Pacharán

Un u más biquipedistas son treballando actualment enamplando iste articlo.

Puede estar que, por ixo, bi haiga lagunas de conteniu u deficiencias de formato. Por favor, antis de realizar correccions mayors u reescrituras, contacte con éls en a suya pachina d'usuario u a pachina de discusión de l'articlo ta poder coordinar-ne la redacción.

Pacharán
Vaso y botella de pacharán, con os suyos aranyons maceraus.
Orichen cheografico
Cocina:	Gastronomía d'Aragón Gastronomía de Navarra
Orichen:	Aragón Navarra
Se bebe en:	Aragón Navarra
Categoría:	Bebida alcolica
Elaboración
Ingredients:	Aranyons, alcol anisau
Sabor:	anisau
Color:	roya fosca
Preparación:	Maceración

O pacharán (d'o basco patxaran,^[1] de pattar, auguardent, y aran, aranyón) ye un licor d'entre 25 y 30 graus d'alcol obteniu por a maceración d'os aranyons en un auguardent anisau, atorgando-li a lo licor resultant a suya color royenca y lo suyo sabor. Se tracta d'una bebida alcolica tradicionalment elaborada en o Perineu y los suyos semontanos en Navarra y Aragón a on se troba l'arbusto Prunus spinosa d'o cual provienen os aranyons como fruito u lulo.

Encara que conoixiu dende fa sieclos en ixas redoladas, dende primerías d'o sieglo XX escomencipió la suya elaboración como un proceso industrial, concentrando-se dende alavez ixa elaboración industrial en Navarra, fendo que popularment se considere que se tracta d'una bebida d'orichen exlusivament navarro. De feito, ta asegurar a producción regular d'aranyons ta la suya industria, en Navarra dende los anyos 1990 prencipió un proceso de cultivo de l'arbusto, que ye un arbusto que creixe en as selvas de l'arredol y que dica alabez yera la sola fuent d'aranyons, amenistando-se asobén importar aranyons d'atros puestos d'Europa ta guaranciar a producción de pacharán.

D'atra man, en as elaboracions caseras se gosa adhibir bels atros elementos a la maceración, como gabardons, granos de café y mesmo bel sinyalín de belatra fruita, ta modificar lucherament a sabor d'o licor resultant.

Con a suya producción industrial s'estendilló lo suyo consumo fuera d'as suyas rechions d'orichen, mas que mas en atras rechions amanadas d'Espanya como La Rioja u lo País Basco, pero tamién en bel departamento francés amanau a la muga con Navarra. Ta guaranciar a calidat en a producción, en 1988 se creyó un Consello Regulador d'o Pacharán Navarro, que controla a las empresas acullidas a la Indicación Cheografica Protechida Pacharán Navarro.

Orichinalment o suyo consumo se feba a temperatura ambient en copa y sin chelo, pero dende fa bels anyos en aumentar a suya popularidat ha prencipiau a consumir-se en vaso luengo con cubitos de chelo.