Castellano en Aragón
| Castellano en Aragón | |
|---|---|
| |
| Localización cheografica | |
| Estau | {{{estau}}} |
| País |  Aragón
|
| Rechión | {{{rechión}}} |
| Parlau en | Comarcas d'as provincias de Zaragoza y Teruel |
| Lugars principals | Zaragoza, Teruel, Calatayú, Tarazona, Albarracín |
| Estatus | |
| Atras denominacions | Parla baturra, baturro |
| Charradors | |
| Oficial en | |
| Reconoixiu en | Aragón
|
| Regulau por | |
| Vitalidat | Muit alta |
| Literatura | |
| Escritors principals | Eusebio Blasco, Alberto Casañal, Sixto Celorrio, Crispín Botana, Mariano Baselga |
| Rasgos dialectals | Substrato aragonés |
| Clasificación lingüistica | |
Indoeuropea
| |
| ISO 639-1 | |
| ISO 639-2 | |
| ISO 639-3 | |
| SIL | |
O castellano en Aragón ye o conchunto de formas d'o castellano que se charran en Aragón. También ye dito espanyol rechional d'Aragón, castellano d'Aragón, espanyol d'Aragón, castellano aragonés, castellano-aragonés u dialecto aragonés d'o castellano. Un atra denominación ya en desuso d'iste dialecto ye la de baturro u parla baturra.
Ye una variedat que tien un substrato aragonés muit marcato, en especial en as comarcas de: Cinco Villas, Baixo Martín, Baixo Aragón, Ribera Baixa d'Ebro, Monegros a on l'aragonés substituyó a l'aragonés de la Val d'Ebro, mes diferent d'o castellano que l'aragonés d'as comunidaz aragonesas. En os Monegros y Val d'Onsella se charró l'aragonés dica fa relativament pocos anyos.
O substrato ye mes evident en o lexico d'as actividaz productivas como l'agricultura, ganadería, caza, l'orache, os obchectos que bi ha en as casas tradicionals, a descripción d'o terreno.
Fonetica editar
En fonetica o castellano d'Aragón ha heredau a tendencia a desfer l'hiato, pero los desfá por un regular cerrando una vocal (pior) y tendencia a no pronunciar esdruixols.
Bi ha tendencia a unificar os diftongos creixients -ai-, -ei- cerrando-se o primero y ubrindo-se o segundo pa dar un grau intermedio -äi-, (poläinas, bäilar, azäite, empäine). Este fenomeno talment tienga relación con o hispanoarabe u arabe andaluz y se troba tamién en A Riocha, bels puestos de Navarra, Alaba, Burgos, Soria, Guadalachara y Cuenca.
A -y- intervocalica se pronuncia enfeblida y esdevién semivocal u semiconsonant y dica puet esdevenir un alofono pareixiu a la e cerrada tamién de caracter semivocal-semiconsonant y puet desapareixer[1] (hoio/hoeo, auntamiento, que-me-se-o, ecetra). Este fenomeno se troba tamién en o castellano de Navarra, A Riocha, Soria, y part de Burgos, Guadalachara y Cuenca.
Morfolochía editar
Verbos editar
En o Baixo Aragón, Cinco Villas y Monegros bi ha repuis d'a conchugación. Por eixemplo en o Baixo Aragón se replegan imperfectos con -iba: caiba, teniba, traiba[2]. En as Cinco Villas se documenta imperfectos con -iai: teniai, ibai, veniai.
Pronombres editar
Se pueden sentir pronombres en aragonés: con mí, con tú, u comuns con o castellano antigo: vus variant de "vos". Tamién formas que poderban estar aragonesas u hibridas como nusotros y vusotros, amás de formar como para yo. O pronombre plural sen dezaga d'infinitivo y cherundio ye amplament emplegau.
Ye prou cheneral a construcción se les cuan o dativo ye plural en cuenta de se lo, se la, se los, se las (ya se les diré a ellos en cuenta de ya se lo diré a ellos). Esta construcción se remonta a la construcción ge les que leyemos en o Fuero romanz de Teruel y en part d'as traduccions de Chuan Ferrández d'Heredia, estando propia de l'aragonés d'as comunidaz aragonesas. En filolochía hispanica ye considerada un simple vulgarismo.
