Berbers en Al-Andalus
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Los berbers estioron presents d'entre periodo andalusí d'a Peninsula Iberica, dende las primeras entradas con Tarik y Muza dica la fin d'o reino Nazarín.
Historia
editarEn o periodo romano y visigodo, los berbers d'o Rif ya feban expedicions de saqueyo en Baetica. La mas gran parte de l'exercito que entró en Hispania y fació desapareixer lo reino visigodo de Toledo yera formau por berbers. Lo fácil d'a victoria y d'a ocupación militar animó a berbers de muito mas luent que lo Rif, y mesmo d'as actuals Libia y Mauritania, a entrar en Al-Andalus.
Los arabes s'establioron en as zonas agricolas ricas (baixo Guadalquivir, Huerta Valenciana), y deixoron a los berbers zonas de meseta y montanyosas, que se pareixeban a lo suyo habitat de l'Atlas y que yeran mas pobres. Cualques berbers defendeban la muga con los cristianos d'o norte y deixoron una marca toponimia que encara existe: Albarracín, Adzaneta, Osella, Favara, Gómara, Mequinenza, Monzalbarba, Titaguas.
Los berbers d'Al-Andalus superaban numericament a los arabes. Seguntes calculos feitos por bel historiador, en los primers decenios d'invasión musulmana los arabes yeran 50.000 y los berbers 150.000 sobre una población de 5 millons d'hispanorromanos y visigodos. La proporción de berbers respecto a los arabes creixió con las invasions almurabitz y almuades. En os primers tiempos d'ocupación musulmana los cristianos diferenciaban entre berbers, a qui diciban moros (de o latín maurus, Mauritania), y los arabes, a qui diciban sarracins u caldeus.
Los nuclios d'establimiento d'os berbers se distribuiban en 5 grupos: lo sud, lo dentro, las marcas u tugur, Levant u Xarc y Balears.
Manimenos con lo tiempo lo termin moro se convertió en sinonimo de musulmán, aplicau pa muladís, arabes y berbers, y mesmo pa musulmans de mas luent. Los arabes asimiloron con lo tiempo linguisticament a los berbers porque la luenga relichiosa yera l'arabe y porque los arabes ya teneban una cultura urbana en arabe presa de modelos romanos orientals y persas.
Los Berbers en o Sud
editarS'establioron berbers en Algarve (Portugal), Niebla (Uelba), Serranía de Ronda (Malaga), y zonas montanyosas de l'actual Cádiz y Sierra Nevada (Granada).
Los berbers establius en o Sud yeran d'o grupo Zanata, como los Banu Birzal de Ecicha, Carmona y Almodóvar del Río, Banu Dammar de Morón y Arcos, Banu Irniyan, Banu Ilyas, Banu Zarwal, Banu l-Jali. Bi heba colonias d'a tribu Aureba por tota la provincia de Chaén y familias Azdaya como los Banu Dulaym y los Banu Saquib en Morón. Tamién bi heba Hawwaras como los Banu Yahwar de Marchena.
Los Berbers en o Centro
editarBi heba berbers en os Pedroches (a lo norte de Cordoba), en Sierra Morena. Yeran posiblement los mes numerosos y los mes influius por lo gubierno de Cordoba. Tamién posiblement estioron entre los que s'arabizoron mas pronto.
Los Berbers en as Marcas
editarLos berbers d'as Marcas yeran guardians permanents d'as mugas con los cristianos y protecheban l'interior d'o país ocupau por los musulmans. Guardaban los castiellos y comunicacions d'o sistema defensivo de muga de l'Al-Andalus.
Berbers d'as Marcas u tugur yeran en Cuenca, Guadalachara, Toledo, la zona d'o Guadiana con Merida, y zonas de mas a norte dica las cuencas d'o Tajo y Mongego con Talavera, Coria, Medellín, Astorga y Coimbra. Estos zaguers comunicaban con atro nuclio en l'Alto Duero y lo Xalón que tamién yeran en contacto con nuclios dispersos en la Marca Superior u val d'Ebro, como los berbers de Monzalbarba. En l'este de Cuenca, Teruel y Zaragoza entran en contacto con los berbers d'o nuclio Levantín (Micnasa en Mequinenza y Hawwara en Favara).
Parte d'o territorio d'as actuals provincias de Cuenca, Teruel, Guadalachara y norte de Toledo se dició Cora de Santavariya u Santaver (pronunciación arabe de Celtiberia), y la suya parte norte teneba mas caracter de muga que atras coras de l'Al-Andalus. Amás gran parte d'os berbers d'as marcas yeran Hawwara y Madyuna, pero tamién i heba Ausacha (en Osella), Malzuza, Ulhasa, Sadina, Madyuna y Mezmut.
Los Berbers en Levant
editarLos berbers levantins yeran en comarcas d'as actuals Murcia, Alicant, Valencia, Castellón, Cuenca, y Teruel. Teneban presencia en o río Xiloca meyo y alto y las vals d'o Guadalaviar, Cabriuel, Millars y Alfambra. Yeran especialment d'orichen Hawwara (dixando toponimos tipo Favara), y Madyuna, con presencia de Zenachas y Zenatas en o levant meridional (deixando toponimos como Senija, Adzaneta y Oliva). En Alicant se documenta los Banu l-Jarrubi. En Alpuent yeran presents los Banu Dasim d'o grupo Kutama. En Teruel y Villel yeran emirs los Banu Amira y los Banu Gazlun, que perteneixeban a la tribu Ulhasa, branca d'os Nafzawa.
Los Berbers en as Balears
editarEn as Balears se crei que i habió clans y familias Gomara, Matgara, Hawwara, Masmuda, Zanata, Sadina, Malila, Nafzawa, Taskura y Masufa. Los Banu Ganiya, que yeran representants d'os Almurabitz, en o gubierno d'as islas yeran masufas.
Datos: Q25619749
