Cicadidae
| Cicadidae | |
|---|---|
 | |
| Denominacions populars | |
Ferfez, fefez, afefez, ferfers, ferfetas, cicalas, cicallas, cigalas, chorchez, sant-chorchez
| |
| Clasificación cientifica | |
| Eukaryota | |
| Animalia | |
Filo:
|
Arthropoda |
| Insecta | |
| Hemiptera | |
| Auchenorrhyncha | |
| Cicadoidea | |
| Cicadidae | |
| Descripción | |
Cicadidae
Westwood, 1840 | |
Os cicadidos (cientificament Cicadidae -en latín-), conoixius popularment como ferfez u fefez, son una familia d'insectos hemipteros de costumbres fitofagos que parasitan a cualques especies d'árbols y son especialment conoixius por o suyo canto nupcial, extraordinariament sonoro.
As nimfas tienen vida soterrania y s'alimentan zurrupando a sapia de as venas de bels árbols y arbustos. Os adultos son alaigos (tienen alas) y voladors, y tienen una vida curta concentrada en os meses de mas calor de l'anyo. A vida como imagos se centra en as fayenas propias d'a reproducción, como executar a parada nupcial, copular y morir.
Descripción
editarA mayoría d'especies de cicadidos tienen midas que bailen entre os 25 y os 65 milimetros de largaria corporal, con alas membranosas muit grans en os imagos (adultos), d'entre as cuals as dos primeras son muito mas grans que as segundas, que tansament se veyen debaixo d'aquellas.
Como toz os hemipteros, os cicadidos tienen un aparello bucal adaptau a la succión que se conoix como estilet y que s'ha formau, evolutivament, por a fusión d'as piezas bucals d'as mandiblas y as maxilas. O fan servir ta punchar a crosta d'as plantas y penetrar dica o crostero, d'a on que zorrupan a sapia con a cual s'alimentan.
As patas debanteras son mas prominents y robustas que as zagueras, residuo vestichial d'a vida soterrania y excavadera que fan as nimfas.
A caracteristica probablement mas notoria d'os cicadidos ye o suyo canto nupcial. Os masclos producen un fuerte soniu d'estridulación con uns organs especials d'o primer segmento de l'abdomen, que consisten en unas membranas quitinosas que se conoix como «timbals» y uns saquez aerios subchacents que fan de caixa de resonancia. Cada especie de cicadido tiene un canto especifico.
Zoonimia
editarAs denominacions mas frecuents y corrients en Aragón son as que se relaciona con «ferfet», «fefet» y a suya familia lexica. «Ferfet» s'ha documentau en as comarcas de Ribagorza, Sobrarbe, Semontano de Balbastro, Plana de Uesca y en Cinco Villas, o que virtualment significa a mayor parte de l'Alto Aragón y en cuasi todas as comarcas a on se charra l'aragonés u se charraba dica no fa guaire tiempos. Asinas, s'ha trobau en municipios tan dispersos d'entre si como Capella, Boltanya, a Buerda,[1] a Espunya, a ciudat de Balbastro, Valpalmas, Exeya d'os Caballers, Sadaba y Uncastiello.[2] Rafel Vidaller documenta, a demás, a variant «ferfer» en Boltanya,[2] y «fetfet» en Tamarit de Litera,[2] ista zaguera ya en a zona a on que se charra o catalán d'Aragón.
Una forma femenina d'ista mesma parola, «ferfeta», se documenta en Salas Altas, en Radiquero y en Abiego, todas tres en o Semontano sobrarbenco, parte nort-occidental d'o Semontano de Balbastro.[2]
A forma «fefet» se conoix en Esdolomada, en Torres y en a villa de Graus en a Baixa Ribagorza, en Benás en l'Alta Ribagorza aragonesa, y en Ontinyena y Alcoleya de Cinca en a Cinca Baixa,[2] o cual dbuixa una distribución prou aparentment oriental d'ista variant. Una variant homologa d'ista pero con una a protetica («afefet»[2]) s'ha documentau en a villa de Fonz y en Capella, nuevament as dos en a zona mas oriental d'a provincia de Uesca.
Os derivaus d'o latín <CICADA, por contra, son muito menos abundants en aragonés que en a resta de luengas vicinas. S'ha documentau «cicala» en Uncastiello (Cinco Villas) y en Plan (val de Chistau, Sobrarbe).[2] «Cicalla» se conoix en Echo (val d'Echo, Chacetania) y una variant sonorizadera de a primera, «cigala», que s'ha documentau en Cinco Villas.[2]
Referencias
editar- ↑ (es) Mariano Coronas Cabrero: Vocabulario aragonés de Labuerda-A Buerda (Sobrarbe), Xordica Editorial, Zaragoza, 2007. ISBN 978-84-96457-23-2.
- ↑ 2,0 2,1 2,2 2,3 2,4 2,5 2,6 2,7 (an) Rafel Vidaller Tricas: Libro de As Matas y Os Animals; Dizionario aragonés d'espezies animals y bechetals, Editorial Val d'Onsera, Zaragoza, 2007. ISBN 978-84-8986-235-7.
Vinclos externos
editar
Wikispecies tiene un articlo sobre Cicadidae.
Se veigan as imáchens de Commons sobre Cicadidae.
| Subfamilias d'a familia Cicadidae | |
|---|---|
| Cicadettinae | Cicadinae | Tettigomyiinae | Tibicininae | Derotettiginae |
