Mequinenza

Mequinenza (Mequinensa en catalán) ye un municipio aragonés de la provincia de Zaragoza, situato en la comarca de la Cinca Baixa. Ye situada en o cabo oriental d'a provincia de Zaragoza, limitando con as provincias de Uesca y Lleida y ubicada en a confluencia de tres ríos, l'Ebro, lo Segre y o Cinca. Lo suyo embalse, conoixiu como Mar d'Aragón, ye un d'os mas grans d'Espanya. La suya población ye de 2.478 habitants(2008), en una superficie de 307,45 km² y una densidat de población de 8,06 hab/km².

Mequinenza Mequinensa
Municipio d'Aragón
Mequinenza.
Entidat  • País  • Provincia  • Comarca	Municipio Aragón  Zaragoza Cinca Baixa
Superficie	307,45 km²
Población  • Total	2316 hab. (2016)
Altaria	75 m.
Distancia  • 135 km  • 19 km	enta Zaragoza enta Fraga (Uesca)
Codigo postal	50170
Ríos	Segre y Ebro
Coordenatas	41°22’30’’N 0°18’ 10’’E
Mequinenza Situación de Mequinenza en Aragón
www.Mequinenza.com

Se troba emplazada entre dos grans masas d'augua, lo Embalse de Mequinenza y lo embalse de Riba-roya. Turisticamente destacan las Fiestas Sant Blas y Santa Águeda, declaradas Fiesta d'Interés Turistico d'Aragón, lo Castiello de Mequinenza y los Museos de Mequinenza. Ye un verdadero paraíso pa los amantes de la pesca e esportes aquaticos. Disposa d'un campo de regatas atura remo y piragüismo considerau un d'os millors d'Europa.

Cheografía

La localidat de Mequinenza ye situata a 75 metros d'altaria sobre lo ran de la mar, a una distancia de 75 km de la ciudat de Zaragoza, la capital de la suya provincia y d'Aragón, y de 19 km d'a localidat de Fraga, a capital d'a suya comarca. Ye situada en o cabo oriental d'a provincia de Zaragoza, limitando con as provincias de Uesca y Lleida y ubicada en a confluencia de tres ríos, l'Ebro y lo Segre, que poco dinantes ha recibiu las auguas d'o Cinca.

Lo suyo singular y peculiar ubicación ha influyiu tanto en a suya historia, como en l'idioma y en o caracter d'os suyos habitants. Mequinenza se troba emplazada entre dos grans masas d'augua, lo Embalse de Mequinenza y lo embalse de Riba-roya.

Mugas

Lo suyo termin municipal muga con Torrent de Cinca, Fraga, Casp, Favara, Nonasp, Fayón y Seròs.

Toponimia

Prene nombre de bells berbers de la branca Micnasa (como los micnasa de Meknes, Marruecos), establitos en ixa zona, on cusiraban la muga noreste de l'Al Andalus. La tribu edificó un asentamiento defensivo en o sieglo VIII. Se latinizó como Miquinencia y amaneixe de forma distinta en a documentación dica lo sieglo XIX alternándose las formas Miquinensa, Miquinença, Mequinença, Mequinensa u Mequinenza. Per antonomasia, se conoixe popularment la población como "lo poble".

Cheolochía

Mequinenza s'inscribe en plena Depresión Cheolochica de l'Ebro entre afloramientos de materials cenozoicos d'a denominada Formación Mequinenza, entre los quals destacan calcolutitas, areniscas y calizas, chuntos a libels lignitíferos.

