L'Abizanda

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo tracta sobre l'Abizanda. Ta altros usos de «Abizanda» se veiga Abizanda (desambigación).

L'Abizanda (oficialment, en castellano, Abizanda) ye un lugar y municipio aragonés d'a provincia de Uesca, en a comarca de Sobrarbe y o partiu chudicial de Boltanya. A suya población ye de 162 habitants en una superficie de 44,8 km² y una densidat de población de 3,62 hab/km².

L'Abizanda Abizanda
Municipio d'Aragón
O nuclio de l'Abizanda, dende a carretera A-138.
Entidat  • País  • Provincia  • Comarca	Municipio  Aragón  Uesca Sobrarbe
Capital	L'Abizanda
Partiu chudicial	Boltanya
Superficie	44,8 km²
Población  • Total  • Densidat	162 hab. (2013) 3,62 hab/km²
Altaria  • Meyana	617 m.
Distancia  • 88 km	enta Uesca
Codigo postal	22392
Patrons	Santa María de l'Asumpción y Sant Veturián
Parroquial  • Diocesi  • Arcipestrau  • Parroquia	Balbastro-Monzón Sobrarbe-Ribagorza Asumpción de Ntra. Sra.
Ríos	Barranco d'o Río y río Cinca
Coordenadas	42°14’38’’N 0°11’54’’E
L'Abizanda L'Abizanda en Aragón
Web oficial

O nuclio de l'Abizanda teneba 79 d'os 151 habitants d'o municipio en 2018.

O municipio actual comprende os lugars de l'Abizanda, que n'estió o primordial ta formar-lo, Escaniella y Ligüerre de Cinca, que se fusionón con l'Abizanda en o periodo 1842-1857, Lamata, que feba parte de l'antigo municipio d'Escaniella y Lamata, y o Mesón de Ligüerre, l'aldeyeta de 3 casas a'l canto de a carretera que teneba l'antigo municipio de Ligüerre.

Dica la suya repentina muerte en mayo de 2005, o suyo alcalde yera Pedro Santorromán Lacambra, senador por o PSOE en a cambra alta, fundador y president de l'asociación ADELPA y secretario cheneral de a Federación de Asociaciones y Municipios con Centrales Hidroeléctricas y Embalses, personache muit ligau a la promoción de a cultura de o Sobrarbe y a la promoción d'una nueva cultura de l'augua que minimizás l'impacto d'os pantanos en a población d'as zonas afectadas.

Cheografía

O lugar de l'Abizanda se composa de dos barrios deseparaus a cada costau de o barranco d'o Río. O barrio d'o castiello destaca por a torre de l'homenache de l'antigo castiello de l'Abizanda, d'o sieglo XI, que le da o nombre a'l nuclio, y con él, a'l municipio. Se troba en alto d'una penya extraplomada, con una espluga en a baixant nord-este, en sinyoreando un punto d'estretimiento en o corso d'o barranco, con una baixant petrosa tamién en a man cuentra.

Por a suya posición, y porque l'actual carretera d'acceso mas important a'l Sobrarbe, dende o Sud, pasa por a cuenca d'o barranco, l'Abizanda se destaca como a primer población sobrarbenca que se troba cuan se puya en sentiu ta l'Aínsa dende o Semontano de Balbastro.

Estructura urbana

O barrio d'a plaza de l'Abizanda dende o suyo castiello.

Un barranco estacional, que heba nombre «barranco de Riazuelo», afluent de o d'o Río, esnavesaba tradicionalment por o centro d'o barrio d'o castiello de l'Abizanda, a on que en l'actualidat ye a plaza. A plaza se pavimentó en o sieglo XX, tot tapando ixe barranco.

A plaza de l'Abizanda ye singular, además, por haber estau feita con cimento que donó un empresario catalán, de nombre Domingo Muniente, y por ixo recibe o nombre d'o personache por cuentas de dicir-se «Plaza Mayor» como en a mayoría de lugars en a comarca.

Por o demás, o nuclio de l'Abizanda (principalment, o barrio d'o castiello) se troba en as dos costeras que fan a sierra de Sant Benedet (u sierra d'Arbe) por a man occidental y o puntón d'o castiello, con a plaza en a part mas baixa.

En o puntón, se destaca as restas d'o castiello, d'o sieglo XI, que dominan o paisache urbano de a población. En o perimetro d'o recinto, mas alto que a resta de l'Abizanda, se i conserva bels trocez de muro d'o que pudon estar os lienzos exteriors d'a fortificación.

Historia

L'Abizanda amaneixió como población en a base d'o castiello, que ye un d'os mas grans que existe en Sobrarbe meridional. Por ixo, a historia d'o lugar ye muit dominada por a historia d'o suyo castiello.

