Fonetica d'o castellano

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A fonetica d'o castellano presenta diferencias en as leis foneticas con respecto a las atras luengas neolatinas vicinas tanto de l'este como de l'ueste.

A evolución dende o latín ta las luengas neolatinas como o castellano se fa siguindo uns cambios que se dicen leis foneticas. As palabras que cumplen estas leis se dicen patrimonials. En estas leis i puet influir a existencia de luengas que i heba antes d'o latín como lo basco u as luengas celtas, que representan o sustrato, u a influencia d'as luengas vecinas u efecto d'aria lingüistica. As leis foneticas no siempre se producen en tot o dominio d'una luenga y no gosan a estar nomás que d'una, porque pueden estar compartidas con as vecinas.

O castellano ye, como las luengas romances en cheneral, una luenga d'acusativo. Ixo quier dicir que a palabra castellana vien d'a radiz latina que s'emplega ta fer l'acusativo. Eixemplos:

• De ROSA, ROSAE, que ye d'a primera declinación, en agafamos l'acusatico ROSAM que quedó como ROSA cuan se perdió a declinación, y no cambió en a evolución dende o latín vulgar ta o castellano.
• De FILIUS, FILI, d'a segunda declinación, en agafamos l'acusativo FILIUM que queda primero como FILIU, y dimpués, en toz os romances hispanicos (proto-iberromanz) a U final fa O: FILIO. D'alcuerdo con as leis foneticas d'o castellano, n'este caso coincidents con o proto-iberorromance FILIO evolucionó ta hijo.
• De COHORS, COHORTIS, que ye d'a tercena declinación, en agafamos l'acusativo, COHORTEM, y cuan se perdió a declinación quedó como COHORTE. D'alcuerdo con as leis foneticas d'o castellano COHORTE evolucionó ta corte.

O castellano tien bellas evolucions que lo fan diferent d'os suyos vecins astur-leyonés y navarro-aragonés.

Fonetica vocalica

As Ŏ y Ĕ curtas tonicas latinas diftongan dando como resultau -ué- e -ie- dando iguals resultaus que en aragonés:

• • SĔRRA > sierra
  • PŎRTA > puerta

Debant de YOD no diptongan, a diferencia d'o navarro-aragonés y astur-leyonés, que tamién i diftongan:

• • HŎDIE > hoye > hoy ("huei").
  • NŎCTE > noite > noche ("nueit").
  • TĔNEO > tengo ("tiengo", present d'indicativo d'o verbo tener).

O diftongo -AI- d'o latín tardano monoptongó a -e- igual como ya lo heba feito enantes o diftongo -AE- en buena part d'o latín.

• VAIKA > vega ("ribera")

Este diftongo podeba apareixer por desaparición d'a -G- intervocalica que l'aragonés se resistiba a perder:

• MAGICU > maigo > mego.
• PLANTAGINE > plantaine > llantén ("plantaina").
• SARTAGINE > sartaina > sartén ("sartana")

Tamién podeba apareixer cuan por metatesi una consonant seguida de YOD pasaba a estar precedida por este soniu:

• CASEU > kaiso > queso.
• SAPIAT > saipa > sepa (present de subchuntivo d'o verbo saber).
• Sufixo -ARIU > -airo > -ero.

Cuan a K de grupos consonanticos -KT- u -KS- evolucionoron ta -it, -ix-:

• TAXU > taixo > tejo ("taixo", "teixo").
• FRAXINU > fraisno > fresno ("fraixin", "freixen").

Fonetica consonantica

A F- inicial latina se pierde, estando un feito caracteristico poco frequent en as luengas y dialectos neolatinos:

• • FARINA > harina ("farina").
  • FURCA > horca ("forca").

Os grupos inicials PL-, CL- palatalizan y se converten en -ll-:

• • CLAVE(M) > llave ("clau").
  • PLORARE > llorar ("plorar").
  • PLOVERE > llover ("plever").

Bi ha parolas como clavo, clavija, playa, plegar, plañir, clavija, plaza y plazo que no sufren esta evolución y s'ha quiesto explicar de diferents trazas, dende considerar-ne belunas como cultismos en uns casos u parolas ampradas dende atras luengas neolatinas como l'aragonés u o catalán, que conservan este grupo. Una hipotesi recient explica a mes gran part d'estos casos por disimilación por haber-ie actualment u haber-ie habiu en castellano medieval un fonema palatal en bella silaba siguient.

O grupo inicial FL- presenta diferents comportamientos, conservación como en aragonés, palatalización y reducción a -l-:

• FLAMA > llama ("flama").
• FLACCIDU > lacio.
• FLOCCU > flueco (en castellano antigo) > fleco.
• FLACCU > flaco ("lambrenyo").
• FLUXU > flojo ("floixo").
• FLORE > flor.

S'ha quiesto explicar os casos de no palatalización por a existencia de palatals en atras silabas, lo que habría produciu una disimilación. En os casos en os que no bi heba consonant palatal como por eixemplo flor ye posible que os parlants hesen evitau a forma patrimonial *llor por pareixer-se a las parolas d'a familia de llorar (<PLORARE), encara que ixo no impedís a formación de toponimos como Lloredo (<FLORETUM).

Os grupos -KT-, -ULT- evolucionan ta it, uit:

• • FACTU > hecho ("feito").
  • MULTU > mucho ("muito").

Os grupos -LY-, -C'L-, -G'L- y -T'L- evolucionan ta -j-:

• • MELIORE > mejor ("millor").
  • OVICULA > oveja ("ovella").
  • TEGULA > teja ("tella").
  • VETULU > viejo ("viello").

Bibliografía

• (es) Paul M. Lloyd: Del latín al español. Editorial Gredos, 2003.
• (es) Ramón Menéndez Pidal: Orígenes del español: El estado lingüístico de la Península Ibérica hasta el siglo XI. Espasa-Calpe, Madrit 1980, 9ª edición.