La Penilla

(Reendrezau dende A Peniella)

La Penilla (oficialment, en castellano, «Lapenilla»[1]) ye un lugar aragonés d'el municipio de la Fueva, en la comarca de Sobrarbe y la provincia de Uesca. Actualment ye despoblau.[1]

La Penilla
Despoblau d'Aragón
Anvista d'a Peniella
Envista de la Penilla.
Entidat
 • País
 • Provincia
 • Comarca
 • Municipio
Despoblau
Flag of Aragon.svg Aragón
Flag of Huesca (province).svg Uesca
Sobrarbe
A Fueva (municipio)
Población
 • Total

0 hab. (2010)
Altaria
 • Meyana

670 m.
Distancia
 • 101 km
 • 39 km
 • 24 km

enta Uesca
enta L'Aínsa
enta Tierrantona
Codigo postal 22438
Parroquial
 • Diocesi
 • Arciprestato

Bp. de Balbastro-Monzón
Ribagorza
Coordenadas
La Penilla ubicada en Aragón
La Penilla
La Penilla
La Penilla en Aragón

Cheografía y historiaEditar

Se troba en una altura menuda, como cerro d'as estribacions meridionals de la sierra de Turón, en a val de Cinca y, en l'actualidat, chunto a la ribera de l'entibo de lo Grau. Forma parte d'a cuenca d'el barranco de Clamosa (significativament, tamién dito «de la Penilla»), en a ripa cuentra d'an ye Clamosa. Va formar parte d'el municipio de Clamosa dica l'absorción en a Fueva en a decada de 1960,[2] conseqüencia de la total despoblación que van sufrir los dos nuclios más grans que en formaba parte, Clamosa y la propia Penilla.

La Penilla ye el zaguer nuclio en a comarca de Sobrarbe por el sud, respective a'l curso d'el río Cinca, pus a 1 kilometro más auguas t'abaixo d'el lugar el río pasa a estar la buega entre el Semontano (Mipanas) y la Ribagorza, por debant de l'aldeya de Pui de Cinca, tamién conoixida como Villagarda. L'acceso se fa posible por una pista engudronada que naixe en el lateral de la carretera local HU-V-6441 de Graus ta Troncedo en pasando por Pano.

Como muitos atros lugars de l'Alto Aragón, la Penilla presenta una estructura defensiva que posiblement se remonta a la Edat Media. L'historiador Manuel Benito Moliner afirmaba que i heba esistiu un castiello, las suyas enrunas aún se podrían trobar en el sallent de penya a l'ueste de la población,[3] que se trobaba en mans cristianas en l'anyo 1067.[3] En el cabo d'alto d'el lugar, a 670 metros d'altaria, se troba un palacio u casal fuerte[4] que recibe el nombre de Casa El Sinyor, que albergaba el salón de baile y la escuela, y que en chunto con la ilesia ye uno d'os atractivos d'el lugar,[4] anque en l'actualidat se troba runicau.[4] Se sabe positivament que el lugar yera sinyoría d'os Mur de Muro de Roda en el sieglo XVI,[3] y que en el sieglo XVIII y sieglo XIX en yera d'os Heredia[3] de Graus.

EconomíaEditar

 
Bellas casas en a Penilla fan pensar d'un pasau que podría haber estau prou acomodau. Casa o Sinyor, en a imachen, yera d'un chenullo d'os Mur de la Fueva, que van estar sinyors d'el lugar dende el sieglo XVI.[3]

Economicament, la Penilla yera un lugar de preponderancia agricola,[3] con los campos estructuraus en faixas y faixetas que dende los arredols d'os casaches se prolargaban baixant t'allá en tres de los quatros costaus por an que a orografía lo permite. Os cerials sembraus en as faixas yeran el cautivo que, d'alcuerdo con lo que s'ha puesto constatar, yeran principals.[3][5] Manimenos, como tamién gosa pasar en muitos atros lugars, las oliveras[3] y las almendreras[3] plantadas en las marguins complementaban la productividat agricola de las fincas y achudaban a contener la tierra, y bellas fincas s'adedicaban a la producción de vinya, que feba vino pa consumo propio.[3]

En a ganadería, M. Benito Moliner quereba pensar que yera un oficio que heba perdiu terreno dende el sieglo XIX dica la despoblación final,[3] y calculaba unas 20 cabezas de bestiar (entre uellas y crabas) por cada casa,[3] más os bueis y mastos que se podese tener. Bell conillo y bella gallina complementarían la producción animal pa achudar a l'alimentación d'os habitants, y bell poquet de ganadería menor (principalment abellas; de forma más residual cucos de seda tamién[3]) habrían puesto dar productos más secundarios como pa vender-ne ta fuera de lugar.

