Upupa epops

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Upupa epops
Porput (Upupa epops)
Denominacions populars
Porput, puput, putput, porpute, apuput, burbut, borbute, porpute, gurgut, gurgute, cucute, gallet de Sant Martín, gallico de Sant Martín, polpuz, gurguta, gallico de Sant Chuan, gallo de Sant Martín, gallico, pupui, gurigur
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Bucerotiformes
Familia:	Upupidae
Chenero:	Upupa
Especie:	U. epops
Descripción
Upupa epops LINNAEUS, 1757

O porput, burbut, gurgut u gallo de Sant Martín (toz os nombres tienen diversas variants. Nombre cientifico: Upupa epops (LINNAEUS, 1757)) ye una au bucerotiforme d'a familia Upupidae, anque muito tiempo se consideró que feba parte d’a orden d’as coraciformes.

S’identifica a la primer vista por un pico largo, una cresta de plumas alto d'a capeza que gosa alzar y abaixar a voluntat, y por unas colors muit caracteristicas, narancha en capeza, cuello y papo, y blancas con faixas negras en as alas y a coda.

Descripción

O porput mesura entre 25 y 28 centimetros de largaria, con as plumas naranchas u pardo-rosadas y colors blancas y negras en as alas y a coda, a on que conforman un debuixo a base faixas alternas que ye muit visible y lo fa de buen identificar, especialment en o volido, cuan bate as alas, fendo un efecto que grita l’atención a la vista por a forma de volar plegando-las a intervalos que tien.

Toz os individuos tienen una cresta de plumas graniza, que gosan esturrufar y acochar senguntes o estau d’atención u d’animo, y probablement como forma de comunicación y sinyal d’alarma pa atros miembros d’a especie.

O porput se considera un animal puerco, y i hai personas que le tienen aversión, principalment por a pudor que se diz que fan. Manimenos os adultos no puden, y son nomás que os polletz os que tienen una glandula ulorosa en a parte baixa d’a espalda que sirve pa que s’acumule o ferumen en o niedo y asinas guardar-ne leixos os depredadors. No tiene cosa en común con a porquería, ni ye cierto que meten fiemo ni vasuera adintro, como bellas vegadas se siente decir, anque sí que i cagan os suyos cagallons propios (como tamién fan os pollos de mutos atros paixaros, sin que ixo faiga una especial pudor).

Alimentación

Ye una au insectivora por un regular, anque puet tornar-se oportunista cuan son disponibles atros tipos d’alimento, como lulos y bayas diversas, y simients. Tamién caza vertebraus chicorrons, como ranuecos, engardaixinas y mesmo bella cría de radedor.

O pico d'o porput ye firme adaptau a la suya dieta y le sirve mesmo pa pillar insectos en superficie como adintro de foraus y fendiellas. Tamién puet esforiquiar en a tierra y en os femeros con él, pues os musclos d'a mandibula y a capeza son fetos de tal forma que, dimpués de fender-lo, puet ubrir o pico y pillar cualsiquier presa que i trobe enronada.

Habitat

Niedo entre as piedras d'una paret.

O porput habita principalment en espacios semi-ubiertos, como campos de fruitals y especialment d'especies tanudas, como almendreras y oliveras, en as cuals troba foraus en os que i fa o niedo debaixo d'o crostero. Tamién se'n troba en espacios naturals u degradaus, como catarrals y matullars, zonas esteparias y en as riberas.

Ye una especie que se troba a sobén en espacios muit humanizaus, y no le cuesta mica compartir habitat con l'Hombre, pos d'a presencia de bestias domesticas en quita buen reuto, cazando insectos entre os rabanyos y por os cagallons que deixan, y tamién en o fiemo. Tamién nidifica en os ripazos y en as rozas entre as penyas, por o que ye muit común en os arredols de lugars y villas habitadas.

Distribución

Se'n troba en Europa occidental y mediterrania, o norte d'Africa, y una francha ampla de territorio que va dende Orient Meyo dica Extremo Orient por todas as latituz subtropicals d'Asia en sud de l'Himalaya.

En latituz templadas ye una au migradera, que inverna en climas calidos como o d'Africa. En Aragón, o porput vive ixemenau por tot lo territoprio, sacando as vals axials mas altas en o Pireneu, y ye semi-migradera, con una mayoría d'eixemplars que nomás i son en verano y bels eixemplars (pocos) que se quedan tamién en hibierno.

