Serbia
A Republica de Serbia (en Serbio, Република Србија u Republika Srbija) ye un país d'o sudeste d'Europa, un d'os seis estatos resultants de l'antigua Yugoslavia. A suya capital ye Belgrado.
| Republica de Serbia Република Србија Republika Srbija | |||||
| |||||
| Lema nacional: No'n tien | |||||
| Himno nacional: Bože Pravde | |||||
 | |||||
| Capital • Población • Coordenatas |
Belgrado 576.124 (2002) 44º 48' N 20º 28' E
| ||||
| Mayor ciudat | Belgrado | ||||
| Idiomas oficials | Serbio 1 | ||||
| Forma de gubierno | Republica parlamentaria Aleksandar Vučić Ana Brnabić | ||||
| Independencia • Declarada |
De Serbia y Montenegro 3 de chunio de 2006 | ||||
| Superficie • Total Mugas Costas |
Posición 113º 88.361 km² 599 km 0 km | ||||
| Población • Total • Densidat |
Posición 74º 6.926.795[1](2020) 78.81 hab/km² | ||||
| PIB (PPA) • Total (2018) • PIB per capita |
Posición 91º EUR€42.885.500.000 EUR€ 6,158.38 | ||||
| Moneda | Dinar(RSD)Euro (€, EUR) (En Kosovo)
| ||||
| Chentilicio | Serbio, -a[2] | ||||
| Zona horaria • en Verano |
CET (UTC+1) CEST (UTC+2) | ||||
| Dominio d'Internet | .rs | ||||
| Codigo telefonico | +381
| ||||
| Prefixo radiofonico | YT–YU, YZ, 4N–4O
| ||||
| Codigo ISO | 688 / SRB / RS | ||||
| Miembro de: | |||||
| 1 Tamién se i charran albanés en Kosovo y hongaro en Vojvodina. | |||||
CheografíaEditar
MugasEditar
Serbia muga con Hongría, Rumanía, Bulgaria, Albania, Macedonia d'o Norte, Montenegro (país con o qualo formó un estato confederal dica 2006), Bosnia y Herzegovina y Croacia.
HistoriaEditar
EtnochenesiEditar
Os serbos yeran descritos en o libro De administrando Imperio como os habitants d'unos principaus entre os crovates y os bulgaros. Beluns d'estos principaus son descritos en atras fuents como part de Croacia, y Bosnia en fuents posteriors será distinguida de Serbia u d'os principaus serbiscos. A base d'a organización social d'os serbos yera a zadruga u familia ampla, como en atros pueblos eslavos. Qualques zadruge aplegadas yeran baixo o mando d'un župan ("mainate"). En bell caso uns quantos župani podeban unir-sen y estar en a subchección d'un veliki župan u "gran župan".[3] Rematan predominando dos estaus serbos, Zeta, en l'actual Montenegro y Raška, en l'interior, en a zona d'o Sanchac de Novi-Pazar. O cristianismo plega a los serbos dende Agrida, y a conversión remata a zaguers d'o sieglo IX.
Estau serbisco uniuEditar
En a segunda metat d'o sieglo XII Esteban Nemanja, Župan de Raška, consigue absorber Zeta y fer-se independient de Costantinoble. En 1217 un legau apostolical lo corona rei, pero Serbia continará estando ortodoxa. Sava, un fillo d'Esteban Nemanja que yera monche d'Athos, consigue creyar una ilesia ortodoxa autocefala serbisca, y quan n'esdebién arcebispe corona a lo suyo chirmán en 1221 como rei d'alcuerdo con o rito ortodoxo. Ye o principio d'a dinastía Nemanja. Esteban I y os suyos succesors costruirán entre os sieglos XIII y XIV una serie de grans monesterios (Studenica, Decani, etc...).
