Militar
|
Iste articlo ye escrito con as normas graficas EFA. Si quiers, puez aduyar cambiando a la grafía oficial de Biquipedia y sacando dimpués ista plantilla. |
Un militar[1] ye una persona que fa d'o servicio en as Fuerzas Armatas regulars d'un país o suyo medio de vida. Enquadrato asinas en as Fuerzas Armatas, i ocupa un puesto hierarquico, conoixito como rango u grau. Ista caracteristica esferencia a lo militar, perteneixient a una organización controlata directament por o estato, d'as fuerzas paramilitars que no se troban baixo o suyo control; o militar ye asinas identificato por bells signos distintivos externos, como o suyo uniforme y por a suya pertenencia a una unidat militar hierarquicament organizata. Cal parar cuenta que a composición d'as Fuerzas Armatas puet estar voluntaria u tamién por o sistema de leva d'entre os civils ta encorporar-los-ie temporalment.
_en.jpg)
.jpg)
Tamién cal esferenciar-lo d'o mercenario, qui tamién fa parte d'as Fuerzas Armatas encara que dentro d'una unidat militar privata, encara que baixo o control teorico d'o estato que la contrata, estando amás a sobén nacional d'un estato diferent a l'estato que lo contrata.
Antiparte, cal esferenciar-lo tamién d'o terrorista, un termin que fa referencia a las personas que emplegan a violencia contra as institucions estatals ta conseguir as suyas finalidatz politicas, y d'o resistent, que ye una persona que no fa parte d'una unidat militar organizata ni ye baixo o control estatal, emplegando tamién a violencia, pero que a sobén se considera que actúa ta lograr o restablimiento d'a independencia d'o suyo país, que ye ocupato militarment en forma total u parcial por una potencia forana.
Ta rematar, s'esferencia d'atras unidatz armatas, como a Policía, en que a suya misión prencipal no ye de mantener l'orden interno d'o país, sino a protección d'as suyas mugas contra un enemigo forano.
Historicament, mientres a Prehistoria y a Edat Antiga, no existiba a fegura d'o militar en sentito estricto, estando qualsiquier miembro d'a sociedat apto ta la luita en prencipiar una guerra. Sindembargo, quan apareixioron os grans imperios de l'Antigüidat, como l'Imperio echipciano u l'Imperio Romano, naixió a fegura d'o militar profesional, que feba d'ista actividat o suyo medio prencipal de vida y que recibib un entrenamiento militar que li permeteba d'estar un ran dencima d'o nivel en que podía plegar un ciudadán que no hese recibito dito entrenamiento. Mientres a Edat Meya, a diferencia prencipal yera entre a Caballería, formata por miembros d'a nobleza que yeran quasi militars, y a Infantería, formata por labradors sin muita formación militar alistatos nomás que ta una campanya militar concreta. As primeras unidatz profesionals que se formoron estioron bellas unidatz d'arquers, que emplegaban un arma (l'arco) que en ixe inte yera un arma especializata. En os sieglos XVI-XVIII, se formoron ta la guerra unidatz de mercenarios, que constituiban a parte prencipal en os grans exercitos. Ista situación cambeó con a Revolución francesa, quen s'estendilló a ideya de que una d'as obligacions d'o ciudadán yera la de prestar por un tiempo o suyo servicio militar, ta fer que en caso de guerra estase a punto ta fer parte de l'Exercito: apareixioron asinas as grans campanyas militars que movilizaban millons de soldatos, mandatos por grans estrategas como Napolión Bonaparte. Mientres a Primera Guerra Mundial, y encara mas mientres a Segunda Guerra Mundial, l'aplicación d'os abances tecnicos de l'industrialización a la guerra fació necesario l'adiestramiento d'os militars por una luega durada, tonando a apareixer o militar profesional, situación que actualment ye vichent en quantos países, incluyindo-ie Espanya.
EtimolochíaEditar
A parola militar provién d'o latín militarius, derivato de miles (ye decir, soldato).
Tipos de militarsEditar
En resumen, un militar puet estar:
- Personal contractato por un tiempo ta fer as funcions militars, con caracter voluntario.
- Personal de carrera, ye deir, que ha feito os estudios d'a carrera militar en una Academia militar y sirve a sobén como oficial u suboficial.
- Personal enrolato por o estato de forma obligatoria como un deber civico, en as ditas levas, como en o sistema que existiba en Espanya dica os anyos 1990, en que totz os ciudadans de chenero masculín pasaban una anyada (u dica dos anyadas, d'antis más) en l'Exercito.
- Personal civil enrolato forzosament en caso de guerra.
Funcions d'o militarEditar
Un militar puet tener una actividat operacional en o campo de batalla, d'adiestramiento d'atros militars, de mando superior u d'oficina. A organización d'un exercito fa necesarios un mando (t'a coordinación d'as tropas) y una lochistica, components de muita importancia en as mudernas Fuerzas Armatas. A sobén se charra d'«escalerón»: escalerón de mando, escalerón lochistico y escalerón operacional.
