Abrir menú principal
Iste articlo tracta sobre o chenero de plantas Buxus. Ta o material que se quita d'istas especies, se veiga Buxo (madera).
Buixo
Buxo
Buixo
Clasificación scientifica
Dominio: Eukaryota
Reino: Plantae
División: Magnoliophyta
Clase: Magnoliopsida
Orden: Buxales
Familia: Buxaceae
Chenero: Buxus

Os buixos[1] (pronunciau /'buʃo/, /'butʃo/ u /'buiʃo/; scientificament Buxus) son un chenero de plantas perennifolias en a familia d'as buixacias. Habitualment tienen porte arbustivo, anque existe exemplars de bellas especies que gosan arribar a porte arborio.

En a Peninsula Iberica, a especie más representativa d'o chenero ye Buxus sempervirens, que ye silvestre en buena cosa de a cheografía, y forma poblacions importants en as sierras como os Pireneus.

Contenius

DestribuciónEditar

Son naturals en Europa (especialmnent en o sud), buena cosa d'o sud d'Asia en pasando por a India y en arribando dica o Pacifico, y en bellas zonas d'America (dende Mexico dica Colombia). As especies de Buxus son, por tot ixo, propias de latitutz y climas temperaus y subtropicals.

En existe qualques poblacions en o norte d'Africa, más que más en a cuenca mediterrania d'ixe continent. En a isla de Madagascar s'ha documentau bellas poblacions d'especies autoctonas, anque muit reducidas.

CaracteristicasEditar

Os buixos manifiestan midas variables, anque as formas arbustivas de port reduciu son con diferencia as más abundants, en existe belaltras, en climas tropicals, que arriban a fer 12 metros d'altaria. A especie más freqüent en Europa, B. sempervirens, tiene una altaria meya de bells 120 cm, con a mayoría d'exemplars plenament desarrollaus d'entre os 100 y os 150 cm,[2] anque de manera infreqüent pueden creixer dica 5 metros d'altaria.[2]

O creiximiento d'os buixos ye muit lento. No puyan si que bells centimetros cada anyada, y por ixa razón producen una madera bien quiesta por a suya dureza. En o Estau Espanyol, a suya expleitación ye viedada por as leis.

 
Follamen.

As fuellas son tiercas, coriacias, con forma lanciolada u arronchadeta, con una lonchitut que baila d'entre 1,5 y 5 cm (en pendendo de a especie y o exemplar), y d'entre 5 y 35 mm d'amplaria. Brostan oposadas en a branca, y a suya coloración ye caracteristicament verda intensa en a mayoría d'as especies y en os exemplars no exposaus a insolación directa, pero puede tornar-se amarellisca u royisca en o sol, con frido intenso, u quan se fan viellas. En captividat, s'ha conseguiu variedatz ornamentals con diferents formas de variegación y colors diferents,[2] que en l'actualidat cuentan con qualque difusión en chardinería.

As flors son monoicas, con os dos sexos presents en o mesmo exemplar, de regular muit discretas. Os estambres son largos y sesils, protuberants dillá que os petalos. Os lulos, quan son maduros, son capsulas de color grisa u marrón que contienen as simients. A mida varía d'entre 5 y 15 mm.

HábitatEditar

As matas de buixo gosan creixer en una gran diversidat de puestos, en os que a sola limitación que troban ye o suyo creiximiento, tan lento, que fa que en as zonas umbrivolas se desarrollen mal, masiau finos y propensos a malotías. S'adaptan bien a una gran cantidat de suelos, pero tienen preferencia por os suelos calsinosos y con Ph amán d'os valors neutros.

 
Hábitat petroso sobre suelo calsinoso. Biotopo freqüent ta las matas de buixo, que compartirán con matas de romero, aliagas y estremoncillos.

En os solans tamién se'n i puede trobar, anque a forma que adoptan ye más chicorrona y arronchadeta, y as matas se suelen trobar deseparadas d'entre ellas, sin formar guaire bardas ni atipir-se. En a cuenca mediterrania, a especie predominant, B. sempervirens, s'adapta bien a's terrenos petrosos en penya calsinera, por o que ye regular de trobar-los en ixes ambients, a on que as formacions en as que i predominan reciben o nombre de «buixitars» u «buixosas».[3] As venas, a largo termin, tienen una gran capabilidat ta meteorizar a penya.

En formacions compuestas, con elevada presencia d'árbols (selvas), as matas de buixo pueden formar una parte principal en o estrato arbustivo. En o dominio submediterranio en os Pireneus, o buixo ye a especie más freqüent como sotobosque en as selvas de planifolios, como caixigars, carrascals y fabosas (en iste zaguer caso, se forma una comunidat conoixida como «fabosa con buixo»). Tamién se troba en pinedas, anque a elevada competitividat por a luz que presentan as coniferas, de fuella perén y atipida, dificulta o suyo desarrollo.

