Pueblo serbio

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Serbios Срби
Serbios con o trache rechional
Población total
13-14.000.000
Rechions con comunidaz importants
Serbia Bosnia y Herzegovina Croacia Rumanía Macedonya d'o Norte
Idiomas
serbio
Pueblos relacionaus
Pueblos eslaus
Mapa

O pueblo serbio u simplament os serbios (en serbio Срби) son os habitants mayoritarios de Serbia, y forman minorías en Bosnia-Herzegovina, Croacia, Macedonya d'o Norte y o Banato rumano. Parlan una luenga eslava meridional, o serbio y son cristianos ortodoxos.

Etnonimo

O etnonimo d'os serbios ye escrito como Σερβlοι (Servloi), Sorabos, Surbi, Sorabi en as fuents medievals primerencas. En De Administrando Imperio se fa mención d'o reino d'un Arcont desconoixiu y os suyos descendients, a dinastía Vlastimirović como Servlia. Se deciba Boiki a la suya tierra mitica, que fan derivar d'o protoeslau *bojь. = "batalla", "guerra", "luita", tamién o lugar de Servia en Grecia recibiba lo suyo nombre por os suyos habitants temporals os serbios. D'alcuerdo con o Cuento d'os anyos de Bygone, a primera cronica rusa, os serbios son uns d'os cinco primers pueblos eslaus que yeran enumeraus por os suyos nombres.

O cheografo d'o sieglo X Ibrahim ibn Yaqub localizaba o pueblo de "Saqalib" (probablement "eslaus" en cheneral), en as rechions montanyosas d'os Balcans centrals a l'ueste d'os bulgaros y a l'este d'os "atros eslaus" (croatas), por tanto en as tierras serbias. Os saqalib teneban a reputación d'estar mes furos.

Se fa mención d'os serbios como Srblji en os primers textos eslavonicos. Estos textos tamién fan servir a denominación de tribalians, en realidat un pueblo tracio u ilirián de l'antiguedat que habitaba o sud de Serbia y l'ueste de Bulgaria. A ciudat de Trebinje, capital d'o županato de Travunia yera escrita a sobén Tribalia. "Bojka", o nombre mitico d'a tierra d'os serbios (Serbia Blanca), podría tener una radiz común con a rechión de Boyko, habitada por os Boikos.

En aragonés o etnonimo ye documentau en o Libro de los fechos et conquistas del principado de la Morea, pero como siervos:

Baldoyn era ydo en françia por aduzir gentes pora recobrar su imperio et quel princep Guillem aparellaua mucha gent quiso se proueyr de muchas gentes de armas a su sueldo por defender su tierra et por recobrar la otra tierra que no auia recobrado: et fizo uenir el duch de quara(n)ta(u)[n]a con Mil alamanes et de hongria dos mil hungaros et de seruia mil sieruos et de alanos et comanos quatro mil et todas estas gentes tenia asu sueldo

vidiendo el poder de los Francos & vidiendo qu'el no auia poder para defenderle, fuyo a las partidas de Salonichi, por recobrar & aplegar gentes de sieruos de Blaquos & de Burgaros por defender las ciudades he castiellos de dicho imperio

en la secunda batalla los Hunguaros & los Sieruos;

& despues comandó a los Hungaros & los Sieruos

En a Edat Meya se feba servir o etnonimo servians en francés y anglés , y d'astí a denominación de servianos que veyemos en castellano en os Anales de la Corona de Aragón de Cheronimo Zurita:

Propúsose de parte de Paleólogo que se redujesen en el primer estado las diócesis de la Servia y de la tierra Zagora que sin autoridad del sumo pontífice después que Constantinopla fue tomada, habiendo gran confusión en aquel imperio y estando muy turbadas las cosas de él, concurriendo los búlgaros y servianos juntamente con los griegos para echar y destruir los latinos, por esta causa se mezclaron aquellas naciones entre sí; y siendo entre ellos comunes los matrimonios y casi una misma gente, erigieron la Servia en metrópoli y la tierra Zagora en patriarcado contra los cánones y costumbres de la iglesia como sin voluntad de la sede apostólica

En o periodo de l'otomán os serbios recibioron a denominación de vlacos, por eixemplo os que s'establioron en ciertas parz d'a Bosnia otomana que enantes estioron part d'o Reino de Croacia. Tamién recibioron esta denominación os que s'establioron en tierras despobladas de Croacia y d'Eslavonia baixo administración austriaca.