O castiello de l'Abizanda o fundón os sinyors musulmans de a familia Ibn Sallam. A dita familia tenión presencia en belaltros nuclios en a comarca, dica dimpués de a reconquiesta, y ostentón bels castiellos y fortificacions tamién en os anyos sucesivos a la dominación cristiana, como por eixemplo o castiello de Clamosa, en a cuentra d'o río Cinca. D'alcuerdo con o historiador Manuel Benito Moliner, podrían trobar-se en as oríchens de l'apelliu Salamero, que lievan muitas personas en a zona de confluencia d'as comarcas de o Sobrarbe, o Semontano de Balbastro y a Ribagorza, en a redolada a on ye l'Abizanda. O nombre musulmán de l'Abizanda yera «Abinyuyas».

O castiello, con a suya caracteristica torre, sinyorea o nuclio de l'Abizanda.

Amaneix en os documentos historicos como fortaleza conquerida por os cristianos de camín ta l'anyo 1017, en tiempos de o reinau de Sancho lo Mayor. S'accepta que se reconstruyó en 1023, porque ye a calendada en a que s'ha puesto fechar a construcción de a torre, d'estilo romanico, executada por mayestros lombardos en o marco d'a primer epoca d'expansión de o romanico por l'Alto Aragón.

A linia de tinents de o castiello se conoix con bellas interrupcions: Ato Galíndiz de 1055 dica 1079, Galindo de Dato en 1090, don Calbet d'entre 1095 y 1114, Sancho Iñiguez en l'anyo 1135, Fortunio Garcés en 1159, Guillén de Castrozol en 1194 y Guillén Castillazuelo en 1291. En l'anyo 1413, dimpués de o compromís de Caspe, o castiello de l'Abizanda sofrió l'ataque de a facción d'o conte d'Urchel, que no acceptaba o resultau conveniu y se mostró en rebelión bels anyos mas.

En o reinau d'Alifonso V, o castiello yera propiedat de a corona, pero le'n cedión a Domingo de Naya. Por ixas envueltas, apareix en os documentos siempre con as formas «Avinçalla» u «Aviçanlla» (probablement pronunciaus «Abinsal·la» y «Abisanla», respectivament), forma d'escribir o toponimo que encara duraría bels tiempos mas. En o sieglo XVII, pareix que ye atestiguau que perteneceba a la baronía de Castro.

Demografía

D'o municipio:

Evolución demografica

1362 f 1495 f 1842 1857 1860 1877 1887 1897 1900 - - - 592 595 564 582 501 504

1910 1920 1930 1940 1950 1960 1970 1981 1991 487 424 422 371 374 291 195 118 129

1992 1994 1996 1997 1998 1999 2000 2001 2002 - - 136 - 140 142 137 135 143

2003 2004 2005 2006 2007 2008 2009 2010 2011 132 131 128 136 133 130 126 132 139

2012 2013 2014 2015 2016 2017 2018 2019 2020 - - - - 142 - - 150 -

2021 2022 2023 2024 2025 2026 2027 2028 - - 151 - - - - - - -

1717-1981: población de feito; 1990- : población de dreito. Fuent: Intercensal en l'INE, Series de población en l'INE y Relación d'unidaz poblacionals en l'INE.

Evolución d'a población d'os nuclios que forman l'Abizanda dende 1857.

De o lugar de l'Abizanda:

Evolución demografica

1992 1994 1996 1997 1998 1999 2000 2001 2002 - - - - - - 82 80 86

2003 2004 2005 2006 2007 2008 2009 2010 2011 77 77 76 81 78 78 73 77 -

2012 2013 2014 2015 2016 2017 2018 2019 2020 - - - - - - - - -

2021 2022 2023 2024 2025 2026 2027 2028 - - - - - - - - - -

1990- : población de dreito. Fuent: Intercensal en l'INE, Series de población en l'INE y Relación d'unidaz poblacionals en l'INE.

Imáchens

• 
  Una casa en a plaza de l'Abizanda.
• 
  A torre-donchón, a ilesia parroquial y a casa de l'abadía son alto en a penya de l'Abizanda.
• 
  A sierra Ferrera y a meya valle d'a Cinca dende l'Abizanda.
• 
  As enrunas de casa Cazolero, en l'Abizanda.
• 
  A torre de l'Abizanda.
• 
  Detalle de o cadafalso superior en a torre.
• 
  Un troz de lienzo perimetral de o castiello de l'Abizanda.
• 
  L'abside de a capiella d'o castiello, que se conserva encastau en a ilesia actual de l'Asumpción.

