Tractau de París (1856)

Iste articlo ye sobre o Tractau sinyau en París o 30 de marzo de 1856, rematando a Guerra de Crimea; ta atros usos, se veiga Tractau de París.

O Tractau de París ye un tractau internacional sinyau en París o 30 de marzo de 1856 entre o Imperio ruso, d'una man, y d'atra man Reino Uniu, Francia, o Reino de Cerdenya-Piemont y o Imperio Otomán, ta rematar a Guerra de Crimea entre ixas nacions.

Deliberacions d'o Tractau de París de 1856.

Clausulas sobre a mar NegraEditar

Seguntes o Tractau, a mar Negra esdeveniba un territorio maritimo neutral, a on no se permitiba a presencia d'armadas de qualsiquier país, ni a construcción de fortificacions melitars a o suyo canto. Os prencipatos de Moldavia y Vlaquia, encara que continaban en mans d'o Imperio Otomán, teneban mas autonomía dica esdevenir quasi independients, estando controlaus por as potencias sinyatarias d'o Tractau, con posibilidat de convocar un referendum ta la suya unificación (á mas, Moldavia recibiba parte d'a Besarabia). Os rusos perdeban asinas influencia en as comunidatz cristianas ortodoxas d'o Imperio Otomán, dixando d'estar consideraus os suyos protectors naturals, como miraba de fer o paneslavismo.

Clausulas sobre a mar BalticaEditar

En a mar Baltica, as islas Åland, que feban parte d'o Gran Ducato de Finlandia (ocupau por o Imperio ruso), tamién esdeveniban territorio desmilitarizau, ubrindo asinas o golfo de Finlandia a un posible ataque contra Rusia.

A Comisión d'o DanubioEditar

O Tractau establió a libre navegación por o río Danubio, establindo-se a Comisión d'o Danubio, que estió a primera organización internacional y que ye l'alazet d'o Dreito Internacional.

Declaración complementaria de Dreito maritimoEditar

Antiparte, Francia y o Reino Uniu sinyoron una declaración común sobre quantas qüestions de Dreito maritimo, conseqüencia d'os alcuerdos que heban sinyau ta la Guerra de Crimea, y seguntes a qüala:

  • Yera prohibida a patente de corso ta apoderar-se de biens propiedat de civils nacionals d'un estau en guerra y fer-ne botín (en actos prou amanaus a la piratería).
  • Yera prohibiu apoderar-se se biens propiedat de belicherants en barcos neutrals y tamién de biens propiedat de neutrals en barcos belicherants.
  • Tamién bi heban bellas clausulas relativas a o bloqueyo maritimo en caso de guerra.

Encara que ista declaración yera nomás un alcuerdo bilateral, quantos países s'adibioron a las suyas clausulas, esdevenindo dimpués un autentico tractau internacional multilateral. A suya primera aplicación practica estió poco dimpués, en prencipiar a Guerra Civil estausunidense.

Dentrada en vigorEditar

O tractau dentró en vigor o 16 d'abril de 1856.

Vinclos externosEditar