Los lignitos de Mequinenza

La Cuenca carbonífera de Mequinenza constituye la prencipal aria carbonífera d'a provincia de Zaragoza, y s'extiende per los limites territorials d'Aragón y Catalunya, con o epicentro en Mequinenza, que da nombre a dito espacio minero. Abarca una superficie d'uns 500 km² que s'extiendo en uns 20 kilometros en adreza este-ueste a lo largo d'as marguins d'os ríos Ebro, Segre y Cinca. Lo tipo de carbón que amaneixe en a cuenca se relaciona con depósitos continentals que colmataron la zona oriental d'a Cuenca de l'Ebro entre lo Oligoceno superior y lo Mioceno inferior. La suya edat quedaría ubicada entre los 35 y los 25 millons d'anyos, configurando una clase de carbón relativament choven comparaus con os d'atras cuentas. Historicament, la capitalidat d'o mineral turolense y la suya proximidat a los nuclios de población mas grans ha feito uembra a los depósitos acumulaus en l'aria oriental d'a Depresón de l'Ebro, tractando-se en totz dos casos de lignito negro, denominau tamién hulla subituminosa. Esta tiene una potencia calorífica que puede plegar a las 6.000 calorías permitindo que haiga estau un mineral historicament demandau per industrias (de cemento, quimicas y azucareras) que valoraban prencipalment la suya capacidat pa chenerar enerchía.

Como curiosidat, en agosto de 1884, La Carbonífera del Ebro plego a ofrir a las autoridatz de Barcelona lignito de Mequinenza pa encender grans fogueras en as carreras pa "sanear" l'atmosfera debant de la menaza d'una epidemia de cólera.

Las caracteristicas cheolochicas d'o lignito mequinenzano condicionoron las labors mineras. Existen mas de 30 libels diferents de lignito completament horizontals, encara que la mayoría d'ells yeran masiau estreitos pa estar esclataus lo que obligaba a los miners a treballar en cuclillas u tumbaus en o espacio interior d'a capa, d'uns 40 a 60 centímetros d'altura.Mas de 150 anyos d'explotacions mineras en a cuenca minera de Mequinenza han resultau en una gran cantidat de patrimonio y historia minera que en l'actualidat se pueden visitar y recorrer en o Museo d'a Mina de Mequinenza. En a cuenca carbonífera de Mequinenza plegoron a treballar en un momento u unatro mas de 250 expotaciones mineras. Qualques d'ellas yeran aluenyadas d'os nuclios urbans y sin vías de comuncación, per lo que en qualques casos se construyioron poblaus miners an gosaban vivir las familias completas u los treballadors. La interpresa Carbonífera de l'Ebro edificó un important aloch de tres plantas d'estilo de entreguerras situau en a mina Virchen d'o Pilar. L'edificio prencipal contaba con tres plantas con una longaria de 65 metros y chunto a ell unatro mas chicot destinau a usinas y residencia d'incheniers.​ Este poblau aculliba a treballadors venius de poblacions cercanas como Fayón, Nonasp, Fraga, Casp u Sastago.

Las malas comunicacions per tierra d'as zonas mineras con os puntos de consumo obligoron a utilizar l'Ebro como meyo prencipal de transporte, per medio d'embarcacions de carga conoixidas como llaüts, que descendían cargadas a favor d'a corrient y ascendían vuedas remolcadas per machos que seguiban lo camín de sirga en la marguina. Lo destín d'as embarcacions yera Fayón, an lo lignito se trasbordaba a lo ferrocarril, encara que una parte d'ellas continaban auguas abaixo dica la Electro-Quimica de Flix, que tamién utilizaba este carbón.

Historia

Antiguidat

Cal destacar la importancia que qualques autors han dau la situación en esta zona d'a ciudat iberica de Octogesa, que chugó un papel important en o desembolique d'a batalla de Ilerda. Dende 1983 y como parte d'os programas d'investigación d'o Museu de Zaragoza, en colaboración con o Concello de Mequinenza y l'emparo d'a Deputación Cheneral d'Aragón se levoron a cabo una serie d'excavacions en tres puestos: Los Castellets, Barranco d'a Mina Vallfera y Riols I.

• Los Castellets: un espacio clau pa lo conoixencia d'o paso d'os lugars d'a Edat de Bronze tardana a la cultura d'os campos d'urnias. Lo conchunto se compone d'una colonia sobre un estribo en o río Ebro, rodiau per dos torres, una paret y una zanja, chunto a dos necrópolis. Ye lo solo de tot Aragón en o qual s'han trobau conchuntament necrópolis d'inhumación y incineración.

