfonso	PAR
2019-2023	Diego Hernández Bernal	PAR
2023-	Diego Hernández Bernal	PAR

Resultaus electorals

Eleccions municipals
Partido	1979	1983	1987	1991	1995	1999	2003	2007	2011	2015	2019	2023
PAR	-	-	-	2	2	3	-	3	3	7	4	7
PSOE	-	3	3	1	1	-	4	4	4	-	3	-
PP	-	4	4	4	4	4	3	-	-	-	-	-
UCD	7	-
Total	7	7	7	7	7	7	7	7	7	7	7	7

Servicios publicos

Educación

La localidat tiene un centro educativo publico: lo CEIP Nuestra Sinyora de los Navarros, vinclau a lo CRA Goya de Caminreal, con un total de 36 alumnos.

Sanidat

I hai un consultorio, dependient de lo Servicio Aragonés de Salut, y una botica. Depende de la Zona de Salut de Calamocha y de lo Hespital de Teruel.

Cultura

Patrimonio arqueolochico

Chacimiento de la Loma d'o Prau

Se tracta d'un chacimiento arqueolochico de caracter urbano d'epoca imperial romana, existent aproximadament entre los sieglos I y IV. Ye situau chunto a lo linde con Lo Pueyo, d'unas nueu hectarias de superficie. Habió de fundar-se a partir de l'abandono d'o poblau anterior en o Pueyo de Sant Esteban de dito municipio, a tasament un kilometro de distancia.

En superficie no conserva estructuras pero han aflorau diversos obchectos. Destaca un sillar de arenisca, en que lo suyo frent tiene gravau una cabeza de toro u bue con fuellas de acanto, conservau en o Museu de Teruel, asinas como una tésera d'hespitalidat, de bronce con forma de delfín. Tamién han aflorau tégulas y atras restas.

Dito asentamiento son las restas d'actividat humana mas antigos existents en l'actual termin municipal. Podría identificar-se con l'antiga ciudat de Leonica, mencionada en referencias documentals de l'Antiguidat.

Pedrera de ruellas de molín

En as inmediaciones d'a gara de ferrocarril se troba una antiga pedrera de ruellas de molín harinero. D'ella s'extrayeba toba volcanica, un tipo de roca ignia mas bien liuchera, suau a lo tacto y de consistencia porosa, idonia pa estar treballada. Ixo facilitaba la extracción, treballo en bloques de gran grandaria y transporte en distancias curtas. Per ixo tenió un papel relevant en aprovisionar los molins harineros d'a comarca, y posiblement tamién de materials pa la construcción.

D'ella se fació eco lo Diccionario Madoz en 1847 y mas abance la Enciclopedia Espasa en 1924, per lo que estió en activo a lo menos entre los sieglos XIX y XX. Con a plegada d'o ferrocarril y lo zarre d'os molins d'a comarca la pedrera perdió la suya razón de ser y estió abandonada; actualment tasament quedan cualques vestigios en superficie.

Patrimonio civil

Casa Gran

Casa Gran

Ye l'edificio mas emblematico de l'arquitectura civil de la localidat, encara que podemos trobar atras viviendas populars. En 1770 perteneixeba a Joaquin Cayetano Cavero y Pueyo, IV Conde de Sobradiel (m. 1809), duenyo tamién en ixa epoca d'una gran extensión de terrenos rusticos repartidos per los lugars de Fuents Claras y Lo Pueyo.

Ye un edificio civil senyorial de dos plantas y atico, construyiu en mampostería. En la planta prencipal presenta una portalada adintelada en piedra picada y cuatro balcones con reixa de forcha. Lo escudo nobiliario esta picau, no podendo reconoixer-se lo linache a lo cual representaba. En la planta superior y arredol de la casa se troban chicoz vanos que conforman lo palomar de la casa.

En o sieglo XIX u prencipios de lo XX se dividió l'edificio en dos familias, que cambioron la estructura orichinal de los vanos. La puerta prencipal fue encegada y s'ubrioron dos laterals, asinas como los balcons, que tamién estioron transformaus. Actualment una de las metaz (la mas amanada a la ilesia parroquial) ye propiedat de lo Concello y s'aspera adquirir l'atra parte pa levar a cabo la restauración de l'edificio como equipamiento municipal.

Fue declarau Molimento d'Interés Local per la corporación municipal lo 9 de mayo de 2008 de cara a la suya inclusión en o Catalogo d'o Patrimonio Cultural Aragonés.

Gara de ferrocarril

Gara Camín Reyal-Fuents Claras

Estación ferroviaria d'estilo racionalista, construyida en 1933 seguntes disenyo d'o arquitecto madrilenyo Luis Gutiérrez Soto con motivo d'a obridura d'a linia Zaragoza-Camín Reyal. O cuerpo de l'edificio ye situau en o termin municipal de Camín Reyal, pero os terrenos perimetrals d'a estación se troba a caballo de toz dos municipios. De feito portó o nombre de Caminreal dica calendatas reciens, cuan estió rebautizada como Caminreal-Fuentes Claras.