Relichión

Dende a suya conversión a lo cristianismo os serbios son cristianos ortodoxos, y poseyen actualment una ilesia autocefala propia. Os serbios d'una comarca entre o Kosovo y Macedonya d'o Norte son musulmans. Os musulmans d'o Sanchac de Novi Pazar tienden a no considerar-sen serbios y considerar-sen d'a mesma nacionalidat que os bosnios musulmans. Dica a guerra d'independencia de Bosnia-Herzegovina i heba musulmans bosnios que se consideraban serbios.

Historia

Etnochenesi

Os serbios yeran descritos en o libro De administrando Imperio como os habitants d'unos principaus entre os croatas y os bulgaros. Beluns d'estos principaus son descritos en atras fuents como part de Croacia, y Bosnia en fuents posteriors será distinguida de Serbia u d'os principaus serbios. A base d'a organización social d'os serbios yera a zadruga u familia ampla, como en atros pueblos eslaus. Bellas zadruge aplegadas yeran baixo o mando d'un župan ("mainate"). En bels casos bels župani podeban unir-sen y estar en a subchección d'un veliki župan u "gran župan". Rematan predominando dos estaus serbios, Zeta, en l'actual Montenegro y Raška, en l'interior, en a zona d'o Sanchac de Novi-Pazar. O cristianismo plega a los serbios dende Agrida, y a conversión remata a fins d'o sieglo IX.

Estau serbio uniu

Ta más detalles, veyer l'articlo Raškaveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].

O prencipau de Serbia en o sieglo XII

En a segunda metat d'o sieglo XII Esteban Nemanja, Župan d'a Raška, consigue absorber Zeta y fer-se independient de Costantinoble. En 1217 un legau apostolical lo corona rei, pero Serbia continará estando ortodoxa. Sava, un fillo d'Esteban Nemanja que yera monche d'Athos, consigue creyar una ilesia ortodoxa autocefala serbia, y cuan n'esdebién arcebispe corona a lo suyo chirmán en 1221 como rei d'alcuerdo con o rito ortodoxo. Ye o principio d'a dinastía Nemanja. Esteban I y os suyos succesors costruirán entre os sieglos XIII y XIV una serie de grans monesterios (Studenica, Decani, etc...).

O reino serbio d'os Nemanja puet resistir o expansionismo d'os bulgaros y os bizantins, y con Esteban Dušan plega a lo suyo apocheu. Esteban Dušan estendilla o suyo reino por Macedonya y Grecia, plegando a conquerir part d'o Ducau de Neopatria a los almogávars. En 1346 Dušan empenta que Peć se convertise en seu patriarcal, y ixa mesma anyada y en Skopje l'arcebispe de Peć corona a Dušan como emperador de serbios, griegos, bulgaros y albaneses. A creyación d'a seu patriarcal ortodoxa pa os serbios en Peć fa que i haiga un schisma con os griegos bizantins (con seu patriarcal en Costantinoble), dica 1375. Dušan muere en 1355 sin poder conquerir Costantinoble, una anyada mes tarde que os turcos otomans conquieren Gallipoli.

Ocupación otomana

Stefan Dušan

Os succesors de Dušan no pueden mantener a unidat d'un territorio tan extenso, que s'esminglana. Os diferents territorios serbios van cayendo u baixo sobiranía otomana u baixo sobiranía d'un reino bosnio en expansión. En 1389 o principe serbio Lazaro Hrebeldjanović ye derrotau en a batalla de Kosovo Polje. O suyo fillo Esteban Lazarevic se sozmete a lo soldán pero demanda l'aduya d'o rei d'Hongría pa poder mantener-se independient. Os hongaros aduyan a creyar en 1412 una plaza fuerte en Belgrado. Dimpués Chorche Branković establix a capital de Serbia en Smeredevo, pero os otomans la prenen en 1439 y en 1459 la ocupan de pa cutio. Serbia se converte en un pachalik otomán y o patriarcato de Peć queda suprimiu dica 1557.