• Barranco d'a Mina Vallfera: se levó a cabo una campanya d'excavación d'emerchencia en este puesto, descubrindo un grupo muito important de aldeas necrópolis y datación final neolítica.

• Riols I. En octubre de 1985 se levó a cabo la primera campanya d'excavación d'emerchencia que describiba un asentamiento de caracteristicas semellants a las d'o Barranco d'a Mina Vallfera. La conservación d'este chacimiento permitió encetar los estudios que apuntoron que databa d'o periodo final d'o Neolítico.

Numerosas pinturas y gravaus asociaus han estau trobaus en Mequinenza, perteneixients a l'Arte rupestre d'o arco mediterranio d'a peninsula iberica, consideraus Patrimonio d'a Humanidat per la UNESCO en 1998​: Barranco de Campells I, Barranco de Campells II, Barranco d'a Plana I, Barranco d'a Plana II, Camín d'a Cova Plana I, Camín d'a Cova Plana II, Pero de Patriciel I, Roca de Marta, Sierra d'os Rincones I, Valmayor IV, Valmayor V, Val de Caballé, Val de Mamet I, Val de Mamet II y Vallbufandes I.

Edat Meya

La presencia de fragmentos de ceramica “sigillata” decorada en diversos espacios levan a indicar una ocupación romana. Julio César en a suya obra “De Bello Civili” fa referencia a la población d'Octogesa que qualques historiadores sitúan en Mequinenza:

"Presa esta resolución, mandan pillar barcas per tot l'Ebro y conducir-las a Octogesa. Yera esta ciudat a la ribera de l'Ebro, distant vinte millas d'os reals. Aquí disposan formar un puent de barcas, y fendo pasar dos lechions per lo Segre, fortifican lo suyo campo con un encletau de dotze pietz".

Lo toponimo de Mequinenza procede d'a tribu bereber Banú Miknasa a los quals s'atribuye la fundación d'a mesma con a suya plegada a la peninsula entre lo 714 y 719. Entre la reconquiere, Alifonso I lo Batallero la ocupó en 1133 (encara que los almorávides la reconquirioron poco dimpués) y estió reconquerida definitivament per Remón Berenguer IV en 1149. Mequinenza pasó a los dominios d'a familia noble d'os Moncada, sinyors d'a baronía d'Aitona. En este periodo se reedificaría la fortaleza defensiva. Al-Idrisi, cronista arabe d'a epoca, la describe asinas:

«Ye chicota, pero tiene una gran fortaleza de fuerte aspecto y se troba en as buegas d'al-Ándalus».

En 1133 la población ye de nuevo recuperada per las fuerzas musulmanas de Yahya ibn Ganiya en 1136. No será dica 1149 quan Mequinenza pasará definitivament a mans cristianas dimpués d'a conquiesta per parte de Remón Berenguer IV. Qualques documentos identifican que este feito tenió puesto lo 24 d'octubre de 1149. Dende alavez, la población (y probablement las fortificacions defensivas emplazadas y construyidas per los habitants musulmans) se convertirán en tenencias de realengo, denominación churisdiccional que indica que lo puesto dependeba dreitament d'o rei. En 1153, se realizará la donación d'1/5 d'as tierras situadas en a ribera de l'Ebro dende Mequinenza dica Benifallet a la Orden d'o Temple, pero ye probable que lo Castiello, la villa, las tierras circumdants y los molins y laudas de Mequinenza quedasen encara baixo la dependencia real u de Guillem Ramón de Moncada.

En 1212, Pero II prometió a la suya filla legitimada (contraita difuera d'o suyo matrimonio Constanza d'Aragón, a lo noble catalán Guillén Ramón de Moncada en una fiesta celebrada en Taust. Lo dote que aportaría la infanta serían los señoríos de Mequinenza, Aytona, Albalat de Cinca, Serós y Soses con totz los suyos dreitos, castiellos, villas y termins. S'encetaba asinas la rama d'Aytona d'o linaje de Moncada, que prene lo nombre d'o mas important d'os señoríos que Constanza recibió. A partir d'este momento, los descendents d'o linaje d'os Moncada serán los sinyors de Mequinenza.

