Phoenicurus ochruros

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Phoenicurus ochruros
Phoenicurus ochruros, masclo.
Denominacions populars
Cudirroya, culroya, codetarroya, cudirroi, culroi, cudirroyo, culirroya, culroya viuda, cudirroya d'as viudas, etc.
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Passeriformes
Familia:	Muscicapidae
Chenero:	Phoenicurus
Especie:	Phoenicurus ochruros
Descripción
Phoenicurus ochruros S. G. Gmelin, 1774
Distribución cheografica
Distribución cheografica

A cudirroya, cudirroyo, culroyo, culirroya, culroya (y atros muitos nombres populars en aragonés), que de nombre cientifico ye Phoenicurus ochruros (S. G. Gmelin, 1774), ye un paixaro de l'orden Passeriformes, superfamilia Muscicapoidea y a familia d'os muscicapidos, de costumbres solitarios y alimentación insectivora, a saber qué común en campos, parques, chardins y bardas por tot en Europa, norte d'Africa y Orient Meyo.

Ye una au territorial y con dimorfismo sexual, que os masclos tienen colors diferents que as fembras, anque toz dos sexos tienen en común a color d'a coda, que siempre ye de color roya u royisca, bien vistera cuan vuelan, por o cual se les gosa conoixer a-escape y ye d'aon dimana as diferents formas de nombre popular que recibe en Aragón.

Descripción

Ye una au chiquirrina, d'entre 14 y 16 cm de largura y arredol de 25 cm d'amplura d'alas. As patas y o pico son finos, de color negra. As zarpas son heterodactilas como en toz os paseriformes.

En Aragón nomás ye resident tot l'anyo en puestos con arbolau abundant, como Pirineu y Prepirineu, Sistema Iberico en Teruel y Puertos de Beceit. En a Depresión d'Ebro por lo común ye un trobo en hibierno, y emprende curtas migracions ta atros puestos cuan torna o buen tiempo pa concentrar-se de población an que la especie ye resident, lo que puede fer que s'aparente que en i ha mas en o verano que en l'hibierno en ixos puestos.

A caracteristica mas vistera d'ista especie ye la coda de color roya que comparten os dos sexos tot l'anyo. Os masclos adultos, en primavera, mudan a pluma y les ne creixe de nuevas con colors mas vivas, chusto enantes d'escomenzar a temporada d'aparellar-se. En ixe tiempo a coda d'os masclos maduros ye roya mas viva y tiene as plumas centrals negras, a diferencia d'a coda d'os chóvens y a d'as fembras, que ye de color si fa u no fa uniforme.

O dimorfismo sexual se presenta en atros caracters en ista especie: Por regular, os masclos tienen colors mas fuscas por tot o cuerpo, pero se'n tornan en especial en a cara y o papo, an que i están cuasi negras. Ixa taca negra s'esbandeixe miqueta a miqueta a mesura que abanza l'anyo, plegando a estar desgastada en o verano. A librea enfollinada podría explicar l'apelativo "viudo" u "de viudas" que bella vez s'aplica cuasi nomás que a os masclos de cudirroya. Tamién tienen una taca blanca en o dorso d'as alas. As fembras, por contra, son mas discretas y con color mas uniforme por tot arreo, de color parda u cenisa, sacando la coda royeta.

Alimentación

As cudirroyas s'alimentan por regular d'insectos y as suyas larvas. Se meten en una percha dende aon miran o suelo y, a malas que atisban un cuco esbulligar, se capuzan pa pillar-lo y se'n tornan una atra vez t'alto ta la percha pa fer pasar a presa.

En o tiempo cuan os insectos tansament se pueden trobar, as cudirroyas miran atros alimentos, como simients u lulos, u rechiran as fuellas d'o suelo pa mirar invertebraus en hibernación.

Reproducción

Fembra.

As cudirroyas fan niedo entre la fin de primavera y o verano. Os niedos se fan en una breca entre piedras, en una marguin, en un muro u en as parez d'una borda, lo mas a sobén no guaire leixos d'an que vive l'hombre pero sin meter-se masiau cerca.

A fembra y o masclo forman parella pa toda la temporada, y os dos adultos cooperan pa construir o niedo y dimpuesas pa cibar a os polletz, anque cobar no lo fa si que a fembra, l'unica que se puede meter lueca. S'ha trobau casos de masclos que s'aparellaban con dos fembras de territorios la uno a canto de l'atro. En istes casos, o masclo aduyará a las dos fembras por igual tanto pa fer niedo como pa alimentar a la pollada. Tamién s'ha trobau casos de parellas mixtas entre cuidirroyos Phoenicurus ochruros con a suya especie chirmana P. phoenicurus; os fillez mestizos tienen caracteristicas combinadas de as dos especies.

Imáchens

• 
  Niedo.
• 
  Fembra con cibo en o pico.
• 
  Choven.
• 
  Masclo adulto.
• 
  Phoenicurus ochruros

Vulnerabilidaz

Seguntes o Ministerio pa la Transición Ecolochica y o Reto Demografico d'Espanya o cudirroyo P. ochruros yera un au con poblacions estables en 2020, pero a resultas de l'impacto d'o cambio climatico s'espera que a suya distribución territorial en suelo espanyol pueda retacular entre o 74% y o 77% entre os anyos 2041 y 2070, restando-le habitats potencials pa la fin d'ixe periodo en entre un 22% y un 25% de l'aria an que actualment se lo puede trobar.

Se veiga tamién

• Papirroi
• Chinchipera

Vinclos externos

• Wikispecies tiene un articlo sobre Phoenicurus ochruros.
• Se veigan as imáchens de Commons sobre o culroi.

• Datos: Q26755
• Multimedia: Phoenicurus ochruros / Q26755
• Especies: Phoenicurus ochruros