En o periodo de dominación otomana o centro politico d'os serbios se treslada enta o norte, a lo mesmo tiempo que bi ha migracions enta o sud d'o Reino d'Hongría, a lo norte d'o Sava y d'o Danubio, podendo plegar a estar mayoritarios en zonas que enantes yeran habitadas por atros pueblos, (croatas, hongaros, vlacos, ecetra...). En 1521 os otomans vencen a los hongaros en Mohacs, y os serbios emigraus tamién son baixo dominación otomana.

En 1683 os otomans son redotaus en Viena y esto tien consecuencias pa os serbios, como habitants d'una zona que puet dixar d'estar baixo dominio otomán. En 1688 os austriacos prenen Belgrado y dimpués abanzan ta Kosovo, posando en canción a los serbios pa que se rebelasen. Manimenos os otomans reaccionan y os austriacos s'han de replegar en 1689-1690 chunto con 37.000 familias serbias que s'establixen en l'actual Voivodina. En 1694 en plegará atra ondada.

Os otomans fuoron vencius en 1697 y por o tractau de Karlowitz de 1699 abandonan Batchka y lo norte de Sirmia. O patriarca serbio s'establix en Karlowitz (Sirmia). Os otomans ceden a los austriacos o sud de Sirmia, o Banato y Serbia en o tractau de Passarowitz (1718) dimpués d'atra derrota.

Os otomans contraatacoron en 1736 y por o tractau de Belgrado, Austria habió de tornar-lis Serbia. Por este tractau se creya a muga norte de Serbia, que ya no cambeyará dica a Primera Guerra Mundial.

Totas estas guerras facioron que os serbios emigrasen dende a rechión d'o Kosovo (que dende alavez de conoixe como Viella Serbia) y que o vueito poblacional lo plenasen os albaneses. Beluns d'os serbios que i quedan se converten a l'islam convertindo-se en os gorani actuals. Os serbios no toz os serbios refuchiaus en o reino dš'Austria se quedan en a Voivodina, muitos d'ellos s'establixen en os confins militars: centro d'Eslavonia, sud de Croacia, en o que se conoixerá como a Krayina croata. En Voivodina os serbios abrán de convivir con repobladors de diferents orichens etnicos a parte d'os serbios: rutens (rusins) eslovacos, alemans, franceses, catalans, (en Nueva Barcelona) etc...

Os otomans posarán a un griego en o patriarcato de Peć en 1739, y lo suprimirán en 1767. En Belgrado bi ha una guarnición de cheniceros que Estambul no controla güaire.

Autonomía

En 1804 esclata una insurrección en Chumadia dirichida por Karadjordje, que prene Belgrado en 1806 y se fa proclamar en 1808 principe hereu. Os otomans reaccionan pero o soldán ha de reconoixer l'autonomía de Serbia en o tractau de Bucarest firmau con Rusia en 1812. Manimenos en 1813 contina a guerra y os otomans prenen Belgrado, fan mortaleras y Karadjordje s'ha de refuchiar en Austria.

En 1815 Milos Obrenović diriche una insurrección en Chumadia, y baixo a presión de Rusia os otomans acceptan que Serbia siga un principau vasallo, con asamblea (skupstina) y exercito. Os otomans encara mantendrán a un gobernador turco, guarnicions y imposarán o pago d'un tributo anyal.

A primera intervención de l'Imperio Ruso en os Balcans fa que se firme o tractau d'Andrianopolis en 1829. En 1833 Serbia ixampla o suyo territorio por o sud. O soldán reconoix a Milos como principe hereu, y abdica en 1839, pasando o títol a Aleixandre Karadjordjević. En o Tractau de París de 1856 Aleixandre obtién una garantía internacional pa Serbia. A familia Obrenović tornó a lo poder en 1858, pero qui dirichirá o gubierno será o partiu liberal (1867-1893) En 1868 os otomans evacuan as suyas tropas de Serbia.