Entre este periodo surten conflictos entre Fraga y Mequinenza a causa d'os suyos limites fronterizos. Lo 6 de setiembre de 1246, pa privar batallas y litigios, Pero de Moncada y la suya muller Sibila proceden a l'amullaramiento de ditos termins, encara que a cambio d'as milloras atorgadas a los fragatinos, respectando los termins d'os suyos municipios, los hombres d'a villa de Fraga se veyen obligaus a pagar a los Moncada cient maravedís d'oro. Mequinenza no priva la peste de 1348, que ocasiona muitas victimas en esta ocasión y tamién en os rebrotes epidémicos dende 1380. A resultas d'esto, de 1381 a 1387, l'infante Juan lo Cazador remaneix en diversas ocasions en o Castiello. En 1410, dimpués d'a muerte sin descendencia de Martin I y entre las disputas succesorias que desembocoron en o Compromís de Caspe, los partidarios d'o conde Jaime d'Urgel en o reino d'Aragón organizoron lo suyo propio parlamento en a localidat, en oposición a lo d'Alcanyiz , encabezau per los leyals a Fernando de Trastámara.​​ Diferents guerras como la Guerra Civil Catalana (1462-1472), la Guerra de Secesión (1640-1652) y la Guerra de Succesión (1705-1714) tamién asolaron la población y lo castiello.

Edat Moderna y Contemporania

Entre los sieglos XV y XVI, se succede una epoca de miseria y fambre con quantas rechiradas a causa d'a opresión de qualques sinyors. En l'anyo 1697 Fray Miguel de Salas escribe lo libro Vida de Santa Agathoclia, virchen y martir, patrona de Mequinenza.

Entre la invasión napoleónica, lo cheneral Suchet (1810), como lo fació Remón Berenguer IV en 1149, intenta conquerir Mequinenza a la quala Napoleón consideró “la clau de l'Ebro”. Dimpués de 20 días d'asedio de 12.000 hombres de l'exercito francés frent a 1.000 defensors espanyols, se rendía la plaza. Esto le facilita a Suchet la conquiesta de tot lo Baixo Cinca y lo Segriá. A conseqüencia d'ixo lo nombre de "Mequinenza" figura en l'Arco de Triunfo d'a plaza Charres de Gaulle de París como una d'as grans victorias de Napoleón. En 1812 Mequinenza dentraba a formar parte d'o departamento francés d'as Bocas de l'Ebro. Poco dimpués, en 1814 Mequinenza estió recuperada pa los espanyols gracias a una audaz estratagema debida a lo militar y aventurero espanyol d'orichen flamenco Juan Van Halen, posteriorment tenient cheneral, que per estratagema aconsiguió la prene de Leida y lo castiello de Monzón.

En 1831 la localidat perteneixeba a los duques de Medinaceli y tamién a lo corregimiento de Zaragoza. Per esto, quan esta ciudat se convierte en cabeza d'un d'as tres provincias que en 1835 sería dividiu l'antigo Reino d'Aragón, Mequinenza sigue integrada en a provincia de Zaragoza.

Mequinenza torna a estar puesto d'importancia entre las Guerras Carlistas y posteriorment en a Guerra d'os Matiners. En 1841, l'aventurero y interpresario Enrico Misley promovió la Interpresa de Vapores per l'Ebro con l'obchectivo d'establir un servicio de transporte entre Zaragoza y Barcelona divido en tramos, utilizando lo carbón d'as minas de Mequinenza de como combustible pa los barcos de vapor. La interpresa de Misley remató fracasando per motivos politicos y economicos, encara que significó un punto de partida en a concesión y la explotación d'as primeras demarcacions mineras d'a cuenca carbonífera de Mequinenza.

