Fagus sylvatica

Fabo
Selva de faus
Clasificación scientifica
Dominio: Eukaryota Reino: Plantae División: Magnoliophyta Clase: Magnoliopsida Orden: Fagales Familia: Fagaceae Chenero: Fagus Especie: F. sylvatica
Nombre binomial
Fagus sylvatica

O fabo, fau u fayo (Fagus sylvatica) ye un árbol caducifolio d'a familia d'as fagacias.

A especie europea d'o fabo ye a Fagus sylvatica, anque existen fabos propios d'altros continens:

• Fagus crenata.
• Fagus engleriana.
• Fagus grandifolia.
• Fagus japonica.
• Fagus orientalis.

Caracteristicas

Ye un árbol gran, d'entre 25 y 35 metros d'altaria y 1,5 m de diametro troncal, anque puede sobrepasar altarias de 40 m y diametros troncals de 3 m. Vive d'uns 150 a 200 años, podendo plegar ta os 300.

O suyo tronco gosa d'estar recto, largo y d'un griso blanquinyoso, anque en condicions aislatas tamién puede estar curto y de ramache largo, ubierto y preto.

As fuellas, per un regular, son alternas en os tallos chóvens, de coda curta y limbo ovalato con canto ondulato. Os niervos laterals son bien marcatos y paralelos (penninervia), d'una color verda bien intensa per a cara, tornando-sen más escuros con os anyos, siempre en posición horizontal ta recullir a más gran cantidat de luz posible.

Ye una planta monoica. As flors masculinas que chita ban acollatas en inflorescencias globosas a lo remate d'un largo pedunclo. As femeninas las chita en grupos d'una a tres, rarament quatre, sobre un pedunclo curto y erecto, en primeras de color amarillenca y dimpués grisenca, y producen en fecundar-sen uns lulos alargatos y comestibles, con sabor de pipa de chirasol, clamatos fabetas u fayetas.

Fabeta.

Fagus sylvatica

Habitat

L'habitat natural d'o fabo abraca dende o sud de Suecia dica lo centro d'Italia, y dende lo norte de Portugal per l'ueste dica lo nordueste de Turquía per l'este, an ya da paso ta o Fagus orientalis (fabo oriental). En l'aria mediterrania, o fabo se troba en as selvas d'os monts, a una altaria d'entre 600 e 1.800 m.

O fabo habita a temperaturas diferents, anque cal que siga en puestos d'humedat contina.

Usos

O fabo fa honra como árbol de guambra ta espacios grans, como parques y chardins.

A suya fusta, tamién apreciata perque se treballa facilment, la emplegan ebanistas y torniadors. Ye útil devez ta procesos de destilación.

Chardinería

F. sylvatica 'Atropurpurea' (Fabo porpra)

O fabo ye bien apreciato como árbol ornamental.

Tolera los hibiernos fridos pero ye sensible a las rosadas de primavera.

Variedatz

O Fagus sylvatica conta con muitas variedatz ornamentals, d'entre as quals:

• F. sylvatica 'Atropurpurea', de fuellas d'un royo escuro;
• F. sylvatica 'Laciniata' u 'Heterophylla' , de fuellas estreitas y sarratas;
• F. sylvatica 'Fastigiata', con o ramache en pilars estreitos;
• F. sylvatica 'Pendula', con o ramache que pincha.

Fitonimia

Os fitonimos d'esta especie derivan d'o latín FAGUS y en l'Alto Aragón presentan chenero masculín: fayo, fabo, fau. A forma fau puet tener relación con a forma occitana cheneral fau y a forma occitana gascona hau. A forma fayo ye a que debió tener extensión historica més gran, y talment explique o toponimo Los Fayos a man de Tarazona. Manimemos en romanz navarro y en o peache de Tarazona d'o sieglo XV l'árbol s'escribiba Faya con chenero femenín como en castellán.

Curiosidatz

Os fabos gosan d'estar os árbols d'as selvas que apareixen en muitas d'as falordietas de fadas.

Fabars u Fayars conoixitos son, entre d'altros, a Selva de Fabos que se troba entre Candanchú y la Val d'Aspa, o Fabar de l'Estreito en Ordesa, la Faiada de Malpàs en la Alta Ribagorza oriental u la Fageda d'en Jordà, en la Garrocha a man d'Olot.

Vinclos externos

• Se veigan as imáchens de Commons sobre o fabo.
• Wikispecies tiene un articlo sobre Fabo.