O reino serbisco d'os Nemanja puet resistir o expansionismo d'os bulgaros y os bizantins, y con Esteban Dušan plega a lo suyo apocheu. Esteban Dušan estendilla o suyo reino por Macedonia y Grecia, plegando a conquerir part d'o Ducau de Neopatria a los almogávars. En 1346 Dušan empenta que Peć esdevenise seu patriarcal, y ixa mesma anyada y en Skopje l'arcebispe de Peć corona a Dušan como emperador de serbos, griegos, bulgaros y albaneses.[4] A creyación d'a seu patriarcal ortodoxa pa os serbos en Peć fa que i haiga un schisma con os griegos bizantins (con seu patriarcal en Costantinoble), dica 1375. Dušan muere en 1355 sin poder conquerir Costantinoble, una anyada més tarde que os turcos otomans conquieren Gallipoli.
Ocupación otomanaEditar
Os succesors de Dušan no pueden mantener a unidat d'un territorio tan extenso, que s'esminglana. Os diferents territorios serbians van cayendo u baixo sobiranía otomana u baixo sobiranía d'un reino bosnián en expansión. En 1389 o principe serbo Lazaro Hrebeldjanović ye derrotau en a batalla de Kosovo Polje. O suyo fillo Esteban Lazarević se sozmete a lo soldán pero demanda l'aduya d'o rei d'Hongría pa poder mantener-se independient. Os hongaros aduyan a creyar en 1412 una plaza fuerte en Belgrado. Dimpués Chorche Branković establix a capital de Serbia en Smeredevo, pero os otomans la prenen en 1439 y en 1459 la ocupan de pa cutio. Serbia esdevién un pachalik otomán y o patriarcato de Peć queda suprimiu dica 1557.
En o periodo de dominación otomana o centro politico d'os serbos se treslada enta o norte, a lo mesmo tiempo que bi ha migracions enta o sud d'o Reino d'Hongría, a lo norte d'o Sava y d'o Danubio, podendo plegar a estar mayoritarios en zonas que enantes yeran habitadas por atros pueblos, (crovates, hongaros, vlacos, etz...). En 1521 os otomans vencen a los hongaros en Mohacs, y os serbos emigraus tamién son baixo dominación otomana.
En 1683 os otomans son redotaus en Viena y esto tien consecuencias pa os serbos, como habitants d'una zona que puet dixar d'estar baixo dominio otomán. En 1688 os austriacos prenen Belgrado y dimpués abanzan ta Kosovo, posando en canción a los serbos pa que se rebelasen. Manimenos os otomans reaccionan y os austriacos s'han de replegar en 1689-1690 chunto con 37.000 familias serbas que s'establixen en l'actual Voivodina. En 1694 plegará atra ondada.
Os otomans fuoron vencius en 1697 y por o tractau de Karlowitz de 1699 abandonan Batchka y lo norte de Sirmia. O patriarca serbisco s'establix en Karlowitz (Sirmia). Os otomans ceden a los austriacos o sud de Sirmia, o Banato y Serbia en o tractau de Passarowitz (1718) dimpués d'atra derrota.
Os otomans contraatacoron en 1736 y por o tractau de Belgrado Austria habió de tornar-lis Serbia. Por este tractau se creya a muga norte de Serbia, que ya no cambiará dica a Primera Guerra Mundial.
Totas estas guerras facioron que os serbos emigrasen dende a rechión d'o Kosovo (que dende alavez de conoixe como Viella Serbia) y que o vueito poblacional lo plenasen os albaneses. Beluns d'os serbos que i quedan se convierten a lo islam esdevenindo os gorani actuals. Os serbos no totz os serbos refuchiaus en o reino d'Austria se quedan en a Voivodina, muitos d'ellos s'establixen en os confins militars: centro d'Eslavonia, sud de Croacia, en o que se conoixerá como a Krajina crovate. En Voivodina os serbos habrán de convivir con repobladors de diferents orichens etnicos a parte d'os serbos: rutens (rusins) eslovacos, alemans, franceses, catalans, (en Nueva Barcelona) etz...
Os otomans posarán a un griego en o patriarcato de Peć en 1739, y lo suprimirán en 1767. En Belgrado bi ha una guarnición de chenizaros que Estambul no controla güaire.
