Falco tinnunculus

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Falco tinnunculus

Ciquilín masclo (Falco tinnunculus)

Estato de conservación

Seguro.

Clasificación scientifica

Dominio:	Eukaryota
Reino:	Animalia
Filo:	Chordata
Clase:	Aves
Orden:	Falconiformes
Familia:	Falconidae
Chenero:	Falco
Especie:	F. tinnunculus

Nomenclatura binominal

Falco tinnunculus

Linnaeus, 1758

Distribución cheografia de F. tinnunculus
Amariello = En verano
Verde = Tot l'anyo

O ciquilín u xoriguer (Falco tinnunculus (L., 1758)) ye una especie de falcón de mida chiqueta muit frecuent en Europa, Meyo Orient y o norte d'Africa. Se considera a especie de falcón mas chiqueta que reside de perén en ixes países, pos a sola especie que i gosa competir de mida tan chiqueta ye o esmerellón (Falco columbarius), que ye un au migradera.

O ciquilín ye una Falconiforme chiqueta, d'entre 34 y 38 centimetros de lonchitut y d'entre 70 y 80 cm d'envergadura d'alas. As alas son soras u royiscas, color d'archila cueta en a esquena d'os masclos, mas discretas en as fembras. A cabeza d'os masclos adultos ye, de manera caracteristica, de color grisa. Toz, masclos y fembras, tienen a punta d'a coda y d'as alas negra, y una faixeta fusca que les baixa por a galta debaixo d'os uellos. Como en toz os miembros d'o chenero Falco, a cera d'o pico, os parpiellos y as patas son de color amariella viva.

Os ciquilins son animals muit adaptables, que habitan bien en zonas con buena presencia humana. S'han gosato documentar buena cosa d'eixemplars en zonas urbanas y dica adintro d'as grans ciudaz. Meten as cobatas en os edificios, en as falsas y debaixo d'os tellatos. Cazan millor en espacios opiertos que no en as selvas, y tienen per caracteristica que a sobén no s'albiran o terreno dende bel puesto elevato como fan altras aus de presa, aguardando-ie que pase bella victima d'antes de volar-se contra ella, sino que baten as alas y se mantienen quietos en un punto en l'aire, tot cernindo-se.

Zoonimia editar

Se conoix con o zoonimo «ciquilín» en buena parte d'o territorio de parla aragonesa,^[1] documentando-se de manera indistincta en comarcas diferents como l'Alto Galligo, a Chacetania, Sobrarbe, os Monegros, Cinco Villas. Puntualment se documenta con ch- inicial, «chiquilín», talment per mesclar-se o termino con l'adchectivo «chico» que tan bien s'escai a la suya descripción per a mida tan chiqueta que tiene.

En a Ribagorza a parola ta decir-ne ye mas variadera. En bels municipios se i reconoix o termino aragonés «ciquilín», sobretot en a zona occidental d'a comarca, en nuclios como Foradada d'o Toscar,^[1] La Poblla de Fantova^[1] y Esdolomada.^[1] En a zona mas oriental, anque a parla local faiga parte de l'idioma aragonés, i utilizan parolas que pareix que hipoteticament se relacionarían con a radiz etimolochica de «zorz»: Se rechistra «choriguer»^[1] en Benás y en A Puebla de Castro, «ixoriguer» en Benás,^[1] en Castillón de Sos^[1] y en Sarller.^[1]

En Echo y en Ansó, en l'altro extremo d'os Pireneus d'Aragón, se i ha puesto trobar tamién a forma «xoriguer»,^[1] y per isto cal descartar que se tracte d'un orientalismo. Anque en cualsiquier caso, pareix que se tracta d'un termino mas minoritario.

Paralelament a tot isto, en bellas localidaz tamién se documentan formas d'o nombre relacionatas con a forma «esparver», que en aragonés sole fer referencia a especies de mida mas gran. Se rechistra como «esparvel» en Cinco Villas,^[2] en Pina d'Ebro^[1] y en Echo.^[1] Como «esparvero» en Sarller,^[1] en Granyén,^[1] en Benás^[1] y en Alcanyiz;^[1] «esparver» en Benás,^[1] en Sarller,^[1] en Chía,^[1] en Vallabriga^[1] y en Esdolomada^[1] y «esparveret» en As Corz^[1] y en Campo.^[1] Como se puede veyer, a distribución cheografica d'ixas formas ye aleatoria, y millor se gosan interpretar como errors d'identificación u eixemplos d'uso d'un termno impreciso que no como formas de nombre propio ta ista especie.