Entre la Guerra Civil Espanyola en Mequinenza, los Auts estioron lo escenario de violentos combates entre la fase inicial d'a batalla de l'Ebro, an la 42ª División republicana encetó lo paso d'o rio Ebro per esta zona la maitinada d'o 25 de chulio. La operación d'a bolsa de Mequinenza-Fayón en os Auts, -de caracter secundario en a Batalla de l'Ebro respective a l'obchectivo prencipal que yera l'abance enta Gandesa-, s'encetó lo 25 de chulio con o cruce d'o río y la conquiesta d'una cabeza de puent cruciando lo río Ebro entre los lugars de Fayón y Mequinenza. Lo balanz d'a batalla d'os Auts estió un d'os mas cruentos de tota la batalla de l'Ebro. Per la parte republicana, 817 muertos y 1.328 prisioneros sin contar los ferius y desapareixius (amán de 3.000 baixas), y per l'exercito franquista, 135 muertos y 1.284 ferius.​​ Finalment los supervivients d'a 42ª División republicana habioron de que tornar a cruciar l'Ebro en sentiu contrario. Como conseqüencia d'a batalla de l'Ebro, lo puent sobre l'Ebro de Mequinenza estió destruyiu y no estió reconstruyiu dica los anyos cinquanta.

La plegada d'o sieglo XX propició un incremento de la demanda de carbón a causa de l'incremento d'a industria. La plegada d'a Primera y Segunda Guerra Mundial encara afavorió mas este incremento. Pero l'aparición d'o ferrocarril, la crisi d'a navegación fluvial y la implantación d'a enerchía electrica provocoron la construcción de diferents embalses hidroeléctricos en o río Ebro. En encetar-se las obras y elevar-se lo libel d'as auguas, muitos mequinenzanos se veyioron obligaus a marchar u a abandonar la suya población que reconstruyioron chunto a lo río Segre. Una Mequinenza mas moderna y mas turistica pero que encara conserva la memoria d'o suyo pasau.

Administración

Reparto de concellers

Eleccions municipals
Partito	1979	1983	1987	1991	1995	1999	2003	2007	2011
Partido de los Socialistas de Aragón									7
Partido Aragonés									3
Partido Popular									1
Total									11

Alcaldes

Lista d'alcaldes

Lechislatura	Nombre	Partito politico
1979–1982	Miguel Godia Ibarz	Partido de los Socialistas de Aragón
1982–1983	Santiago Oliver Castelló	Partido de los Socialistas de Aragón
1983–1987	Sebastián Caballé Arbonés	Partido de los Socialistas de Aragón
1987–1991	Sebastián Caballé Arbonés	Partido de los Socialistas de Aragón
1991–1995	Sebastián Caballé Arbonés	Partido de los Socialistas de Aragón
1995–1999	Jaime Borbón Oliver	Izquierda Unida
1999–2003	Jaime Borbón Oliver	Izquierda Unida
2003–2007	Magdalena Godia Ibarz	Partido de los Socialistas de Aragón
2007–2011	Magdalena Godia Ibarz	Partido de los Socialistas de Aragón
2011–2015	Magdalena Godia Ibarz	Partido de los Socialistas de Aragón
2015–2019	Magdalena Godia Ibarz	Partido de los Socialistas de Aragón

Economía

La suya economía ye basada en a industria, la minería d'o carbón, la manufactura textil, la ganadería porcina y ovina (encara que estas zagueras se troban ya en regresión), una creixent agricultura de secano (almendreras, oliveras y cereales) y regadío orientau enta lo cautivo d'arbols frutals tals como cireseras y melocotoneros. Tamién existe una industria turistica con gran potencial de futuro especialment gracias a la pesca y a la cultura. Mequinenza recibe visitantes extranchers plegaus practicament dende los cinco continentes.

Las minas de lignito estioron intensament esclatadas entre las dos guerras mundials; lo transporte s'efectuaba per l'Ebro u per carretera. Actualment esta actividat se troba completament en decadencia, encara que antes mas heba permitiu a Mequinenza poseyer una flota de 16 llaüts (embarcacions que transportaban lo carbón de Mequinenza y teneban una capacidat de carga de 18 a 30 toneladas), ya desapareixida.

