Articlo d'os 1000
Adolf Hitler
Adolf Hitler


2 d'agosto de 1934 – 30 d'abril de 1945
Precediu por Paul von Hindenburg (como president)
Succediu por Karl Dönitz (como president)

Canceller d'Alemanya (Reichskanzler)
30 de chinero de 1933 – 30 d'abril de 1945
Precediu por Kurt von Schleicher
Succediu por Joseph Goebbels
Naiximiento 20 d'abril de 1889
Braunau am Inn (Imperio Austrohongaro)
Muerte 30 d'abril de 1945 (56 anyos)
Berlín (Tercer Reich)
Partiu Partiu Nacionalsocialista Alemán d'os Treballadors
Conchuche Eva Braun (28 d'abril de 1945-30 d'abril de 1945)
Profesión Militar, Politico, escritor, activista, y pintor
Sinyal

Adolf Hitler (Braunau am Inn, Austria, 20 d'abril de 1889 - †Berlín, 30 d'abril de 1945) estió un militar y politico alemán d'orichen austriaco, que establió un rechimen nacionalsocialista en o que teneba o títol de Reichskanzler (canceller imperial) y Führer (capitoste, líder u guía). Hitler estió un d'os dictadors mas poderosos d'o sieglo XX. Lideró dende 1921 lo Partiu Nacional Socialista d'os Treballadors Alemans y estió canceller d'o Tercer Reich dende o 30 de chinero de 1933 y President d'Alemanya dende 1934.

Adolf Hitler ye considerato un d'os dictadors mas notorios y cruels d'o sieglo XX. L'obchectivo prencipal d'a dictadura de Hitler estió "purificar" o pueblo alemán d'as "mallas no arias", fendo de Hitler o responsable prencipal de l'holocausto que en resultó. O suyo segundo obchectivo yera recuperar (por a vía militar, si yera menester) os territorios alemans que s'heban perdito dimpués d'a Primera Guerra Mundial. Manimenos, tamién quereba una mayor expansión enta l'este d'Europa (Lebensraum) y a la fin o dominio d'o mundo. Con a invasión de Polonia (1939), prencipió a Segunda Guerra Mundial,[1] que encara que fació plegar a suya Wehrmacht dica las mugas d'Europa remató con a suya redota en mayo de 1945. Ta no estar prisionero d'os sovieticos, se suicidó lo 30 d'abril de 1945 en o suyo bunker.[2]

A suya fegura ye considerata por a historiografía de forma muit negativa, asociata a los Crimens contra la Humanidat que se cometioron mientres o suyo gubierno, incluyindo-ie os campos d'exterminio y a shoah contra los chodigos, sin oblidar as mortaleras de civils en toz os países ocupatos y a destrucción d'Europa. Antiparte, encara que una d'as suyas finalidaz yera la d'eixamplar os dominios alemans, en rematar a guerra Alemanya perdió cuantos territorios alemans a l'este, en favor de Polonia y de l'Unión Sovietica, incluyindo-ie Prusia, o nuclio historico d'o militarismo alemán.

Introducción

En 1913, os sentimientos pro-Gran Alemanya de Hitler li empentoron a viachar a la ciudat alemana de Munich (Bavera). Se diz que cuan esclató a Primera Guerra Mundial (1914-1918), s'ofreixe a l'inte como voluntario. Sirvió mientres cuatre anyadas como soldato y como gefreiter (rango equivalent alto u baixo a cabo en o 16eno Rechimiento Bavaro d'Infantería de Reserva,[3] luitando, entre atras, en a Primera Batalla d'Ypres,[4] a batalla d'o Somme, a batalla d'Arrás y a batalla de Passchendaele.[5] Fue ferito diversas vegatas. En Mesen, una bala li rozó a frent, y mas entabant amagó a cicatriz resultant con a tufa. Fue condecorato con as dos versions d'a Cruz de Fierro (1ª y 2ª clases) pero, por a suya frustración, nomás puyó dica o rango de gefreiter, ya que os suyos superiors opinaban que mancaba de cualidaz de liderache. En noviembre de 1918 decidió dentrar en a politica, unindo-se a una d'as muitas chicotas formacions politicas nacionalistas que existiban: o Partiu d'os Treballadors Alemans (DAP), que mas tardi se convertiría en o Partiu Nacional Socialista d'os Treballadors Alemans.

