Republica de Chenova
A Republica de Chenova estió una d'as republicas maritimas italianas més importants.
| Serenisma Republica de Chenova Serenissima Repubblica di Genova | ||||
| ||||
| ||||
 | ||||
| Capital | Chenova | |||
| Idioma oficial | Ligur, latín y italiano | |||
| Relichión | Catolica | |||
| Gubierno | Republica | |||
| • Establita | 1005 | |||
| • Desaparición | 1797 | |||
Chenova prenió importancia a fins d'o sieglo XI, entrando en competencia con Venecia.
En o sieglo XII Chenova sozmete tota a costa de Liguria, territorio que controlará dica o sieglo XVIII. En 1131 o Papato repartió Corcega entre Pisa y Chenova. A fins d'o sieglo XII os chenoveses teneban o control d'os chudicato sardos de Gallura, Cáller y Torres.
Os chenoveses fuoron forachitatos de l'Imperio Bizantín en a Quatrena cruzata. Manimenos os chenoveses aduyoron a los griegos contra os franceses y venecians y quan os paleologos griegos restauroron l'Imperio Bizantín recuperando o control de Costantinoble en 1261. En conseqüencia concedioron a los chenoveses o monopolio comercial d'a mar Negra. Chenova tenió colonias en a peninsula de Crimea y mar d'Azov conoixitas como Gazera.
Por ixos tiempos os chenoveses creyan una rota comercial maritima atlantica, dica Bruches. En 1284 os chenoveses vencioron a los pisans en a batalla de Meloria (en a mar de Livorno).
En 1349 os chenoveses destruyoron a zaguera flota que ha tenito l'Imperio Bizantín en represalia por querer evitar a suya preponderancia y mirar l'aduya veneciana y catalana. Dimpués de destruyir a flota bizantina os chenoveses prohibioron o trafico bizantín por a mar Negra.
En a guerra de Chioggia (1378-1381) Chenova redotó a la Republica de Venecia, pero ixo fació que Chenova s'endeudase. A prencipios d'o sieglo XV os acreyedors d'a republica fundoron o Banco de Sant Chorche pa chestionar os ingresos que lis concedioron en contrapartita. En 1453, quan os otomans prenioron Constantinoble (en a conquiesta de Constantinoble), os chenoveses perdioron o control d'o comercio en a mar Negra. A deuda publica yera tan gran que o banco plegó a controlar o Estato. Chenova perdió l'autonomía politica, y reorientó a suya economía enta actividatz financieras.
En 1528 Andrea Doria facio que Chenova s'alineyase con Carlos V. A fins d'o sieglo XVI Chenova esdevenió a primera potencia financiera d'Europa.
En o Tractau de Versailles de 1768 Chenova habió de ceder a Francia os suyos dreitos sobre Corcega.
En o periodo napolionico, mientres as guerras napolionicas, Chenova fació parte d'a Republica Ligur, que fue ocupata en 1805 por Francia. O Congreso de Viena de 1814-1815 no reestablió a republica de Chenova, que fue adhibita a lo Reino de Cerdenya, con Savoya y Niza.