Cofadría relichiosa
Las cofadrías[1], confrairía[1] u cofrarías[1] relichiosas son collas de laicos agrupaus pa promover una creyencia. Las cofadrías relichiosas las diriche un gran mayestre, un mayordombre, un santo u un gurú, y pueden estar:
- Cofadría musulmana: agrupacions que han estendillau a sobén bella noción preislamica u cristiana en lo Islam, como por eixemplo l'amor mistica de Dios u lo culto a los santos. Cualques escuelas de sufís se dicen cofadrías, como por eixemplo los derbixes.
- Cofadría catolica: asociación de creyents catolicos que fan rolde arredol d'una advocación de Cristo, la Virchen u un santo, un inte de la pasión u una reliquia. Bi n'ha tres tipos:
- Cofadrías penitencials, que salen en Semana Santa. Son talment las mes conoixidas en lo Baixo Aragón.
- Cofadrías de Gloria, que salen la resta de l'anyo.
- Cofadrías sacramentals, que tienen como titular a lo Santismo Sacramento.
Totas las cofadrías gosan organizar una procesión, a lo menos una vegada en una anyada, solas u con atras cofadrías.
L'organo plenario de la cofadría ye lo capítol u asamblea cheneral de toz los conflaires. Lo capítol cheneral s'encarga d'esleyir a la chunta, que ye l'organo de gubierno de la cofadría, con un president.
Cualques cofadrías tamién pueden aplegar-se en un organo superior que prene diferents nombres seguntes lo puesto: Consello cheneral, Capítol de Cofadrías, Capítol superior, Federación, Agrupación, Unión, Chunta Local...
En las cofadrías bi ha cualques clases de miembros, como los mayordombres, estants, costalers, hombres de cadiera reyal, cargadors, ecetra...
En principio cualsiquier cristiano puet fer parte d'una cofadría, conseguindo la firma de bel chirmán que lo avale. Los nuevos miembros gosan recibir la investidura de la tunica y la imposición d'escapulario u medalla.
Una cofadría important en la baixa Edat Meya zaragozana estió la Ermandat et Confrayría in honore de Sancte Marie de Transfixio (1311-1508), que escribió los suyos estatutos en aragonés. Un atra cofadría baixomedieval que se'n conoixen los suyos estatutos en aragonés ye la de Cofadría de Santiago en Tudela, fundada en 1355 con l'aprobación de Carlos de Navarra.
La tradición de cofadrías catolicas baixomedievals s'estendilló en las zonas d'America controladas por Castiella y Portugal, y i estioron un elemento importantismo de la vida. En Brasil los negros formoron cofadrías d'esclavos d'orichen africano, y asinas empecipió un sincretismo relichioso entre lo catolicismo y los cultos africanos, desembocando en los cultos afrocaribenyos como lo candomblé.
Referencias editar
- ↑ 1,0 1,1 1,2 (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.