Independencia

Serbia declaró a guerra a l'Imperio Otomán en 1876 cuan os disturbios de Bosnia. Encara que os serbios fuoron vencius a lo principio, a fins de 1877 tornan a la ofensiva, favoreixius por a intervención rusa en os Balcans. O tractau de Berlín de 1878 reconoix a independencia de Serbia, que queda examplada con a rechión de Niš. O Sanchak de Novi Pazar queda baixo administración austriaca chunto con Bosnia-Herzegovina pa fer de zona tampón entre Serbia y Montenegro.

Encomienzan os conflictos d'os serbios con atras nacionalidaz balcanicas que tamién se liberaban d'o dominio otomán. A unión de Rumelia Oriental con Bulgaria ye vista como periglosa por a Serbia independient, (distribuita por territorios historicament bulgaros que podeban reclamar en o futuro una Bulgaria mes poderosa). Os serbios atacoron a los bulgaros en 1885 y fuoron vencius.

En ixos tiempos ya i heba problemas internos por una sublevación campesina en 1883 y una presión d'un nuevo partiu radical refirmau por os sublevaus. A constitución de 1888 fa de Serbia cuasi una monarquía parlamentaria, y a politica posterior bien marcada por a luita entre liberals y radicals, dica un inte que o rei Aleixandre Obrenović restableix l'absolutismo monarquico con a Constitución de 1901, pero ye asasinau en 1903.

O nuevo rei ye Pero I Karadjordjević, que con l'aduya de lo ministro Nicola Pasić, d'o partiu radical, restableix a constitución de 1888 y enforteix os ligallos con Francia y Rusia. En politica exterior Serbia ye obligada a reconoixer l'anexión de Bosnia-Herzegovina por l'Imperio Austrohongaro y preba d'estendillar-se enta o sud, declarando a guerra a l'Imperio Otomán o 18 d'octubre de 1912 chunto con Bulgaria, Grecia y Montenegro, encomenzando a Primera Guerra Balcanica. Os serbios ocupan a part occidental de Macedonya y a mayor part d'o Kosovo y os montenegrins Peć. Serbia pretende tener una salida a la mar a traviés de tierras albanesas, pero l'Imperio Austrohongaro se i oposa. En o tractau de Londres de mayo de 1913 ye reconoixiu un estau albanés independient pero quedando o Kosovo dentro de Serbia. En chunio os bulgaros encomienzan a Segunda Guerra Balcanica, son derrotaus e por o tractau de Bucarest d'agosto de 1913 a part de Macedonya correspondient a l'actual Macedonya d'o Norte y o norte d'o Sanchac de Novi Pazar son adchudicaus a Serbia.

Primera Guerra Mundial

Dimpués de l'atentau de Sarajevo de 1914 organizau por serbios. Austria-Hongría adreza un ultimatum a Serbia, y li declara a guerra o 27 de chulio. l'Imperio Ruso refirma a Serbia y encomienza a primera Guerra Mundial. Os serbios no resisten que a lo principio, y reblan. En noviembre de 1914 ya no controlan Belgrado, pero en aviento lo reconquieren. Bulgaria entra en a guerra pa anexionar-se Macedonya, y esto fa que os serbios ya no puedan defender-sen. L'exercito serbio se retira t'Albania y ye evacuau por os aliaus en Corfú, pa ser adrezaus a lo frent d'Orient dende chulio de 1916. O frent d'orient se creba en setiembre de 1918, y Austria-Hongría se rinde o 3 de noviembre. L'1 d'aviento de 1918 Aleixandre Karadjordjević proclama a formación d'o Reino d'os Serbios, Croatas y Eslovenos.

