Biquipedia

Pueyo de Sant Esteban (chacimiento arqueolochico)

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Lo Pueyo de Sant Esteban ye un chacimiento arqueolochico de caracter urbano d'epoca republicana y imperial romana, existent aproximadament entre los sieglos I aC y I dC. Ye situau en Lo Pueyo, localidat d'o termin municipal de Calamocha (Teruel, Aragón, Espanya).[1]

Pueyo de Sant Esteban
Ciudat romana
Entidat
 • País
 • Provincia 		Ciudat
Imperio Romano
Hispania Tarraconense
Superficie
 • Total
10
Actual Lo Pueyo
Fundación Sieglo I a.C
Desaparición Sieglo I d.C

Historia

editar

La ciudat estió en tres emplazamientos succesivos, estando lo Pueyo de Sant Esteban lo segundo d'éls y amostrando una continuidat de hábitat de caracter urbano ininterrompiu en a comarca d'o sieglo II aC a lo menos dica lo sieglo IV.[2] Estió fundada a consecuencia d'a destrucción d'a ciudat inicial situada en o Chacimiento d'a Caridat (Camin Reyal) a causa d'as guerras sertorianas libradas en a Peninsula Iberica entre los anyos 82 aC y 72 aC.[3]

Se desconoixe con seguridat lo nombre d'a ciudat. Cotejando diversas fuents de l'Antiguidat (Naturalis Historia, de Plinio lo Viello; la Cheografía de Claudio Ptolomeu u lo Anonimo de Rávena) podría tractar-se de Leonica, nombre dau en estar habitada per los leonicenses, lugar celtíbero que suposadament habitaba la zona.[4]

La ciudat sería ubicada dentro d'o trayecto de l'antiga calçada romana que uniría las poblacions de Saguntum (actual Sagunto) y Bilbilis (actual Calatayú). La calzada seguiría la marguin ezquierda d'o curso d'o Xiloca a l'altura de dito chacimiento.

Cuan las circumstancias lo permitioron los pobladores decidioron abandonar l'asentamiento pa baixar a lo plano y refundaron la ciudat en La Loma d'el Prau, en o termin municipal vecino de Fuents Claras, a meyaus d'o sieglo I dC y a 1,1 km de distancia de Lo Pueyo.

Descripción

editar

Empecipió a estar estudiau en os anyos 50 per Purificación Adrián[5] y posteriorment entre 1976 y 1978 per Francisco Burillo Mozota, dentro d'os suyos treballos de prospección arqueolochica d'os diversos asentamientos d'o territorio d'a Celtiberia, entre los cuals se troba la Comarca de Xiloca.[6][7]

Lo chacimiento ocupa una d'as laderas d'o pueyo, a escasa distancia d'os atros dos emplazamientos.[2] Se tracta d'un nuclio amurallau d'unas 10 hectarias d'extensión. La suya muralla ye de dople paramento, con una longaria d'1.456 metros de perímetro y 4 metros d'amplaria, adaptada a lo terreno y con ueito torretons de planta cuadrada. S'han aterrazau las laderas, reutilizándo-se pa lo cautivo. En a vaguada sudeste se trobaba la dentrada, de 3,3 metros d'amplaria, hue trascruzada per lo camín que va a la ermita.[8]

Restas conservadas

editar

Tanto adintro como fuera d'o cinto se mantienen sinyals d'antigas edificacions y s'han trobau materials ceramicos y numismaticos que pareixen corresponder a la epoca d'abandono d'a ciudat. Son visibles dos cambras, con muros de mampostería irregular, una d'ellas con una cisterna en o suyo interior, excavada en a pedrera cuarcitica y recubierta de argamasa. Las excavacions arqueolochicas han descubierto cuantas estancias, muros de mampostería prolongaus con adobas y revocaus con archila, suelos archilencos fueras d'un de opus signinum blanco. En un torretón s'ha trobau presencia d'un lenau de losetas. En superficie s'han trobau monedas ibericas de Bilbilis, Colonia Celsa y Nertobis y tamién hispanorromanas de Bilbilis, Calagurris, Colonia Celsa y Ilici. Tamién abundants ceramicas: lucernas, anforas, terra sigillata italica, parez finas, iberica y comuna.[1][9]

En lo cabalto d'o pueyo tamién se conservan restas d'un antigo torretón posterior, d'epoca medieval.

Bibliografia

editar
  • (es) Burillo Mozota, Francisco (1981), Poblado de San Esteban (el Poyo del Cid, Teruel), Noticiario Arqueológico Hispánico. ISSN 0211-1748.
  • (es) Burillo Mozota, Francisco (1991), Inventario arqueológico: Calamocha, Diputación General de Aragón. ISBN 9788477531890.
  • (es) Caballero Casado, Carlos Javier (2003), Asentamientos urbanos en la Celtiberia Citerior en la República y el Alto Imperio: la ciudad como elemento de romanización, Universidad Complutense. ISBN 84-669-1041-7.

Referencias

editar
  1. ↑ 1,0 1,1 Ciudad de San Esteban (El Poyo del Cid), Xilocapedia.
  2. ↑ 2,0 2,1 Caballero Casado, Carlos: Asentamientos urbanos en la Celtiberia Citerior en la República y el Alto Imperio: la ciudad como elemento de romanización, pach. 135. Universidad Complutense, 1996.
  3. ↑ Caballero Casado, Carlos: «2.3. Estrategias socioeconómica. Concesión de estatutos privilegiados.» Asentamientos urbanos en la Celtiberia Citerior en la República y el Alto Imperio: la ciudad como elemento de romanización, pach. 341. Universidad Complutense, 1996.
  4. ↑ Plinio lo Viello: Naturalis Historia. Libro III, pach. 24.
  5. ↑ El Poyo del Cid. Cultura Yacimiento del Cerro de San Esteban.
  6. ↑ Burillo Mozota, Francisco: Poblado de San Esteban (El Poyo del Cid, Teruel). Noticiario Arqueolochico Hispanico (1981), pach. 187-290.
  7. ↑ Burillo Mozota, Francisco: Inventario arqueológico. Calamocha. Diputación General de Aragón (1991).
  8. ↑ Territorio Iberkeltia 2.0: Cerro de San Esteban de El Poyo del Cid (Teruel) (2013), Youtube.
  9. ↑ El Poyo del Cid, Gran Enciclopedia Aragonesa.
Obteniu de "https://an.wikipedia.org/w/index.php?title=Pueyo_de_Sant_Esteban_(chacimiento_arqueolochico)&oldid=2187746"