Hitler plegó a o poder en una epoca en que o pueblo alemán sufriba por l'ature, a pobreza y a humillación d'a Primera Guerra Mundial. Baixo o Tratato de Versailles, Alemanya fue obligata a compensar por o mal que heba feito en a guerra. Ista obligación pesaba significativament sobre o país. Cuan a fins d'octubre de 1929 Alemanya prencipiaba a recuperar-se, o crack d'a bolsa de Nueva York fació colapsar a economía alemana, dando a Hitler a suya oportunidat. A traviés d'una eficient maquinaria propagandistica, consigió fer-se a si mesmo y a o suyo partiu muit populars y obtenió mas y mas escanyos en o Parlamento alemán (o Reichstag).

Dimpués d'a suya victoria electoral en 1933, o president d'Alemanya Paul von Hindenburg li nombró finalment Canceller d'Alemanya (ye decir, primer ministro). A l'inte, mete en marcha os suyos plans ta apropiar-se de tot o poder en Alemanya, aleixar os chodigos d'a vida publica y preparar a Alemanya ta una guerra de conquiesta.

En 1938 s'anexiona Austria (Anschluss), que dende allora fue dita Ostmark. O 28 de setiembre de 1938, o Reich ninvió un ultimatum a Checoslovaquia ta recuperar os Sudetes, que teneban una mayoría de población etnicament alemana. A iniciativa de Mussolini, se sinyó a escape l'Alcuerdo de Munich entre Hitler, Francia y o Reino Uniu ta mirar d'evitar a guerra imminent. O 30 de setiembre, Checoslovaquia se veye obligata a ceder os Sudetes.

En 1939, Hitler ordenó a invasión de Polonia, fendo que o Reino Uniu y Francia declarasen a guerra a Alemanya. Estió o prencipio d'a Segunda Guerra Mundial. En primeras, Hitler podió ocupar gran parti d'Europa pero dimpués de l'ataque contra a Unión Sovietica en chunio de 1941, a partir de 1943, as suyas posibilidaz s'enfonsoron y o Tercer Reich quedó contra as cuerdas. En l'hibierno de 1944-1945, os Aliaus ya se trobaban en as mugas d'Alemanya, y asinas prenioron a la fin Berlín.

Dimpués de veyer que os nazis heban perdito a Segunda Guerra Mundial, o 30 d'abril de 1945 de tardis, se suicidó chunto con a suya mulller Eva Braun en o suyo búnquer de Berlín. S'heban casato o día d'antis en o mesmo búnquer. Ella s'enverenó, mientres que Hitler se disparó en o tozuelo. Una mica dimpués fuoron levatos a l'exterior, y pareixe que fuoron cubiertos de benzina y crematos en un forato. Posiblement, os sovieticos se levoron o cranio de Hitler y as restas d'os suyo cuerpos ta Moscú ta una posterior investigación. En a guerra desencadenata por Hitler, en Europa perdioron a vida 39 millons de personas, entre os cualos seis millons de chodigos. Gran parti d'Europa quedó destruita mientres l'ataque de Hitler, y o continent perdió a suya anterior hechemonía mundial a favor d'os Estaus Unius y a Unión Sovietica. Alemanya perdió un territorio considerable en as mugas orientals con Polonia y Rusia, os habitants d'o cualo fuoron perseguitos enta l'ueste. Lo que quedaba d'Alemanya fue dividita en una parti occidental y una oriental en o prencipio imminent d'a Guerra Freda. Europa y Alemanya continarían dividitas por o telón d'acero dica 1990.

As suyas primeras anyadas

 
Adolf Hitler de nin.