Os serbios en a Yugoslavia d'entreguerras

Un comité yugoslau formau en Londres por dirichents orichinarios de l'Imperio Austrohongaro y d'o gubierno serbio de Pasić firmoron o 20 de chulio de 1917 a declaración de Corfú, que preveyeba a unión d'os eslaus d'o sud baixo a monarquía d'os Karadjordjević. O 1 d'aviento de 1918, o fillo de Pero I de Serbia, Aleixandre, proclama o Reino d'os Serbios, Croatas y Eslovenos.

En as prebatinas de redacción d'una Constitución en 1919-1920 se vei de seguida o conflicto entre os centralistas panserbios y os federalistas orichinarios de l'Imperio Austrohongaro. O partiu croata de chent d'a tierra fa boicot a l'asamblea y Pasić puet conseguir una constitución centralista o 28 de chunio de 1921. En a decenio de 1920 i habrá crisis politicas por o conflicto entre croatas y serbios, (o lider d'o partiu croata de chent d'a tierra será engarcholau y asasinau).

O 6 de chinero de 1929 o rei Aleixandre disuelve o Parlamento y la constitución de 1921 ye abolida y bi ha dictadura. O reino prene o nombre oficial de Yugoslavia. O 9 d'octubre de 1934 o rei Aleixandre muere en un atentau obra d'os ustaixas. O principe de Pavlo exerce a rechencia. En 1938 se creya una banovina autonoma croata con tierras de Bosnia-Herzegovina. Os serbios controlan atras partes de Bosnia-Herzegovina.

Segunda Guerra Mundial

A principios de 1941 Hitler ordena a Yugoslavia que s'adhiera a lo Pacto Tripartito pa atacar Grecia. O rechent Pavlo accepta pero uns patriotas serbios se sublevan y o 27 de marzo o cheneral Simović obliga a lo rechent a exiliar-se. Pero I ye proclamau rei y denuncia o pacto. O 6 d'abril os exercitos alemans, italianos y hongaros invaden Yugoslavia. O 17 d'abril o gubierno se rinde. Os invasors dividen Yugoslavia y se creya una Serbia independient que se reduciba a la serbia posterior a 1878 pero con o Banato Serbio y sin o districto de Pirot, que s'han quedau os bulgaros.

O cheneral Nedić, ministro d'a Guerra entre 1938 e 1941 dirichiba o gubierno. O Banato Serbio yera baixo control d'os alemans locals, suabios d'o Danubio. Os chodigos de serbia son elimitaus. Se creya un estau croata d'ideolochía faixista que ocupa Bosnia-Herzegovina, o Sirmio y a mayor part de Croacia y en o que son eliminaus os opositors y sobretot os serbios, seguntes bella fuent o numero de serbios exterminaus plega a 750.000.

Dende a primavera de 1941 s'organiza una resistencia en o norte d'o Kosovo. Dimpués i habrá dos resistencias. Os chetniks, nacionalistas monarquicos serbios dirichius por o cheneral Draža Mihailović que se negó a capitular en abril y os comunistas dirichius por Josip Broz Tito. En agüerro de 1941 una ofensiva alemana fa que se dividan Mihailović negocia con os alemans y Tito pasa ta Bosnia.

Os chetniks luitan contra os ustaixas croatas y se dedican a fer mortaleras de croatas y sobretot musulmans en as zonas de Bosnia-Herzegovina que controlan. Cuan os partisans comunistas iban prenendo importancia os chetniks plegoron fer liga con os ustaixas.

Os partisans comunistas combaten contra italianos, alemans y os ustaixas croatas. A fins de 1943 Tito creya en Jajce un Comité nacional de liberación, que será l'embrión d'o futuro gubierno federal. Pero II reconoix en 1944 a Tito como jefe d'a Resistencia. Cuan l'exercito royo sovietico plega ta Belgrado os partisans ocupan gran parte d'o país. A Conferencia de Yalta en febrero de 1945 planteya que i haiga un compromís o rei y Tito que sería o president. En 1945 os partisans dominan Yugoslavia y o 11 de noviembre a lista unica d'o Frent d'o Pueblo obtién o 90% d'os votos. A monarquía ye abolida y se creya a Republica popular federativa de Yugoslavia.