L'edificio destaca per la suya modernidat, combinando elementos d'o racionalismo arquitectonico alavez vichent con atros d'aire popular como fronteras encaladas, bandas de rechola royisca, teixa curva u fusterías en verda. Tot ixo da a l'edificio un marcau accento local, integrau en o paisache y a la vegada moderno y innovador. Estió un important activo pa lo desembolique economico y social amás d'un estratechico nyudo de comunicacions que en os anyos 50 y 60 d'o sieglo XX emplegó a mas de cient treballadors, pros d'éls residents en o cercano barrio de San Salvador (Lo Santo). En zarrar-se la linia Calatayú-Camin Reyal en 1985 dentró de decadencia dica clausurarse en 1995. Estió declarada en 2007 Bien Catalogado d'o Patrimonio Cultural Aragonés. En 2019 estió designada como una d'as siedes d'o futuro Museo d'o Ferrocarril d'Aragón y se preveye la suya rehabilitación pa tal finalidat.

Centro de Comunicacions Calamocha-VOR

Centro de comunicacions Calamocha-VOR

Estió construyiu en 1959 per lo Ministerio de l'Aire d'Espanya) como centro de comunicacions pa la navegación aeria, en substitución de l'existent dica alavez en Calamocha. L'edificio aculle las instalacions aeronauticas d'o centro de comunicacions, lo radiofaro omnidireccional (VOR) y lo equipo mesurador de distancia (DME), funcionando de traza automatizada. Ye adscrito a AENA y la suya actividat la regula actualment lo Ministerio de Fomento.

Tamién estió ubicau lo observatorio meteorolochico dica 1985, anyo en que retornó a Calamocha. Allí estió an se rechistró lo récord de –30 °C de 17 d'aviento de 1963, un d'os tres vértices d'o denominau Trianglo de chelo u Trianglo d'o fredo, d'o cual los atros dos son Teruel y Molina d'Aragón (Guadalachara).

Palomar circular

Palomar circular

Situau a la dentrada de lo lugar dende l'acceso dende la carretera cheneral, lo palomar ye una torre de planta circular construyida en mampostería, reservando-se las piedras mas grans pa enmarcar la dentrada de la puerta, la cual ye adintelada con cabecero de fusta. Conserva lo enlucido de argamasa orichinal. Tiene tres plantas, la inferior como almadazén y las dos superiors, a las cuals s'accede per medio d'escaleras de fusta, destinadas a la función de palomar. Podría datarse arredol d'o sieglo XVIII.

Peirón de la Piedra Plana

Ye un peirón de piedra, formau per una grada de solo escalón, basa y un solo cuerpo que alberga tronco y edículo. Este zaguer ye una capiella an se podeba leyer la dedicatoria y lo nombre de lo feneixiu (totalment ilechible en l'actualidat). Coronado en forma de piramide rematada con una bola, mide uns 2 metros en total. Desconoixemos la suya calendata d'erección, encara que podría estar en bel momento d'o sieglo XIX.

Fuent de piedra

Situada en a carrera de lo mesmo nombre, con dos canyos y cubierta con un arco de piedra, se troba liucherament deprimida y pa acceder a ella ye necesario baixar uns escalones. Amaneixe mencionada en 1882, encara que segurament ha d'estar muito anterior.. Ye citada en o sieglo XIX, encara que puede estar muito anterior. No ye la fuent orichinal, pus fue cambiada d'ubicación en os anyos 90 pa facilitar lo paso de lo trafico rodau.

Reloch de sol

Se troba en a frontera d'un domicilio particular, situau en a Carrera San Pedro numero 12. Data de 1887 y se tracta d'un reloch cuadrangular con adorno semicircular radial en a parte superior. Ye esgrafiado sobre yeso, en colors blancas azulados. En a franja superior se leye la inscripción AÑO 1887 y contino SESESMD.

I hai dos reloches de sol mas en a población en senglas fronteras de fincas particulars, pero de calendatas muito recients (un de 2010 y unatro sin fechar, pero d'epoca semellant).

Monumento a la bicicleta

Se tracta d'una escultura contemporania clamada La bicicleta de Julia Berna, creyada en fierro en forcha con forma de bicicleta gigante, obra d'o escultor José Azul. Estió colocada en 2019 en a rotonda de dentrada a la población, dende lo esbarro d'a carretera cheneral N-234. Ye lo primer elemento que se veye en dentrar en a población, alusivo a la fama que tienen los lugareños como usuarios de dito meyo de transporte.

