Dialectos de l'aragonés

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

A lengua aragonesa tiene parlas locals, que s'agrupan en parlas de val, de comarca u parlas de bella comarca. O termin dialecto ye ambigo y se gosa fer servir pa parlas de val, bien definidas (cheso, ansotano, etc...). Tamién existe a propuesta de clasificar as parlas aragonesas en cuatro grupos, complexos dialectals u dialectos (seguntes as apreciacions d'os autors), que dimpués explicaremos. A diversitat lingüistica podemos clasificar-la asinas:

Grupos de parlas de l'aragonés

Vals y Semontano

Veyemos graus d'erosión-pureza, homocheneidat-localismo, evolución-arcaismo:

Vals d'o Pireneu axial

Millor conservación d'a luenga, pero con arcaismos. A topografía en forma de vals bien separadas ha feito que l'aragonés haiga evolucionau en un dialecto u parla local en cada val:

• Aragonés ansotano.
• Aragonés cheso.
• Aragonés d'a val d'Aragüés.
• Aragonés d'a val d'Aísa.
• Aragonés tensino.
• Aragonés d'as valles de Broto y de Vio.
• Aragonés belsetán.
• Aragonés chistabín.
• Aragonés benasqués u patues.

Prepireneu

Millor conservación d'os rasgos chenuinos que en o Semontano, pero pior que en as vals d'o Pirineo Axial. Son parlas de transición entre o Semontanés y a parla de cada val.

Semontano

O Semontanés ye relativament uniforme en zonas mas amplas, pero mui castellanizau, con perda de muitos caracters chenuinos. As diferiencias cheneracionals son mas grans que as cheograficas. S'ha perdiu o emplego d'o pronombre adverbial de locativo i, (bi en as vals axials).

Polos occidental y oriental

Existe una distribución de diferiencias entre l'este y l'ueste, con mugas que no coinciden, pero que fan que unos se veigan mas que mas dende Broto y Cotefablo enta Ribagorza, (y mas luent), y atros se veigan mas que mas dende Tena y Cotefablo enta Navarra. Podemos veyer-lo en as parellas:

Fonetica

• -x- / -ix: por eixemplo baxo / baixo.

A muga ye en Cotefablo, pero a o sud no ye clara por a perda d'o fonema a causa d'a cheada tipica d'o semontano.

Relacionau con esta dicotomía bi ha una dicotomía en o tractamiento d'o diftongo -AI- d'o latín tardano u d'o romanz primerenco que apareixió por a evolución d'o grupo -KS- enta ix:

• Taxo / teixo (latín TAXUS)
• Fráxin / fréixen (latín FRAXINUS)
• Fraxenco / freixenco (francico frisking).

Palabras que conservan millor a traza fonetica orichinal u en a part occidental u en a oriental:

• Sartana / sartén (latín SARTĀGINE, se suposa que pasando por una etapa *sartaina con diftongo -AI-).

Relacionau con a evolución d'o diftongo -AI- tenemos tamién a forma verbal de primera persona d'o pasau imperfecto d'indicativo -ebai de l'ansotano, que corresponde a -ebe d'o chistabín.

• Tenebai / tenebe.

Ciertos matices foneticos esporadicos visibles en ciertas palabras presentan una distribución d'acuerdo con estos polos y que reflectan diferiencias adintro de lo latín peninsular.

• Conello / conillo.
• Sabuco y variants sufixadas / samuco, samugo y variants sufixadas.
• Pro / prou: a primera forma, d'Ansó a Tena, tamién un poquet en Bielsa. A segunda forma de Broto a Benás. Prou por o sud plega ta o Somontano, Baixo Aragón y sierra de Gúdar con a suya forma alofona prau.

Morfolochía

Pronombres

• Con mi / con yo
• Nos / mos
• Vos / tos
• Bi / i: "bi" se troba en Ansó, Echo, Tena, Sarrablo, plegando como minoritario ta Bielsa y ta o Viello Sobrarbe. "i", estió a forma mas extendida cuan se conservaba en o resto d'Aragón.

Conchuncions

• Sindembargo / manimenos, conchuncions adversativas.
• Alora (continador de la ora en aragonés medieval), u allora (en cheso) / alavez
• A ormino / a sobén: a sobén se deciba en aragonés medieval d'a depresión d'Ebro y se documenta en o Baixo Aragón en o sieglo XX.
• De raso / de tot.
• A tamás que / por mas que, per mes que, por muito que, per molto que, conchuncions concesivas.