Encara que a fegura d'Adolf Hitler ye de gran importancia historia, encara hue bi ha muitas uembras en bels aspectos d'os suyos oríchens y d'as suyas primeras anyadas, incluyindo-ie a formación d'a suya personalidat con a suya ideolochía nacionalista, antimarxista, racista y antisemita. Hitler no escribió garra cosa pareixita a un diario, no gosaba dixar muitos textos escritos, y a suya unica obra, Mein Kampf, ye una autobiografía en gran parti reconstruita y que no amuestra a verdat, sino nomás ixo que l'intresaba a Hitler amostrar.

Os suyos oríchens familiars

 
Alois, o pai d'Adolf Hitler.

Adolf Hitler naixió o 20 d'abril de 1889 en una chicota localidat que en ixe inte feba parte de l'Imperio Austrohongaro, Braunau am Inn, y que hue se troba en o estato de l'Alta Austria, en Austria, muit amán d'a muga con l'Imperio Alemán (hue Alemanya). Yera fillo d'Alois Hitler y de Klara Pölzl, y a mayor parti d'os suyos chirmans murioron de chicoz (nomás sobrevivió a suya chirmana Paula, que morió en 1960).

Alois Hitler, o pai d'Adolf, yera un chicot funcionario d'a Monarquía austriaca, prestando-li os suyos servicios como duanero. Alois yera fillo ilechitimo de Maria Anna Schicklgruber, naixito o 7 de chunio de 1837, y fue baptizato con o nombre d'a suya mai, como Alois Schicklgruber, dica que o 6 de chunio de 1876 fue lechitimato por l'hombre de su mai, prenendo o suyo apellito de Hitler. No se conoix con seguridat si yera u no o suyo fillo, pero pareix que bi heba a lo menos una relación de proximidat familiar con l'autentico pai, estando asinas sin fundamento bellas teorías que dicen que o pai d'Alois yera en realidat un chodigo. Sindembargo, ista inseguridat sobre os suyos oríchens familiars pesaba sobre Adolf Hitler, qui, cuan estió dictador, esboldregó o lugarón a on bi heba naixito o suyo pai (Döllersheim) ta construir-ie unas instalacions militars.

A suya infancia

Cuan Adolf Hitler yera un nino, a su mai actuaba seguntes pareix de forma masiau protectora, mientres que su pai, que s'heba retirato dende 1895, incarnaba a fegura d'un pai dominant que feba sufrir a o suyo fillo a mas estricta disciplina. O pai morió en 1903, cuan Hitler teneba 14 anyadas, y su mai morió en 1907, dixando a Hitler subchecto a la tutela d'atros familiars encara que en posesión d'as chicotas propiedaz familiars.

Adolf Hitler estudeyaba en a localidat de Linz, a capital de l'Alta Austria, y bel unas d'as fotografías d'a escuela en ixas envueltas amuestran que estió companyero de clase d'o futuro filosofo chodigo Ludwig Wittgenstein.[6] Seguntes una teoría poco estendillata, Hitler habría desembolicato o suyo antisemitismo por antipatía respective d'o choven Wittgenstein, encara que os historiadors seriosos descartan ista hipotesi en no amostrar-se garra sinyal d'antisemitismo seguntes as conoixencias d'a vida de Hitler por ixas envueltas. En cualsiquier caso, Adolf Hitler estió ya dende as suyas primeras anyadas un mal estudiant.

A suya adolescencia en a vida bohemia de Viena

No tenendo pai ni mai, viviba d'os chicoz recursos que l'heban legato os suyos pais, y se tresladó enta Viena, a capital d'Austria. Ye fácil que por contraposición a l'austeridat y severidat d'a fegura paterna, Adolf Hitler pretendió convertir-se en artista, y miró mesmo dos vegatas de dentrar en l'Academia d'Artes Polidas de Viena (en 1907 y 1908), encara que suspendió as dos vegatas as pruebas d'acceso a l'Academia. Tan y mientres, s'adedicaba a una formación autodidacta, en leyendo as obras de Friedrich Nietzsche y ascuitando a musica de Richard Wagner, as suyas dos grans pasions. Ta vivir, en estar insuficient a suya chicota renta, s'adedicó a pintar acuarelas que, encara que feitas con tecnica, lis manca a capacidat de transmitir bella cosa a o espectador, y que vendeba a os paseyants por as carreras d'a ciudat. Tamién fació chicoz treballos eventuals, y mesmo plegó a la mendicidat.