Administración

Reparto de concellers

Eleccions municipals
Partiu	1979	1983	1987	1991	1995	1999	2003	2007	2011	2015	2019
Partido Aragonés	-	-	-	0	-	-	-	-	0	-	3
Partido de los Socialistas de Aragón	-	-	5	5	5	5	5	5	4	2	2
Partido Popular	-	5	-	0	0	0	0	0	1	3	0
Unión de Centro Democrático	4	-	-	-	-	-	-	-	-	-	-
Total	4	5	5	5	5	5	5	5	5	5	5

Alcaldes

Lista d'alcaldes

Lechislatura	Nombre	Partiu politico
1979–1983	José Gabal Lafalla	Unión de Centro Democrático
1983–1987	José Gabal Lafalla	Partido Popular
1987–1991	José Gabal Lafalla	Partido de los Socialistas de Aragón
1991–1995	Pedro Santorromán Lacambra	Partido de los Socialistas de Aragón
1995–1999	Pedro Santorromán Lacambra	Partido de los Socialistas de Aragón
1999–2003	Pedro Santorromán Lacambra	Partido de los Socialistas de Aragón
2003–2007	Pedro Santorromán Lacambra / Ramón Guatas	Partido de los Socialistas de Aragón
2007–2011	Fernando Torres Lacambra	Partido de los Socialistas de Aragón
2011–2015	José Buesa Abadías	Partido de los Socialistas de Aragón
2015–2019	Vanesa Cuello Escartín	Partido Popular
2019–2023	Javier Labat Latorre	Partido Aragonés
2023–2027	Javier Labat Latorre	PAR

Patrimonio

A ilesia parroquial de l'Asumpción, d'o sieglo XVI.

A población de l'Abizanda tiene dos monimentos destacables; o castiello de l'Abizanda, d'o sieglo XI, y a ilesia de l'Asumpción, d'o sieglo XVI.

O castiello ye o monumento mas visible, tanto dende a carretera A-138 que une Balbastro y l'Aínsa, como dende toda a cuenca de o barranco d'o Río. Con 40 metros d'altaria, a torre de tipo donchón ye a sola edificación que queda de piet entera, y a mas visible de todas. Tiene 5 plantas d'altaria, y en a zaguera muestra un cadafalso perimetral de madera sobre fustes, que teneba una misión defensiva. A dentrada en a torre se feba por una puerta en altaria, que corresponde con a segunda planta, dencima d'o almagacén, y ta la que, historicament, se debeba acceder por una escalereta retirable.

L'interior de o donchón, que tiene as plantas de madera refirmada sobre fustes, y o cadafalso superior, se i troban dende a restauración que s'acometió en os anyos 1990, a iniciativa de l'alavez alcalde Pedro Santorromán. En imáchens anteriors a ixa epoca, como as que quitó Lucien Briet en as zaguerías d'o sieglo XIX, y como a estampa que muitos habitants de o Sobrarbe pueden recordar de os tiempos enantes de a construcción de l'actual carretera, A-138, cuan s'esnavesaba por a'l costau de l'Abizanda por a carretera dita de «l'Alto'l Pino», a torre yera despullada y no se i conservaba sique as parez exteriors.

En os arredols de o donchón, y especialment en a frontera norte de a ilesia parroquial, i ha cualques restas de muros que debión estar as murallas perimetrals de a fortificación. Un abside romanico y os alacez d'un templo d'ixe estilo son parcialment conservaus por a man d'afuera de a ilesia parroquial, en o Norte, por o que s'aprecia que i habió d'estar o emplazamiento de a ilesia orichinal.

A ilesia parroquial, consagrada a l'advocación d'a figura de l'Asumpción de Santa María, ye una obra mayoritaria de o sieglo XVI, y por a construcción d'as fronteras con piedra de colors claras, y por o tellau de tellas, fa recordar a las ilesias de o Semontano. Se troba en alto, a'l canto d'o recinto d'o castiello, y tiene en a frontera, concabido, l'abside de l'antiga capiella u ilesieta, romanica, que i debeba tener o castiello.

A torre-donchón con cadafalso de o castiello de l'Abizanda.

Además, en os arredols de l'Abizanda i ha cuatro ermitas. La una, a de Sant Veturián, patrón menor de l'Abizanda, ye construida en estilo romanico tardano y se i celebra anyalment a romería d'os langostos, una peculiar romería en a que os de l'Abizanda i puyan ta sentir-ie misa y, como se fa en chinero, tradicionalment se vaticinaba a productividad d'as cullitas d'ixa anyada en función de si se trobaba langostos en o camino u no se'n i trobaba (cal pensar que ixes insectos, que tanto les gusta a calor, no ye mica frecuent trobar-los en chinero). A ermita se troba en alto en a sierra de Sant Benedet, a mas d'una hora de camino dende o nuclio, d'entre dos partidas que en dicen «a Valata» y «Laternal».