AutonomíaEditar
En 1804 esclata una insurrección en Chumadia dirichida por Karadjordje, que prene Belgrado en 1806 y se fa proclamar en 1808 principe hereu. Os otomans reaccionan pero o soldán ha de reconoixer l'autonomía de Serbia en o tractau de Bucarest firmau con Rusia en 1812. Manimenos en 1813 contina a guerra y os otomans prenen Belgrado, fan mortaleras y Karadjordje s'ha de refuchiar en Austria.
En 1815 Miloš Obrenović diriche una insurrección en Chumadia, y baixo a presión de Rusia os otomans acceptan que Serbia siga un principau vasallo, con asembleya (skupstina) y exercito. Os otomans encara mantendrán a un gobernador turco, guarnicions y imposarán o pago d'un tributo anyal.
A primera intervención de l'Imperio Ruso en os Balcans fa que se firme o tractau d'Adrianopoli en 1829. En 1833 Serbia ixampla o suyo territorio por o sud. O soldán reconoix a Miloš como principe hereu, y abdica en 1839, pasando o títol a Aleixandre Karadjordjević. En o Tractau de París de 1856 Aleixandre obtién una garantía internacional pa Serbia. A familia Obrenović tornó a lo poder en 1858, pero qui dirichirá o gobierno será o partiu liberal (1867-1893) En 1868 os otomans evacuan as suyas tropas de Serbia.
IndependenciaEditar
Serbia declaró a guerra a l'Imperio Otomán en 1876 quan os disturbios de Bosnia. Encara que os serbos fuoron vencius a lo principio, a zaguers de 1877 tornan a la ofensiva, favoreixius por a intervención rusa en os Balcans. O tractau de Berlín de 1878 reconoix a independencia de Serbia, que queda ixamplada con a rechión de Niš. O Sanchak de Novi Pazar queda baixo administración austriaca chunto con Bosnia-Herzegovina pa fer de zona tampón entre Serbia y Montenegro.
Encomienzan os conflictos d'os serbos con atras nacionalidatz balcanicas que tamién se liberaban d'o dominio otomán. A unión de Rumelia Oriental con Bulgaria ye vista como periglosa por a Serbia independient, (distribuita por territorios historicament bulgaros que podeban reclamar en o futuro una Bulgaria més poderosa). Os serbians atacoron a los bulgaros en 1885 y fuoron vencius.
En ixos tiempos ya i heba problemas internos por una sublevación d'a chent d'a tierra en 1883 y una presión d'un nuevo partiu radical refirmau por os sublevaus. A constitución de 1888 fa de Serbia quasi una monarquía parlamentaria, y a politica posterior bien marcada por a luita entre liberals y radicals, dica un inte que o rei Aleixandre Obrenović restableix l'absolutismo monarquico con a Constitución de 1901, pero ye asasinau en 1903.
O nuevo rei ye Pero I Karadjordjević, que con l'aduya de lo ministro Nicola Pasić, d'o partiu radical, restableix a constitución de 1888 y enforteix os ligallos con Francia y Rusia. En politica exterior Serbia ye obligada a reconoixer l'anexión de Bosnia-Herzegovina por l'Imperio Austro-Hongaro y preba d'estendillar-se enta o sud, declarando a guerra a l'Imperio Otomán o 18 d'octubre de 1912 chunto con Bulgaria, Grecia y Montenegro, encomenzando a Primera Guerra Balcanica. Os serbians ocupan a part occidental de Macedonia y a mayor part de Kosovo y os montenegrins Peć. Serbia pretende tener una salida a la mar a traviés de tierras albanesas, pero l'Imperio Austro-Hongaro se i oposa. En o tractau de Londres de mayo de 1913 ye reconoixiu un estau albanés independient pero quedando Kosovo dentro de Serbia. En chunio os bulgaros encomienzan a Segunda Guerra Balcanica, son derrotaus y por o tractau de Bucarest d'agosto de 1913 a part de Macedonia correspondient a l'actual Macedonia d'o Norte y o norte d'o Sanchac de Novi Pazar son adchudicaus a Serbia.