Tamién asistiba, seguntes diz en Mein Kampf, a las sesions d'o Parlamento austriaco, a on diz que li amaneixió a suya aversión por a democracia y por o parlamentarismo. En a sociedat vienesa d'os anyos 1900, bastión austriaco d'a socialdemocracia, naixió tamién o suyo antimarxismo. Antiparte, tamién contactó con as ideyas panchermanicas que por ixas envueltas se preconizaban en os ambients de dreita vieneses, y tenió conoixencia d'a capacidat de seducción d'ixas ideyas sobre as masas populars. Ta rematar, pareix que estió mientres a suya estada en Viena cuan desembolicó ideyas antisemitas, estando asinas iste antisemitismo fruito d'as suyas experiencias vienesas. Istas influencias no nomás yeran d'o populismo de Karl Lueger, que dende 1897 yera l'alcalde de Viena, sino tamién de l'antisemitismo de muit baixo nivel cultural y social que tamién se trobaba en ixe inte en a ciudat.

En a primavera de 1913, ta evitar estar enrolato en l'Exercito austriaco, se treslada enta Múnich, a capital d'o Reino de Bavera, encara que iste feba parte de l'Imperio Alemán, y a on contaba de trobar un ambient no guaire diferent de l'ambient vienés. En a suya nueva residencia tornó a malvivir d'a venta d'as suyas acuarelas de mediocre calidat. Gritato ta una revisión medica, en haber-se trobato o suyo puesto de residencia, fue declarato inútil ta o servicio militar por a suya constitución feble, y Hitler tornó ta Múnich.

Voluntario en a Primera Guerra Mundial

 
Adolf Hitler (en a dreita, posato) con atros soldatos d'a suya unidat mientres a guerra.

En prencipiar a Primera Guerra Mundial, Hitler se trobaba encara en Múnich. S'ha descubierto mesmo una fotografía en a que apareix, cuan encara yera un desconoixito, en a multitut que celebra o prencipio d'a guerra.[7] Con as suyas ideyas nacionalistas y panchermanistas, prenió a decisión d'alistar-se como voluntario ta luitar en a guerra, encara que no lo fació en un Exercito austrohongaro que no li cuacaba, sino en l'Exercito alemán, alistando-se en o 16º Rechimiento d'Infantería de Bavera, un rechimiento no de primera linia, sino de reserva. En plegar a o Frent Occidental fació parte d'a batalla d'Ypres en 1914, y teneba l'aprecio d'os suyos chefes, encara que consideraban que no teneba cualidaz ta mandar tropas como suboficial y li refusoron o suyo ascenso. Fació fainas d'estafeta, y partecipó en a guerra de trincheras dica setiembre de 1916, cuan o suyo Rechimiento partecipó en a batalla d'o Somme.

Ferito en una cuixa en ista batalla, en octubre, tornó a un hospital en Alemanya, ta tornar dimpués a o frent en Flandres. En 1918 fue nafrato una atra vegata, en ista ocasión cuan l'Exercito britanico fació un ataque con gas mostaza, resultando afectatos os suyos uellos. L'ingresoron en un hospital en Pasewalk (Pomerania) y li concedioron una Cruz de Fierro de 1ª Clase (que no se gosaba conceder-se a soldatos, encara que sí a estafetas en tener mas contacto con os oficials). L'oficial que recomendó que li concedesen a Cruz de Fierro, ironicament, yera chodigo.