En as etapas de degradación d'ixas formacions se i puede trobar comunidatz no formadas sique por buixos, por o que tamién se les gosa dar nombre «buixitars» u «buixosas».

ImáchensEditar

FitonimiaEditar

A forma «buixo» (d'o latín <BUXUS) ye a sola forma reconoixida pa representar este fitonimo en a Propuesta Ortografica de l'Academia de l'Aragonés,[1] en a que s'indica que as formas graficas «buxo» (/'buʃo/) y «bucho» (/'butʃo), que en a propuesta grafica de 1987 gosaba representar a ixas dos variants foneticas patrimonials, no s'emplegarán ya, tot asumindo-se que quedan incluidas en as posibilidatz de pronunciación de a forma grafica «buixo».

Pronunciación «buxo»Editar

A nivel fonetico y no grafico, a pronunciación /'buʃo/ («buxo») ye con diferencia a más emplegada por tot l'Alto Aragón, en rechistrando-se por toda una pantilla de lugars tanto en l'aria occidental, a on que sería más esperable a pronunciación sin a -i- semivocalica, como en a oriental y centro-oriental, en a que sí que i ye un caso atipico pus o regular ye que s'introduzca la dita -i debant de -x [iʃ]. Asinas, o lexicografo naturalista Rafel Vidaller en documenta uso en puestos por toda la Chacetania (Echo, Ansó, Botaya, etc.),[4] en o norte de l'Alto Galligo (Pandicosa y Sallent),[4] por tot o Sobrarbe (Bielsa, Plan, Torla, Sarvisé, a Espunya, Fanlo, Nerín, a Buerda, Tella),[4] en a Ribagorza aragonesofona (Torres, Campo, etc.),[4] en o Semontano de Balbastro (en Naval y Castillazuelo),[4] en a Plana de Uesca (Agüero y Ayerbe)[4] y en as Cinco Villas.

Pronunciación «buixo»Editar

A forma /'buiʃo/ («buixo»), menos freqüent, s'ha documentau siempre en a zona más oriental de o dominio lingüistico de l'aragonés. Vidaller la ha documentau en Ribagorza (Benás, Sarler, Campo, Vilanova, Torres, Capella, Bisagorri, etc.) pero tamién en a Cinca Meya (en Fonz).[4] En Sobrarbe tamién diz que ye prou abundant, anque coexiste en a mayor parte d'a comarca, de forma minoritaria, con as formas /'buʃo/ y /'butʃo/. Se diz /'buiʃo/, d'alcuerdo con Vidaller, en Fanlo y en Vio;[4] todas dos en a val de Vio.

Pronunciación «bucho»Editar

A forma con cheada, /'butʃo/ («bucho»), acunyada por hipercorrección castellanizadera, se documenta en una gran cantidat de localidatz en as que historicament s'ha parlau aragonés y en belaltros en os que encara se i parla. Vidaller da como puestos de referencia Buerba en a val de Vio y Fraixén en a val de Broto en Sobrarbe, Alquezra, Nocito y Radiquero d'entre belaltros en o Semontano de Balbastro, Luesia y Longars en as Cinco Villas, etc. pero s'ha de manifestar que a distribución d'ista forma, en l'actualidat, ye muito más cheneral.

D'entre todas as formas exposadas, a sobén dos u más d'ellas se pueden sentir coexistindo en bells puntos cheograficos, y mesmo puede que un mesmo parlant en diga una u l'altra aleatoriament en a mesma conversa. En iste estau se puede sentir o suyo emplego actual, p. ex, en l'Aínsa, a Buerda, Escalona y totz os lugars en a redolada, en a val d'a Cinca en Sobrarbe, en os que predominantement se diz «bucho» en l'actualidat, pero ocasionalment tamién se deixa sentir a forma «buxo» u dica «buixo», en estando ista zaguera la que muitos consideran más «antiquada» y «basta», cosa que, como han gosau sinyalar muitos autors, tamién puede significar que sia la más chenuinament aragonesa.

ReferenciasEditar

  1. 1,0 1,1 (an) Varios. Propuesta Ortografica de l'Academia de l'Aragonés; Estudio de Filología Aragonesa (Academia de l'Aragonés); Zaragoza, 2010. ISBN 978-84-614-4170-9
  2. 2,0 2,1 2,2 Ficha de B. sempervirens; consultada l'11 de chunio de 2011.
  3. (es) ALLUÉ NAVARRO, Mª Isabel y FUERTES CASAUS, Mª Pilar. Nombres para un paisaje (toponimia del Valle de Broto). Ed. Comarca de Sobrarbe + Diputación de Huesca; Zaragoza, 2006. ISBN 84-611-1141-9
  4. 4,0 4,1 4,2 4,3 4,4 4,5 4,6 4,7 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7

Vinclos externosEditar

Se veiga a información de Biquiespecies sobre Buxus.