Primera Guerra MundialEditar
Dimpués de l'atentau de Sarajevo de 1914 organizau por serbos. Austria-Hongría adreza un ultimatum a Serbia, y li declara a guerra o 27 de chulio. l'Imperio Ruso refirma a Serbia y encomienza a primera Guerra Mundial. Os serbians no resisten que a lo principio, y reblan. En noviembre de 1914 ya no controlan Belgrado, pero en aviento lo reconquieren. Bulgaria entra en a guerra pa anexionar-se Macedonia, y esto fa que os serbians ya no puedan defender-sen. L'exercito serbián se retira t'Albania y ye evacuau por os aliaus en Corfú, pa ser adrezaus a lo frent d'Orient dende chulio de 1916. O frent d'orient se creba en setiembre de 1918, y Austria-Hongría se rinde o 3 de noviembre. L'1 d'aviento de 1918 Aleixandre Karadjordjević proclama a formación d'o Reino d'os Serbos, Crovates y Eslovenos.
Os serbos en a Yugoslavia d'entreguerrasEditar
Un comité yugoslau formau en Londres por dirichents orichinarios de l'Imperio Austro-Hongaro y d'o gobierno serbián de Pasić firmoron o 20 de chulio de 1917 a declaración de Corfú, que preveyeba a unión d'os eslavos d'o sud baixo a monarquía d'os Karadjordjević. L'1 d'aviento de 1918, o fillo de Pero I de Serbia, Aleixandre, proclama o Reino d'os serbos, crovates y eslovenos.
En as prebatinas de redacción d'una Constitución en 1919-1920 se vei de seguida o conflicto entre os centralistas panserbiscos y os federalistas orichinarios de l'Imperio Austro-Hongaro. O partiu crovate d'a chent d'a tierra fa boicot a l'Asembleya y Pasić puet conseguir una constitución centralista o 28 de chunio de 1921. En a decada de 1920 i habrá crisis politicas por o conflicto entre crovates y serbos, (o lider d'o partiu crovate d'a chent d'a tierra será engarcholau y asesinau).
O 6 de chinero de 1929 o rei Aleixandre disuelve o Parlamento y la constitución de 1921 ye abolida y bi ha dictadura. O reino prene o nombre oficial de Yugoslavia. O 9 d'octubre de 1934 o rei Aleixandre muere en un atentau obra d'os ustaixas. O principe de Pavlo exerce a rechencia. En 1938 se creya una banovina autonoma crovate con tierras de Bosnia-Herzegovina. Os serbos controlan atras partes de Bosnia-Herzegovina.
Segunda Guerra MundialEditar
A primers de 1941 Hitler ordena a Yugoslavia que s'adhiera a lo Pacto Tripartito pa atacar Grecia. O rechent Pavlo accepta pero uns patriotas serbos se sublevan y o 27 de marzo o cheneral Simović obliga a lo rechent a exiliar-se. Pero I ye proclamau rei y denuncia o pacto. O 6 d'abril os exercitos alemans, italians y hongaros invaden Yugoslavia. O 17 d'abril o gobierno se rinde. Os invasors dividen Yugoslavia y se creya una Serbia independient que se reduciba a la Serbia posterior a 1878 pero con o Banato Serbisco y sin o districto de Pirot, que s'han quedau os bulgaros.
O cheneral Nedić, ministro d'a Guerra entre 1938 y 1941 dirichiba o gobierno. O Banato Serbisco yera baixo control d'os alemans locals, suabos d'o Danubio. Os chodigos de Serbia son eliminaus. Se creya lo Estau Independient de Croacia, que ocupa Bosnia-Herzegovina, o Sirmio y a mayor part de Croacia. En este estau controlau por los ustaixas son eliminaus los opositors y sobretot los serbos, seguntes bella fuent o numero de serbos exterminaus plega a 750.000.