Cuan encara se trobaba en o hespital, conoixió que o Exercito alemán reblaba en o frent occidental, as noticias d'a Revolución en Berlín, o motín d'a Kaiserliche Marine, l'abdicación d'o kaiser Guillén II y a suya fuyita enta os Países Baixos, a proclamación d'a Republica por o socialista Philipp Scheidemann y a sinynatura de l'armisticio de 1918. Incapable de comprender os feitos escaicitos, Hitler s'adhibió dende ixe momento a la teoría d'a Dolchstoßlegende u punyalada en a esquena, seguntes a cual o Exercito alemán no heba perdito a guerra en o frent, sino que nomás a traidoría d'os chodigos y d'as chents d'ezquierda en a retraguarda heban feito posible a redota alemana; ista teoría estió muit estendillata en os medios d'o nacionalismo alemán. Seguntes diz en Mein Kamp, fue en ixe inte cuan prenió a decisión de dentrar en a vida politica.

A luita politica

Hitler en 1919

Encara que en a suya obra Mein Kampf Hitler diz que en o mesmo leito d'o hespital ya heba decidito dentrar en a vida politica, ixo no ye en realidat nomás que una reconstrucción a posteriori d'os escaicimientos feita con finalidaz de propaganda. Asinas, cal parar cuenta que Hitler no prebó de dentrar en denguno d'os abundants Cuerpos francos u unidaz paramilitars que se formoron por ixas envueltas con militars y soldatos desmovilizatos d'ideolochía de dreitas u d'extrema dreita ta luitar contra os comunistas u contra os países mugants en l'este por o control de bels territorios, u mesmo contra o propio rechimen politico democratico que s'heba formato en Alemanya en rematar a guerra, a dita Republica de Weimar. Antiparte, mientres a dita (y efimera) Münchner Räterepublik, Hitler tenió un perfil muit baixo, y ye fácil que plegando mesmo a prestar tacitament u expresa a suya conformidat a las nuevas autoridaz revolucionarias.

 
Carnet de militant d'o Nationalsozialistische Deutsche Arbeiterpartei d'Adolf Hitler, en 1920.

O 9 de noviembre de 1918 se formó en Bavera un Gubierno revolucionario de tipo sovietico, a dita Münchner Räterepublik u "Republica d'os Concellos", proclamata por o socialista Kurt Eisner. Cuan Eisner fue asasinato en primerías de 1919, iste rechimen encara tornó mas enta a ezquierda politica. Mesmo o cuartel a on se trobaba Hitler yera dirichito por un "concello" u soviet. En primerías, Hitler, a qui no li cuacaba a situación politica, albandonó Múnich ta dirichir-se enta Traunstein. Sindembargo, en 1919, cuan a situación politica yera dubtosa en no estar platero si dominaría o Kommunistische Partei Deutschlands (Partiu Comunista Alemán) u o Sozialdemokratische Partei Deutschlands (Partiu Socialdemocrata Alemán), Hitler fue esleito delegato por o suyo cuartel, dos vegatas (a primera mientres o Gubierno socialista, a segunda mientres o efimero Gubierno comunista). Encara que no s'afilló a denguno d'ixos dos partius, no fació cosa ta combatir-los; antiparte, ye fácil que os soldatos que l'esleyoron tenesen conoixencia d'a suya ideolochía de tipo nacionalista. Istos feitos s'escaicioron chusto cuan as tropas federals, unitas a bel uns voluntarios d'os Cuerpos francos, prenioron a ciudat de Múnich y rematoron con o suyo Gubierno d'ezquierdas.

Hitler continó fendo parte d'a Reichswehr, l'Exercito alemán, dica o 31 de marzo de 1921. Dende chunio de 1919, o suyo superior, o capitán Karl Mayr, li ordenó que fese propaganda anticomunista entre os suyos companyeros (Meyr, qu yera d'ideolochía socialista, morió engarcholato en o campo de concentración de Buchenwald en febrero de 1945, dos meses antis de rematar a guerra). Hitler feba conferencias a os soldatos, descubrindo-ie asinas as suyas capacidaz ta l'oratoria y a propaganda, estando amás a primera vez en que un publico quedaba subchecto por o suyo carisma en relación con as masas.

