Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.
Columba oenas
Sisella
Sisella (Columba oenas)
Denominacions populars
Sisella, sisalleta, zorina, palomo de mont, palomo furo, palomo montesino [1]
Estau de conservación

Seguro (IUCN)
Clasificación cientifica
Eukaryota
Animalia
Chordata
Aves
Columbiformes
Columbidae
Columbinae
Columba
C. oenas
Descripción
Columba oenas
L., 1758

A sisella[2] (d'o basco < uso "paloma")[3] (Nombre cientifico: Columba oenas (Linnaeus, 1758)) ye una especie de paloma salvache d'o chenero Columba y a familia Columbidae, propia d'Europa y Asia.

Descripción

editar

Anque fa recordar muito a os palomos domesticos, tiene o cuerpo subtilment mas fino, y con a color grisa d'o plumache uniforme, sin as dos caracteristicas faixas negras d'os palomos comuns. As alas, en volido, se veyen grisas por debaixo, a la contra de como pasa con belatras palomas que as i tienen mas claras.

Os iris d'os uellos son caracteristicament negros, sin l'aniello de color amariella u narancha que tienen os torcazos y os palomos comuns.

Hábitat

editar

As sisellas viven en as selvas de caducifolios, a on que fan o niedo en os foratos d'árbols viellos.[4]

En Aragón ye una especie poco frecuent en l'actualidat, anque en buena cosa d'o territorio se guarda alcordanza de que enantes se cazaba. Ye una especie mas destribuida por a Europa atlantica y central, anque en ixas latituz ye un au migradera que marcha ta'l sud en hibierno.[4]

Imáchens

editar

Nombres

editar

D'alcuerdo con o naturalista y lexicografo Rafel Vidaller, sisella ye o nombre mas frecuent y destribuido ta iste animal por a metat oriental de l'Alto Aragón, documentau en localidaz de Litera, o Semontano de Balbastro, a Ribagorza y o Sobrarbe por él y por diferents autors.[2] Manimenos, en o suyo «Dizionario aragonés d'espezies animals y bechetals» no i amaneix garra referencia de que s'haiga documentau un nombre ta ista especie en garra población de l'Alto Galligo, a Chacetania nian a Plana de Uesca.[2]

Chabier Tomás documentó tamién a forma deminutiva sisalleta[2][5] en o Viello Sobrarbe, en a segunda metat d'os anyos 1990, y en l'Aves de Aragón. Atlas de especies nidificantes, expublicau por IberCaja en 1998, i amaneix unatra variant atipica, xixella,[2] anque no se'n cita la procedencia.

A novela d'Ánchel Conte O bolito d'as sisellas (Xordica, 2000), ambientada en Planiello en os anyos d'incertidumbre sobre as expropiacions ta que fesen o pantano de Chanovas, incluye una alusión metaforica a iste animal en o titol.

Referencias

editar
  1. (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
  2. 2,0 2,1 2,2 2,3 2,4 (an) VIDALLER TRICAS, Rafel, Libro de As Matas y Os Animals; Dizionario aragonés d'espezies animals y bechetals; Ed. Val d'Onsera. Zaragoza 2004. ISBN 978-84-89862-35-7
  3. (es) Santiago Bal Palazios:Vocabulario dialectal del habla de Maella (Aragón), Gubierno d'Aragón, 2000, ISBN 84-7753-840-9, p.205
  4. 4,0 4,1 (es) FELIX, Jîrî y TOMAN, Jan; Guía de Campo (3ª Ed.); Ediciones Susaeta. Madrid, 1999. ISBN 84-305-7413-1
  5. (es) TOMÁS ARIAS, Chabier. El aragonés de Biello Sobrarbe. Instituto de Estudios Altoaragoneses. Uesca, 1999. ISBN 84-8127-095-4

Vinclos externos

editar