Patrimonio industrial

Molín harinero

Molín harinero

Fue construyiu con anterioridat a 1555. En 1731 perteneixeba a José Latorre Alava, hidalgo vecin de Burbaguena, qui lo logaba a moliners profesionals.

Se tracta d'un molín de la tipolochía de contrabalsa. Construyiu en mampostería, tapial y rechola, seguntes diversas reparacions. Presenta cuatro carcavos, de diferent factura, uns realizaus en sillería y atros con os sillars menos regularizaus. Poseye una vivienda anexa, a la cual s'accede per un porche de dentrada, baixo lo cual se troba un arco de meyo punto de sillería, muito modificau. La resta de la construcción alterna tapial y mampostería. Conserva en o suyo interior la maquinaria tanto de lo molín como de la fabrica de luz. Esta zaguera instalación fue creyada en o sieglo XX pa levar la electricidat a la fabrica de farinas de Bello, que yera de los mesmos propietarios. Deixó de funcionar a prencipio de los anyos 80.

Lavador de lanas

Antigo complexo industrial dedicau a lo lavau d'a lana, construyiu a primers d'o sieglo XVII a resultas d'o surtimiento d'a industria lanera en a comarca. Yera situau en o camín entre Fuents Claras y Lo Pueyo, localidat de l'actual termin municipal de Calamocha. Teneba unas dos hectarias d'extensión y s'extendeba en gran parte per la localidat vecina, encara que mas amán d'o casco urbano fuentesclarino. Pa la suya construcción se prenioron materials d'o vecino chacimiento romano de La Loma d'el Prau.

Las suyas instalacions incluyiban toz los servicios pa lo procesau d'a lana: pesau y almacenaje, estibado, caldera pa escaldau y pilas de lavau, zonas pa estirau y ixugau, amás d'atras estancias (tallers, almagacenes, aloch, minchadors, etc.). S'ubicaba a lo costau d'o río Jiloca, que la suya augua yera necesaria pa tot lo proceso. Plegó a tener un centenar d'emplegaus en o sieglo XVIII.

Estió activo dica prencipios d'o sieglo XIX, cuan la Guerra d'o Francés, la Primera Guerra Carlista y la emerchent industria d'o algodón en Catalunya afectoron a lo comercio lanero local. Enta 1850 ya no funcionaba y estió abandonau, quedando tan solo unas pocas ruinas en superficie.

Patrimonio militar

Ciudadela

Arredol de l'actual ilesia parroquial quedan restas d'una especie de fortaleza de la cual se conservan un muro de 30 metros de longaria y 4 d'altaria. Fue mandada construyir per Chaime II en 1337 como defensa contra las invasions castellanas. Ye reyalizada en sillars de grans dimensions, en o que quedan cuantas saeteras bien visibles en a suya cara interna y tasament apreciables en a parte externa de lo muro, amás d'un lichero talut en a base. En o suyo recinto s'incluyiba una torre con barbacana. En 1361 Pero IV tornó a ordenar obras en o recinto. Dimpués de la Guerra de los Dos Peros quedó muito danyada, autorizando lo arzobispo de Zaragoza la construcción d'una torre campanar en o castiello.

Actualment lo recinto fa parte de la ilesia parroquial, que se construyió mas tarde. La torre de la fortaleza se convirtió en o campanar, encegando-se las saeteras y eliminando las almenas, pa cubrir-se con un chapitel. Ye construyida en mampostería con refuerzo de sillars en as cantonadas, conserva l'alféizar d'una buharda y finestras semicirculars.

Patrimonio relichioso

Ilesia parroquial de San Pedro

Ilesia parroquial de San Pero

Edificio gotico-renascentista, construyiu en o sieglo XVI. La primera noticia que se tiene ye de 1567, cuan lo visitador arzobispal mandó enladrillar-la.

Ye construyida en mampostería y cantería, ubicada sobre las ruinas de l'antiga ciudadela. Presenta una sola nave de tres trampos y capiellas entre contrafuertes. La cubierta ye una vuelta de crucería estrelada con arandelas de fusta policromada de lo sieglo XVII. Lo capitero ye poligonal y se cubre tamién de la mesma forma.

La cubierta ye de crucería estrelada con arandelas de fusta policromada de lo sieglo XVII y lo capitero ye poligonal, cubierta con a mesma vuelta que lo trampo adchacent de la nave mayor.

La torre presenta dos cuerpos de piedra. En 1699 se coronó con un nuevo chapitel a cargo de lo mayestro d'obras de Madrit Juan Antonio Aparicio. Per ixo presenta una estetica barroca castellana, distinta a la de la resta de la comarca.

De comienzos de lo sieglo XVII ye lo retablo de la Virchen de lo Rosario, en o cual debió treballar lo escultor navarro Miguel Sanz (m. 1623). D'a mesma epoca ye un retablo manierista, con imáchens de Santa Ana y Sant Bertolomeu. Chunto a él, en o costau de la epistola, se conservan las imáchens dieciochescas de Santa Lucia, Sant Fabián y Sant Sabastián.