Orador d'o Partiu Nazi en 1921-1922

 
Composición con imáchens d'Adolf Hitler mientres os suyos discursos, fotos de Heinrich Hoffmann en 1930.

En setiembre de 1919, ordenoron a Hitler de cosirar as actividaz d'un grupusclo politico d'ideolochía ultranacionalista, o Deutsche Arbeiterpartei (Partiu Obrero Alemán), que heba fundato Anton Drexler en 1918. En rematar un acto en una cervecería de Múnich, Hitler prenió a parola ta contradecir a uno d'os oradors en ixe acto, y Drexler, que en paró cuenta, li proposó d'convertir-se en militant d'o partiu, que cambió o suyo nombre inicial a Nationalsozialistische Deutsche Arbeiterpartei (Partiu Nacional Socialista Obrero Alemán).

O indubtable magnetismo personal d'Adolf Hitler y as suyas capacidaz oratorias li facioron convertir-se a escape en a "estrela" d'o partiu en os actos politicos d'extremistas de dreita que en ixe inte se feban en as cervecerías muniquesas, remarcando tres cuestions prencipals en os suyos discursos (antisemitismo, anticomunismo y nacionalismo), dirichitos enta un publico que ya yera convencito d'ixas ideyas antes d'o discurso. A suya creixent popularidat lo fació convertir-se en una personalidat imprescindible en o partiu, parando asinas un golpe interno contra l'anterior grupo dirichent d'o partiu, que remató por ceder-le a presidencia d'o partiu. Parando cuenta d'a suya popularidat exterior, o partiu creixió muito, encara que continó estando un chicot partiu minoritario.

Hitler establió un diario como organo d'o partiu, o Völkischer Beobachter, trigando tamién una bandera ta simbolizar-lo, a bandera d'a cruz gamata. Tamién imposó un programa politico, o dito Programa d'os 25 puntos (1920) y establió una melicia paramilitar d'o partiu, as Sturmabteilung (SA). Antiparte, adoptó ta a suya propia persona una vestimenta de color negra, que combinaba con atras de traza militar, y adoptó tamién a suya mostaixa tan caracteristica.

Mientres istos inicios d'a suya carrera politica, Hitler no se presenta a sí mesmo como un líder politico, sino nomás que como un precursor u profeta d'un futuro líder que sería o salvador d'Alemanya y qui conduciría Alemanya enta o suyo reendrezamiento y recuperación d'a suya posición como gran potencia en Europa. Sindembargo, cambió a escape ista planteyamiento en veyer cómo funcionaba de bien o culto a la personalidat que amanixió enta a suya persona entre os miembros d'as SA y d'o Partiu Nazi. Pasó asinas, dende 1921-1922 a considerar-se a sí mesmo como o salvador d'a Gran Alemanya, un convencimiento que ya no l'albandonaría.

Creixió asinas o suyo narcisismo y a suya megalomanía, accentuando-se amás a suya preponderancia en o Partiu Nazi. Ixe ye un rasgo definitorio que diferencia o nazismo alemán d'o stalinismo sovietico (Josef Stalin nunca no creyó en o culto a la suya personalidat que se li feba) u d'o faixismo italiano (Benito Mussolini nunca no estió mas que uno mas, encara que en una posición predomiminant, d'os dirichents d'o Partiu Fascista).

Como consecuencia d'as suyas actividaz, en chinero de 1922 as autoridaz condenoron a Hitler a tres meses de garchola, por "desórdens de l'orden publico", que cumplió en una garchola de Múnich, y l'alvertioron de que podría estar forachitato de Bavera (en no tener a nacionalidat alemanya sino austriaca).

O fallito Putsch de Múnich d'o 9 de noviembre de 1923

Ta más detalles, veyer l'articlo Putsch de Múnichveyer os articlos [[{{{2}}}]] y [[{{{3}}}]]veyer os articlos [[{{{4}}}]], [[{{{5}}}]] y [[{{{6}}}]]veyer os articlos [[{{{7}}}]], [[{{{8}}}]], [[{{{9}}}]] y [[{{{10}}}]].
 