Os serbios en Federación Yugoslava de Tito

Tito pretendeba evitar que Serbia y os serbios tenesen un peso excesivo en a federación yugoslava y no unificó territorialment a los cristianos ortodoxos de luenga serbia, que quedoron distribuitos por as republicas socialistas que establió: Republica Socialista de Serbia, Republica Socialista de Bosnia y Herzegovina, Republica Socialista de Montenegro y Republica Socialista de Croacia. Dió categoría de republica a Macedonya, deseparando-la de Serbia y dio autonomía a las rechions con minorías no serbias numerosas como a Voivodina y o Kosovo, on permitió que entrasen nuevas poblacions albanesas.

Pero china chana os serbios iban fendo-se con o poder d'a Republica Federal Socialista de Yugoslavia, y ya en a decada de 1960 os serbios controlaban l'exercito federal.

A unión yugoslava se torna insostenible

Os Balcans en 1998, dimpués d'a guerra

Dende 1986 Slobodan Milošević, d'o partiu comunista de Serbia prene un discurso nacionalista serbio chauvinista y aproveita a tensión entre serbios y albaneses en o Kosovo, y os ataques albaneses a la minoría serbia pa mover sensibilidaz. Os eslovenos y croatas deseyan cada vegada mes a independencia.

En chinero de 1990 os eslovenos creban os ligallos con os comunistas de Yugoslavia, y farán o mesmo os croatas.

En 1990 dimpués d'un referendum Serbia prene una constitución que remata con l'autonomía d'o Kosovo y a Voivodina, encara que permite o multipartidismo. Milošević ye esleito president en aviento con o 65% d'os votos.

Os serbios cuan s'esminglana Yugoslavia

Bosnia y Herzegovina, Serbia, Montenegro y Kosovo en 2010

O 25 de chunio Eslovenia y Croacia proclaman a independencia y encomienza una guerra entre l'Exercito Federal Yugoslau y las republicas secesionistas. En Croacia l'exercito federal ye aliau con os terroristas locals serbios, controlan as zonas de mayoría serbia y fan limpiezas etnicas de población croata, encomenzando a guerra d'independencia croata. Os serbios fundan a Republica Serbia de Krajina.

Dimpués proclama a independencia Bosnia-Herzegovina. En Bosnia-Herzegovina se repetirá o mesmo proceso pero con mayor rapideza y violencia. Os serbios son mes numerosos y son mayoritarios en amplas zonas: Bosnia Occidental, Herzegovina Oriental y zonas de Bosnia Oriental mugants con Serbia. A población musulmana y croata fue forachitada u exterminada de muitas d'estas zonas y las zonas de mayoría serbia prenioron continuidat territorial a traviés d'o corredor de Posavina, a costa d'os croatas.

En o Kosovo no bi ha guerra mientres bi n'ha en Croacia y Bosnia-Herzegovina, pero muitas zonas son controladas por os albaneses locals. Macedonya se deseparó pacificament y os serbios no podioron organizar o mesmo procedimiento.

En abril de 1992 Serbia y Montenegro forman una nueva Republica federal de Yugoslavia que no fue reconoixida por a comunidat internacional. A situación de guerra en Croacia y especialment en Bosnia-Herzegovina permite a Milošević enfortir o suyo poder. En as eleccions lechislativas d'aviento de 1993 o Partiu Socialista (en realidat ex-comunista) consigue 123 d'os 250 botos. Bi heba una oposición ultranacionalista y una oposición democratica.

Cuan remató a guerra en Bosnia-Herzegovina encomenzó a guerra en o Kosovo con una rapida limpieza etnica, manimenos a OTAN intervinió y obligó a l'exercito serbio a retirar-se'n. Muitos serbios de Kosovo han habiu d'ir-se-ne.

Se veiga tamién

• Serbios, pa os habitants de Serbia.

Referencias

• Datos: Q127885
• Multimedia: Serbs / Q127885