Pollet
Un pollet (pronunciau /po'ʎe/~/po'ʎed/; d'o latín <*PULLETTUS, deminutivo de <PULLUS, «pollo») ye a cría de curta edat d'os animals en a clase Aves, de regular referiu a os que se troba d'entre o momento d'a eclosión y a edat en a que, en as especies nidicolas, se revolan difuera d'o niedo.
A parola tamién s'aplica a las especies nidifugas ( como as gallinacias u as megapodas) dende que naixen dica que presentan (lo menos, qualques) caracteristicas d'adulto.
Atras denominacionsEditar
En aragonés existe parolas especificas ta os polletz de qualques grupos d'aus, de qualsiquier edat, que s'emplega sin menoscavo de que tamién se'n pueda decir polletz. Son eixemplos d'isto as crías d'as rapaces diurnas, que reciben con freqüencia o nombre d'aligons independientment de a especie a la que perteneixcan, u os anadons, os polletz d'os anades.
Ademes, en aragonés existe diferents termins ta referir-se a las diferents edatz u estaus de maduración de qualques especies. En ixos casos, puede estar que s'aluda a l'animal como pollet mientres as primeras etapas d'o suyo creiximiento, quan encara conserva caracteristicas neonatals, y s'emplegue o termin mas especifico ta la suya especie quan prencipia a tener caracteristicas d'individuo pre-adulto, como en bells casos puede suposar l'aparición d'as plumas. Ye un eixemplo d'isto lo caso d'os «pichons», os chuvenils (con plumas) de as columbidas, que ya han superau a fase (sin plumas) en a que se les denomina «pollet».
Tamién se designa a las gallinas chovens como «polletas», parola que dimana de pollo/pollet, enantes que arriben a la suya maxima productividat en ficando uevos.