As personalidaz inculpatas mientres o proceso d'Adolf Hitler en 1924, en una fotografía d'Heinrich Hoffmann.

Adolf Hitler yera un fervient admirador de Benito Mussolini, y cuan iste fació a suya Marcha sobre Roma o 28 d'octubre de 1922 y prenió o poder en o Reino d'Italia, Hitler creyó que podría repetir o exito que heba tenito Mussolini con o que en realidat yera un golpe d'estato. Asinas, en noviembre de 1923 a economía d'a Republica de Weimar s'esboldregó: con a hiperinflación o Papiermark no teneba denguna valor, os Aliaus franceses y belgas ocuporon a cuenca d'o Ruhr en a dita Ocupación d'o Ruhr, y bel uns chicoz grupos politicos facioron accions comunistas u separatistas. En ixas condicions, Hitler creyó que a suya oportunidat heba plegato y que podría conquerir o poder en Bavera ta dimpués marchar enta Berlín y prener o poder en toda Alemanya. Organizó asinas, de conchunto con o mariscal Erich Ludendorff un golpe d'estato, que se conoix en a historiografía con o nombre de Putsch de Múnich, os días 8-9 de noviembre de 1923. As autoridaz reprimioron con facilidat a tentativa de golpe y mientres una chicota batalla debant d'a Feldherrnhalle de Múnich ferioron a Hitler y morioron 16 militants nazis (que dimpués se convertioron en mártirs d'o nazismo).

Como consecuencia d'istos escaicimientos, o Nationalsozialistische Deutsche Arbeiterpartei fue prohibito y Hitler fuyió. Fue preso l'11 de noviembre y li ubrioron un proceso, engarcholado-lo alavez en a prisión de Landsberg am Lech. En ixe momento, Hitler decidió d'emplegar nomás que as vías legals ta plegar en o poder (encara que cal parar cuenta que ixo yera nomás que una decisión tactica, como o feitos dixan prou platero).

Antiparte, Hitler supo aproveitar o suyo proceso ta fer-se propaganda, convertindo-se en un personache conoixito en toda Alemanya y no nomás en Bavera como dica ixas envueltas. Os suyos chueces, que ideyolochicament yeran amanatos a l'extrema dreita y a qui no lis cuacaba a Republica de Weimar, estioron a-saber-lo d'indulchents y l'1 d'abril de 1924 lo condenoron a cinco anyadas de garchola por alta traidoría, encara que nomás cumplió que una anyada en a prisión de Landsberg am Lech.

A formación d'una ideolochía (1923-1924)

Mientres estió en a garchola, dictó a o suyo secretario, Rudolf Hess, a suya obra Mein Kampf. Ye a unica obra teorica de Hitler, y ye feita como un relato autobiografico con finalidat de manifiesto politico, que se convertió a escape en una autentica guía (u mesmo una Biblia, con as suyas connotacions de tipo relichioso) d'o movimiento politico d'o nazismo. S'expone en o libro a Weltanschauung u concepción d'o mundo de Hitler, que heba construito dende 1919 y que no varió ni mica ni pon en o futuro, convertindo-se tamién en un guía d'as actividaz politicas de Hitler.

