Turcomans (Orient Meyo)
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Este articlo tracta sobre os turcomans d'Orient Meyo. Ta atros usos d'o etnonimo turcomans adrece-se ta l'articlo Turcomans
Os turcomans son pueblos nomadas turquicos d'a branca oguz que invadioron Asia Central dende l'este enta o sudueste y dimpués trescurzoron as montanyas d'Irán plegando t'Anatolia, Siria y Irak. Os turcomans d'Asia Central se convertioron en turcmenios, os turcomans d'Anatolia Oriental y Azerbaichán contribuyoron a la formación d'os turcos anatolicos y azerins. Encara bi ha comunidaz en Irán, Irak y Siria calificatas de turcomanas, y turcomans en Anatolia en proceso d'asimilación a os turcos (yorucos, carapapakhes).
Historia
editarA migración entra l'ueste d'os turcomans lebó a la fundación en 1055 d'o soldanato selchuquí d'Irán. Cuan os turcomans s'adrezoron t'Anatolia l'Imperio Bizantín reaccionó pero o selchuquí Alp Arslán los esclafó en Menzikert en 1071. Os vencedors yeran de dos tipos, turcomans que buscaban pasturas y gazis u guerrers d'a fe que lebaban tiempo vivindo de saqueyar a muga con os cristianos. Tanto os uns como os atros s'ixemenoron por Anatolia sin ser controlatos por selchuquís u bizantins. Se facioron os duenyos d'as zonas poco poblatas d'Anatolia central; bellas poblacions cristianas fuyoron, atrás se convirtioron a lo Islam y prenioron a luenga turquica.
A invasión mongola d'Orient Meyo en o sieglo XIII empentó nuevas poblacions turcomanas ta Anatolia. A fins d'o sieglo XIII o turcomán Osmán heredó un territorio en a muga con os bizantins, con posibilidaz de fer incursions de saqueyo y atrayó bels partidarios turcomans canalizando las suyas belicosidat y ansia de botín. Os descendients d'Osmán creyoron l'Imperio Otomán, que manimenos trobará a oposición d'os principatos creyatos por os turcomans en Anatolia y que quereban mantener a suya independencia. En a versión aragonesa d'o "Libro de Marco Polo" denominan l'actual Turquía u Asia la Chica como Turqueman (Turquemania en traduccions a atros idiomas) y dicen que ye habitata por turcomans, armenios y griegos:
Bayazet I habió se sozmeter a los prencipatos d'Anatolia coaligatos en contra d'él. Os turcomans, distribuitos tamién fuera de l'aria d'acción d'os otomans, dende Anatolia Oriental dica Irán, por a suya traza nomada de vida, cuasi no lis afectaban as campanyas destructivas de Tamerlán. D'esta traza os turcomans d'Anatolia demandoron aduya a Tamerlán, que invadió o sudeste d'Anatolia, encara que dimpués se'n fue ta la India. O prestichio de Bayacet dimpués d'a victoria en Nicopolis trayó ta l'Imperio Otomán nuevas poblacions turcomanas. D'esta traza Bayacet decidió sozmeter tota Anatolia: Caramán en 1397 y os principatos d'o norte en 1398. Tamerlán tornó y los principes turcomans desposeitos s'unioron a lo suyo exercito. Una batalla se produció en Ankara o 27 de chulio en 1402, os turcomans que a lo principio luitaban en o bando otomán se pasoron a lo bando de Tamerlán y d'os opositors turcomans. Os otomans fuoron derrotatos, Tamerlán restauró os principatos turcomans y Caramán fue ixamplata, adchudicando-li un papel preponderant. En tiempos de Mehmed I y Murat II Caramán se convertió en un estato tampón entre os otomans y mamelucos y una amenaza permanent ta l'Imperio Otomán.
En o sieglo XIV amaneixió en as riberas d'o laco Van a entidat política turcomana Cara Coyunlu, o suyo cabo Kara Yusuf s'oposó a Tamerlán y se refuchió en o territorio mameluco chunto con os yalairís. Dimpués d'a muerte de Tamerlán, os Cara Coyunlu s'apoderoron d'Acerbaichán, Irak y Anatolia oriental en 1410, dende on conquirioron l'ueste y centro d'Irán.
