Archidiocesi

Una archidiocesi ye, en a Ilesia catolica, una diocesi con un rango superior a las convencionals. O títol ye un nombre honorifico y d'él se deduce que o suyo bispe siga denominau arcebispe. En as Ilesias orientals catolicas, as archidiocesis se denominan archieparquías.

Mapa d'as diocesis d'Espanya. En color mas fosca as archidiocesis.

Diocesis sufraganias

L'archidiocesi gosa presidir sobre un grupo de diocesis d'una rechión, as cuals son conoixidas como "sufraganias", pero a incidencia de l'arcebispe en a vida de ditas diocesis ye mas de preeminencia que de incherencia, a menos que existan razons de fuerza mayor pa ello como a imposibilidat d'un bispe de rechir a vida d'a suya diocesi. No todas as archidiocesis tienen diocesis sufraganias (por eixemplo, l'Archidiocesi Castrense d'Espanya, no en tién porque no ye una archidiocesi territorial).

Ragón d'a elección d'o títol

O títol d'"archidiocesi" lo da a Santa Seu y pueden existir diferents razons pa ixo. As mas importants son:

1. A diocesi tien una larga tradición historica.
2. A diocesi tien por territorio una important rechión urbana d'un país.

O pastor

Por lochica, o bispe recibe o títol d'arcebispe y iste constituye un cuerpo administrativo que diriche a faina eclesial de l'archidiocesi. L'arcebispe ye nombrau nomás por o papa y ye baixo supervisión dreita d'iste (a diferencia d'os bispes convencionals).

Tipos d'archidiocesis

D'as 629 archidiocesis existents en tot o mundo, 547 son metropolitanas. As archidiocesis metropolitanas fuoron creadas en o sieglo V en a capital de cada provincia de l'Imperio Romano, estando o suyo chefe un arcebispe metropolitano. Cada archidiocesis metropolitana ye cabeza d'una provincia eclesiastica, que a la vegada comprende por un regular atras churisdiccions, ditas sufraganias de l'archidiocesi metropolitana.

En as Ilesias orientals catolicas, existen 4 archieparquías que encabezan as 4 Ilesias archiepiscopals mayors:

• Archieparquía mayor d'Ernakulam-Angamaly, d'a Ilesia catolica siro-malabar.
• Archieparquía mayor de Făgăraș y Alba Iulia, d'a Ilesia greco-catolica rumana.
• Archieparquía mayor de Kiev-Galitzia, d'a Ilesia greco-catolica ucrainesa.
• Archieparquía mayor de Trivandrum, d'a Ilesia catolica siro-malankara.

As atras 78 archidiocesis se dicen archiepiscopals.