La Penilla teneba tamién un molín d'olio anque no en teneba garra de grano, lo que fa pensar de cómo yera de principal la producción d'iste lequido en a redolada (p. ex. en Clamosa se i va gosar producir 3.000 kg en 1787[3]) pero pa fer-se moler o grano heban d'ir ta la vecina capital municipal que yera Clamosa. Un tellero y una producción menor de lenya y carbón vechetal con las lecineras y los caixigos de la redolada completaban la industria d'el lugar.[3]

DemografíaEditar

Anque se tiene conoixencia de la Penilla dende el sieglo XI, seguntes Benito Moliner no se'n puede trobar garra referencia demografica anterior a 1646, que en estando sinyoría d'os Mur, en la Penilla se cuenta 8 fuegos (casas) que el propio autor estima representarían a cosa de quatro u cinco habitants[3] por cada casa, d'entre 32 y 40 habitants en el lugar.

En 1713, en la Penilla el numero de casas (fuegos) s'habría reduciu a la metat, con 4 fuegos, lo que faría un total de 20 dica 25 habitants d'alcuerdo con o promeyo de 4-5 habitants/casa[3] que Manuel Benito troba adequau pa ixas envueltas. En 1787, sisanta y quatro anyos dimpués, el numero de casas que pagaban treudos en la Penilla se conserva estable, con 4 fuegos, pero con una ocupación domestica estimable en 13 presonas/casa,[3] lo que daría un total de 52 habitants.

Ta 1860, el numero d'ocupadors de cada casa habría baixau dica 9,1 hab./casa,[3] pero con un total d'once casas, lo que faría una población total arredol d'os 100 habitants en el lugar, y en 1900, con un promedio d'ocupación de 8,45 hab./casa,[3] la población en a Penilla rondaría los 93 habitants.

En l'actualidat y dende los anyos 1960, quan la Confederación Hidrografica de l'Ebro lo va expropiar, la Penilla se troba de tot despoblau.

LenguaEditar

 
Detalle de l'interior de la ilesia de la Penilla, en 2010.

En el lugar de la Penilla se charraba fovano con bell rasgo propio como l'emplego de los articlos el, la, los, las, propio d'os lugars orientals d'a Fueva como Clamosa, Troncedo, Villagarda, Puicinca y tamién Foradada en el norte. Tamién usaban el pronombre «mos», coincident con l'aragonés ribagorzano, en cuenta de «nos» que ye el mayoritario en la Fueva. Pero os rasgos de frontera que lo enquadran en el fovano y no pas en el ribagorzano son claros: cherundios fendo, cantando, usmiando, malmetendo, no palataliza la L: lugar, luna, libro, placeta, planura, flama, y las formas verbals de la primera persona d'el plural son completas, femos, venimos, ibanos, faremos, imos.

La resta de rasgos foneticos y gramaticals son identicos a los d'a Fueva:

-Conservación de F latina inicial y dentro de palabra: afogar, afumar, farina, faba, fecho, fer, ferradura, forniga, fumo, fuso, forno.

-Conservación d'a prepalatal fricativa sorda X: ixugar, ixo, ixordiga, ruxada, ixena, ixaguadizos, teixón.

-Pronunciación d'a R final: ixugar, tociar, muller, lugar, usmiar, venir.

-Uso de o perifrástico: vamos venir. van fer, se va espantar, va entrar.

-Uso de pronombres en, i: me'n voi, pensando-ie, no'n quiere, se'n iba.

-Paradigmas verbas regulars e irregulars fovanos: feba, quereba, teneba, fetz, queretz, tenetz, tiengo, viengo.

-Participios fuertes: dicho, fecho, quiesto, puesto


El lexico ye el mesmo que se gosa usar en tot Sobrarbe y Somontano de Barbastro y coincidente con el Ribagorzano que lo adapta a la suya fonetica de transición. engardaixina, requesta, ruixada, chent, choven, planura, palluzo, misache, ixordiga, ixenar-se, maronyal, figau, fizar, fartalla, estroliquiar, flama, chubo, chilar, chemecar, zancallazo, tociar.

ImáchensEditar

FiestasEditar

ReferenciasEditar

Vinclos externosEditar