L'organo fue construyiu per lo mayestro organero navarro Bartolomé Sánchez (m. 1743) en 1724.

La portalada de l'edificio ye sencilla, de dos cuerpos. Ye diferent a las habituals de la epoca y sería producto d'una reforma posterior. Sirvió de modelo a la de la ilesia parroquial de Camín Reyal, ya en o sieglo XVIII. En o costau ezquierdo de la portalada se puet apreciar la inscripción Año 1663 / se plantó la olma. Dende calendata immemorial la portalada yera flanqueada per dos olmos centenarios (las olmas). Toz dos fuoron atacaus per una malotía y, dimpués de consulta popular, tallaus en 1989 y substituyius per arbols chóvens.

En o lateral dreito se troba una chicota construcción que da acceso a lo espacio de lo fosal antigo, de lo como encara se conserva lo muro de sillería que marguina este costau de la ilesia.

Ermita de la Virchen de los Navarros

Ermita de la Virchen de los Navarros

Datada en o sieglo XVII. Construyida en mampostería, en as afueras de lo casco urbano y mugant con a carretera cheneral, d'una sola nave cubierta con vuelta de meyo canyón con lunetos. Lo suyo capitero ye poligonal y ye aliniada con dos edificios laterals. Tiene decoración de estucos. La portalada, con arco de meyo punto de rechola baixo una ringlera de esquinillas, ye coronada per la imachen de la virchen en ceramica contemporania.

Inicialment se clamó Virchen d'o Camín, en trobar-se la Ermita a lo costau d'o Camín Reyal que uniba Zaragoza y Teruel; dimpués estió clamada de la Fuent, per la cual regaba l'hortal cercano; y finalment, d'os Navarros. Sobre lo zaguer cambio de nombre i hai cuantas leyendas populars. Seguntes un, fue a proposito d'uns navarros que de camín a Valencia entablaron una baralla y resultoron ferius, pero estioron aduyaus per la Virchen a recuperar la salut y dotoron a la ermita d'asaber-las limosnas. Unatra teoría charra d'unatra baralla, tamién de navarros, que gracias a la intercesión de la Virchen se privó la muerte de la filla a mans de su pai. Finalment, unatra versión diz que uns navarros furtoron la Virchen de la ermita y fuyioron; cuan ya heban marchau d'o lugar s'aturoron pa reposar y paroron cuenta que la imachen heba desapareixiu: miraglosament la Virchen se trobaba de nuevo en a ermita.

En 1789 lo relichioso fuentesclarino Joaquín Ibáñez de Jesús y María l'adedicó a la Virchen un novenario y uns goyos de devoción.

Ermita de Sant Ramón Nonato

Ermita de Sant Ramón

Edificio d'una sola nave y de chicotas proporcions, situau dentro de lo casco urbano en o barrio de Sant Ramón. Estió donada en 1726 a lo Concello per los suyos constructors y segurament se construyió en calendatas immediatament anteriors. Se tracta d'una sala rectangular, con un abside poligonal poco pronunciau cubierto per una vuelta d'ariesta y tellau a dos auguas. La frontera ye de sillería y la dentrada presenta un arco de meyo punto de sillería. Lo 23 d'agosto de 2010 lo Concello la declaró Monumento d'Interés Local de cara a la suya inclusión en o Catalogo d'o Patrimonio Cultural Aragonés.

Ermita de Sant Salvador

Construcción popular de calendata incierta (tal vegada entre lo sieglo XIX), tamién conoixida como Lo Santo y situada en o barrio homonimo. Presenta una sola nave y ye cubierta a dos auguas. Presenta un sencillo arco rebaixau de dentrada, sobre lo cual se disposa una ringlera de rechola a lo tresbolillo. Lo 23 d'agosto de 2010 lo Concello la declaró Monumento d'Interés Local de cara a la suya inclusión en o Catalogo d'o Patrimonio Cultural Aragonés.

Ermita de Sant Marcos

Una cuatrena ermita, la de Sant Marcos, fue construyida de nueva planta en 1988. Ye situada en as lomas de Valdellosa, a uns cinco kilometros de la localidat, y ye actualment lo puesto de destín de la romería que tradicionalment se celebra en abril y que dinantes teneba per destín la ermita de Sant Esteban, de lo Pueyo.

