Sistema de nomenclatura binominal
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
En biolochía, o sistema de nomenclatura binominal (tamién a ormino dita erroniament «binomial», anque este termino en as luengas latinas no s'ha d'emplegar difuera de ta referir-se a los binomios matematicos) u nomenclatura binaria ye un convenio stándard emplegau ta denominar especies. Como a palabra binominal sochiere, o nombre scientifico d'as especies ye una combinacion de dos palabras ("nombres") en latín: o nombre chenerico que indica o chenero y un epiteto u nombre especifico que designa a especie. A unión d'os dos vocables ye o nombre d'a especie.
O nombre chenerico puede estar perfectament compartiu por dos especies chirmanas (Homo sapiens y Homo neanderthalensis son especies d'o mesmo chenero) pero a cosa que designa propiament a especie ye a combinación d'as dos parolas (asinas, o nombre d'a especie humana ye «Homo sapiens», no pas «sapiens»).
O nombre chenerico ha de levar siempre a primera letra en mayuscula, mientres que o epiteto especifico no la i ha de levar. Esta norma incluye a obligación de resaltar o nombre, o que se fa en manuscritos y textos mecanografiatos subrayando-lo, y en textos imprentatos por meyo d'a cursiva. Por eixemplo: Homo sapiens, encara que tamién podría fer-se subrayato: Homo sapiens, encara que no ye tan freqüent.
O nombre d'o chenero puede alcorzar-se emplegando a letra inicial se este concuerda con o zaguer chenero nombrato con a mesma inicial a dintro d'a mesma pachina y siempre que no pueda menar ta confusions. En bells casos a versión alcorzata ye común, como en o caso d'a bacteria Escherichia coli, que gosa escribir-se como E. coli en a literatura medica y d'atros grupos profesionals allenos a la biolochía.
A nomenclatura binominal ye a forma más especifica ta denominar as especies, pero ye nomás uno d'os quantos stándards d'a nomenclatura biolochica, que s'ocupa tamién d'a denominación formal en latín d'os taxons de categoría superior.