Liebre

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Iste articlo ye sobre os lagomorfos. Ta a liebre como animal mitolochico se veiga liebre (mitolochía).

Liebre u llebre (d'o latín <LEPUS, LEPORIS) ye a denominación popular con a que se fa referencia a bellas especies de mamiferos lagomorfos caracterizaus por a suya mida, una destacada capacidat ta correr, y o feito de librar crías maturas y con pelo, que se desplazan y s'alimentan solas nian plegadas de naixer.

Una liebre europea (Lepus europaeus).

Anque en Aragón no se troba sique dos de as numerosas especies descritas en o chenero Lepus; Lepus europaeus y Lepus granatensis, a denominación puet aplicar-se tamién a belatros mamiferos de caracteristicas semellants.

Zoonimia

En o dominio lingüistico de l'aragonés o zoonimo liebre (pronunciada /'ljebɾe/~/'ljæbɾe/) ye a mas extendida cheograficament, en resultando propia de as zonas dialectals occidental y central. A dintro de a zona tradicionalment considerada central se troba, curiosament, una forma particular con conservación d'a consonant xorda d'o latín, P, documantada en as vals de Broto y de Vio, en a comarca de Sobrarbe: liepre (pronunciada /'ljæpɾe/~/'ljapɾe/), que s'ha documentau exclusivament en Torla en a primera d'as dos vals, y en Vio, en Buerba, en Fanlo y en Sercué en a segunda.

A parola «llebre» (/'ʎebɾe/), por contra, ye mas propia d'a zona dialectal oriental, en estando a sola forma propia conoixida en a comarca de Ribagorza, y forma que coexiste con «liebre» en buena cosa de Sobrarbe, mas que mas en as zonas de a cuenca directa d'o río Cinca en ixa comarca. «Llebre» ye, ademés, a forma propia en a val de Chistau.

Se veiga tamién

• Conillo
• Cachapo
• Lagomorpha
• Rodentia

Referencias

• Datos: Q46076
• Multimedia: Lepus / Q46076
• Especies: Lepus