Belarrusos
| Belarrusos беларусы | |||||||||||||||
|---|---|---|---|---|---|---|---|---|---|---|---|---|---|---|---|
 | |||||||||||||||
 Belarrusia 7,99 millons | |||||||||||||||
| |||||||||||||||
| Belarruso | |||||||||||||||
| Cristiana Ortodoxa | |||||||||||||||
| Pueblos eslavos | |||||||||||||||
 | |||||||||||||||
Os belarrusos[2] (en belarruso беларусы) son os habitants mayoritarios de Belarrusia y tamién habitan como minoría en Rusia, (en a rechión de Smolensk viven os krivichi u jriviche, consideraus Belarrusos), y Polonia. Parlan luengas eslavas orientals: lo ruso como luenga de cultura y lo belarruso que charran tradicionalment. Son de relichión cristiana ortodoxa.
LuengaEditar
O belarruso ye una luenga eslava oriental. En muitos caracters ye intermedio entre o ruso y o polaco. Os textos més antigos en luenga eslava con rasgos belarrusos son d'o sieglo XIII. A zaguers s'o sieglo XV o belarruso ya heba sustituito a lo latín como luenga escrita d'o Gran Ducau de Lituania. Os textos més importants son os codigos churidicos (estatutos lituans) de 1529, 1566 y 1588, amés de traduccions y prefacios d'a Biblia de Francis Skaryna. Manimenos en 1696 o parlamento polaco prenió a decisión de fer d'o polaco a sola luenga oficial en tota a Unión Polaco-Lituana y o belarruso cayó en desuso como luenga escrita.
O renaiximiento d'a luenga belarrusa se produció a primers d'o sieglo XIX como resultau d'investigacions folkloricas en tierras d'a Unión Polaco-Lituana absorbidas por l'Imperio Ruso, investigacions que quereban demostrar a identidat rusa u polaca d'a población local. L'acumulación d'ixos datos etnograficos, folkloricos y linguisticos conducioron a la conclusión que os belarrusos son un pueblo eslavo diferenciau.
Con a publicación d'os periodicos Nasha Dola y Nasha Niva dende 1905 y l'aparición d'os primers escritors destacaus Kupalas, Kolas y Ahdanovich, se fixó una luenga standard. En a primera guerra mundial os ocupants alemans permitioron l'uso d'esta luenga y que s'ubrisen escuelas belarrusas. Dende 1918 amaneixioron dos normas, a d'os bielorrusos de Polonia que teneban como centro intelectural Vilna y a d'os belarrusos d'a URSS, (con a gramatica de Taraxkyevich u Taraxkevitsa como standard). O belarruso sovietico desembolicó un os anyos 20 una terminolochía d'administración, de fuerzas armadas y sciencias, pero en o decenio de 1930 Stalin esclafó con una fura represión a vida intelectual belarrusa, ordenó una reforma ortografica en 1933 y unos cambios gramaticals enfilaus a amanar a luenga escrita a lo ruso. Os alemans permitioron periodicos en belarruso y escuelas en belarruso, pero os profesors yeran obchecto de represalias por parte d'os partisans.
Dimpués d'a segunda guerra mundial cada vegada i heba menos escuelas que fesen servir o belarruso. As autoridatz sovieticas ixemenaban a ideya que o belarruso yera dialecto rechional inferior y que a luenga d'alta cultura yera o ruso, muita chent deixó de charrar belarruso. Amés, charrar belarruso representaba o periglo d'estar acusau de nacionalista burgués. Manimenos dende os anyos setanta bell intelectual ha encomenzau a defender o belarruso y bi ha una nueva cheneración d'escritors.
O belarruso yera a sola luenga oficial d'a Belarus d'os primers anyos d'independencia, encara que i heba presions pa fer d'o ruso una segunda luenga oficial. O dictador postsovietico de Belarrusia yera pro-ruso y yera en contra d'o belarruso.
O belarruso s'escribe en alfabeto cirilico con dos normas, una anterior a 1933 (entre os emigraus y entre bell chóven de Belarrusia) y posterior a 1933. Tamién existe un sistema alfabetico con caracters latinos, y os tartres de Belarrusia fan servir a grafía arabe.
RelichiónEditar
Os belarrusos gosan estar cristians ortodoxos, y a ilesia ortodoxa de Belarrusia ye administrada por o patriarcau de Moscú. Bi ha una ilesia ortodoxa autocefala en a diaspora.
Os belarrusos ortodoxos yeran clasificaus como rusos y os belarrusos catolicos como polacos. A hierarquía catolica polaca administra a Ilesia Catolica de Belarrusia y no li fa goyo de considerar que i haiga belarrusos catolicos, manimenos os habitants de Belarrusia que alegan estar polacos son unos 300.000 mientres que os catolicos plegan a los 2.000.000.