Un d'os prencipals referents industrials d'a localidat ye lo Poligono Industrial "Riols" situau en l'extremo nordeste d'o termin municipal en o limite con a provincia de Uesca . Se tracta d'un espacio estratechico que disposa de buenas comunicacions, a meya hora d'a estación d'AVE Lleida-Pirineus, a hora y vinte menutos de Zaragoza y Tarragona y a amán de dos horas de Barcelona. Lo Poligono "Riols" tamién conta con un edificio CEEI (Centro Europeu d'Interpresas y Innovación) denominau Centro d'Emprendedores de Mequinenza dedicau a la enchegada de nuevas interpresas de recient creyación que quieran consolidar-se en o mercau. Lo centro forma parte d'o Ret Aragonés de Centros d'Emprendedores (Ret ARCE).

Patrimonio

Museos de Mequinenza.

Museos de Mequinenza

En os Museos de Mequinenza, se puede explorar una galería minera subterrania de carbón de mas de 1000 metros de recorriu en o Museo d'a Mina, recorrer la historia d'a población dica la desaparición de l'antiga villa baixo las auguas d'o rido Ebro en o Museo d'Historia u descubrir cómo se viviba entre la Prehistoria en o Museo d'o Pasau Prehistorico. Feitos a devantadera en 2008, son ubicaus en l'antigo Grupo Escolar Maria Quintana, las antigas escuelas d'a población construyidas en 1929 y un d'os pocos edificios supervivients d'o espaldo d'o Lugar Viello.

Los Museos de Mequinenza se centran en o patrimonio minero y historico d'a población que estió demolida y inundada baixo las auguas de l'Ebro. En l'actualidat se puede visitar parte d'o casco antigo, lo castiello medieval d'a ciudat y una mina de carbón autentica de mas d'un kilometro de recorriu interior con material historico y maquinas que han estau utilizadas pa la extracción de carbón entre mas de 150 anyos en a cuenca minera de Mequinenza. Tamién se troba chunto a los museos l'Albergue Municipal "Camí de Sirga" con capacidat pa 80 personas, que replega lo nombre de l'antiga rota que usaban los sirgadores pa remontar lo río Ebro con os llaüts, unas embarcacions que podeban plegar a cargar 30 toneladas de carbón.

Castiello de Mequinenza

Castiello de Mequinenza.

L'edificio s'alza quasi a lo canto d'un gran precipicio, estando una masa zarrada de pro altura, la suya planta ye un cuadrilátero irregular, con siet torreones rectangulars fueras d'un, lo mas robusto, que ye curiosament de planta pentagonal. Dos torreones flanquean la chicota puerta que ye semicircular, baixo escudo y protechida per un buharda. Pocas fortalezas tendrán un millor emplazamiento que esta, contemplando un extenso y impresionant paisache, quasi cheolochico, sobre la confluencia d'os ríos Ebro, Segre y Cinca y las suyas tierras circumdants. No deixa de sorprender que los Moncada, sinyors d'a baronía de Mequinenza triasen este nido d'aligas pa la suya mansión fortificada. L'edificio ye un autentico Castiello-Palacio, un d'os millors que l'arte gotico legó a la Corona d'Aragón, datado en os sieglos XIV y XV.