Patrimonio viario

Camín Reyal

Antigo trazau viario que transcorre de norte a sud d'o termin municipal, entre a carretera cheneral (N-234) y a Autovía Mudéchar (A-23). Os suyos orichens podrían remontar-se a epoca romana en formar parte d'o trazau de l'antiga calzada entre Saguntum (Murviedro) y Bilbilis (Calatayú) o Caesaraugusta (Zaragoza), u a existén entre Laminium (La Mancha) y a mesma Caesaraugusta. En epoca medieval estió conoixiu como Camín Reyal y estió una d'as prencipals caminos de transito y transporte de mercaderías, estando entre sieglos a rota mas dreita entre Teruel y Zaragoza. Luego quedó obsoleto con a construción d'a N-234 y estió desaparexendo en estar sustituyiu por nuevas carreteras u absorbiu por istas.

En Fuens Claras se conserva o suyo trazau integro, en gran parte lixeramén engudronau. En o cruce con o camino ta Rubiuelos se construyió a Ermita de la Virchen de los Navarros, antes mas conoixida como Virchen d'o Camino por aber-se devantau a lo costau d'o Camín Reyal. En atros dos cruces funcionoron senglas ventas ta l'atención de viacheros y transporte: una, conoixida como Venda d'o francés, en o camino que desemboca en a N-211 y unatra, conoixida como Venda de Fuens Claras, en o cruce d'o camino ta Bañón. Con a cayedura en desuso d'o Camín Reyal totas dos dixoron de funcionar como tals y se troban en un abanzau estau de ruina.

Vía verda

Las vías verdas son camins naturals pa uso peatonal u ciclista, reutilizando antigos trazaus ferroviarios pa convertir-los en senderos de caracter turistico y cultural. En Fuents Claras transcorre de norte a sud d'o termin municipal y en paralelo a l'actual vía ferroviaria entre Valencia y Zaragoza. Forma parte d'a Vía verda Santander-Mediterranio, que escurre entre Santander y Valencia, trazada aprofitando lo trazau d'antigas linias ferroviarias.

En Fuents Claras la Vía verda transcorre acondicionando la viella Linia Calatayú-Valencia; en concreto, lo tramo entre Calatayú y Caminreal, activo entre 1901 y 1985. Remató d'executar-se en 2022, estando un d'os zaguers d'a Vía verda Santander-Mediterranio en acabar-se. Antiparte d'a suya valor historica y natural, la Vía connecta y vertebra atras rotas de caracter turistico ya presents en o lugar y la comarca.

Entidaz culturals

• Asociación Cultural Alborada
• Asociación Amas de Casa Virchen de los Navarros
• Club de Chubilaus Sant Marcos

Confrairías

Amás de l'actual Confrairía de la Sangre de Cristo existioron dica tres confrairías mas: Confrairía de lo Santismo Sacramento (sieglo XVII), Confrairía de la nuestra Sinyora de los Navarros (sieglos XVIII-XX) y Confrairía de lo Sagrau Corazón de Chesús (sieglo XVIII).

Festividaz y tradicions

La diferents festividaz de Fuents Claras son planificadas y organizadas a lo largo de l'anyo per una Comisión de Fiestas de caracter permanent, integrada per vecins de la población de traza rotatoria y coordinada con o Concello.

Fiestas patronals en honor de la Virchen de los Navarros

Las fiestas mayors de lo lugar se celebran en honor de la Virchen de los Navarros. Se celebran en setiembre y son una de las zagueras de la comarca: los días prencipals son lo 7 y 8 de dito mes y estando lo día gran este zaguer. Lo suyo acto central ye la procesión a la Ermita de la Virchen de los Navarros, amás d'un gran numero d'actos ludicos y festivos.

Ye tradicional y emotivo lo canto de las albadas en a medianoche de lo 7 de setiembre, en a viespra de la festividat de la Virchen de los Navarros. En a denominada zona de la costerilla s'interpreta una copla mirando enta la ilesia. En rematar se tanye un estribiello, nomás con trastes. Canta tot aquel que tienga motivo u quiera dar gracias a la Virchen.

Romería de los Penitents

Las referencias mas antigas datan de 1674. Lo segundo domingo de mayo los vecins acuden en romería a la localidat vecina de Villalba de los Morals. La organiza la Cofradía de la Sangre de Cristo, que ye la que prene protagonismo en toz los actos. Acude en pleno y varios son los personaches destacaus: lo prior, lo listero, lo mayordomo, l'abanderau, los alumbradores u los cofrades; asinas como los actos: cortesías, obligacions, pasar lista en o nombradero, etc. Actualment la componen 182 cofrades y 61 chirmanas, estando l'acto seguiu per toz los vecins y gran cantidat de visitantes.

Cada anyo s'encarga un prior d'organizar la fiesta, él ye lo que prepara chicolate y pastas pa los cuals acuden per lo maitín a Villalba. Lo cargo de prior ye asignau anyalment a lo cofrade mas antigo que, dimpués de fer lo suyo redolín, no podrá repetir. Lo se encarga de cobrar las cuotas, levar la imachen de lo Cristo en a procesión, iluminar la capiella en os feneiximientos de los cofrades y nombrar seis alumbradores pa l'enrueno, y de dar la fiesta en Villalba.

