Lardiés

Iste articlo tracta sobre o nuclio de Lardiés en o municipio de Fiscal (Sobrarbe). Pa atros usos d'o toponimo Lardiés se veiga Lardiés (desambigación).

Lardiés ye un lugar d'o municipio de Fiscal, en a provincia de Uesca y a comarca de Sobrarbe. A suya población ye de 9 habitants (2018).

Lardiés
Lugar d'Aragón
Entidat  • País  • Provincia  • Comarca  • Municipio	Lugar Aragón  Uesca Sobrarbe Fiscal
Población  • Total	9 hab. (2018)
Altaria	890 m.
Distancia  • 1 km  • 23 km  • 117 km	enta Fiscal enta L'Aínsa enta Uesca
Codigo postal	22373
Parroquial  • Diocesi  •Arciprestato	Chaca Biescas
Coordenadas	42°29’54’’N 0° 8’ 4’’U
Lardiés Situación de Lardiés en Aragón

Se troba en os primers metros d'a costera d'a punta de Berroy, por alto d'as suyas propias uebras en a Ribera de Fiscal, cosirando a boquera d'o barranco de Sant Salvador en o río Ara.

Se i plega por o primer esbarre d'a N-260 en a variant Yebra-Fiscal, salindo dende a rotonda de Fiscal de sentiu ta Yebra. Enantes de que se i fese la dita obra, se i diba por un camín gudronau dende a suya cabecera municipal.

Patrimonio

A ilesia parroquial data d'o sieglo XVIII y ye consagrada a l'advocación de Santa Agueda. Ye Bien d'Intrés Cultural declarau, con codigo SIPCA 1-INM-HUE-003-109-171, y se troba feta enrunas dende que s'espaldó lo tellau en 2009. No teneba oficios regulars dende feba 40 anyos, d'acuerdo con a diocesi, pero encara se visitaba dica 2007. O zaguer servicio que se fizo fue o baltismo d'un ninón d'a localidat, en 1999, y ya se diz que o pai d'o crío i heba teniu que fer bells apanyos.

Ye destacable Casa Tapia, que data de 1787. Tamién son B.I.C. o lavadero, Casa Perico y Casa Allué.

Historia

A ilesia de Sta. Agueda de Lardiés, en 2013.

En 1073 apareixe en a documentación d'o monesterio de Sant Per de Rava, que yera en o termino d'Ayerbe de Broto, como aldeya que pagaba treudos a l'abadía. En 1571 a parroquia se transfiere dende lo bispau de Uesca ta lo de Chaca.

Amaneix en o Diccionario geográfico-estadístico-hiostórico de España y sus posesiones de Ultramar de Pascual Madoz. D'alcuerdo con o cheografo navarro, arredol de 1845 teneba 8 casas y una ilesia parroquial, que yera servida por un mosén que nombraba o Rei y, si no, l'arcipreste de Biescas. No explica o por qué d'ixa tradición de que lo nombrás en primeras o Rei.

A metat d'o sieglo XIX o nuclio se serviba de l'augua de dos fuents, teneba uebras productivas y o mont yera de pinar, de buxos y d'aliagas. Teneba camins que yiban ta Fiscal, ta Bergua y ta Chaca (cal suposar que o camín viello d'o puerto de Petralba, que puya dende o barranco de Sant Salvador y se i prene aman). O correu le plegaba dende l'Aínsa.

Seguntes o que diz Madoz, perteneceban a o termino de Lardiés as «pardinas» d'Asué, Berroy, Vinyuals y Sant Chaime. A par d'alavez Berroy encara teneba municipio propio, por o que puet estar que le mentisen en as enqüestas.

Economía

Por Madoz sabemos que, en o sieglo XIX, os campos de Lardiés produciban trigo, civada, panizo y millo. A ganadería ye «de corto numero», compuesta de uellas y crapas, pero teneba caza en abundancia, feta de perdices, llebres, corzos y chabalins.

Contribuiba 956 reals a la facienda publica, y teneba un presupuesto municipal de 600 reals que s'aplegaba a vicinal.

Se veiga tamién

• Apelliu Lardiés.

Vinclos externos

• Se veigan as imáchens de Commons sobre Lardiés.