Qualques belarrusos han encomenzau a recuperar a Ilesia Greco-Catolica u Uniata dende fa pocos anyos. En o decenio de 1990 encara no bi ha una traducción completa y consensuada d'a Biblia en belarruso.
Bi ha comunidatz de viellos creyents en bella zona de Belarrusia, a més grant en Vyetka, cerca de Homyel, en 1913 yeran 98.000 individuos, y muitos d'ellos se consideran de nacionalidat belarrusa.
Bi ha supervivencias de celebracions y costumbres paganas d'o politeísmo eslavo en o medio rural: como o kupally u solsticio de verano y Dzyady, cerimonia ritual con platos especials en recuerdo d'os antipasaus, o día d'os difuntos.
HistoriaEditar
O estau de Kiev esclata en o sieglo XII en unos quantos principaus sozmesos por os mongols en 1239. Os sobirans lituans consiguen refusar a los mongols y liberar a los eslavos orientals de Belarrusia d'o poder mongol. Os principes eslavos orientals prefieren estar en a subchección d'os lituans que en a d'os mongols, y os eslavos orientals s'asocian con o pueblo lituán primero, y tamién con o pueblo polaco dende 1386 formando a Unión Polaco-Lituana.
Os rutens en a Unión polaco-lituanaEditar
A unión Polaco-Lituana estió en luita contra os teutons (vencius en 1410), os tartres u os turcos. Os eslavos orientals que quedan dentro d'a Unión Polaco-Lituana son denominaus rutens y son os antipasaus d'os actuals belarrusos y ucraineses. Os rutens charran una luenga encara cerca d'o protoeslavo y que ye oficial en o Ducau de Lituania dica 1696. Dende o sieglo XVI una parte d'a nobleza rutena prene a luenga polaca y se convierte a lo catolicismo u a lo calvinismo.
Os belarrusos actuals representan os rutens que yeran més en contacto con os lituans y os ucraineses os rutens que yeran més en contacto con os polacos, sobretot quan poco antes d'a Unión de Lublin (1569) os rutens d'o sud pasoron a depender de Polonia, quedando os rutens d'o norte en Lituania dentro d'a Republica d'as Dos Nacions. Os rutens de Smolensk quedoron pronto baixo a sobiranía de l'Imperio Ruso y son consideraus por beluns como belarrusos.
En 1596 se celebra o Sinodo de Brest en o que una asembleya de rutens fidels y clerigos d'a relichión ortodoxa restablix a comunión con Roma conservando o rito bizantín, con o que naixe a Ilesia Uniata, que no conseguirá aplegar a totz os rutens, car muitos preferirán seguir estando en a subchección d'un metropolitán de Kiev independient de Roma.
Os repartos de PoloniaEditar
En os repartos d'a Republica d'as Dos Nacions, os territorios habitaus por rutens d'o norte esdevienen part de l'Imperio Ruso principalment en tres etapas:
- En 1772 Polotsk, Vitebsk, Moguilev y Gomel.
- En 1793 Minsk, Bobruisk y Pinsk.
- En 1795 Grodno, Novogrudok y Brest-Litovsk.
En l'Imperio Ruso os territorios belarrusos son denominaus Rusia Occidental, y a Ilesia Greco-Catolica queda ligada autoritariament y por a fuerza a la Ilesia ortodoxa en 1839.
Os etnografos por ixe tiempo investigaban as tradicions d'os belarrusos.
Bielorrusia como entredito entre Lituania, Polonia y a URSSEditar
Quan dimpués d'a Revolución d'Octubre as potencias centrals ocupan amplos territorios en o frent oriental, negocian con o nuevo gobierno ucranián y reconoixen un Estau lituán a lo que conceden Grodno, Bialystok y Brest-Litovsk. Manimenos o 25 de marzo de 1918 se problamó a republica nacional de Belarrusia sin garra eco. Os polacos dende 1919 preboron de recuperar as mugas de 1772, extendendo a sobiranía polaca por os países rutens que enantes yeran d'a Unión Polaco-Lituana u d'a Republica d'as Dos Nacions. L'exercito polaco topetó cn l'Exercito Royo y lo fació reblar, encomenzando a guerra polaco-sovietica. A guerra polaco-sovietica conduce en 1920 a que o territorio d'os Belarrusos quede dividiu en dos entre Polonia y a URSS por una muga a l'este de Minsk, ratificada por o tractau de Riga o 18 de marzo de 1921. Os belarrusos serán a mayor part d'a población d'as rechions de Volinia y Vilna en a Polonia independient.