La procesión sale en romería a las ueito de lo maitín enta Villalba, dimpués de lo volteo de campanas. Los cofrades salen dica lo barrio de Sant Salvador, con a imachen de lo nuestro Sinyor con a Cruz y la Dolorosa. La chent les acompanya dica la ermita y éls siguen en procesión enta Villalba. La confrairía, a traviés de lo denominau listero (siempre la mesma persona, ye un cargo que pasa de pais a fillos, dentro de la mesma familia), pasa lista en o puesto conoixiu como lo nombradero.

Este puesto, cuan se sale per lo maitín de Fuents Claras, ye en a zona de Peñarrubia, amán de Villalba (en tornar de Villalba lo nombradero ye en a ermita de Sant Salvador, en o barrio de Lo Santo), antes de dentrar a lo lugar y formar en procesión. Han d'estar toz los cofrades y nomás se sincusa per delito de malotía. Lo zaguer que s'ha apuntau (mocez y chóvens) ye l'en primeras en salir a la procesión (en estar nombrau), y asinas per orden d'inscripción dica lo zaguer que ye lo prior (lo mas viello de toz), que se coloca entre la Virchen y lo Cristo.

En Villalba son recibius per los vecins, que asperan con as imáchens relichiosas. Chuntos sienten misa y se minchan lo chicolate con bunyuelos preparau per lo prior.

Romería a la Ermita de Sant Marcos

Lo sabado mas proximo a lo día de Sant Marcos (25 d'abril) s'acude en romería a la ermita de Lo Santo. Este día ye conoixiu como Romería u Día de lo Cerro.

Atras tradicions

En zagueras s'ha recuperau la celebración de fogueras per Sant Antón (17 de chinero) per barrios u grupos de vecins, levando la lenya los propios interesaus. En o rescaldo de las fogueras se rustiban trunfas, productos de lo cochín que se mataba en casa y vin con figas. Atras calendatas de fogueras yeran per Santa Lucia (13 d'aviento) y la vispra de Sant Blas (3 de febrero).

Antes mas se celebraban los carnavals, que igual que en atros lugars de la Comarca de lo Xiloca, duraban dica tres días. Se caracterizaban per la existencia d'un personache denominau lo cagarrutero dimpués de lo cual correban los zagals per las carreras de la localidat.

Pa San Juan (24 de chunyo) los mozos plantaban un chopo en o frontón y per la nueit se les meteban flors y cardos a las mozas, asinas como bel ramo de ciresas. Pa Sant Pero se meteba una enramada en forma de arco con ramas y unas vigas en a puerta de la ilesia.

Gastronomía y patrimonio agroalimentario

La gastronomía local ye representada per los productos de mayor renombre de la comarca: lo zafrán, lo pernil, lo ternasco y la borraja.

Zafrán de lo Xiloca

Lo suyo cautivo se restrinche a terrenos con condicions muito precisas: altaria meya entre 900 y 1.100 metros, preferentment calizos y bien drenaus. Fuents Claras y la val de lo Xiloca reunen estas condicions y entre sieglos estió una de las prencipals rechions productoras de lo país. Entre lo sieglo XX la emigración de lo campo a la ciudat, la competencia de colorantes artificials y zafrans de baixa calidat y pre provocoron la suya desaparición cuasi total, pero en os zaguers decenios s'ha recuperau la suya producción y mira d'obtener de la Unión Europea la reconoixencia como Denominación d'Orichen Protechida.

Pernil de Teruel

La Denominación d'Orichen Pernil de Teruel naixió en 1984 y estió la primera d'estas caracteristicas en Espanya. La zona de producción ye formada per los termins municipals de la provincia que la suya altitut meya no sía inferior a 800 metros, entre los cuals se troba Fuents Claras. Proviene de la selección de las razas de cochín blanco Landrace, Large White y Duroc. Ye un jamón de gusto suau, con o punto chusto de sal y un percentache important de grasa intramuscular.

Ternasco d'Aragón

Per Ternasco d'Aragón s'entiende tota aquella carne de cordero certificada per lo Consello Regulador de la Indicación Cheografica Ternasco d'Aragón, procedent de cinco razas autoctonas: ansotana, maellana, rasa aragonesa, roya Bilbilitana y uellinegra de Teruel. Destaca per la suya carne d'aspecto rosau, con un baixo percentache de grasa, y lo suyo gusto, muito suau, dau que los corders son alimentaus exclusivament con leit materna y cerials.

Borraja

La Borraja ye un vechetal muito habitual en a gastronomía local. Especialment los suyos tallos, que gosan cocinar-se de diversas trazas: con trunfas y apanyaus con aceite d'oliva, rechiraus con uego u setas, u combinaus con acelga, allo y uego. La borraja ye tamién habitual como fondo basico pa lo caldo vechetal, sola u con atras verduras.