As atras tres ermitas son as de Sant Salvador, Sant Miguel y «Santiago» Apóstol. Todas tres se fizon d'entre os sieglos XVII y XVIII.

Casas destacadas

L'Abizanda tiene, como tamién en son o castiello y a ilesia, tres casas principals que son catalogadas como Bien d'Intrés Cultural.

A mas antiga de as tres ye «casa don Carlos», en o barrio d'o Castiello. Ye un casal fuerte de o sieglo XV con una torre defensiva que data d'o sieglo XVI, y en l'actualidat ye reformada y habitada.

Casa Maza, datada en l'anyo 1745, ye un palacio que en l'actualidat se fa funcionar como vivienda de turismo rural.

Casa Cazolero, que ye en o barrio de l'Entremuro, tiene o tellau espaldau dende fa bels anyos, y l'absencia de os suyos amos en a localidat fa que de as tres sia a que tiene o pior futuro.

Belatros focos d'interés

L'Abizanda conta, además de tot ixo, con dos museus y un archivo documental en o lugar, y con unatro museu, o Paleontolochico de Sobrarbe, en o nuclio de Lamata. Ista gran cantidat d'instalacions culturals (si se para cuenta que o municipio entero no tiene sique arredol de 130 habitants) se debe en parte a o compromís de o suyo difunto alcalde, Pedro Santorromán, en os prochectos de promoción cultural y de reivindicación de lo propio.

D'entre os prochectos destacables que Santorromán fundó en l'Abizanda se conta o Museu d'as Creyencias y a Relichiosidat Popular d'o Pireneu Central, fundau de conchunta con l'antropologo Ángel Gari en 1990, que se troba en ocupando l'edificio de a casa l'abadía, una d'as casas mas grans de lugar (data d'o sieglo XVII). Se troba a'l costau de a ilesia parroquial, y contiene una colección de 8.000 obchectos relichiosos que van dende o I milenio aC dica o sieglo XX.

Anque a exposición remanent ye, principalment, en l'edificio de l'abadía, ocasionalment s'habilita exposicions temporals en a torre d'o castiello.

A puerta d'o Centro de Estudios y Documentación de Aure y Sobrarbe (CEDAS), en l'Abizanda.

A casa d'os Titeres, museu y espacio cultural de a companyía tiatral Titiriteros de Binéfar, tamién s'ubica en l'Abizanda, en a baixada de o castiello de camín ta'l barranco. Conta con una exposición de monyacos y titeres que s'ha emplegau mientres d'anyos y en diferents puestos, y d'un espacio a l'aire libre (en a era d'a casa) a on que se puede fer representacions.

En l'actualidat, a Casa d'os Titeres se composa de dos edificios que son casas rehabilitadas de o lugar. A era que todas dos casas compartiban se fa servir en l'actualidat como escenario ta bellas actuacions de a companyía.

Además d'ixes edificios, l'Abizanda ahuespa tamién a seu espanyola de o Centro de Estudios y Documentación de Aure y Sobrarbe, una institución publica promovida por l'achuntamiento de l'Abizanda y a comuna d'Ancida (Occitania, Francia) que s'adedica a la investigación, preservación y difusión d'a cultura tradicional de o Pireneu central.

Actualment tiene un aria de treballo que cubre tot o Sobrarbe y as valles d'Aure y de Louron, en os Altos Pireneus franceses, y ye a institución que se troba dezaga de a promoción de a iniciativa «Continua Pirineum», subscrita por toz os achuntamientos de Sobrarbe y por bellas comunas d'os Altos Pireneus, financiada con fondos Interreg d'a Unión Europea, y que ha enchegau a recuperación de cualques monimentos y camins tradicionals en cada costau de iste sector de a muga franco-espanyola.

Fiestas

• Cabo de semana mas amanau a'l 12 de chinero, Romería d'os Langostos, romería tradicional ta la ermita de Sant Veturián, con a que se miraba ta vaticinar as pestes de l'agricultura y a producción d'ixa anyada.
• 9 de mayo, fiesta menor, fendo-le honras a Sant Gregorio.
• 15 d'agosto, Fiesta Mayor, fendo-le honras a l'Asumpción d'a Virchen María.

Veyer tamién

• Lista de municipios de Uesca

Vinclos externos

• Se veigan as imáchens de Commons sobre l'Abizanda.
• (es)Pachina web municipal
• (es)/(en)/(fr) Pachina web con información de L'Abinanza.

• Datos: Q1656410
• Multimedia: Abizanda / Q1656410