Probablement en os suyos prencipios estió una fortaleza arabe, construyida per la tribu bereber d'os Miknasa enta lo sieglo XII, tribu que tamién dio nombre a la población. Dimpués de quantas conquiestas, cayió en mans de Ramón Berenguer IV, pasando definitivament a mans d'os cristians. Dimpués de quantos cambios de propietario, en 1184 se le concede lo castiello y la villa de Mequinenza, a lo marqués d'Aitona , Ramón Guillén de Moncada, pa pasar posteriorment a los duques de Medinaceli. Muito mas tarde, entre lo sieglo XVIII y la Guerra de Succesión se transformó y acondicionó lo Castiello y los alrededores a una nueva forma de guerra y estió este lo momento en o qual lo Duque d'Orleáns mandó construyir un camín que iba dende Mequinenza a Tortosa paralelo a lo río, con a finalidat de custodiar totas las embarcacions que navegaban per ell. Entre lo sieglo XIX y la plegada d'a Guerra d'a Independencia, lo castiello suportó tres ataques per parte d'os exercitos de Napoleón, pero finalment en 1810 estió conqueriu per las tropas d'o mariscal Suchet, y perteneixió dica 1814 a lo gubierno francés. Mequinenza pasó a estar inscrito en letras grans en un d'as columnas exteriors en l'Arco d'o Triunfo de París como una d'as grans victorias francesas en a peninsula iberica. Entre 1820 y 1823 adquirió un papel important, suportando importants ataques carlistas y conservando guarnimiento militar dica prencipios d'o sieglo XX momento en o qual s'abandona. Entre la Guerra Civil pansa a estar un puesto estratechico d'obserbación y una vegada finalizaus los combates queda en ruinas dica que la interpresa ENHER lo reconstruye en o decenio d'os anyos 50. Actualment lo castiello ye propiedat d'a Fundación ENDESA.

Lugar Viello de Mequinenza

Lugar Viello de Mequinenza.

Lo lugar viello de Mequinenza estió situau en a marguin cucha d'o rido Ebro, chusto en o punto que confluyen con as auguas d'o Segre y d'o Cinca. Estió espaldau practicament de forma completa entre la construcción de l'embalse de Ribarroja. Constituyiba un nuclio urbano con caracteristicas propias d'as localidatz d'o tramo baixo de l'Ebro , con una trama urbana que se remontaba a la epoca musulmana. Gracias a los ríos, Mequinenza establió un comercio fluvial en tota regla, que dio prestigio, no nomás a los navegantes mequinenzanos sino tamién a los carpinteros "calafateros", a los sogueros y a lo milenario Camín de Sirga de l'Ebro . En a epoca d'esplendor se plegó a tener una flota de mas de 16 llaüts, embarcacions tipicas d'o tramo baixo de l'Ebro que transportaban entre 18 y 30 toneladas, normalment de lignitos extraitos d'a cuenca minera mequinenzana.

Con a plegada d'a interpresa ENHER y la construcción d'os embalses de Mequinenza y Riba-roya, la vida cambió pa la mayoría d'os mequinenzanos, pasando de tener censados 4.033 habitants a tener 5.800 censados y amán d'1.500 mas sin censar. Muitos d'ells yeran treballadors plegaus d'atras localidatz pa treballar en a construcción d'a presa de Mequinenza. Las industrias empecipioron a zarrar a causa de l'aumento significativo d'o libel d'augua d'a presa de Ribarroja y la población empecipió a reclamar alternativas a la inundación d'o nuclio urbano. Empecipiaba asinas un éxodo pa los habitants de Mequinenza que tenioron que abandonar las suyas casas pa pasar a vivir a la nueva población a canto d'o río Segre. Una parte d'os habitants se marchoron enta zonas mas industrials como Barcelona u Zaragoza u mesmo a l'extranchero pa continar treballando en a minería​. A zaguers de l'anyo 1974 la mayoría d'a población ya heba completau lo trachico abandono d'o Lugar Viello de Mequinenza y se trobaba vivindo en a nueva localidat. Parte de l'antiga población de Mequinenza puede visitar-se hue en día perque s'ha convertiu en un gran parque d'a memoria a l'aire libre. S'han recuperau d'entre las runas los trazaus orichinals d'as carreras y d'as casas que quedaban per alto d'o libel de l'augua. La Mequinenza antiga, lo “Lugar Viello” como la conoixen los mequinenzanos, ye una invitación a pasear per la memoria d'as suyas carreras y callejones, a redescubrir parte de l'antiga Ilesia, a imachinar los antigos muelles y conoixer mil historias, curiosidatz y leyendas d'aquella milenaria y historica villa de navegantes y miners a canto d'o rido Ebro.