Adverbios

• Cosa / res: En a zona este de l'Alto Aragón se troba res, pero dezaga de ni: no he visto ni res, no n'ha quedau ni res. En Pandicosa, Viello Sobrarbe y Ribagorza, en especial en Benás.

Desinencias y verbos irregulars

• Puedes / puez.

Lexico

• Almadía / navata.
• Calderizo / cremallos.
• Cárcel / garchola.
• Cinguiello / pala.
• Clamar / dicir (con sentiu de "denominar").
• Clamar-se / dicir-se.
• Cornizas / .
• Enchaquia / desincusa.
• Espata / tenilla.
• Espinais / espinaques.
• Fablar, (Ansó, Echo) / parlar, (Chistau, Viello Sobrarbe, Ribagorza, Monegros).
• Foyo / clot.
• Laguna / estanyo.
• Lardo / redetiu (y variants).
• Melón / Formas d'a familia taixo-teixón-texugo
• Milloca / panizo.
• Odir (ansotano)-oyir / sentir.
• Paxaro / muixón.
• Pez / pegunta.
• Pezón / percullo.
• Pintacoda / candereta.
• Ronya / robín.
• Saín / ensundia.
• Tresmudar / trescolar-trascolar.
• Tovalla / xugamanos.
• Usín-osín / turbios-turbera.
• Vaina / bachoca.
• Xorrontar / espantar.
• / Demoret.
• / Enfilar .
• / Vidolla, birolla.

Palabras con a mesma radiz y diferent prefixo, infixo u sufixo

• Enamplar / Ixamplar.
• Meyo / Michan(o).
• Felz(e) / Felequera-Falaguera.
• Fraxín(o) / Freixe(ra).
• Chulio / chuliol.
• Chuntura / chunta.

Atros aspectos

En os verbos deícticos de movimiento ir y venir se veye que l'uso d'estos verbos coincide con os usos castellanos en aragonés occidental (o emisor ye o solo centro deictico d'a comunicación) y con os usos catalans y occitans en aragonés oriental (o interlocutor puet estar tamién centro deictico d'a comunicación, d'astí se de diga venir referindo-se a lo puesto on ye):

• Iré ta Binéfar lugo, (aragonés cheso).
• Vendré ta Binéfar luego, (aragonés ribagorzano).

Propuesta d'os cuatro dialectos

A propuesta mas asolada de clasificación dialectal, ye a de Francho Nagore, que clasifica as parlas aragonesas en 4 grupos (occidental, central, oriental y meridional). Ta beluns, istos grupos son complexos dialectals, y as parlas que bi ha adintro de cadagún (como o cheso, o chistabín...) serían dialectos. Ta belatros, os 4 grupos son os dialectos constitutivos de l'aragonés, y os parlaches que incluyen serían sozdialectos, parlas comarcals u locals.

• Aragonés Occidental
• Aragonés Central
• Aragonés Meridional u Semontanés
• Aragonés Oriental

Atras propuestas de clasificación dialectal

Encara que a propuesta d'os cuatro dialectos ye a mas estendillada, atros autors en han propuesto variacions. Asinas, ta Ch. R. Usón y Ch. Tomás, bi habría tres dialectos historicos (occidental, central y oriental), que se corresponden alto u baixo con os tres viellos condaus pirinencos (Aragón,Sobrarbe y Ribagorza). Seguntes istos autors, as variedaz meridionals serían a continación d'ístas, que s'habrían castellanizau y uniformau en un proceso favoreixiu por a suya orografía mas plana.

Atro autor, F. Sánchez, ha propuesto en zaguerías una clasificacion que postula a existencia de dos grans variedaz u dialectos, l'occidental y l'oriental. Istos tendrían, amás, unas subvariedaz mas estremas: l'ansotano (y en bella mida, o cheso y l'ayerbense), con caracteristicas occidentals extremas, relacionadas con l'antigo romance navarro, y o ribagorzano, con prous solucions de transición enta o catalán.

Bibliografía

• (es) Francho Chabier Nagore Laín: El Aragonés Hoy. Ibercaja e CFA.
• (es) Anchel Conte et al. El aragonés: identidad y problemática de una lengua. Colección Aragón. Librería general.
• (es) Chabier Tomás Arias: El aragonés del biello Sobrarbe. Instituto de Estudios Altoaragoneses, 1999. ISBN 84-8127-095-4

Se veiga tamién

• Mugas lingüisticas de l'aragonés.

• Datos: Q3571271