En 1467 os Cara Coyunlu fuoron sustuitos por os Ac Coyunlu orichinatos en Diyarbaquir en o sieglo XIV y plegatos dende Anatolia Oriental. Amés d'o territorio d'os Cara Coyunlu podioron ocupar una parte de Persia oriental. Cuan os otomans baixo o soldanato de Mehmet II ocuporon Caraman facioron grans mortaleras de turcomans. Os Ac Coyunlu d'Azerbaichán aplegoron a los principes turcomans desposeitos, pero fuoron derrotatos por Mehmet II o conqueridor en 1473. Os turcomans d'Anatolia no tenioron atro remeyo que sozmeter-sen, encara que en o sud d'Anatolia continó a oposición turcomana contra os otomans. Os Ac Coyunlu encomenzoron a perder fuerza cuan o sucesor d'Uzun Hasan decidió d'eliminar as supervivencias de dreito mongol en beneficio d'a lechislación islamica, o que provocó a rebelión de tribus nomadas turcomanas y mongolas.
En o sieglo XV Yoneid, gran mayestre d'a orden relichiosa d'os safavidas consiguió atrayer a muitos turcomans, que pronto fuoron conoixitos como Quizil Bax (sombreros royos). Con a suya aduya o nieto d'él Ismail s'apoderó de Tabriz en 1501, rematando con os Ac Coyunlu y fundó a dinastía safavida, que reinó en Persia dica o sieglo XVIII.
A principios d'o sieglo XVI os turcomans d'Anatolia oriental yeran en contra d'os otomans. Asinas como se feba mes grant o movimiento Quizil Bax os turcomans d'Anatolia lis oposaban mes resistencia. O movimiento Kicil Bax heba plegato ta o sud d'Anatolia, en concreto l'antigo principato de Karamán. A lo problema político que suposaba sozmeter a las tribus turcomanas nomadas li se sumó o conflicto relichioso que representaba o chiismo d'os turcomans contra o sunnismo d'os otomans. En 1511-1512 esclaroton grans revueltas turcomanas en Anatolia, plegando t'Anatolia central, revueltas que pronto tenioron refirme de l'Imperio Persa Safavida.
O soldán otomán Selim I exerció una brutal represión y ninvió l'exercito ta l'este, penetrando en Anatolia Oriental y mandando executar a os partidarios d'os Quicil Bax. Dimpués d'a derrota d'o Xah safavida Ismail en Caldirán en 1514 os otomans ocuporon Tabriz, (que dimpués habioron d'abandonar) y yeran ya os duenyos indiscutibles d'Anatolia Oriental. Muitos turcomans d'Anatolia emigroron ta l'Imperio Persa Safavida y rematoron fendo-se chiitas. Os turcomans se convertioron en a población mayoritaria en Azerbaichán, a suya luenga turquica evolucionará ta l'actual azerín y se produció a etnochenesi final d'o pueblo azerín. Bels turcomans se sedentarizoron.
Pa reforzar a muga meridional con os mamelucos, que aduyaban a os turcomans d'Anatolia oriental, en 1515 os otomans prenioron Diyarbakir y Mardín, y posoron baixo a suya sobiranía a os beis kurdos. En 1519 se produció una nueva revuelta turcomana en Anatolia, o suyo caudiello yera un predicador safavida dito Yelal, encara que vencita, as rebelions turcomanas d'os dos sieglos vinients serán conoixitas como yelalís. En 1526-1527 esclatoron revueltas yelalís. En 1533 Solimán lo Magnifico encomenzó una campanya contra os safavidas en a que ocupó Acerbaichán, dimpués ocupó Bagdad, anexionata en 1534, Basora, en 1547, y amés os otomans ocuporon mes terreno en Anatolia Oriental u Armenia (Erzurun, Van). Dimpués d'atrás dos expedicions infructuosas contra Acerbaichán os otomans y safavidas firmoron a paz d'Amasía en 1555 en a que se fació o primer esbozo de mugas entre os dos imperios.
Encara en 1603-1604 esclatoron revueltas yelalís cuan se produciban retacules debant d'os safavidas. Por o tractau de Sehab se reafirmó a sobiranía en Mesopotamia y os safavidas ocuporon Ereván.
Datos: Q25620044