Dende a primavera de 1941 s'organiza una resistencia en o norte de Kosovo. Dimpués i habrá dos resistencias. Os chetniks, nacionalistas monarquicos serbos dirichius por o cheneral Draža Mihailović que se negó a capitular en abril y os comunistas dirichius por Josip Broz Tito. En agüerro de 1941 una ofensiva alemana fa que se dividan Mihailović negocia con os alemans y Tito pasa ta Bosnia.
Os chetniks luitan contra os ustaixas crovates y se dedican a fer mortaleras de crovates y sobretot musulmans en as zonas de Bosnia-Herzegovina que controlan. Quan os partisans comunistas iban prenendo importancia os chetniks plegoron fer liga con os ustaixas.
Os partisans comunistas combaten contra italians, alemans y os ustaixas crovates. A zaguers de 1943 Tito creya en Jajce un Comité nacional de liberación, que será l'embrión d'o futuro gobierno federal. Pero II reconoix en 1944 a Tito como jefe d'a Resistencia. Quan l'Exercito royo sovietico plega ta Belgrado os partisans ocupan gran parte d'o país. A Conferencia de Yalta en febrero de 1945 planteya que i haiga un compromís o rei y Tito que sería o president. En 1945 os partisans dominan Yugoslavia y l'11 de noviembre a lista unica d'o Frent d'o Pueblo obtién o 90 % d'os votos. A monarquía ye abolida y se creya a Republica popular federativa de Yugoslavia.
Os serbos en Federación Yugoslava de TitoEditar
Tito pretendeba evitar que Serbia y os serbos tenesen un peso excesivo en a federación yugoslava y no unificó territorialment a los cristians ortodoxos de luenga serbo-crovata, que quedoron distribuitos por as republicas socialistas que establió: Republica Socialista de Serbia, Republica Socialista de Bosnia y Herzegovina, Republica Socialista de Montenegro y Republica Socialista de Croacia. Dió categoría de republica a Macedonia, deseparando-la de Serbia y dio autonomía a las rechions con minorías no serbas numerosas como a Voivodina y o Kosovo, a on permitió que entrasen nuevas poblacions albanesas. Lo predominio albanés en bella zona perchudicaba a los serbos.
Pero china chana os serbos iban fendo-se con o poder d'a Republica Federal Socialista de Yugoslavia, y ya en a decada de 1960 os serbos controlaban l'exercito federal.
A unión yugoslava se torna insostenibleEditar
Dende 1986 Slobodan Milošević, d'o partiu comunista de Serbia prene un discurso nacionalista serbisco chauvinista y aproveita a tensión entre serbos y albaneses en o Kosovo, y os ataques albaneses a la minoría serba pa mover sensibilidatz. Os eslovenos y crovates deseyan cada vegada més a independencia. En chinero de 1990 os eslovenos creban os ligallos con os comunistas de Yugoslavia, y farán o mesmo os crovates.
En 1990 dimpués d'un referendum Serbia prene una constitución que remata con l'autonomía d'o Kosovo y a Voivodina, encara que permite o multipartidismo. Slobodan Milošević ye esleito president o 23 d'aviento de 1990 en as Eleccions parlamentarias serbianas con o 65 % d'os votos.
Os serbos quan s'esminglana YugoslaviaEditar
O 25 de chunio Eslovenia y Croacia proclaman a independencia y encomienza una guerra entre l'Exercito Federal Yugoslau y las republicas secesionistas. Los serbos de Croacia proclamoron la independencia d'a rechión de Krajina centrada en Knin, que esdendría la Republica Serbisca de Krajina. Lo gobierno federal yugoslau refirmó a los serbos de Croacia con la presencia de l'exercito federal.[5] Bi habió mortaleras y operacions de limpieza etnica contra la poblacion crovata mientres duró la Guerra d'independencia crovata, devez que en lo territorio controlau por la Croacia independient se forzó a muitos serbos pa que se'n fuesen.[6] Beluns se refuchioron en Serbia.