Nombres

Uuu-po-puu, uuu-po-pup ye como fan istas aus, y a onomatopeya ye a radiz d'an dimanan o nombre cientifico Upupa epops y a mayoría d'os nombres vernaclos que tiene en muitos idiomas, como l'aragonés.

En Cinco Villas i hai documentatas as variants gurgute y purput, a mas a mas de gallico de San Martín.

Formas con P

O nombre porput (/porpú/) y purput (/purpú/) son comuns en Sobrarbe y en Semontano. Como poput (/popú/) s'ha documentau en Esdolomada (Ribagorza), y como puput (/pupú/) en Tella (Sobrarbe) y Estadilla (Semontano), y pronunciau /puput/ en ribagorzano, en Graus, Torres, la Puebla de Castro y en Grist (val de Benás). En a val de Benás, ye apaput (/apaput/) en Sarllé, pero apuput en Benás. Tamién se diz apaput (/apapú/) en chistabino.

A variant porpuz (/porpuz/) se diz en Salas Altas, Radiquero y Alquezar en o Semontano de Balbastro, y tamién en Guaso y en Mondot en Viello Sobrarbe. Parpuz (/parpuz/) ye como s'ha documentau en Vio (Vallivió, Sobrarbe), y como polpuz (/polpuz/) tan en sud como en Sarrión (Gúdar-Chabalambre, Teruel cuasi en a muga con Castellón). Puput (/puput/), como en ribagorzano y en catalán, se diz en Santalecina en a Cinca Meya, y en Muniesa (provincia de Teruel).

Formas con B

Se documenta borbut en Chaca (Chacetania) y Murillo de Galligo (Cinco Villas), burbut (/burbú/) en Pandicosa (Alto Galligo), y borbute en Chaca, en Murillo y en Ansó. Tamién se troba la mesma forma «borbute» en Obón, en a provincia de Teruel.

L'animal ye burbut en Nueno (Plana de Uesca), y burbute (a forma que mas vegadas se troba d'iste grupo) en Botaya, Banaguás, Aragüés de lo Puerto, Agüero, Ayerbe, Uesca, Plasencia d'o Mont y Sos d'o Rei Catolico, repartius entre a Chacetania, a Plana de Uesca y Cinco Villas.

En Alfambra, nuevament tan en sud como ye a Comunidat de Teruel, trobamos a forma burbuta.

Formas con G

As mas minoritarias, pero tamién se'n troba. Como gurgut (/gurgú/) y gurgur (/gurgur/), que se diz en Luesia (Cinco Villas), gurguete en Exeya d'os Caballers y en Biel, gurgante, y gurgute en Uncastiello, en Luesia y en Valpalmas, y en Lecinyena en plenos Monegros.

En a ciudat de Zaragoza se documenta o zoonimo aragonés con a forma femenina gurguta.

Gallos, gallicos y gallez

Con a cresta esturrufada.

Por a cresta de plumas que tienen, no ye difícil prechinar por qué se les diz tamién gallo (y os suyos derivaus) a istos animals por buenacosa d'a cheografía aragonesa.

O documentamos como gallet, y como galluelo s'ha sentiu decir en Tardienta, en a comarca de Plana de Uesca, y en Anyón, Litago y los Fayos, tres municipios d'o semontano de Moncayo.

Como gallo tamién, pero baixo l'advocación de bel santo, se gosa trobar tamién. Asinas o porput ye tamién o gallico de San Juan en Sos y en Uncastiello, en Cinco Villas zaragozanas, y de Sant Martín en una ripa d'atros lugars aragoneses. Gallet de Sant Martín, pronunciau /gallé/, ye en Chía (val de Benás) y en Chistén (val de Chistau), y pronunciau /gallet/ en Benás y en Veri por a parte de Ribagorza y en Tella y Bielsa en o vecino Sobrarbe.

Torna como gallico de Sant Martín ta Cinco Villas, y se documenta en Sos d'o Rei Catolico, Luesia y Sigüés. En Sigués tamién se da a forma gallo de Sant Martín, como en Salvatierra d'Esca y en Berdún, en a Chacetania os tres. Tamién se documenta como gallo de Sant Martín en Plan, en a val de Chistau en Sobrarbe.

Mazadas

• Si canta o porpuz, quítate o capuz.

Vinclos externos

• Se veigan as imáchens de Commons sobre Upupa epops.
• Wikispecies tiene un articlo sobre Upupa epops.

• Datos: Q25247
• Multimedia: Upupa epops / Q25247
• Especies: Upupa epops