Silbes
Ista fuella ye escrita en baixo sobrarbés.
Silbes | |
---|---|
Lugar d'Aragón | |
Silbes con os tellaus caitos. | |
Entidat • País • Provincia • Comarca • Municipio |
Lugar![]() ![]() Sobrarbe Boltanya |
Población • Total |
8 hab. (2005) |
Altaria | 1.002 m. |
Distancia • 3,5 km • 9,5 km • 99,5 km |
enta Boltanya enta l'Aínsa enta Uesca |
Codigo postal | 22340 |
Parroquial • Diocesi •Arciprestato |
Balbastro-Monzón Sobrarbe |
Coordenatas | 42°27’ 6’’N 0° 2’14’’E |
Silbes (Silves en castellán) ye un lugar aragonés d'o municipio de Boltanya, en a provincia de Uesca y Comarca d'o Sobrarbe. A suya población ye de 8 habitants (2005).
O lugar de Silbes ye una d'as entidatz poblacionals más protechidas d'a valle de Boltanya, por d'encima d'o recolón d'o Baluport y d'a faixa d'as esplugas de Seso, en l'alto d'una d'as garras d'a Punta d'a Ferrera (1392 m) que como una balconera mira las valles de l'Ara y Campodarbe (a valleta d'o barranco d'a Ferrera). Silbes s'ancuentra por alto d'a marguin sud de l'Ara, por d'encima de Seso, y s'ha de puyar por una pista que ye bien tortuosa, que ranca dende lo puent d'o sanatorio (l'antiguo convento d'os agustinos de Boltanya) y ye sinyalizada nomás que como si marchase ta Seso, pero que en aber-se fecho os primeros 600 metros en plano tien una esviadera t'alto, por a izquierda d'o caminante, que emprencipa a serpentiar t'arriba por bellos 3 Km por medio d'a bosquera y que ye imposible de fer-la con coche, nomás que caminando.
L'acceso ta os veículos s'ha de mirar en la otro canto d'a serreta, en a valle de Campodarbe, en a par d'ande se desemboca lo barranco d'a Ferrera y que ne sale d'un lateral d'a carretera A-1604 (Boltanya - Samianigo) nomás a bellos 2 Km d'a capital de l'Ara. Ixa pista enfila o monte debant d'a vista d'os caseros d'Espierlo, y puya 5,7 Km (d'alcuerdo con o retulo que hay a baixo a piet d'a carretera) ta Silbes, y dispués bello par de kilometros más t'allá d'iste lugar continua ta l'Aligar. Ista pista ye de tierra y s'ha pasau buenos anyos espaldada d'escorrenteras y aguazos que la feban bien rancia de pasar, pero atualmente (noviembre de 2007) se-i son fiendo labors de millora, amplando-la, y quitando-ne as penyas que fesen estorbo en pasar, y asinas se puet decir que ye posible puyar encluso con automobiles de turismo.
Silbes heba teniu casas sinyorials en tiempos recientes, y bellos d'os habitantes d'a redolada en tienen recuerdo, pero en quedar-se albandonau de todo en os anyos 70, muchas d'as casas s'espaldón y una parte grande d'o patrimonio que teneba (mueble y inmueble) el debión de robar, pos que en mirar restas d'os cuairons y bastidas bien labraus que prometeban os mayores de Boltanya no se n'ancuentra denguno.
D'ixes zagueros habitantes d'o lugar en diz una canción d'A Ronda de Boltaña, pos a traviés d'os uellos d'un nino que marcha de días t'a escuela de Boltanya en retrata la vida como se feba d'antiguos en os lugars d'a valle d'a capital sobrarbenca por contraposición con a villa, que yera ya en ixes anyos (decadas d'os 50 y 60) fuertamente enfluida por a colonia de treballadors (venitos d'atros puestos) d'a Iberduero que teneba. Tanto más a l'estilo d'a tierra baixa, que se-les ne rediban d'os costumbres y d'a fabla mesmo a os montanyeses d'os lugars amparaus.
En a canción d'a Ronda s'esplica bien lo duro que yera o camino de puyar ta Silbes, que en parabras d'o nino que en salir d'a escuela el feba yera bien pavoroso, pos pasaba por dintro d'as bosqueras d'ixa obaga d'o monde t'arriba y ye bien berdat que s efa asinas.
|
Vinclos externosEditar
- Se veigan as imáchens de Commons sobre Silbes.
- (an) Estadisticas de Silbes en o portal AragonEsAsi
Lugars d'o municipio de Boltanya | |
---|---|
Poblaus: L'Aligar | Ascaso | Boltanya | Campodarbe | Malgurguet | Matidero | Moriello de Sant Pietro | Puimorcat | Seso | Sieste | Silves | La Valle Despoblaus: Alastrué | Bibán | Casa Barranco Sant Martín | Espierlo | Sant Fertús | Luparuelo | Mesón d'Albars | Mesón d'o Barranco Fondo | Mesón de Fuevola | Mesón d'o Piojo | Miz | Montalbán | Morcat | Pardineta de Bibán | Santa María d'Ascaso | Sant Martín de la Valle | Sant Pietro | Sant Velián | Torrulluela d'a Plana | Torrulluela de lo Vico | Tuartas |