O castellano d'Aragón tamién se resiste a las innovacions modernas d'o castellano: Andalucía y Aragón estioron as zagueras grans rechions on o leísmo propio d'o castellano mes actual está tardando mes en imposar-se, mantenendo a diferenciación entre o pronombre lo/la de complemento directo referiu a personass y o pronombre le de complento indirecto tamién referiu a personass. Agora cualques chóvens son leístas, pero muita chent (sobretot a chent viella) diz encara no lo conozco, d'alcuerdo con totas as luengas neolatinas en cuenta de no le conozco).
Sufixos editar
En castellano d'Aragón se troban con una gran extensión palabras aragonesas orichinadas por derivación con os sufixos caracteristicos: mesache, orache, pelaire, colgallo, tresmallo, ternasco.
O sufixo diminutivo -et, -eta, -etc, -etas con diferents pronunciacions (-é, -er, -ed), ye encara productivo (por o menos en chent naixida en a segunda mitat d'o sieglo XX) en diferents localidaz d'o Baixo Aragón, Monegros y arias recientment castellanizadas d'a Plana de Uesca.
Lexico editar
Se conservan muitos elementos lexicos propios de l'aragonés. En as comarcas orientals se conservan elementos lexicos coincidents entre l'aragonés y o catalán y que bels autors han puesto malinterpretar como catalanismos. José María Enguita Utrilla interpreta como catalanismos en o castellano d'a part oriental d'a provincia de Teruel as palabras corvella, esculla, gos, impelte, bambolla, escupinada, pesigar, escurzón, llanda u sucar.[2] Manimenos l'analís d'a distribución de muitas d'estas palabras amuestra que beluns son comuns entre l'aragonés y o catalán. Belunas como sucar u corvella se documentan tal y como variants en l'aragonés occidental (dende Cotefablo dica las Cinco Villas). Belatras como escurzón por o menos en aragonés oriental (dende Benás dica Cotefablo).
Variedaz internas d'o castellano aragonés editar
O castellano en Aragón, como cualsiquier variedat lingüistica, no ye homochenio. Adintro d'o castellano charrau en Aragón, existen diferencias cheolectals. María Antonia Martín Zorraquino distingue en o castellano aragonés tres variedaz internas u subdialectos:[3]
- Castellano aragonés sudoccidental: ye a variedat parlada en o sudueste d'as provincias de Zaragoza y Teruel. Abarca as parlas d'as comarcas de Tarazona y Moncayo, Aranda, Comunidat de Calatayú, Campo de Daroca, Xiloca, Sierra d'Albarracín, Comunidat de Teruel y Gúdar-Chabalambre. Ye a variedat d'o castellano aragonés mas amanada a o castellano de Castiella.
- Castellano aragonés central: ocupa a zona central d'as provincias de Zaragoza y Teruel, abarcando as parlas d'as comarcas de Ribera Alta d'Ebro, Campo de Borcha, Val de Xalón, Comarca Central, Campo de Carinyena, Cuencas Meneras y Mayestrato. Ye una variedat intermeya que comparte rasgos d'as variedaz sudoccidental y nordoriental.
- Castellano aragonés nordoriental: abarca una chicota zona d'o norte de Uesca (Sallent de Galligo, Broto, Chaca), o extremo norte d'a provincia de Zaragoza (Cinco Villas), un amplo espacio d'o sud d'a provincia de Uesca (Monegros) y a parti oriental d'as provincias de Zaragoza y Teruel (Baixo Aragón y Ribera Baixa d'Ebro). Ye a variedat que conserva mas peculiaridaz representativas de resultaus fonicos tipicament aragoneses. Adintro d'o mesmo, por a suya peculiaridat, destacan parlas como as de Casp u Chiprana.
Referencias editar
- ↑ Antonio Llorente Maldonado de Guevara Las hablas aragonesas en las fronteras occidentales A.F.A LVI 1999-2000
- ↑ 2,0 2,1 José María Enguita Utrilla Rasgos dialectales aragoneses en las hablas de Teruel. Revista Teruel, n 74, chulio-aviento de 1985 p 179-219
- ↑ (es) "Lenguas de Aragón", María Antonia Martín y José María Enguita Utrilla. Caja de Ahorros de la Inmaculada, Zaragoza, 2000
Bibliografía editar
- José María Enguita Utrilla Rasgos dialectales aragoneses en las hablas de Teruel. Revista Teruel, n 74, chulio-aviento de 1985 p 179-219.
- Rafael Lapesa. Historia de la lengua española. Editorial Gredos. (1981).