Ta os emplegos operacionals, se puet destinguir:
- O caballero u miembro de l'Arma de Caballería. Antes más a caballo, o termin s'emplega dende meyatos d'o sieglo XX, alto u baixo, ta referir-se a l'arma blindata, en haber desapareixito actualment l'emplego de caballos con finalidatz belicas.
- O infant u miembro de l'Arma d'Infantería, qui luita a piet.
- O marín u miembro de l'Armata, qui luita en a mar.
- O infant de marina, que ye transportato por l'Armata pero que en plegar en tierra firme combate como soldato d'infantería.
- O piloto militar u aviador militar, miembro de l'Aviación militar, que luita en l'aire.
- O incheniero militar, miembro de l'Arma d'Incheniers militars.
- L'artillero, miembro de l'Arma d'Artillería.
- O paracayidista y a infantería aerotransportata, que son trasladatos por l'Aviación dica o suyo lugar de combate ta dimpués luitas como infantería.
Cal parar cuenta tamién d'atras actividaz militars, como a Intelichencia militar, adedicata a o espionache y contraespionache, ya siga en l'interior d'o propio país u en l'exterior, ta reunir informacions sobre as actividaz, tecnicas, disposición y capacidatz d'atros exercitos foranos.
A sciencia tien tamién muita importancia por o suyo uso militar, y tamién se charra asinas d'a sciencia militar, a ormino t'o desembolique d'a tecnolochía militar.
O militar en a HistoriaEditar
PrehistoriaEditar
En a Prehistoria, no existiba o militar como una profesión, en estar tot miembro d'una sociedat un militar en caso de conflicto, situación que continó en quantos estatos de l'Antigüidat. Sindembargo, en os grans imperios de l'Antiguidat, en l'Antigo Echipto y en l'Imperio Romano, os militars esdevenioron uns profesionals, a lo menos en quantas unidatz selectas.
Imperio RomanoEditar
Mientres l'Imperio Romano, s'alistoron en a Lechión romana os soldatos por primera vegata como soldatos profesionals, prestando-ie os suyos servicios por una luenga durada, y recibindo formación militar ta cumplir millor con a suya misión. A prestación de servicio por os ciudadans romanos se completaba con l'alistamiento de personas que, encara que naixitas dentro d'as mugas de l'Imperio, no teneban a ciudadanía romana, que nomás adquiriban que en estar licenciatos, dimpués de 25 anyadas de servicio, esdevenindo os soldatos dimpués d'estar licenciatos un instrumento prencipal en a politica de latinización d'as poblacions conquiestas. Sindembargo, nomás qui teneba ciudadanía romana (u latina) prestaba o suyos servicios en a Lechión, prestando servicios a resta en unidatz especials ditas auxiliars, a ormino de Caballería en as ditas Alae.
Edat MeyaEditar
Mientres a Edat Meya no existiba a fegura d'o militar profesional, y en ixas envueltas lo mas amanato a un militar yeran os nobles que feban parte d'a Caballería, y que yeran decisivos en a mayor parte d'as batallas. A infantería en ixe inte yera formata nomás que por por labradors que no teneban formación militar y que s'alistaban nomás que ta una campanya militar concreta.
Sindembargo, tamién apareixioron en ixe inte dos tipos de soldatos que sí se puet considerar que yeran profesionals, totz dos mercenarios que luitaban en pagas por una soldada. D'una man, bi heba os grupos de caballers mercenarios, segundons d'a nobleza u miembros d'a chicota nobleza que buscaban por medio d'a suya participación en as guerras un botín ta incrementar os suyos recursos economicos y a suya posición social. D'atra man, os soldatos que manipulaban bella arma especializada, como l'arco u a dita artillería en ixas envueltas (ye decir, catapultas, onagres y atras armas de setio). Ixos especialistas se contrataban en o caso d'os arquers siempre con as suyas armas, y tamién se feba asinas a sobén con os especialistas en artillería, situación que se reprodució en apareixer a primera artillería tal como hue se conoix, con emplego d'a polvora.
RenaiximientoEditar
Mientres o Renaiximiento, no nomás fació a suya aparición a moderna artillería, sino que amás prencipió a existir un Exercito permanent a lo servicio d'as prencipals monarquías u reinos, que yeran os países que teneban suficients recursos economicos ta fer frent a lo suyo coste. Tamién aparicioron os ditos condottieri en a peninsula italica, formando dende o sieglo XIV unidatz militars completas que contrataban os chicotz estatos d'a peninsula ta las suyas guerras, en un sistema quasi codificato a on no yeran freqüents as mortaleras de presoners.
Sindembargo, tamién apareixioron en Europa as guerras por de motivos relichiosos, con as mortaleras de presoners en rematar a batalla, feito que dica ixe int nomás se feba en as luitas contra os musulmans. A confrontación ideolochica, amás d'a creixencia d'o poder estatal, fació que amanixiesen en o continent os grans exercitos en campanyas quasi permanents, fendo nomás una parada en hibierno, quan as condicions climatolochicas feban difícil a continación d'as operacions militars. En ixas envueltas destacoron os ditos tercios de l'Exercito espanyol que luitoron en os Países Baixos espanyols contra os sublevatos protestants d'as Provincias Unitas y contra os suyos aliatos, os angleses y os franceses, amás de contra os exercitos protestants de suecos y alemans.