A doctrina politica d'o libro charra d'o suyo malestar con a democracia, con una Francia que ye "enemiga mortal d'o pueblo alemán", con o socialismo y con o chudeo-bolchevismo, y tamién d'una concepción darwinista de luita entre unas razas que nunca no pueden estar iguals. Hitler afirmaba que a sociedat perfecta yera una piramide social que tendría en a suya cuspide a raza alemana, que sería a raza d'os sinyors (Hitler, cuan en charra, la califica indistintament de "raza aria" u de "raza nordica"). Sindembargo, caldría "purificar" ista raza, sacando-ie toz os "elementos foranos" u "no alemans", chodigos, homosexuals u malautos, y asinas ista raza purificata podría dominar o mundo emplegando a fuerza d'estar menester. Hitler adhibió a la teoría tradicional conservadora d'o panchermanismo, que pretendeba unir a toz os alemans etnicos en un unico estato, a suya ideya d'un Lebensraum u espacio indefinito a conquerir ta permitir a supervivencia d'os alemans, espacio que caldría conquerir a d'atras razas ditas "inferiors" como polacos u atros pueblos eslaus consideratos Untermensch ("sub-hombres" u "infra-hombres"). Tamién gosaba charrar en a suya obra d'os chodigos, un pueblo que deciba que calía "erradicar" y mesmo "aniquilar", en estar no nomás una raza inferior sino tamién una raza periglosa por as suyas capacidaz de contaminación d'a pureza d'a raza superior alemana.

L'ultra-racismo de Hitler teneba as suyas radices en as teorías recistas d'o francés Joseph Arthur de Gobineau y de l'anglés Houston Stewart Chamberlain; o suyo culto enta o super-hombre teneba as suyas radices en as ideyas a o filosofo alemán Friedrich Nietzsche; a suya obsesión por a decadencia teneba orichen en as teorías d'o filosofo conservador alemán Oswald Spengler; y prenió os conceptos de "raza nordica" y d'"espacio vital" a Alfred Rosenberg, o prencipal teorico d'o Partiu Nazi. Tamién prenió ideyas d'a dita Revolución conservadora que contra a Republica de Weimar inspiroron pensadors como Arthur Moeller van den Bruck u Hugo von Hofmannsthal (iste zaguero yera autor d'una obra que teneba como títol un suchestivo O Tercer Reich, nombre qu en zaguerías adoptó Hitler ta o suyo rechimen, o Tercer Reich).

Dimpués de nomás que 13 meses d'estar en a garchola, o 20 d'aviento de 1924 liberoron a Hitler.

A reorganización d'o Partiu Nazi (1925-1928)

En creyer que podía estar expulsato enta Austria, Adolf Hitler renunció a la nacionalidat austriaca o 30 d'abril de 1925, convertindo-se asinas formalment en un apatrida. Encara que li prohibiron de charrar en publico dica o 5 de marzo de 1927, manimenos mantuvo a suya popularidat.

Antiparte, encara que o Nationalsozialistische Deutsche Arbeiterpartei tenió dica 1928 pocos exitos en as eleccions a o Reichstag, sí que cal parar cuenta que Hitler s'adedicó a estendillar o Partiu, que dica ixe inte yera cuasi nomás que un partiu rechional bavaro, per tot o territorio d'a Republica de Weimar. Antiparte, creyó seccions u asociacions satelites dirichitas enta sectors socials concretos: estudiants, campesins, obrers, intelectuals u chóvens (a Hitlerjugend s'establió en 1926). Asinas, o Partiu Nazi se convertió en un contra-gubierno y una contra-sociedat, encara que con una estructura susceptible, d'estar posible, de substituir a o mesmo estato alemán: yera asinas un contra-poder preparando-se ta una posible revolución u conquiesta d'o poder.

Vinclos externos

Referencias

  1. Keegan, John (1989), The Second World War, Glenfield (Nueva Zelanda): Hutchinson
  2. Wistrich, Robert S. Who's Who In Nazi Germany? Routledge, Londres, 1995 ISBN 978-0-415-11888-0
  3. Bullock, A. (1962), Hitler: A Study in Tyranny, Penguin Books, ISBN 0-14-013564-2
  4. Keegan, John (1987), The Mask of Command: A Study of Generalship, Pimlico (Random House)
  5. Shirer, William L. (15-11-1990), The Rise and Fall of the Third Reich, Simon & Schuster, ISBN 0-671-72868-7
  6. (fr) Kimberly Cornish, Wittgentsein contre Hitler. Le Juif de Linz, PUF, 1997.
  7. (en) Hitler Picture - Hitler Celebrating the Declaration of WWI