Periodo d'entreguerrasEditar
O renaiximiento cultural belarruso se produce en o decenio de 1920 en o costau sovietico d'a muga. A Republica Socialista Sovietica de Belarrusia, fundada o 1 de chinero de 1919 arredol de Minsk y Bobruisk será una republica constitutiba d'a URSS o 30 d'aviento de 1922 con Rusia, Ucraína y Trascaucasia. Entre 1924 y 1926 s'exampla con Polotsk, Vitevsk, Moguilov y Gomel. Queda una muga fixada entre Rusia y Belarrusia corresponde a la muga entre Rusia y Polonia antes de 1772. A luenga belarrusa encomienza a estar normalizada y s'esviella socialment. Se prene como modelo una d'as parlas locals tradicionals pa esdevenir luenga oficial y muitos belarrusos la han d'aprender en a escuela. Por un tiempo se fa oficial a luenga belarrusa y se creya una elite intelectual belarrusa, pero o Stalinismo reprimirá estas expresions y diezmará a clase intelectual.
Belarrusia dende 1939 dica 1991Editar
O Pacto chermano-sovietico de 1939 permite a los sovieticos ocupar a metat occidental de Belarrusia, baixo poder polaco y que l'anterior Polonia quede dividida entre o III Reich y a URSS. Bielorrusia se reunifica,con o paso d'as rechions de Vilna y Volinia t'a RSS de Belarrusia. L'exercito royo fa limpiezas etnicas de población polaca y muitos polacos son deportaus ta Cazaquistán. En 1941 os alemans atacan a la Unión Sovietica y ocupan Belarrusia. S'organiza una resistencia partisana que se mantién dica a contraofensiva sovietica de 1944. En as selvas bi ha una resistencia de partisans que son hostils a la ideya d'una identidat belarrusa, y matan a los mayestros que amuestran a luenga belarrusa. Os Einsatzgruppen eliminan a población chodiga en a retaguardia d'as linias alemanas. En 1944 l'exercito royo recupera Belarrusia.
En 1945 se creya una nueva muga con Polonia basada en a linia Curzon, considerada dende 1919 como muga etnica, encara que no lo veigan asinas os polacos. A Bielorrusia d'a postguerra teneba un menisterio d'Afers Esteriors teoricament diferent d'a URSS, y Bielorrusia fa part o mesmo que Ucraína d'os fundadors d'a ONU, pero o país dependeba en realidat d'a URSS de tot. A presión politica y cultural rusa ye muito fuerte, y por eixemplo a mitat d'o decenio de 1980 no i heba garra escuela en Minsk que amostrase Bielorruso. A zaguers d'este decenio amanixió o Frent Popular Belarruso. Belarrusia estió o país més perchudicau por o desastre nucleyar de Chernobil de 1986.
Belarrusia independientEditar
A independencia de Bielorrusia ye més resultau d'as circustancias que d'a voluntat nacional d'un pueblo que deseye a independencia. Lo que quereban més os bielorrusos yera una renovación politica d'a unión de republicas, un cambio politico con fin d'a hechemonía politica d'o Partiu Comunista, unas esleccions libres y reparacions por o desastre de Chernobil. A independencia de Belarrusia plega por as circustancias, quan diferents republicas socialistas sovieticas van declarando a independencia y se descompone a URSS.
O golpe militar d'agosto de 1991 en Rusia significó a fin d'a URSS, y o 8 d'aviento de 1991 os presidents de Rusia, Bielorrusia y Ucraína (as republicas eslavas), firmoron a fin d'a URSS y a formación d'a CEI (Comunidat d'Estaus Independients). Dende ixe inte Belarrusia ha teniu buenas relacions con Rusia.
En setiembre de 1991 a republica prenió o nombre de Belarus en cuenta de Belorosija. Staniskav Chchkevitch esdevinió chefe d'Estau de facto, pero fue destituito y reemplazau en chinero de 1994 por Mietchislav Grib.
ReferenciasEditar
- ↑ (es) Nacidos en el extranjero, residentes en Aragón en 2021. Instituto Aragonés de Estadística
- ↑ (an) Diccionario ortografico de l'aragonés (Seguntes la Propuesta Ortografica de l'EFA). Versión preliminar. Estudio de Filología Aragonesa. ISSN 1988-8139. Octubre de 2022.
BibliografíaEditar
- (es) André Sellier, Jean Sellier: Atlas de los pueblos de Europa Central. Acento editorial.
- (es) Felipe Fernández-Armesto: Los hijos de Zeus. Pueblos, etnias y culturas de Europa. 1996 Grijalbo.