Roya bilbilitana

A roya bilbilitana ye una raza ovina autoctona d'o territorio nord-oriental d'a Meseta Central espanyola. Se troba mas frecuent en as vals d'os ríos Mesa y Xalón y a sinyoría de Molina d'Aragón, en a zona de confluyencia d'as provincias de Zaragoza, Soria y Guadalachara, encara que tamién puet apareixer mezclada en rabanyos mixtos en Uesca y Teruel, Cuenca, y en a Comarca de Cervera en o sud-este de La Rioja.

Roya bilbilitana en a ribera d'o Xalón

Caracteristicas

Perteneixe a o tronco entrefino y se caracteriza por a color d'a suya capa, negra cuan naixen os corders pero que dimpués y de forma progresiva se torna en una tonalidat entre terrosa y royenca. Os masclos pueden presentar cornamen muit desarrollau y estriau. Ista raza gosó estar a o borde d'a extinción en o sieglo XX debiu, entre atros factors, a l'albandono d'o mundo rural por parti d'a población, a la introducción d'atras razas que suposadament daban un mayor rendimiento economico y a o cruce d'os rabanyos con razas blancas.

Denominación

A roya bilbilitana prene o suyo nombre de Bilbilis, a ciudat prerromana y dimpués romana d'a peninsula iberica situada sobre o tozal de Bambola, a cantos d'o río Xalón, en o barrio de Uermeda, Calatayú (Zaragoza).

Bibliografía

• (es) "RAZAS GANADERAS ESPAÑOLAS. II. OVINAS". Cayo Esteban Muñoz. 2003. ISBN 84-491-0580-3
• (es) "Guía de campo de las razas autóctonas españolas". Ministerio de Medio Ambiente y Medio Rural y Marino. ISBN 978-84-491-0946-1

• Datos: Q21483853
• Multimedia: Roya Bilbilitana / Q21483853