Unión de Republicas Socialistas Sovieticas

Antiguo estau d'Eurasia (1922-1991)
(Reendrezau dende Unión Sovietica)
Articlo d'os 1000

A Unión de Republicas Socialistas Sovieticas (URSS) (en ruso: Союз Советских Социалистических Республик (СССР), Soyuz Sovietskij Sotsialistichieskij Riespublik (SSSR)), u Unión Sovietica (Советский Союз, Sovietskii Soyuz) estió un estau socialista que existió mientres gran parti d'o sieglo XX, dende o trunfo d'os comunistas en a guerra civil que siguió a la Revolución Rusa, en 1922 y a suya desaparición mientres o gubierno de Mikhail Gorbachev en 1991. Establida dimpués de l'asasinato d'o zaguer zar, s'estendilló dende la mar Baltica y la mar Negra en Europa dica l'oceano Pacifico en Asia, con una superficie parellana a la d'antigo Imperio Ruso. Se tractaba d'un estau federal integrau en primerias nomás que por 4 republicas federadas (Rusia, Transcaucasia, Ucraína y Belarrusia), en as suyas zagueras anyadas yera formada por 15 republicas socialistas sovieticas, ya que o suyo numero y grandaria heba variau dende 1922. Rusia yera a republica mas gran d'a Unión, tanto en superficie como en población, y dominaba politicament y economica lo conchunto d'a URSS. A suya vida politica estió marcada por o predominio absoluto d'o comunismo, con un rechimen politico monopartidista dominau por o Kommunistíchieskaya pártiya Soviétskogo Soyuza (o Partiu Comunista d'a Unión Sovietica) dica la disolución d'a URSS.

Unión de Republicas Socialistas Sovieticas
Союз Советских Социалистических Республик
1922 — 1991




Bandera Escudo d'armas
Lema nacional: Пролетарии всех стран, соединяйтесь! (Proletarii vsiej stran, soiediniaities'!)
(Ruso: Proletarios de toz os países, unir-tos!)
Himno nacional: A Internacional (1922-1944)
Himno d'a Unión Sovietica (1944-1991)
Situación de URSS
Situación de URSS
Capital Moscú
Idioma oficial No bi'n heba, ruso de facto
Gubierno Estau socialista
 • Constitución
   - Declarata
   - Reconoixida

30 d'aviento de 1922
1 de febrero de 1924
 • Desaparición 25 d'aviento de 1991
Superficie
 • 1991

22,402,200 km²
Población
• 1991 est.
     Densidat

293.047.571 hab.
13,1 hab/km²
Chentilicio Sovietico/a[1]
Moneda Rublo
Miembro de: ONU, Pacto de Varsovia

A Unión de Republicas Socialistas Sovieticas prencipió la suya existencia como estau en l'anyo 1922 como continación de l'antigo Imperio Ruso en un proceso impulsau por Lenin ta consolidar as institucions naixidas con a Revolución Rusa y refirmadas con a victoria de l'Exercito Royo en a Guerra Civil Rusa en luita contra las potencias occidentals, contra los contrarios a la revolución y tamién contra bels nacionalismos perifericos en bellas d'as republicas que s'heban proclamau independients en esboldregar-se l'Imperio Ruso. Mientres a suya existencia estió lo centro que toz os comunistas d'o mundo consideraban como l'exponent maximo d'a suya ideolochía politica, estando lo primer estau socialista d'o mundo. Mientres as suyas primeras anyadas, o nuevo estau remató con a intervención de tercers países en o suyo territorio, y dimpués d'a muerte de Lenin en 1922 o suyo succesor, Stalin, controló ferriament cualsiquier esbarre d'a doctrina politica oficial, completando amás un proceso d'industrialización d'a economía completau con un proceso de colectivización de l'agricultura, tenendo como consecuencia un gran abance economico pero tamién un periodo inicial en primerías d'os anyos 1930 en que s'escaicioron crisis de subsistencia con una población afamada.

Con a Segunda Guerra Mundial, dimpués d'a Operación Barbarroya u invasión d'o país por os alemans, a URSS habió de luitar por a suya propia supervivencia como estau y como nación frent d'o Tercer Reich (con 27 millons de victimas d'a guerra, la Unión Sovietica estió lo país aliau con un numero mas elevau de victimas) plegando las tropas alemanas dica las mesmas puertas d'a ciudat de Moscú en l'hibierno de 1941, y con a suya victoria en a guerra chunto con os Aliaus enampló la suya aria d'influyencia en Europa Central en os países que heba ocupau l'Exercito Royo en o suyo abance enta Europa Central: Estonia (incorporada a la URSS), Letonia (tamién incorporada), Lituania (tamién incorporada), Rumanía, Bulgaria, Yugoslavia, Albania, Hongría, Checoslovaquia y Polonia, amás de territorios anteriorment perteneixents a Alemanya, Rumanía, Polonia y Checoslovaquia, amás de mantener mientres bels anyos una zona d'ocupación en Austria y una atra en Alemanya que posteriorment se convertió en a Republica Democratica Alemana.

Posteriorment o suyo refirme a Mao Zedong aduyó a la victoria d'o comunismo en China, encara que en anyos posteriors toz dos países no compartiban posicions politicas. Mientres a Guerra Fría que la URSS mantenió con os Estaus Unius y los suyos aliaus d'a Organización d'o Tractau de l'Atlantico Norte una constant pugna, que remató en a finals d'os anyos 1980 con o gubierno de Mikhail Gorbachev, dica que lo 25 d'aviento de 1991 s'escaició la disolución d'a Unión Sovietica, convertendo-se asinas as antigas republicas sovieticas en nuevos estaus independients y reconoixius como tals por a comunidat internacional: Rusia (lo país mas gran y succesor "de facto" d'a URSS), Estonia, Letonia, Lituania, Belarrusia, Ucraína, Cheorchia, Armenia, Azerbaichán, Cazaquistán, Moldavia, Kirguizistán, Tachiquistán, Turkmenistán y Uzbekistán.

Referencias editar

Se veiga tamién editar

Vinclos externos editar


Republicas d'a Unión Sovietica
  RSS d'Armenia | RSS d'Azerbaichán | RSS de Belarrusia | RSS de Cheorchia | RSS d'Estonia | RSS de Letonia | RSS de Lituania | RSS de Moldavia | RSS de Cazaquistán | RSS de Kirguizistán | RSSF de Rusia | RSS de Tachiquistán | RSS de Turkmenistán | RSS d'Ucraína | RSS d'Uzbekistán

Republicas Sovieticas de curta vida: RSS Carelo-Finesa (1940-1956) | RSSF Transcaucasica (1922-1936)


  Ex Unión de Republicas Socialistas Sovieticas (URSS)
Armenia | Azerbaichán | Belarrusia | Cazaquistán | Cheorchia | Estonia | Letonia | Lituania | Moldavia | Kirguizistán | Rusia | Tachiquistán | Turkmenistán | Ucraína | Uzbekistán