Muhammad ibn Mardanix
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
_in_the_word_Allah.svg){kind=small}
| Muhammad ibn Mardanix ابن مردنيش | |
|---|---|
| Rei d'a Taifa de Murcia | |
 Posible representación d'o Rei Lobo | |
| 1147 - 1172 | |
| Nombre real | ابن مردنيش |
| Naixencia | 1124 Peniscola |
| Muerte | 1172 Murcia |
Muhammad ibn abd Allab ibn Sad ibn Mardanis (en arabe أبو عبد الله محمد بن سعد بن محمد بن أحمد بن مردنيش الجذامي, Peniscola, 1124 - †Murcia, marzo de 1172), conoixiu por los cristianos como Rei Lop, d'orichen mozarabe, gosó estar rei de tota la zona oriental de l'al-Andalus.
Descendient d'una familia cristiana mozarabe de la val d'Ebro (Mardanis ye l'arabización de Martínez y Ibn Mardanix significa Fillo de Martínez). Esta familia se convirtió a l'Islam convertindo-se en uns muladís que a mas yeran aristocratas. Lo Rei Lop pasó a la historia como simbolo de la resistencia de los musulmans nativos hispanos contra los musulmans berbers, primero independizando-se de los almurabiz, y dimpués luitando contra los almuades. Tamién pasó a la historia de l'Al Andalus como uno de los hombres mes polemicos de lo suyo tiempo, entre atras cosas por lo suyo caracter libertín.
Fraga
editarIbn Mardanix estió lo zaguer gobernador musulmán de Fraga, y n'heba feito una taifa independient aproveitando disputas familiars entre Zaragoza y Leida.[1] Contando con nomás 25 anyos habió de negociar la rendición de la ciudat con Remón Berenguer IV lo Santo lo 24 d'octubre de 1149, conseguindo un tracto de favor para los musulmans que se i quedoron, como lo que podiesen rechir-sen por las suyas propias leis.
Murcia
editarIbn Mardanix succedió a su tío y lo nombroron rei de Murcia. La suya capacidat como estratega li permetió d'esfensar-se en tot inte de los almuades. En tot lo emirato de lo Rei Lop, Murcia consigue un explendor asaber-lo de gran, tanto que la suya moneda (lo Lopín) se converte en referent pa tota Europa. La prosperidat de la ciudat se basó en l'agricultura y, aproveitando lo río Segura, se creyó un complexo rete hidrolochico (zaicas, tuberías, zutes, norias, acueductos), estando la predecesora de l'actual sistema de reganos de la huerta de Segura. L'artesanía tamién yera muit important y de gran prestichio, tanto que la ceramica murciana s'exportaba ta las republicas italianas. A tot esto s'ha d'anyadir que en su etapa d'emirato en Murcia bi heba muitos puestos d'ocio y cultura, considerada alavez como capital d'Al-Andalus. N'ixa epoca amaneix en Murcia lo cautivo de la seda, la fabricación de paper y mesmo una especie de fideus de pasta, ditos "aletría".
Edificó un estau poderoso. Compró la paz a los reis cristianos con tributos, conseguindo largos periodos de paz. Por eixemplo firmó treguas con Remón Berenguer IV por cuatro anyos, renovables por atros cuatro dica 1157, cuan os aragoneses y barceloneses atacan y pierde Alcanyiz. Las paces con lo sobirán d'Aragón y Barcelona se renuevan en 1161. Estos periodos de paz li permetioron ixamplar y enriqueixer lo suyo reino, y con ixo emitir la debant dita moneda.
Extendió lo suyo reino ocupando Albacet, Exatiba, Denya, Chaén, Baza, Ubeda, Guadix, Carmona, Ecicha y Granada, amenazó Cordoba y plegó a asitiar Sevilla.
Por prebar de prener Cordoba, en 1165 los almuades organizan un exercito en Sevilla con berbers venius de lo norte d'Africa y refuerzos peninsulars. Ixe exercito sale ta Murcia y ye lo principio de la fin de Ibn Mardanix, que ya dos anyos enantes no heba puesto prener Granada pa cutio a los almuades.
Lo exercito berber días dimpués derrota a l'exercito de lo Rei Lop y los suyos 13000 cristianos on la Val de lo Guadalentín s'achunta con la ribera murciana. Lo emir se refuchió dezaga las murallas de Murcia con las restas de lo suyo exercito y la población civil, pero la huerta y las luxosas villas de los nobles murcians quedoron en mans de los invasors que las malmetioron y escachoron. Tamién malmetioron la residencia que teneba Mardanix en Mont Agut.
Se crebó l'alianza que bi heba entre Ibn Mardanix y lo suyo suegro, o sinyor de Chaén, y por tanto nuevas campanyas de los murcians y los auyos aliaus pa anexionar-se ixos territorios chienenses que teneban muita importancia economica y estratechica pa defender Murcia.
En 1165, aproveitando l'inte, lo rei Alifonso II lo Casto li ubrió un nuevo frent a las suyas espaldas, abanzando por la cuenca de lo río Blanco y lo río Guadalop (reconquista de lo Matarranya y Teruel capital). Entre 1165 y 1168 os cristianos aragoneses y catalans ocupan ya pa cutio las tierras de lo Matarranya, Algars, y por 70 anyos la muga entre cristianos y musulmans será lo terreno entre la linia Cantaviella-Penya Roya-Ulldecona y las fortalezas musulmanas de Segorb, Moriella y Peniscola. Pa los musulmans andalusís la perduga de lo Baixo Aragón yera ya pa cutio y n'ixa tierra principió una historia con atra relichión, atra chent y atra cultura. En las vals de los ríos Guadalop y Matarranya, recient conquiestos, només en pocos lugars como Calanda i quedó una población musulmana significativa.
En 1170, y en cercustancias no guaire claras, lo sinyor d'Estella Pero Ruíz d'Azagra consiguió de lo rei Lop l'antiga Taifa d'Albarracín, seguntes diz la tesi mes aceptada, comprando-la u recibindo-la en pagas por la aduya suya.
L'exercito almuade tornó en setiembre de 1171. Tamién fracasoron en lo setio de la capital, pero atras poblacions cambioron de bando, pasando-se a los almuades una a una, fendo pareixer que preneban a suya doctrina y fendo fuera a los militars y civils cristianos (mozarabes). Aguardaban rematar con la guerra y la presión fiscal que levaba dende feba muito tiempo. A la fin cuan cuasi no li quedaban aliaus, lo rei Lop morió en marzo de 1172, y los suyos fillos no tardoron en declarar-sen vasallos de los almuades y partidarios de la suya doctrina.
La suya fama estió tan gran que cristianos y musulmans encara lo recordarían muitos anyos dimpués de la suya muerte. En lo reinau de Chaime I d'Aragón, cuan se conquista Valencia, lo gobernador musulmán yera nieto d'Ibn Mardanis y Chaime I li se diriche como tal cuan se firma la capitulación:
Referencias
editar- ↑ (es) Ibn Mardanix protector de los fragatinos. La Voz del Bajo Cinca (2007).
Datos: Q528564