Aiguabarreig Segre-Cinca-Ebro

Aiguabarreig.

En a confluencia d'os ríos Segre y Ebro s'ubica l'Aiguabarreig un espacio con gran riqueza natural y una gran variedat d'ecosistemas que abarcan dende las estepas mediterranias a impenetrables selvas de ribera, convertindo este espacio en un paraíso pa la biodiversidat. Territorialment, l'Aiguabarreig se troba en o centro d'a Depresión meya de l'Ebro. Limita a lo ueste con os Monegros, a lo este con os Tossals de Montmeneu y Almatret y enta lo sud con a coda de l'embalse de Ribarroja. Este espacio recibe lo nombre d'a parola d'orichen catalán que designa lo puesto en o qual dos u mas corrients d'auguas se chuntan y forman una sola. Lo Segre y lo Cinca forman un primer Aiguabarreig entre las poblacions de La Granja d'Escarp/La Granja d'Escarp, Massalcoreig y Torrente de Cinca, a pocos kilometros convergen con as auguas de l'Ebro , ya en o termin municipal de Mequinenza, conformando un d'as mayors confluencias fluvials de tota la peninsula iberica.

En l'Aiguabarreig trobamos cientos de metros d'amplaria d'augua connumerosas islas fluvials y selvas de ribera, grans masas de carrizal, plachas de guijarros, pozas y galachos. Ye un punto de confluencia d'a flora esteparia proveniente d'a zona arida de Monegros y d'a flora mediterrania que asciende per la val de l'Ebro. Gracias a estas caracteristicas conviven especies d'ambients opuestos. Las aus son lo grupo mas numerosos y abarcan dende colonias d'ardeídas a tot tipo de rapaces y aus propias d'ambients desérticos. Tamién pueden trobar-se reptiles, anfibios y mamifers, destacando especialment murciélagos, ciervos, corzos, nutrias y la presencia cada vegada mas abundant de crabas salvaches.

Presa de Mequinenza

Construyida en 1966 sobre lo río Ebro, tiene una superficie de 7540 ha de lamina d'augua, estando lo mayor embalse d'Aragón . Lo suyo volumen aconsigue los 1530 hm³, dedicando-se a la producción d'enerchía electrica. Tiene una amplaria meya de 600 m y la suya profundidat plega a superar los 60 m. La presa, de 79 m de altura, s'empara en as estribaciones calizas d'as sierra de Montenegre y de l'Hortal, en o termin municipal de Mequinenza. L'embalse recibe la denominación geoturística de mar d'Aragón, en estar tota la suya superficie dentro d'esta comunidat autonoma, servindo en bell tramo de limite provincial entre Uesca y Zaragoza. Anega parte d'os termins municipals de Mequinenza, Fraga, Caspe, Chiprana, Sástago y Escatrón. La construcción d'a presa de Mequinenza, per concesión a la interpresa ENHER de l'aproveitamiento hidroeléctrico integral d'un tramo d'o rido Ebro en 1955, dio orichen a este gran embalse que la suya longaria ye d'uns 110 km y poseye unas "costas interiors" d'arredol de 500 km. La lamina d'augua en a cota maxima ye de 121 m. S'embalsó per primera vegada en aviento de 1965 quan s'inundoron 3500 ha de hortal. L'incheniero encargau d'o prochecto estió lo catalán Victoriano Muñoz Oms.Con una cota d'augua de 121,5 metros y un aria drenada de 55.000 km² ye lo mayor embalse hidroeléctrico de tot Aragón. Inicialment contaba con una potencia instalada de 324 MW encara que dende 2010 s'ha incrementau a 384 MW, con una producción anyal de mas de 743 GWh.

Presonalidatz naixitas de Mequinenza

• Categoría:Naixitos de Mequinenza

Puestos d'intrés

• Castiello de Mequinenza
• Entibo de Mequinenza
• Lugar viello de Mequinenza
• Museos de Mequinenza

Vinclos externos

• Se veigan as imáchens de Commons sobre Mequinenza.
• Pachina web oficial municipal.