Esporte

Ciclismo

Lo esporte estrela de la localidat ye lo ciclismo a livel d'usuario como meyo de transporte cutiano. La bicicleta goza d'un excepcional arraigo y s'ha convertiu en sinyal d'identidat de lo lugar a livel supralocal, ya que toz los suyos habitants las usan pa desplazar-se. Mesmo, entre un tiempo, se plegoron a matricular. La localidat ha plegau a estar conoixida como l'Amsterdam aragonés.

Birlas y frontón

A livel de competición, dos son los esportes que han gozado de gran arraigo en a localidat.

Per un costau lo chuego de birlas, practicau en cualsequier ye un espacio plano y sin obstáculos. Formau per nueu chornalers con una corona en a parte superior y una altura de setanta centimetros y un rei coronau con tres coronas y con una altaria mayor. Pa lanzar s'emplegan dos lanzaderas u mazas cilindricas de 25 cm de longaria. Tradicionalment ha estau practicau per mullers.

Per unatro costau lo chuego de pilota, practicau en o frontón per hombres.

Cicloturismo

Amás de l'uso de la bicicleta como meyo cutiano de transporte, lo lugar forma parte de cuantas rotas que recorren la Comarca de lo Xiloca (como lo Camín de lo Cid) en bicicleta de montanya como forma de potenciar lo cicloturismo.

Instalacions esportivas

La localidat disposa d'un pabillón poliesportivo municipal en o cual se reyalizan fiestas y celebracions populars.

En a Plaza de la Concordia i hai una zona esportiva de moderna construcción, consistent en un frontón descubierto pa lo chuego de pilota y una piscina descubierta.

Lo frontón viello deixó de funcionar malas que se fació a devantadera lo nuevo. Actualment sirve pa actos socials y festivos de diversa índole a l'aire libre gracias a la suya centrica ubicación, amán de lo Concello.

Entidaz esportivas

• Club Esportivo Kuadrones

Eventos esportivos

Destacan dos eventos atleticos que se celebran anyalment.

Per un costau, dende 1995 se corre la Puyada de Sant Marcos en zaguerías d'abril, preba d'entre 6,5 y 7 kilometros disputada cuasi integrament per camins de tierra en una suau pendient ascendent entre lo municipio y la ermita de lo mesmo nombre. Se corre en zaguerías d'abril, entre la festividat homonima.

Per unatro costau la cursa popular organizada anyalment per lo Club Esportivo Kuadrones dende 2006, que s'organiza en zaguerías d'agosto y de 10 km de distancia.

De 2012 a 2014 se celebró una prueba de mushing o perros de tiro. Gosaba celebrar-se en noviembre en dos etapas.

Personaches destacaus

• Miguel Francisco Gómez y Cabello (fin. s. XVII-1756), escritor y rector de la Universidat de Zaragoza entre 1744 y 1749.
• José Ibáñez y Gassia (1728-1779), escritor y inventor.
• Joaquín Ibáñez de Jesús y María (1738-1809), escritor y orador.
• María Ignacia Ibáñez (1745-1771), actriz oriunda de Fuents Claras.
• Mariano de Ibáñez Cuevas y Rubio (1750-1802), militar.
• Joaquín Gómez y Blasco (1774-1821), regidor d'o Concello de Zaragoza (1804-1821) y deputau suplente d'as Cortes de Cádiz (1813-1814).
• Rafael Ibáñez de Ibáñez (1796-1839), militar de la Primera guerra carlista.
• Enrique Esteban Julve (1892-1968), alcalde entre 1931 y 1934.
• Pepe Gálvez (1950), guionista y dibuixant de cómics.
• José Antonio Lázaro Romero (1951), hotero y president de la Federación de Comunidaz Aragonesas en l'Exterior.
• Plácido Díez Bella (1958), periodista de radio y prensa escrita.
• José Antonio Pérez Cebrián (1958), president de la CEOE en Teruel.
• Amparo Bella Rando (1961), historiadora, activista feminista y politica.
• José Blas Rando Romero (1979), hotero.
• David Sánchez Fabra (1989), escritor y medico.

