Abrir menú principal

Urtica

(Reendrezato dende Chordiga)
Xordica reendreza ta iste articlo. Ta la editorial aragonesa se veiga Xordica Editorial.
Urtica
0910 Mannheim FH-Bund Brennnessel P1000296.JPG
Urtica spp.
Denominacions populars
Xordiga, xordica, ixordiga, ixordica, enfordiga, sordiga, anxordiga
Clasificación scientifica
Dominio:
Eukaryota
Reino:
Plantae
División:
Magnoliophyta
Clase:
Magnoliopsida
Orden:
Urticales
Familia:
Urticaceae
Chenero:
Urtica
Descripción
Urtica
Linnaeus, 1753

As xordigas u xordicas (scientificament Urtica (Linnaeus, 1753)) son un chenero de plantas anchiospermas de a familia Urticaceae, con d'entre 30 y 45 especies descritas, y presencia en quasi todas as latitutz subtropicals y temperadas d'os cinco continents.

DescripciónEditar

As xordigas son plantas anyals o perens, de port herbacio, y acusadament nitrofilas, por o que muestran una clara preferencia por os puestos en os que s'ha acumulau materia organica u decheccions d'animals. Creixen dica una altaria, que pende de a especie y de l'hábitat a on se trobe, d'entre 10 y 300 centimetros, anque o mas regular en os exemplars que habitan en a Peninsula Iberica ye que no pasen t'alto d'os 100 cm.

As especies perens tienen rizomas soterranios, que perviven en hibierno baixo tierra mientres as parts aerias d'a planta s'ixecan u pereixen por as cheladas, y tornan a brostar de primaveras.

 
Pelos urticants en una branqueta d'Urtica dioica.

As fuellas as tienen oposadas, con peciolo, de forma lanciolada u ovalada y con a ladera aserrada. Os niervos i son bien marcaus. As parts aerias de a planta (principalment fuellas y tallos), en a mayoría d'especies, son cubiertas de pelos urticants que contienen acido formico, histamina y serotonina, que quan se liberan por punción en os teixius tovos (p. ex. a dermis) d'os vertebraus inducen inflamación.

HábitatEditar

I ha especies autoctonas d'o chenero Urtica en os cinco continents. Habitan en zonas de clima subtropical y temperau, anque i ha más diversidat d'especies en os temperaus. De regular, precisan unas condicions d'humedat un poquet mas acusadas que no belatras especies herbacias, por o que gosan creixer en puestos con poca insolación.

Todas as especies d'Urtica son fuertement nitrofilas, o que quiere dicir que amenistan un gran aporte de compuestos nitrochenaus de o substrato a on viven. Por ixa razón, son mas freqüents en os arredols de zonas humanizadas; en terrenos abonaus u a on que s'haiga acumulau fiemo y orina d'animals.

En l'Alto Aragón, son freqüents en os nuclios despoblaus, como conseqüencia de l'acumulación d'ixas substancias en atros tiempos y de l'actual falta de qui las pise, o que en inhibiba o creiximiento quan yeran poblaus.

FitonimiaEditar

 
Xordiga y xordica (pronunciadas /tʃor'diga/ y /tʃor'dika/ respectivament) son as formas mas freqüents en aragonés.

A pronuncia popular mas freqüent, en o dominio lingüistico de a luenga aragonesa, ye «xordiga» (/tʃor'diga/). En o «Dizionario aragonés d'espezies animals y bechetals» de o naturalista y lexicografo Rafel Vidaller se cita ista forma en lugars distribuius por toda a cheografía de l'Alto Aragón: dende Salvatierra d'Esca,[1] en a muga d'as Altas Cinco Villas con Navarra, dica Biarche[1] y Salas Altas,[1] en o Semontano sobrarbenco, tot pasando por puestos tan destacables como Pandicosa[1] (a tamas de a suya habitual conservación d'as oclusivas xordas, se i documenta /tʃor'diga/), y encara en a ciudat de Uesca.[1] Son tamién puestos en os que s'ha documentau a pronuncia /tʃor'diga/: Sigüés[1] (Altas Cinco Villas), a villa d'Ansó[1] y en Fago[2] (val d'Ansó), Luesia[1] y Sos d'o Rei Catolico[1] (Baixas Cinco Villas), Radiquero[3] y Rodellar[1] (comarca d'o Semontano de Balbastro), en Torla[1] (en a val de Broto), en a Buerda[4] y en Guaso[1] (comarca de Sobrarbe).

