Abrir menú principal
Cicadidae
Cicadidae - Cicada orni-2.JPG
Ferfet de a especie Cicada orni.
Denominacions populars
Ferfetz, fefetz, afefetz, ferfers, ferfetas, cicalas, cicallas, cigalas, chorchetz, sant-chorchetz
Clasificación scientifica
Dominio:
Eukaryota
Reino:
Animalia
Filo:
Arthropoda
Clase:
Insecta
Orden:
Hemiptera
Suborden:
Auchenorrhyncha
Superfamilia:
Cicadoidea
Familia:
Cicadidae
Descripción
Cicadidae
WESTWOOD, 1840

Os cicadidos (scientificament Cicadidae -en latín-), conoixius popularment como ferfetz u fefetz, son una familia d'insectos hemipteros de costumbres fitofagos que parasitan a qualques especies d'árbols y son especialment conoixius por a suya canta nupcial, extraordinariament sonora.

As nimfas tienen vida soterrania y s'alimentan zurrupando a sapia de as venas de bells árbols y arbustos. Os adultos son alaigos (tienen alas) y voladors, y tienen una vida curta concentrada en os meses de mas calor de l'anyo. A vida como imagos se centra en as fayenas propias d'a reproducción, como executar a parada nupcial, copular y morir.

Contenius

DescripciónEditar

A mayoría d'especies de cicadidos tienen midas que bailen d'entre os 25 y os 65 milimetros de largaria corporal, con alas mimbranosas muit grans en os imagos (adultos), d'entre as quals as dos primeras son muito mas grans que as segundas, que tansament se veyen debaixo d'aquellas.

Como totz os hemipteros, os cicadidos tienen un aparello bucal adaptau a la succión que se conoix como estilet y que s'ha formau, evolutivament, por a fusión d'as piezas bucals d'as mandiblas y as maxilas. O fan servir ta punchar a crosta d'as plantas y penetrar dica o crostero, d'a on que zorrupan a sapia con a qual s'alimentan.

As patas debanteras son mas prominents y robustas que as zagueras, residuo vestichial d'a vida soterrania y excavadera que fan as nimfas.

A caracteristica probablement mas notoria d'os cicadidos ye a suya canta nupcial. Os masclos producen un fuerte soniu d'estridulación con uns organs especials d'o primer segmento de l'abdomen, que consisten en unas mimbranas quitinosas que se conoix como «timbals» y uns saquetz aerios subchacents que fan de caixa de resonancia. Cada especie de cicadido tiene una canta especifica.

ZoonimiaEditar

As denominacions mas freqüents y corrients en Aragón son as que se relaciona con «ferfet», «fefet» y a suya familia lexica. «Ferfet» s'ha documentau en as comarcas d'a Ribagorza, Sobrarbe, Semontano de Balbastro, Plana de Uesca y en as Cinco Villas, o que virtualment significa a mayor parte de l'Alto Aragón y en quasi todas as comarcas a on se charra l'aragonés u se charraba dica no fa guaire tiempos. Asinas, s'ha trobau en municipios tan dispersos d'entre si como Capella, Boltanya, a Buerda,[1] a Espunya, a ciudat de Balbastro, Valpalmas, Exeya d'os Caballers, Sadaba y Uncastiello.[2] Rafel Vidaller documenta, a demás, a variant «ferfer» en Boltanya,[2] y «fetfet» en Tamarit de Litera,[2] ista zaguera ya en a zona a on que se charra o catalán d'Aragón.

Una forma femenina d'ista mesma parola, «ferfeta», se documenta en Salas Altas, en Radiquero y en Abiego, todas tres en o Semontano sobrarbenco, parte nort-occidental d'o Semontano de Balbastro.[2]

A forma «fefet» se conoix en Esdolomada, en Torres y en a villa de Graus en a baixa Ribagorza, en Benás en l'alta Ribagorza aragonesa, y en Ontinyena y Alcoleya de Cinca en a Cinca Baixa,[2] o qual dbuixa una distribución prou aparentment oriental d'ista variant. Una variant homologa d'ista pero con una a proteticaafefet»[2]) s'ha documentau en a villa de Fonz y en Capella, nuevament as dos en a zona mas oriental d'a provincia de Uesca.

Os derivaus d'o latín <CICADA, por contra, son muito menos abundants en aragonés que en a resta de luengas vicinas. S'ha documentau «cicala» en Uncastiello (Cinco Villas) y en Plan (val de Chistau, Sobrarbe).[2] «Cicalla» se conoix en Echo (val d'Echo, Chacetania) y una variant sonorizadera de a primera, «cigala», que s'ha documentau en as Cinco Villas.[2]

ReferenciasEditar

  1. (es) CORONAS CABRERO, Mariano (2007), Vocabulario aragonés de Labuerda-A Buerda (Sobrarbe); Xordica Editorial. Zaragoza. ISBN 978-84-96457-23-2
  2. 2,0 2,1 2,2 2,3 2,4 2,5 2,6 2,7 (an) VIDALLER TRICAS, Rafel (2004), Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza. ISBN 978-84-8986-235-7

Vinclos externosEditar