Taifa de Denya
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
Lo Reino u Taifa de Denya estió un reino musulmán que amainixió cuan se desfació lo Califato de Cordoba, enta lo 1010. La fundó lo emir y antigo esclavo d'orichen eslau Muchahid en un chicot territorio formato por Bairén, Orba, Alteya, Callosa, Sagra, Cocentaina y Bocairent y las suyas redoladas, tenendo Denya u Dàniyya como capital. A elite la formaban antigos soldatos musulmans d'Europa de l'Este, estando una de las taifas eslavonas. Muchahid teneba lo cargo de gobernador dica 1013, cuan se proclamó rechent de l'Omeya Al-Moaiti, a qui deixó mandar nomás que en cuestions relichiosas.
| Taifa de Denya دانية والبليار ṭāʾifa Dāniya' | ||||
| ||||
 | ||||
| Capital | Denya | |||
| Idioma oficial • Atros idiomas |
Arabe Mozarabe levantín | |||
| Relichión | Musulmana sunita | |||
| Gubierno | Emirato | |||
| Periodo historico | Edat Meya | |||
| • Independencia de lo Califato de Cordoba | 1010 | |||
| • Anexión a la Taifa de Zaragoza | 1091 | |||
En 1015 conquirió las islas Balears y los meses vinients atacó Cerdenya. Derrotó a los sardos y s'establió en lo Campidanu, pero los chenoveses y pisans la'n facioron fuera. En 1016 deposó a Al-Moaiti y dió las funcions relichiosas suyas a Abdallah ben Obeidallah, de qui estió rechent teorico dica 1018 por lo menos, cuan Denya y Balears reconoixioron como califa a Al-Murtada u Al-Mostadi. En 1021 ocupó Elch, Oriuela y Alicant que perteneixeban a Khairan d'Almería; ixe mesmo anyo tamién Muchahid nomenó a lo suyo sobrín Abd Allah gobernador de las Balears (morió en 1036). En los anyos vinients fació uns cuantos ataques navals a las costas catalanas, destacando lo de 1023 a Tortosa. Lo 1038 ocupó Lorca y lo norte de Murcia. En 1039 atacó Valencia, que dependeba d'un emir d'Almería, pero no consiguió ocupar-la y en 1040 firmoron la paz. Tamién en 1040 asoció a lo gubierno a lo suyo fillo Hassan, pero en 1043 lo apartó de la poder probablement por conspirar.
Con Muchahid, la Taifa de Denya se desvinió un important centro maritimo y comercial; se i acunyaba una moneda que duró dica la invasión almuade, estando la Taifa de Denya lo primer reino taifa en acunyar moneda.
Muchahid morió en 1044 y lo succedió lo suyo fillo Ali ben Muchahid Iqbal al-Dawla. En 1045 reconoixioron como emir en Tortosa a Mokatil, probablement chirman de Muchahid. En 1058 Ali atorgó a lo bispe de Barcelona churisdicción sobre las ilesias de lo suyo reino. Lo mesmo anyo l'antigo Emir de Tortosa, Labib, con l'aduya de la Taifa de Zaragoza recuperó la poder, pero en 1059 Alí tornó ta Tortosa con un exercito y posó en la trono a Yala al-Amiri. En 1076, Al-Muqtadir de Zaragoza ocupó Tortosa y continó contra Denya que tamién ocupó. Alí fuyió a las Balears on lo gobernador local Abdallah al-Murtada lo recibió pero no lo reconoixió como emir, títol que asumió el mesmo. Por 5 anyadas, Denya dependió de la Taifa de Zaragoza.
Al-Muqtadir morió en 1081 y dixó Denya, Leida y Tortosa a lo suyo fillo Al-Mundir Imad al-Dawla que establió la suya capital en Exatiba, y a sobén se clama Taifa d'Exatiba. Ocupó Alicán, que heba caito en mans de Murcia (alavez de la Taifa de Sevilla). En 1082 fació liga con Berenguer Remón II de Barcelona contra lo suyo chirmán Abu Amir Yusuf ben Ahmad ben Hud al-Mutamin de Zaragoza, y unas fuerzas aliadas asetioron Almenar pero los zaragozanos ganoron y ensobinoron a lo conte de Barcelona, que poco dimpués tornaría a estar libre. Lo mercenario castellano Rodrigo Díaz de Vivar, a lo servicio de los zaragozanos combatió contra l'emir d'Exatiba.
En 1086 lo rei Al-Qadir de Valencia atacó Exatiba, y Al-Mundir demandó aduya a los suyos aliaus lo conte de Barcelona, lo rei d'Aragón y Pamplona y lo conte d'Urchel. Cuan los catalans abanzoron enta Valencia los walís de Murviedro, Segorb, Exerica y Almenara se declaroron independients. Derrotoron A Al-Qadir A man d'Exatiba. Los catalans quereban atacar la ciudat cuan los Al-Mutamin de Zaragoza atacó Leida, encara que los aragoneses tamién atacaban y li prenioron Monzón por un tiempo, tornoron ta Leida pa luitar contra los zaragozanos, y los facioron tornar-se'n.
En 1087 morió Abdallah al-Murtada de las Balears y las islas declaroron la suya obediencia A Al-Mundir. En 1089 lo emir d'Exatiba y los catalans atacoron Valencia aproveitando que lo Cit yera un tiempo fuera, en Castiella. Lo rei castellano li mandó tornar ta Levant pa aduyar A lo suyo protechito lo rei de Valencia Al-Qadir, y debant de los mercenarios bien entrenatos los catalans y los suyos aliaus locals rebloron y se'n fueron ta Requena. En la campanya de 1090, los catalans y castellanos s'encaroron en la Batalla de Pinar de Tebar, que se piensa que estió en Penya Roya. Lo Cit derrotó a Berenguer Remón II, cayó presionero y lo deixó marchar dimpués de pagar un buen rescate.
En 1090 morió Al-Mundir y repartió lo suyo reino: Leida y Tortosa pa lo suyo fillo Sulaiman Sayyid al-Dawla, y Exatiba, Denya y las Balears pa Mobaxer Nasir al-Dawla. Los zaragozans ocuporon allora Leida mientres los valencianos albanzoron ta lo sud y ocuporon Elch y lo castiello de Polop.
En 1091 l'almurabit Yusuf se presentó en Denya que ocupó con muita facilidat. Mobaxer fuyió ta las Balears.
Denya quedó en mans de los almurabiz dica lo 1145. Dende 1145 dica 1170 pasó ta la taifa de Valencia y en 1170 a los almuades, dica 1225. Atra vegata dependió de la nueva taifa de Valencia dica 1244, cuan la ocuporon los exercitos aragoneses que conqueriban Valencia pa lo rei Chaime I d'Aragón.
Datos: Q252323
Multimedia: Taifa of Dénia / Q252323