A forma analoga, anque conservadera con a consonant oclusiva xorda en posición intervocalica, «xordica» (/tʃor'dika/), tamién s'ha documentau en un buen numer de lugars. Vidaller a trobó en as suyas enqüestas en zonas que son, mas que mas, foneticament conservaderas con iste tipo de consonants, en o centro-norte de l'Alto Aragón. En o suyo «Libro de As Matas y Os Animals» a recopila en a villa de Biescas[1] y en a val de Tena en Lanuza,[1] en Sallent[1] y en Pandicosa,[1] a on que tamién i ha trobau a forma «/tʃor'diga/». En a vecina val de Broto, a documenta en Broto[1] y en Torla,[1] anque igual como pasa con Pandicosa, en Torla tamién se i documenta /tʃor'diga/,[1] por o que existen as dos formas. En a val de Vio, anque Vidaller no i documenta sique /tʃor'dika/,[1] en un estudeo precedent d'Artur Quintana se troba que /tʃor'dika/ efectivament se diz en Nerín[5] y en Sercué,[5] pero que en todas dos localidatz coexiste con a forma /tʃor'diga/[5] y dica encara con una mas peculiar, no documentada sique en ixas dos localidatz,[5] que sería a forma pronunciada /ʃor'dika/.

En Ribagorza y en Sobrarbe oriental se troba formas, tanto conservaderas como no, con un incremento ix- inicial. «Ixordiga» (/iʃor'diga/) se documenta en Fonz,[1] en Benás, en Graus, en Esdolomada y en Torres[1] en a primera d'as dos comarcas, mientres que en Sobrarbe la documentón en Tella,[1] en Chistén,[1] en a Espunya[1] y en Puyarruego,[1] todas ellas localidatz que se troban en a compleguera de l'alta Cinca. «Ixordica» (/iʃor'dika/) ye una variant, muito menos común, que Vidaller trobó exclusivament en Vio[1] de a val de Vio, y en Biescas,[1] en l'Alto Galligo.

Existe a forma pronunciada /ʃor'diga/ que s'ha documentau en a val d'Ansó,[1][2] a on que coexiste con a forma /tʃor'diga/. Belatras formas variants, como «anxordiga», «xurdiga», «anfordiga», etc. amaneixen de forma anisolada en diferents lugars por tot l'Alto Aragón.

Se veiga tamiénEditar

ReferenciasEditar

  1. 1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12 1,13 1,14 1,15 1,16 1,17 1,18 1,19 1,20 1,21 1,22 1,23 1,24 1,25 1,26 1,27 1,28 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
  2. 2,0 2,1 (es) BARCOS, Miguel Ánchel, El Aragonés Ansotano: estudio lingüístico de Ansó y Fago; Gara d'Edizions. Zaragoza, 2007. ISBN 978-84-8094-058-0
  3. (es) Vocabulario de animales y plantas del Somontano de Barbastro en www.Radiquero.com; consultau o 30 d'agosto de 2011.
  4. (es) CORONAS CABRERO, Mariano, Vocabulario aragonés de Labuerda-A Buerda (Sobrarbe); Xordica Editorial. Zaragoza, 2007. ISBN 978-84-96457-23-2
  5. 5,0 5,1 5,2 5,3 (es) QUINTANA i FONT, Artur, El Aragonés nuclear de Nerín y Sercué (Valle de Vio); Gara d'Edizions. Zaragoza, 2007. ISBN 978-84-8094-060-3

Vinclos externosEditar

Se veiga a información de Biquiespecies sobre Urtica.