Bibliografía

• (es) AAVV (1924): Enciclopedia Universal Ilustrada Europeo-Americana. Espasa-Calpe. Barcelona: Espasa-Calpe. Vol. XXIV, pach. 1492 [1]
• (es) Alcañiz Gutiérrez, Ángel (1996): Fuentes Claras. Calamocha: Centro de Estudios del Jiloca (Xiloca, 18). ISSN 0214-1175. Pach. 249-259 [2]
• (es) Aldecoa Bravo, José Serafín (2009): Entre el hambre de tierra y el despertar social: La II República en tierras del Jiloca (1931-1936). Calamocha: Centro de Estudios del Jiloca, Calamocha. ISBN 978-84-613-6661-3 [3]
• (es) Aldecoa Bravo, José Serafín (2009): 75 años de la construcción de El Caminreal. Calamocha: Centro de Estudios del Jiloca (Xiloca, 37). ISSN 0214-1175. Pach. 83-112 [4]
• (es) Aupí Royo , Vicente (2013): El triángulo del hielo: Teruel, Calamocha, Molina de Aragón. Estudio climático del polo del frío español. Teruel: Dobleuve Comunicación. ISBN 978-84-938724-7-2.
• (es) Benedicto Gimeno, Emilio (1997): La Cofradía de la Sangre de Cristo de Fuentes Claras. Calamocha: Centro de Estudios del Jiloca (Cuadernos del Xiloca, 10). ISSN 1136-8209. Pach. 51-68 [5]
• (es) Benedicto Gimeno, Emilio; Esteban Guillén, Pilar (2002): Los peirones en las comarcas del Jiloca y Campo de Daroca. Calamocha: Centro de Estudios del Jiloca (El Patrimonio olvidado, 1). ISBN 84-609-5131-6. Pach. 47 [6]
• (es) Benedicto Gimeno, Emilio (2003): Comarca del Jiloca. Gobierno de Aragón (Territorio, 9). ISBN 84-96223-10-8 [7]
• (es) Benedicto Gimeno, Emilio; Bonilla Torrijo, Carlos (2010): Los lavaderos de lana. Calamocha: Comarca del Jiloca (El patrimonio cultural de la Comarca del Jiloca, 8). Pach. 23-50
• (es) Carreras Asensio, José María (2001): Noticias sobre las torres de Olalla, Peralejos, Báguena, Fuentes Claras y Ferreruela de Huerva. Calamocha: Centro de Estudios del Jiloca (Xiloca, 27). ISSN 0214-1175. Pach. 57-60 [8]
• (es) Carreras Asensio, José María (2003): Noticias sobre la construcción de iglesias en el noroeste de la provincia de Teruel (siglos XVII-XVIII). Calamocha: Centro de Estudios del Jiloca (Serie monográfica, 15). ISBN 84-607-7302-7. Pach. 214-217 [9]
• (es) Casas Nagore, Carlos (2020): El camino real histórico entre Zaragoza y Valencia. historiasdecarreteras.com [10]
• (es) Faci, Roque Alberto (1739): Aragón, Reyno de Christo, y dote de Maria Santissima. Zaragoza: Imprenta de Joseph Fort. Pach. 319-321 [11]
• (es) Hernández Benedicto, José (2010): La jota en el Jiloca. Cincuenta joteros por el valle. Calamocha: Centro de Estudios del Jiloca. ISBN 84-614-2829-8 [12]
• (es) Ibáñez de Jesús y María, Joaquín (1789): Novenario para implorar el patrocinio de Maria Santisma, virgen y Madre de Dios, que baxo el titulo de Nra. Sra. de los Navarros se venera en el lugar de Fuentes Claras por el P. Joaquin Ybañez de Jesus y Maria de las Escuelas Pias. Zaragoza: Oficina de Francisco Magallon [13]
• (es) Latassa y Ortín, Félix de (1801): Biblioteca nueva de los escritores aragoneses que florecieron desde el año de 1753 hasta el de 1795. Zaragoza: Oficina de Joaquín de Domingo [14]
• (es) Madoz e Ibáñez, Pascual (1847): Diccionario geográfico-estadístico-histórico de España y sus posesiones de Ultramar. Madrid: Imprenta del Diccionario. Vol. VIII, pach. 250 [15]
• (es) Pérez Pérez , Isabel (2002): Albadas a Nuestra Señora de los Navarros (Fuentes Claras). Calamocha: Centro de Estudios del Jiloca (Cuadernos del Xiloca, 15). ISSN 1136-8209. Pach. 117-120 [16]
• (es) Rando Rando, Marco A. (1988): La evolución demográfica del municipio de Fuentes Claras (1960-1981). Calamocha: Centro de Estudios del Jiloca (Xiloca, 2). ISSN 0214-1175. Pach. 109-149 [17]
• (es) Sebastián López, Santiago (1974): Inventario artístico de Teruel y su provincia. Madrid: Servicio de Publicaciones del Ministerio de Educación y Ciencia. ISBN 84-369-0347-1. Pach. 217-219
• (es) Souto Oliva, Mercedes (2004): Palomares en el sur de Aragón. Las tierras del Jiloca. Calamocha: Centro de Estudios del Jiloca (El Patrimonio Olvidado, 2). ISBN 84-609-1598-0 [18]

Veyer tamién

• Lista de municipios de Teruel.

Vinclos externos

• Concello de Fuents Claras.
• Fuents Claras en a pachina web d'a comarca d'o Xiloca.