Dimpués proclama a independencia Bosnia-Herzegovina. En Bosnia-Herzegovina se repetirá o mesmo proceso pero con mayor rapideza y violencia. Os serbos de Bosnia y Herzegovina son més numerosos que en Croacia y son mayoritarios en amplas zonas: Bosnia occidental, Herzegovina oriental y zonas de Bosnia oriental mugants con Serbia. A población bosniaca musulmana y crovate fue forachitada u exterminada de muitas d'estas zonas y las zonas de mayoría serba prenioron continuidat territorial a traviés d'o corridor de Posavina, a costa d'os crovates. Igual como en Croacia, buena part de la poblacion serba en territorios baixo control de crovates y bosniacos fuyó. Lo resultau estió que durant las guerras de succesión yugoslavas en lo norte de Serbia bi habió bells centenars de mils de refuchiaus serbos.
En Kosovo no bi ha guerra mientres bi n'ha en Croacia y Bosnia-Herzegovina, pero muitas zonas son controladas por os albaneses locals. Macedonia se deseparó pacificament y os serbos no podioron organizar o mesmo procedimiento.
En abril de 1992 Serbia y Montenegro forman una nueva Republica federal de Yugoslavia que no fue reconoixida por a comunidat internacional. A situación de guerra en Croacia y especialment en Bosnia-Herzegovina permite a Milošević enfortir o suyo poder. En as eslecions lechislativas d'aviento de 1993 o Partiu socialista (en realidat excomunista) consigue 123 d'os 250 botos. Bi heba una oposición ultranacionalista y una oposición democratica.
Quan remató a guerra en Bosnia-Herzegovina encomenzó a guerra en o Kosovo con una rapida limpieza etnica, manimenos a OTAN intervinió y obligó a l'exercito serbián a retirar-se'n. Muitos serbos de Kosovo han teniu que ir-se-ne.
EsportesEditar
Os esportes mes practicatos son o baloncesto, o balonmán y o fútbol, a primera división ye conoixita como SuperLiga Serbia.
ReferenciasEditar
- ↑ https://ec.europa.eu/eurostat/databrowser/view/tps00001/default/table?lang=en
- ↑ (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
- ↑ (en) History of Serbia. Articlo tetulau Balcan States en a edición de l'anyo 2007 d'a Enciclopedia Britannica
- ↑ (es) Miguel Ángel Ladero Quesada: Historia Universal, Edad Media. Vicens Vives.
- ↑ (fr) Dennis P. Hupchick, Harold E. Cox: Les Balkans. Atlas historique. Ed Economica, 2008. p 110.
- ↑ (es) Josep Palau El Espejismo yugoslau. Ediciones del Bronce, 1996. pp. 75-90.
| Estaus d'Europa |
| Abkhasia3 | Albania | Alemanya | Andorra | Armenia2 | Artsakh3 | Austria | Azerbaichán1 | Belarrusia | Belchica | Bosnia y Herzegovina | Bulgaria | Cazaquistán1 | Croacia | Cheorchia1 | Chipre2 | Chipre d'o Norte2, 3 | Chequia | Dinamarca | Eslovaquia | Eslovenia | Espanya1 | Estonia | Finlandia | Francia1 | Grecia | Hongría | Islandia | Irlanda | Italia1 | Kosovo3 | Letonia | Liechtenstein | Lituania | Luxemburgo | Macedonia d'o Norte | Malta | Moldavia | Mónegue | Montenegro | Noruega | Osetia d'o Sud3 | Países Baixos | Polonia | Portugal | Reino Uniu | Rumanía | Rusia1 | San Marino | Serbia | Suecia | Suiza | Transnistria3 | Turquía1 | Ucraína | Vaticano |
| Dependencias: Åland | Akrotiri y Dhekelia | Chibraltar | Guernési | Isla de Man | Islas Feroe | Jèrri | Svalbard |
| 1 Parti d'o suyo territorio ye difuera d'Europa. 2 Se troba en Asia, pero tien relacions historico-culturals con Europa. 3 Parcialment reconoixiu. 4 No reconoixito |