Sieglos XVIII y XIXEditar
A Revolución francesa estió un momento clau en a evolución d'a fegura d'o militar. Seguntes as ideyas liberals d'os revolucionarios franceses, desapareixiba a condición de subchecto d'una monarquía ta amanixer a condición de ciudadán d'una democracia. Asinas, mesmo que o ciudadán pagaba uns impuestos ta fer que l'estato podese fer frent a las suyas necesidatz, tamién pagaba en forma de prestación d'un servicio militar obligatorio, formando asinas exercitos de ciudadans armatos. Ta mandar y enquadrar a ixos soldatos, apareixioron os oficials de carrera, formatos en Academias militars y con conoixencias especializatas en o mando y planificación d'as operacions militars, que teneban ta las suyas maniobras a la suya disposición una gran masa de soldatos. Tamién s'emplegaba una abundant artillería y atras armas mudernas en o frent de batalla.
O militar más caracterizato d'ixe periodo ye Napolión Bonaparte, qui con os suyos mariscals y chenerals luitó por primera vez en batallas por toda Europa, dende Rusia dica Portugal, u mesmo fuera d'Europa, como en Echipto.
Sindembargo, en os anyos 1870, con a Guerra Franco-prusiana, a tecnica aplicata a las armas fació que s'inventase a metralladora, con una potencia de fuego tan important que feba imposible as batallas como dica ixe inte s'heban conoixito, encara que ista lección no s'aplicó encara por os Estatos Mayors.
Sieglos XX y XXIEditar
Primera Guerra MundialEditar
En a Primera Guerra Mundial o sistema d'exercitos masivos formatos por millons de soldatos ya yera o sistema habitual, estando enquadrato por un chicot exercito formato por profesionals y por oficials que tamién yeran profesionals. Sindembargo, en ista guerra uno d'os elementos más destacatos estió l'aplicación a las tecnicas y a l'armamento militar d'as zagueras innovacions tecnicas y d'os descubrimientos scientificos.
A mesma potencia de fuego a que heba plegato en ixas evueltas l'artillería y l'emplego masivo d'a metralladora facioron que os ataques contra posicions fortificatas esdeveniesen un autentico suicidio. Se creyoron trincheras como sistemas de fortificación ta la protección d'o frent de batalla d'os ataques de l'enemigo, contando-se asinas os abances territorials en metros de territorio, que amás restaba arrasato de raso.
Tamién apareixioron atras innovacions, como l'emplego masivo d'os automóvils u d'o ferrocarril ta o transporte de tropas, u l'emplego de nuevas armas como o tanque u l'avión militar, anque que en ista guerra no s'emplegoron encara a plena capacidat.
Segunda Guerra MundialEditar
Ista situación s'intensificó mientres a Segunda Guerra Mundial.
D'una man, a Wehrmacht con l'emplego d'a blitzkrieg (emplego masivo de tanques y aviación, fació un uso intensivo (encara que nomás que en puestos concretos) d'a sciencia aplicata a la guerra, situación encara mas desembolicata por l'Exercito estausunidense, que plegó a l'emplego d'a bomba atomica contra o Chapón.
D'atra man, con ixo calía una mayor tecnificación d'os militars, que luitaban en vehiclos especializatos con armamento sofisticado, armamento que requería d'una important formación tecnica d'os militars (y tamién d'os oficials ta l'emplego correcto d'os nuevo medios de luita).
Posguerra y actualidatEditar
Con istos antecedents, se plega curiosament a una situación pareixita a la situación anterior a la Revolución francesa: un chicot grupo de militars, altament tecnificato y profesional, forma os exercitos actuals, rematando con o servicio militar obligatorio y creyando un exercito profesional a on a sobén en fan parte soldatos d'atros países. Continan existindo as Academias militars ta formar a los futuros oficials, encara que os soldatos ya tienen a vegatas una relación quasi laboral con as suyas Fuerzas Armatas.
Militarismo y antimilitarismoEditar
A posición d'a sociedat dabant d'os militars fa que se pueda charrar de militarismo y d'antimilitarismo, en un debat que ha dividito modernament as sociedatz civils.
- O militarismo ye una ideyolochía que considera que o militar ha de tener una posición destacata en a sociedat, en estar o depositario d'as virtutz y esencias nacionals que ha d'esfender en o campo de batalla. Ye una ideyolochía que gosa estar asociata a la dreita politica y mesmo de vegatas a l'autoritarismo, encara que un partidario d'a democracia puet estar d'ideyolochía militarista. Tamién s'asocia a lo imperialismo. Mientres o sieglo XX o faixismo de Benito Mussolini u o nazismo d'Adolf Hitler en son eixemplos claros.
- L'antimilitarismo ye una ideyolochía que gosa estar asociata a la ezquierda politica y que, antiparte, ye refleixo d'o pacifismo.
Un eixemplo d'istos debats podemos trobar-lo en a Francia d'a Tercera Republica en relación con o dito caso Dreyfuss.
ReferenciasEditar
- ↑ (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.