Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Burro / Somero
Burro
Equus asinus, o somero domestico.
Estato de conservación

Domestica.
Dominio: Eukaryota
Reino: Animalia
Filo: Chordata
Clase: Mammalia
Orden: Perissodactyla
Familia: Equidae
Chenero: Equus
Especie: E. asinus
Equus asinus
Linnaeus, 1758

O burro u somero[1] / somer (Equus asinus (L., 1758)) ye un mamifero domestico d'a familia d'os équidos, mes chicot y con orellas mes luengas que no os caballos. Se diz pollín de l'animal chóven, emplegando-se lo termin guarán ta os mastos sementals.

Hibridación con altros equidos editar

 
En l'Alto Aragón como en tot o territorio pirenenco os burros de pelo fusco yeran predominants.

Un guarán puede cobrir fembras d'altras especies emparentatas, como una yeugua, y dar potrez hibridos viables (anque estérils). O entrecruz d'un guarán con una yeugua s'ha feito clasicament ta librar mulas (bartos u mastos cuan son masclos) que son animals muit fuertes, resistents y dócils, razón per a cual s'aconsideran animals particularment valiosos ta carreyar pesos en distancias luengas, sobre tot en terrenos de montanya u deserticos. Os mulez naixitos d'una somera cobierta con un caballo son mes chicoz y febles, por ixo se mira siempre de fer o entrecruz per a vía inversa.

Anque muito menos comuns, tamién se son aconseguitos bels ibridos de burro domestico y diversas especies de cebra, conoixitos en anglés como "zeedonks", que podría traducir-se como «ceburros». Como toz os hibridos d'equidos diferents, os hibridos d'o somer son esterils perque tota as especies d'o chenero Equus tienen numeros diferents de cromosomas, que resultan inaparellables en os hibridos. Os caballos en tienen 64 y os someros 62, producindo-se asinas hibridos (as mulas e mastos) que no en tienen si que 63, y en tenendo lo numer impar no pueden fer a segregación meyotica d'os suyos gametos y remanen esterils.

Esiste una especie (con diversas subespecies) de somers salvaches en as estepas d'Asia, ditos onagres u hemions, Equus hemionus. Una altra especie de somer que ye salvache en Africa ye l'Equus africanus, en o qui cualques investigadors son quiesto veyer o antipasau d'o somer domestico.

Utilidat economica editar

Dende las orichens d'a historia, os somers s'han feito servir en Europa y Asia mes occidental ta porteyar cargas, estibar carros y carreyar personas. Anque no son de luent tan rapedos como os caballos, son animals mes lonchevos, o mantenimiento suyo ye menos costoso y tienen gran resistencia y achilidat cuan que os camins son deficils. Encara en l'actualidat son animals d'una gran importancia economica en países en vías de desarrollo.

Os pollins tienen una gran reputación d'estar capezutos, pero ixo se debe a la malinterpretación de belas personas sobre o suyo sentito de l'autopreservación. Ye muito deficil de forzar un somero a fer bella cosa cuan este vei que no bi n'ha de sacar treslato. Modernament, han proliferato os estudios sobre lo suyo comportamiento, anque encara son prou lemitatos. Os somers pareix que son animals aprevenitos, amigables y enchugarditos, y prou mes intelichents que no se'n heba considerato tradicionalment. Manimenos, en que s'ha ganato a suya confianza pueden estar buenos companyers de treballo y recreyo. Ante parte, se los conserva en bels países occidentals como animals de grancha y como mascotas cuan que lo suyo emplego como bestias de carga ya ye desapareixito. Tamién son bestias populars en puestos toristicos y de recreyo ta paseyar os ninos.

Aspectos historicos editar

  • O burro estió lo simbolo d'o dios echipciano Ra.
  • O burro estió lo simbolo d'o dios griego Dionisio.
  • O somero amaneix repetidament en a Biblia ebrea.
  • En l'Antiga Roma, o somero yera l'animal vinclato con Príapo, y a él s'ofreixeban somers en sacrificio perque diz que ixe dios en heba habito de matar uno en o suyo viache enta las Indias chunto con Baco per haber gosato desputar-le lo premio d'a fuerza.

Ditos y mazadas editar

  • «ande u no ande, o burro grande»
  • «fa bien a burros y te pagarán a calzs»
  • «dimpués de enterrar o burro, pastura y hordio»
  • «o burred de Vicented que s'acocha por cargale un papeled»[2]
  • «en do manda l'amo s'ata o burro»[3]
  • «menos mal, que s'ha perdido a burra, pero ha amanecido o ramal»[4]

Imáchens editar

Se veiga tamién editar

Referencias editar

  1. (an)/(es) Juan Moneva y Puyol: Vocabulario de Aragón. Edición y estudio de José Luis Aliaga, Xordica Editorial, ISBN 978-84-88920-97-3, 2004, p.424
  2. (es) Pedro Arnal Cavero: Refranes, Dichos, Mazadas... En El Somontano Y Montaña Oscense, Prames, 2013, ISBN 978-8483213957, p.152
  3. (an) Chusé Antón Santamaría Loriente: Chiqueta comparanza de paremias oczitanas, franzesas e aragonesas, Fuellas 228-229, Consello d'a Fabla Aragonesa, 2015, ISSN 1132-8453, pp. 17-19.
  4. (an) Fernando Sánchez Pitarch, Guillermo Tomás Faci: Replega de tradizión oral agüerana, Luenga & Fablas 10, Consello d'a Fabla Aragonesa, 2006, ISSN 1137-8328, pp. 33-61.

Vinclos externos editar